ᑐᓴᒐᒃᓴᐅᔪᖅ ᓴᕿᑕᐅᔪᖅ

ᑕᓪᓗᕈᑎᐅᑦ ᐃᒪᖓ ᖁᑦᑎᒃᑐᒥ ᑲᓇᑕᒥ ᐊᖏᓛᖑᓂᐊᕐᑐᖅ ᓴᐳᔾᔭᐅᓯᒪᔪᓂ

ᑲᓇᑕᒥ, ᓄᓇᕗᑦ ᐊᒻᒪᓗ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖏᖃᑎᒋᒃᑐᑦ ᑭᖑᓪᓕᕐᐸᖓᓂᒃ ᐋᕿᒃᑕᐅᔪᖅ ᑭᒃᓕᒋᓂᐊᕐᑕᖓ ᑲᓇᑕᒥ ᐊᖏᓛᖑᔪᖅ ᑲᓇᑕᒥ ᑕᕆᐅᖓᓂ ᑕᓪᓗᕈᑎᐅᑦ ᐃᒪᖓ ᑲᓇᑕᐅᑦ ᐅᑭᐅᕐᑕᕐᑐᖓᓂ

ᐋᒌᓯ 14, 2017 - ᒥᑦᑎᒪᑕᓕᒃ, ᓄᓇᕗᑦ

ᑲᓇᑕᐅᖅ ᐅᑭᐅᕐᑕᕐᑐᖓ ᓄᓇᖓ ᐊᖏᔪᒻᒪᕆᐊᓘᒃᒪᑦ ᓱᕈᕐᓇᕐᑐᖃᖏᑦᑐᖅ ᓴᓗᒪᑦᑎᐊᕐᑐᖅ ᑕᕆᐅᖓ ᐊᒻᒪᓗ ᓄᓇᖓ ᐃᓄᖕᓄᓪᓗ ᓇᔪᕐᑕᐅᖏᓐᓇᕐᓯᒪᔪᖅ ᑕᐃᒪᖓᑐᖄᓗᒃ. ᐃᓂᒋᔭᐅᒋᓪᓗᓂᓗ ᐅᓄᕐᑐᓄᑦ ᐊᕐᕕᒃᓄᑦ, ᓇᓄᕐᓄᑦ ᐊᒻᒪᓗ ᑎᖕᒥᐊᓄᑦ ᑎᑭᑦᑕᕐᑐᓄᑦ. ᓯᓚᐅᑦ ᐊᓯᓪᓕᐊᕐᐸᓪᓕᐊᓂᖓ ᐊᒻᒪᓗ ᐃᓄᑐᐃᓐᓇᐃᑦ ᐱᓕᕆᓂᖏᓐᓄᑦ ᐃᒃᐱᒃᓇᐅᑎᒃᒪᑕ ᓄᓇᖓᓄᑦ ᐊᒻᒪᓗ ᐃᓕᖁᓯᖏᓐᓄᑦ ᐃᓄᓯᖏᓐᓄᑦ ᐅᑭᐅᕐᑕᕐᑐᒥ, ᐊᒻᒪᓗ ᐃᓄᑐᐃᓐᓇᐃᑦ ᓴᐳᔾᔨᓯᒪᓇᓱᒋᐊᖃᕐᒪᑕ ᐱᓕᕆᐊᒃᓴᕆᒃᒪᒍ..

ᐅᓪᓗᒥ, ᒥᓂᔅᑕ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ ᐊᒻᒪᓗ ᒥᓂᔅᑕᐅᓪᓗᓂ ᒥᕐᖑᐃᓯᕐᕕᓕᕆᓂᕐᒧᑦ ᑲᓇᑕᒥ, ᑳᑐᕆᓐ ᒪᒃᑭᓐᓇ , ᐱᖃᑕᐅᓪᓗᓂ ᔫ ᓴᕕᑲᑖᖅ, ᓄᓇᕘᒥ ᒥᓂᔅᑕᐅᔪᖅ ᐊᕙᑎᓕᕆᓂᕐᒧᑦ, ᐊᒻᒪᓗ ᐸ.ᔭ.ᐊᕿᐊᕈᖅ ᐃᒃᓯᕙᐅᑕᐅᔪᖅ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᖏᓐᓄᑦ, ᓇᓗᓇᐃᕐᓯᖃᐅᔪᑦ ᓴᕿᑦᑎᓪᓗᑎᒃᓗ ᐊᖏᖃᑎᒋᒃᓂᕐᒥᓂᒃ ᑭᖑᓕᕐᐸᒥᒃ ᐋᕿᒃᑕᐅᔪᖅ ᑭᒃᓕᒋᓂᐊᕐᑕᖓ ᑲᓇᑕᒥ ᑕᕆᐅᖓᓂ ᓴᐳᔾᔨᓯᒪᓂᕐᒧᑦ ᑕᓪᓗᕈᐅᑎᑦ ᐃᒪᖓ.

ᐃᓚᖓ ᑕᓪᓗᕈᐅᑎᑦ ᐃᒪᖓ ᐊᖏᑎᒋᐸᓗᒃᑐᖅ 109,000 ᑭᓚᒥᑕ ᑭᑉᐸᕆᒃᓯᓗᒍ − ᒪᕈᕐᓱᓪᓗᐊᕐᓗᓂ ᐊᖏᓂᕐᓴᐅᑎᒋᔪᖅ ᓄᕙ ᓯᑰᓴᒥᑦ − ᓴᐳᔾᔭᐅᓯᒪᓂᐊᓕᕐᐳᖅ, ᐊᖏᓚᖑᓗᓂ ᑕᕆᐅᖓᓂ ᓴᐳᔾᔭᐅᓯᒪᔪᓂ ᑲᓇᑕᒥ.

ᐅᓪᓗᒥ ᓴᕿᑕᐅᔪᖅ ᐅᖃᓯᐅᔪᖅ ᐱᓕᕆᐊᖑᓯᒪᔪᖅ ᐊᕋᒍᒐᓴᒃᓄᑦ ᐃᕿᐊᖑᖃᑦᑕᖏᓪᖢᑎᒃ ᓄᓇᕘᒻᒥ ᐃᓄᖏᑦ ᐊᒻᒪᓗ ᐊᔾᔨᒌᖏᑦᑐᑦ ᒐᕙᒪᐅᔪᑦ. ᐃᑲᔪᕐᑎᒋᖕᓂᒃᑯᑦ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᖏᑦ, ᒐᕙᒪᒃᑯᑦ ᓄᓇᕗᑦ, ᒐᕙᒪᒃᑯᑦ ᑲᓇᑕᒥ ᓯᕗᒧᑦ ᑲᔪᓯᒋᐊᕐᐳᑦ ᐱᒋᐊᕐᑎᑦᑎᓪᓗᑎᒃ ᐃᖃᐅᒪᔭᐅᖃᑦᑕᕐᓂᐊᕐᑐᒥᒃ ᓯᕗᑦᑎᓐᓂ ᐃᓄᓂᐊᕐᑐᓄᑦ. ᓴᐳᔾᔭᐅᓯᒪᓂᖓ ᑕᓪᓗᕈᑎᐅᑦ ᐃᒪᖓ ᑲᓇᑕᒥ ᑕᕆᐅᖓᓂᒃ ᓴᐳᔾᔨᓯᒪᓂᐅᔪᖅ ᐱᑕᖃᐃᓐᓇᕐᑎᑦᑎᓇᓱᒃᓂᕐᒧᑦ ᐆᒃᑐᑕᐅᔪᓐᓇᕐᐳᖅ ᐃᑲᔪᕐᑎᒌᖕᓂᒃᑯᑦ ᓴᕿᑦᑎᔪᓐᓇᕐᓂᖏᓐᓂᒃ ᐊᒻᒪᓗ ᐃᓚᐅᖃᑕᐅᔪᐃᓐᓇᐅᓗᑎᒃ ᐱᔭᕆᕐᓯᓂᕐᒥᒃ. ᑕᓐᓇ ᐊᖏᖃᑎᒌᒍᑎ ᐱᒋᐊᕐᑎᑦᑎᓂᐊᕐᐳᖅ ᐋᔨᖃᑎᒌᒃᓂᕐᒥᒃ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕚᓪᓕᐅᑎᒃᓴᐃᑦ ᐊᖏᖃᑎᒌᒍᑎᒥᒃ ᐊᑯᓂᐅᔪᒧᑦ ᐱᕚᓪᓕᐅᑕᐅᒧᓐᓇᖁᓪᓗᒍ ᐃᓄᒃᓄᑦ ᓄᓇᖃᐃᓐᓇᕐᓯᒪᔪᓄᑦ ᑕᒫᓂ. ᑖᓐᓇ ᐊᖏᖃᑎᒋᒍᑎ ᓇᓗᓇᐃᕐᓯᓂᐅᒋᕗᖅ ᐊᔪᓕᕐᑎᑦᑎᓯᒪᓂᐊᕐᓂᖓᓂᒃ ᓯᕗᓂᒃᓴᒥ ᐅᕐᓱᐊᓗᒃᓯᐅᕐᑐᓂᒃ ᒐᓯᓯᐅᕐᑐᓂᒃᓗ ᐊᓯᖏᓐᓂᒃᓗ ᕿᓂᕐᓴᕐᓂᐅᔪᓂᒃ ᐱᕙᓪᓕᐊᓂᐅᔪᓂᒃ.

ᑖᓐᓇ ᐱᑕᖃᐃᓐᓇᕐᑎᑦᑎᓇᓱᒃᓂᖅ ᓴᐳᔾᔨᓯᒪᓂᐊᕐᐳᖅ ᐃᓄᒃᓂᒃ ᐊᖑᓇᓱᒍᓐᓇᐃᓐᓇᕐᓗᑎᒃᓗ ᐱᔪᓐᓇᐅᑎᖃᕐᓗᑎᒃ ᒪᓕᒃᓗᒋᑦ ᓄᓇᕗᑦ ᐊᖏᖃᑎᒌᒍᑎᑦ ᐊᒻᒪᓗ ᓴᐳᔾᔭᐅᓯᒪᓗᑎᒃ ᐆᒪᔪᐃᑦ ᐅᓗᕆᐊᓇᕐᑐᒦᑦᑐᑦ.

ᒐᕙᒪᒃᑯᑦ ᑲᓇᑕᒥ ᐊᖏᕐᓯᒪᔪᑦ ᑲᔪᓯᑎᑦᑎᔪᒪᓪᓗᑎᒃᓗ ᐊᖏᓕᒋᐊᕐᑕᐅᓗᓂ ᓴᐳᔾᔭᐅᓯᒪᔪᑦ ᐊᒻᒪᓗ ᓴᐳᔾᔭᐅᓯᒪᓗᑎᒃ ᑲᓇᑕᒥ ᐆᒪᔪᖃᕐᓂᐅᓂᖏᑦ. ᐊᖏᖃᑎᒌᒍᑕᐅᔪᖅ ᑭᒃᓕᖓ ᑕᓪᓗᕈᑎᐅᑦ ᐃᒪᖓ ᐃᑲᔪᑕᐅᓂᐊᕐᑐᖅ 2−ᐳᓴᓐᒥᒃ ᑲᔪᓯᑎᑦᑎᔪᒪᓯᒪᓂᖏᑦ ᑲᓇᑕ 5-ᐳᓴᖓᓂᒃ ᑲᓇᑕᐅᑦ ᑕᕆᐅᖓᓂᒃ ᐊᕋᒍᖓᓂ 2017. ᐊᑎᓕᐅᕐᑕᐅᒍᓂ ᐃᓄᖕᓄᑦ ᐃᒃᐱᒃᓇᐅᑎᔪᑦ ᐱᕚᓪᓕᐅᑕᐅᔪᓄᓪᓗ ᐊᖏᑎᖃᑎᒌᒍᑎᒪ ᑕᓐᓇ ᐱᑕᖃᐃᓐᓇᕐᑎᑦᑎᓂᕐᒧᑦ ᐃᑲᔫᑕᐅᓪᓚᕆᒃᓂᐊᕐᒪᑦ ᑲᓇᑕᐅᑦ ᐱᒋᐊᕐᑎᑐᒪᓯᒪᔭᖓᓂᒃ ᓄᓇᕐᔪᐊᕐᒥ ᑲᑎᒪᔨᕐᔪᐊᖏᓐᓂ ᑲᑎᒪᑎᓪᓗᒋᑦ ᐆᒪᔪᓕᕆᓂᕐᒧᑦ ᐊᔾᔨᒌᖏᑦᑐᓂᒃ.

ᑕᓪᓗᕈᑎᐅᑦ ᐃᒪᖓ ᐱᑕᖃᓪᒪᕿᒃᐳᖅ ᐆᒪᔪᓂᒃ. ᓂᒃᓚᓱᒃᑲᓗᐊᕐᑎᓪᓗᒍ ᐃᒪᖓ ᐃᓂᒋᔭᐅᕗᖅ ᑎᖕᒥᐊᓄᑦ, ᐃᖃᓗᒃᓄᑦ ᐊᕐᕕᒃᓄᓪᓗ, ᐊᔾᔨᐅᖏᑦᑐᒥᒃ ᐆᒪᔪᖃᕐᕕᐅᓂᐊᓂᒃ ᖃᐅᔨᒪᔭᐅᔾᔪᑕᐅᓪᓗᓂ ᓄᓇᕐᔪᐊᕐᒥ. ᑲᔾᔮᕐᓇᕐᖢᓂ ᑲᒪᓇᕐᖢᓂ ᐊᒻᒪᓗ ᐊᒻᒪᓗ ᐃᓅᕕᐅᓯᒪᓪᓗᓂ ᐃᓄᒃᓄᑦ ᐊᕋᒍᒐᓴᒃᓄᑦ ᑕᐅᓴᓄᑦ. ᑕᒪᓐᓇ ᐃᓂᒋᔭᐅᔪᖅ ᐃᓕᖁᓯᖃᕐᕕᐅᓪᓗᓂ ᐊᒻᒪᓗ ᖃᓄᐃᖏᑦᑎᐊᕈᑕᐅᓯᒪᓪᓗᓂ ᐊᒃᑐᐊᓂᖃᓪᒪᕿᒃᖢᓂᓗ ᐃᓄᒃᓄᑦ ᐃᓄᓯᖏᓐᓄᑦ ᓄᓇᖓᓂᑦ ᐊᒻᒪᓗ ᑕᕆᐅᖓᓂᑦ.

ᐅᓪᓗᒥ ᓇᓗᓇᐃᒃᑯᑕᐅᓂᐊᕐᐳᖅ ᐱᔭᕆᐊᖃᓪᒪᕆᒃᑐᒥᒃ ᐊᒻᒪᓗ ᐱᓪᓚᕆᐅᔪᒥᒃ ᓯᕗᒧᒋᐊᕐᓂᖅ ᓴᐳᔾᔭᐅᓯᒪᓂᕐᒧᑦ ᓯᕗᓂᒃᓴᒥ ᐃᓄᓂᐊᕐᑐᓄᑦ.

ᐅᖃᕐᑕᐅᓯᒪᔪᑦ

“ᓴᐳᔾᔭᐅᓯᒪᓂᖓ ᐱᔭᕆᐊᖃᓪᓚᕆᖕᒪᑦ ᐱᓪᓚᕆᐅᓪᓗᓂᓗ. ᐅᑭᐅᑕᕐᑐᒥᐅᑕᐅᔪᑦᑕᐅᖅ, ᑕᒪᓐᓇ ᐅᓗᕆᐊᓇᕐᑐᒦᒻᒪᑦ ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ. ᐅᖁᓯᕙᓪᓕᐊᓂᖓᓄᓪᓗ ᐊᒻᒪᓗ ᐊᐅᒃᐸᓪᓕᐊᓂᖓᓄᑦ ᓯᑯᖓ ᐃᓂᒋᔭᖏᑦ ᒥᑭᒃᓕᕙᓪᓕᐊᓪᓗᑎᒃ, ᑕᕆᐅᕐᒥᐅᑕᐅᔪᓪᓗ ᐊᒃᓱᕈᕐᓇᕐᑐᒦᑉᐸᓪᓕᐊᑎᓪᓗᒋᑦ. ᐃᓄᐃᑦ, ᐊᕋᒍᒐᓵᓗᒃᓄᑦ ᑕᑎᒃᓴᓚᐅᕐᒪᑕ ᓂᕿᖃᕐᕕᒋᓪᓗᒍ, ᐊᓐᓄᕋᖃᕐᕕᒋᓪᓗᒍ ᐊᒻᒪᓗ ᐅᖁᐊᓕᐅᕈᑎᒋᓪᓗᒋᑦ ᐆᒪᔪᐃᑦ, ᐃᓄᓯᖏᓪᓗ ᐅᓄᕆᐊᓇᕐᑐᒦᖃᑕᐅᒃᒪᑕ ᐊᑦᑕᕐᓇᕐᑐᒦᓪᓗᑎᒃᓗ ᓯᕗᓂᒃᓴᖏᑦ.

ᓴᔾᔭᐅᓯᒪᓂᖓ ᑕᓪᓗᕈᑎᐅᑦ ᐃᒪᖓ, ᐃᑲᔪᕐᐳᒍᑦ ᐱᑕᖃᐃᓐᓇᕐᑎᓪᓗᒍ ᐃᖃᐃᒪᔭᐅᔾᔪᑎᖓ ᓯᕗᓂᒃᓴᒧᑦ. ᓴᕿᑦᑎᕗᒍᑦ ᓱᕋᒃᑕᐅᔾᔨᐊᖏᑦᑐᒥᒃ ᐅᓗᕆᐊᓇᕐᑐᖃᕋᓗᐊᕐᑎᓪᓗᒍ ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ, ᐊᒻᒪᓗ ᓴᐳᔾᔭᐅᓯᒪᓗᓂ ᐃᓄᑐᐃᓐᓇᐃᑦ ᐱᕙᓪᓕᐊᓂᖏᓐᓄᑦ. ᐊᑐᓕᕐᑎᑦᑎᕗᒍᑦ ᐃᒃᐱᒍᓱᑦᑎᐊᕐᑐᒥᒃ ᐱᖃᓯᐅᔾᔨᓯᒪᔪᒥᒃ ᐸᕐᓇᐅᑎᒥᒃ ᐱᑕᖃᐃᓐᓇᕐᑎᑦᑎᓂᐊᕐᑐᒥᒃ ᐆᓚᒧᖏᓐᓂᒃ ᐊᒻᒪᓗ ᐃᓄᓯᖏᓐᓂᒃ ᑲᔪᓯᔾᔪᑕᐅᓂᐊᕐᓗᓂ ᐃᓄᒃᓄᑦ ᐃᓕᖁᓯᖓᒍᑦ ᐃᓄᑎᓪᓗᒋᑦ.”

ᓂᕈᐊᕐᑕᐅᓯᒪᔪᖅ ᑳᑐᕆᓐ ᒪᒃᑭᓐᓇ, ᒥᓂᔅᑕᐅᔪᖅ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ ᒥᖤᒡᑕᐅᒋᓪᓗᓂ ᑲᒪᒋᔭᖃᕐᑐᖅ ᒥᕐᖑᐃᓯᕐᕕᓕᕆᓂᕐᒧᑦ ᑲᓇᑕᒥ

“ᒐᕙᒪᕗᑦ ᐊᖏᕐᓯᒪᔪᑦ ᓴᐳᔾᔨᓯᒪᔪᒪᓪᓗᑎᒃ 5−ᐳᓴᓐ ᑕᕆᐅᖓᓂᒃ ᑕᒪᑐᒪᓂ ᐊᕋᒍᒥ, ᐊᒻᒪᓗ 10−ᐳᓴᓐ ᐊᕋᒍ 2020 ᑎᑭᓚᐅᖏᓐᓂᖓᓂ, ᑕᓐᓇ ᑲᓇᑕᒥ ᑕᕆᐅᖓᓂ ᓴᐳᔾᔨᓯᒪᓂᖅ ᓴᙱᓈᕐᖢᓂ ᓯᓄᒧᒋᐊᕈᑕᐅᕗᖅ ᑐᕋᒐᕆᔭᑦᑎᓐᓄᑦ. ᐊᑐᓕᕐᑎᑦᑎᒋᓪᓗᑕᓗ ᑕᕆᐅᖓᓂ ᓴᐳᔨᓯᒪᓂᕐᒧᑦ ᐸᕐᓇᐅᑎᓂᒃ, ᑕᐃᒪᐃᓚᐅᕐᓯᒪᖏᑦᑐᖅ ᑮᓇᐅᔭᓂ 1.5 ᐱᓕᐊᓂᒃ ᓴᓂᕐᕙᐃᓯᒪᓪᓗᑕ ᓴᐳᔾᔭᐅᔾᔪᑕᐅᓂᐊᕐᑐᓂᒃ ᑕᕆᐅᖓᓂᒃ ᓴᓗᒪᑎᑕᐅᓗᓂᓗ. ᐸᕐᓇᐅᑎ ᒪᓕᒃᓗᒍ, ᐊᖏᓕᒋᐊᕐᑎᑦᑎᓂᐊᕐᐳᒍᑦ ᓯᒃᔭᖓᓂᒃ ᑕᕆᐅᖓᓂᒃ ᓴᐳᔾᔨᓯᒪᕙᒃᑐᑦ ᓯᑯᓯᐅᑎᓕᕆᔨᒃᑯᑦ ᐅᑭᐅᕐᑕᕐᑐᒥ, ᐱᓗᐊᕐᑐᒥᒃ ᐃᓚᐅᓕᕐᑎᑦᑎᓗᑕ ᓄᓇᖃᕐᖄᕐᓯᒪᔪᓂᒃ. ᑲᔪᓯᕙᓪᓕᐊᑎᓪᓗᑕ ᑐᓴᐅᒪᑎᑦᑎᕙᓪᓕᐊᓂᐊᕐᐳᒍᑦ ᑕᒪᑐᒥᖓ ᐱᕙᓪᓕᐊᓂᐅᔪᒥᒃ, ᑕᑯᔭᐅᔪᓐᓇᕐᓯᓂᐊᕐᒪᑕ ᐅᑭᐅᕐᑕᕐᑐᒥ ᑐᐊᕕᕐᓇᕐᑐᖃᕐᓂᕈᓂ ᑲᒪᒋᔭᐅᑲᐅᑎᒋᒧᓐᓇᕐᓂᕐᓴᐅᖁᓪᓗᒋᑦ ᐅᑭᐅᕐᑕᕐᑐᒥ ᐊᒻᒪᓗ ᐊᑐᑎᖃᑦᑎᐊᕐᑐᒃᑯᑦ ᐱᕕᖃᕐᑎᑦᑎᓗᑕ ᓄᓇᖃᕐᖄᕐᓯᒪᔪᑦ ᓄᓇᓕᖏᓐᓂᒃ ᓴᐳᔾᔨᓯᒪᔪᓐᓇᕐᓗᑎᒃ ᑕᕆᐅᖁᑎᒥᒃᓂᒃ ᓯᒥᕗᓂᒃᓴᒥ ᐃᓅᓂᐊᕐᑐᓄᑦ. .”

ᓂᕈᐊᕐᑕᐅᓯᒪᔪᖅ ᑕᒥᓂᒃ ᓕᐸᓛᓐᒃ, ᒥᓂᔅᑕᐅᔪᒻ ᐃᒪᕐᒥᐅᑕᓕᕆᓂᕐᒧᑦ , ᑕᕆᐅᖓᓄᑦ ᐊᒻᒪᓗ ᑲᓇᑕᒥ ᓯᒃᔭᖓᓂ ᓇᐅᑦᑎᕐᓱᕐᑎᑦ ᓯᑯᓯᐅᕐᑎᑦ

“ᑖᓐᓇ ᑕᐃᔭᐅᓯᒪᓕᕐᓂᖓ ᓴᐳᔾᔭᐅᓯᒪᓂᖓᓂᒃ ᐱᓪᒪᕆᐅᕗᖅ ᐱᔭᕇᕐᑕᐅᓪᓗᓂ ᓄᓇᕘᒥᐅᓄᑦ, ᐊᒻᒪᓗ ᐅᕙᒍᑦ ᑕᒪᑦᑕ ᖁᕕᐊᓲᑎᒋᓗᑎᒍ. ᐃᓄᐃᑦ ᐃᓄᓯᖃᐃᓐᓇᕐᓯᒪᒃᒪᑕ ᐃᒃᐱᒍᓱᑦᑎᐊᕐᖢᑎᒃ ᐃᓄᓯᓕᕆᓂᕐᒥᒃ ᖃᐅᔨᒪᔭᑐᖃᖏᑎᒍᑦ ᐅᖃᐅᓯᐅᔪᖅ ᐊᕙᑎᑦᑎᓐᓂᒃ ᑲᒪᑦᓯᐊᕐᓂᖅ, ᐃᒃᐱᒋᔭᐅᑦᑎᐊᖁᓪᓗᒍ ᑲᒪᒋᑦᑎᐊᕐᓗᒍᓗ ᓄᓇ, ᐆᒪᔪᐃᑦ ᐊᒻᒪᓗ ᐊᕙᑎᖓ. ᓄᓇᒦᑦᑐᓂᒃ ᐊᕙᑎᑦᑎᓐᓃᑦᑐᓂᒃ ᑲᒪᔨᐅᑎᓪᓗᑕ, ᐅᕙᒍ ᑕᕙ ᐸᕿᔭᕆᐊᖃᕐᐳᒍᑦ ᑲᒪᑦᑎᐊᕐᓗᑕ ᐱᕙᓪᓕᐅᓂᐅᔪᓂᒃ ᓄᓇᒦ ᑕᕆᐅᕐᒥᓪᓗ ᐱᕕᐅᖃᑦᑕᕐᑎᓪᓗᒍ ᐊᒻᒪᓗ ᓴᐳᑎᓯᒪᓗᒍ ᐊᒻᒪᓗ ᐱᑕᖃᐃᓐᓇᕐᑎᓪᓇᓱᒃᓗᒍ ᓄᓇᒦᖓᕐᑐᒥᒃ ᐃᓄᔾᔪᑕᐅᖃᑦᑕᕐᓂᖓᓄᑦ. ᐅᐱᒍᓱᑦᑎᐊᕐᑐᖓ ᐃᓚᒋᔭᐅᔪᓐᓇᕋᒪ ᑕᕗᖓ ᐱᓪᓚᕆᐅᔪᒧᑦ ᓯᕗᒧᒋᐊᕐᑕᐅᔪᒧᑦ ᑲᑐᔾᔨᓗᑕ.”

ᓂᕈᐊᕐᑕᐅᓯᒪᔪᖅ ᒨ ᓴᕕᑲᑖᖅ,
ᓄᓇᕗᑦ ᒥᓂᔅᑕᐅᔪᖅ ᐊᕙᑎᓕᕆᓂᕐᒧᑦ

“ᐅᓪᓗᒥ ᐱᓪᒪᕆᐅᕗᖅ ᐃᓄᖕᓄᑦ ᐱᔾᔪᑎᒋᓪᓗᒍ ᐃᒃᐱᒃᓇᓪᓚᕿᒃᑐᒥᒃ ᐱᕕᒃᔪᐊᕆᔭᐅᒃᒪᑦ ᑕᓪᓗᕈᑎᐅᑦ ᐃᒪᖓ ᓄᓇᓕᒃᓄᑦ. ᑕᒪᓐᓇ ᐃᓕᖁᓯᖏᓐᓄᑦ ᐊᒃᑐᐊᓪᓚᕆᒃᒪᑦ ᓄᓇᖃᕐᑐᓄᑦ, ᑕᕆᐅᖓᓂᓗ ᐆᒪᔪᖃᕐᕕᐅᓪᓗᓂ ᐆᒪᔾᔪᑕᐅᓯᒪᒃᒪᑦ ᐃᓄᒃᓄᑦ ᑕᐃᒪᖓᑐᖃᓗᒃ. ᐊᕋᒍᒐᓴᒃᓄᑦ 50, ᐃᓄᐃᑦ ᐱᓕᕆᖃᑦᑕᐃᓐᓇᕐᓯᒪᒃᒪᑕ ᐆᒪᔾᔪᑕᐅᔪᑦ ᓄᓇᒥ ᑕᕆᐅᕐᒥᓪᓗ ᑲᔪᓯᖁᓪᓗᒋᑦ ᐃᓕᖁᓯᑦᑎᓐᓄᓂᑦ ᐊᒃᑐᐊᓂᖏᓐᓄᑦ, ᐱᖁᓯᕗᑦ ᐃᓄᓯᑦᑎᓐᓂ ᐊᒻᒪᓗ ᐊᓐᓇᐅᒪᓂᕐᒧᑦᔭ ᓴᕿᑕᐅᓂᖓ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕚᓪᓕᐅᑕᐅᔪᑦ ᐊᖏᖃᑎᒌᒍᑎ, ᐃᓄᐃᑦ ᓄᓇᖃᕐᑐᑦ ᑲᔪᓯᓂᐊᕐᒪᑕ ᐱᕚᓪᓕᐅᑎᖃᕐᓗᑎᒃᓗ ᑕᕆᐅᖓᓂᒻ ᐊᒻᒪᓗ ᐱᕈᕐᐸᓪᓕᐊᓗᑎᒃ ᐊᒻᒪᓗ ᐊᔪᕐᓴᖏᓐᓂᕐᓴᐅᓗᑎᒃᓗ ᓯᕗᓂᒃᓴᒥ.”

ᐸ.ᔭ. ᐊᕿᐊᕈᖅ,
ᐃᒃᓯᕙᐅᑕᖅ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ

ᖃᐅᔨᒪᔭᒃᓴᐃᑦ

  • ᑲᑎᑕᐅᓪᓗᑎᒃ ᐊᖏᓂᖓ ᑕᕆᐅᖓᓂ ᓴᐳᔾᔭᐅᓯᒪᓂᐊᕐᑐᖅ ᑕᓪᓗᕈᑎᐅᑦ ᐃᒪᖓ ᐱᖃᓯᐅᑎᓪᓗᒍ ᓯᕐᒥᓕᒃ ᒥᕐᖑᐃᓯᕐᕕᒃ, ᕿᑭᕐᑕᖓᓗ ᑎᖏᒥᐊᖃᕐᕕᒃ, Prince Leopold Island,ᐊᒻᒪᓗ ᓂᕐᔪᑎᖃᕐᕕᒃ ᑲᓇᑕᒥ ᐆᓚᔪᖃᕐᓂᖓ, ᑲᑎᓪᓗᒋᑦ ᐊᖏᓂᖃᕐᑐᖅ 131,000 ᑭᑉᐹᕆᒃᓯᓗᒍ ᑭᓛᒥᑕ − ᒪᕐᕈᐃᕐᓱᓪᓗᐊᕐᓗᒍ ᐊᖏᓂᕐᓴᐅᑎᒋᔪᖅ ᑲᓇᑕᐅᑦ ᐊᖏᓛᖑᔪᖅ ᐅᓪᓗᒥ ᓴᐳᔾᔭᐅᓯᒪᔪᖅ (ᑎᖕᒥᐊᓄᑦ ᑎᑭᑦᑕᕐᑐᓄᑦ ᐃᓂᒋᔭᐅᔪᖅ Queen Maud Gulf Migratory Bird Sanctuary). ᐊᑕᐅᑦᑎᒃᑰᕐᓗᑕ, ᓴᐳᔾᔭᐅᓯᒪᔪᑦ ᐱᖏᐊᕐᕕᖃᕐᓗᓂ ᖄᖓᓂ ᓯᕐᒥᓕᒃ ᒥᕐᖑᐃᓯᕐᕕᐅᑦ ᓯᕐᒥᖏᓐᓂᑦ ᑎᑭᓪᓗᒍ ᑕᓪᓗᕈᑎᐅᑦ ᐃᒪᖓᓄᑦ.
  • ᐸᕐᓇᒃᑕᐅᔪᖅ ᑕᓪᓗᕈᑎᐅᑦ ᐃᒪᖓ ᓴᐳᔾᔭᐅᓯᒪᔪᒃᓴᖅ ᒪᕈᕐᓱᕐᓗᓂ ᐊᖏᓂᖓ ᓴᕿᓐᓂᐊᕐᐳᖅ ᒫᓐᓇ ᐊᖏᓂᖃᕐᑐᖅ 1.54 % ᐃᒪᓐᓇ ᐊᖏᓂᖃᓕᕐᓂᐊᕐᑐᖅ 3.44 %, ᐊᒻᒪᓗ ᐃᑲᔫᑕᐅᕗᖅ 1.9 ᐳᓴᓐ ᑲᓇᑕᒥ ᑲᑎᓪᓗᒍ ᑕᕆᐅᖓᓂᒃ ᓴᐳᔾᔨᓯᒪᓂᐅᔪᖅ ᐊᖏᕐᓯᒪᔭᖓ ᒐᕙᒪᒃᑯᑦ ᑲᓇᑕᒥ ᓴᐳᔾᔨᓯᒪᔪᒪᓪᓗᑎᒃ 5 −ᐳᓴᖓᓂᒃ ᐊᕋᒍ 2017, ᐃᑲᔪᑕᐅᔪᖅ ᑲᔪᓯᓂᐊᕐᑐᖅ ᑭᓯᐊᓂ ᐃᓄᐃᑦ ᐊᖏᕐᐸᑦ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐱᕚᓪᓕᕈᑕᐅᔪᓪᓗ ᐊᖏᖃᑎᒋᒍᑎᒃᑯᑦ.
  • ᐃᓄᐃᑦ ᖃᐅᔨᒪᔭᑐᖃᖏᑦ ᖃᐅᔨᒋᐊᕐᕕᐅᖃᑦᑕᕐᓂᐊᕐᑐᑦ ᓯᕗᓂᒃᓴᒥ ᐋᕿᒃᓯᔪᖃᕆᐊᖃᕌᖓᑦ ᐊᐅᓚᓂᖓᓂᒃ ᐊᒻᒪᓗ ᓴᐳᔾᔭᐅᓯᒪᓂᖓᓂᒃ ᑕᕆᐅᖓᓂᒃ. ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᕐᑕᐅᖏᓐᓇᕐᓯᒪᒃᒪᑕ ᑭᖑᕚᕆᒃᑐᓄᑦ ᑐᓴᐅᒪᑎᑦᑎᕙᓪᓕᐊᓪᓗᑎᒃ ᐊᑐᕐᑕᐅᖏᓐᓇᕐᓯᒪᓪᓗᑎᒃᓗ ᐊᓐᓇᐅᒪᓇᓱᒃᓂᒃᑯᑦ ᐅᑭᐅᕐᑕᕐᑐᒥ. ᐃᓄᐃᑦ ᖃᐅᔨᒪᔭᑐᖃᖏᑦ ᑲᑎᓯᒪᓪᓗᑎᒃ ᐊᕋᒍᒐᓴᒃᓄᑦ ᑭᖑᕚᕇᒃᓄᑦ ᑐᓴᐅᒪᔭᐅᔪᐃᓐᓇᐅᓪᓗᓂᓗ ᖃᐅᔨᒪᔭᐅᓪᓗᑎᒃ ᑲᑎᑕᐅᓯᒪᔪᑦ ᐅᖃᐅᓯᒃᑯᑦ ᖃᐅᔨᒪᔭᐅᓪᓗᑎᒃ ᐃᓄᒃᓄᑦ ᐱᔪᓐᓇᕈᑕᐅᖃᑦᑕᕐᓯᒪᔪᑦ ᐊᒻᒪᓗ ᑐᑭᓯᐅᒪᔾᔪᑕᐅᓪᓗᑎᒃ ᐊᕙᑎᒥᒃᓄᑦ.
  • ᓴᐳᔾᔭᐅᓯᒪᓂᖓ ᑕᓪᓗᕈᐅᑎᑦ ᐃᒪᖓ ᐃᑲᔪᕐᑐᕐᑕᐅᓯᒪᔪᖅ, ᐃᓚᖓᒍᑦ, ᐃᑲᔪᕐᖢᑎᒃ ᐅᑯᐊ ᓄᓇᒥᒃ ᐱᑕᖃᐃᓐᓇᕐᑎᑦᑎᓂᕐᒧᑦ ᑲᓇᑕᒥ Nature Conservancy of Canada ᐊᒻᒪᓗ ᐅᕐᓱᐊᓗᓕᕆᔩᐅᔪᑦ ᑲᓇᑕᒥ Shell Canada ᐋᕿᒃᓯᓚᐅᕐᒪᑕ ᖁᔭᓈᕐᓯᓪᓗᑎᒃ 30 ᐅᕐᓱᐊᓗᒃᓯᐅᕐᕕᐅᓂᐊᓚᐅᕐᑐᑦ ᒐᓯᒥᒃᓗ ᓄᓇᖁᑎᒋᔭᕐᒥᓂᒃ ᐊᖏᓂᖃᕐᑐᖅ 8,600 ᑭᑉᐸᕇᒃᓯᓗᒍ ᑭᓛᒥᑕ.
  • ᑖᓐᓇ ᐊᖏᖃᑎᒌᒍᑎ ᐱᖃᓯᐅᔾᔨᓯᒪᕗᖅ ᐊᖏᕐᖢᑎᒃ ᓄᖃᕐᑎᑕᐅᓂᖏᑦ ᐅᕐᓱᐊᓗᒃᓯᐅᕐᑐᑦ ᒐᓯᓯᐅᕐᑐᑦ ᓯᕗᓂᒃᓴᒥ, ᕿᓂᕐᕕᐅᖃᑦᑕᖏᓪᓗᓂᓗ, ᖃᐅᔨᓴᕐᑕᐅᖃᑦᑕᖏᓪᓗᓂᓗ ᓯᒐᕐᑎᑦᑦᑎᓗᑎᒃ ᑕᕆᐅᖓᓂ ᐃᖃᖓᓂᒃ ᖃᐅᔨᓇᓱᒃᓗᑎᒃ ᐱᔭᕆᐊᖃᖏᓪᓗᑎᒃ ᐊᖏᖃᑎᒋᒐᓱᒃᓂᖏᓐᓂᒃ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐱᕚᓪᓕᐅᑎᔪᓄᓪᓗ ᐊᖏᑎᖃᒋᒍᑎᒥᒃ. ᑎᑎᕐᑕᐅᓯᒪᓕᕐᐸᑦ ᑲᓇᑕᒥ ᑕᕆᐅᖓᓂᒃ ᐱᑕᖃᐃᓐᓇᕐᑎᑦᑎᓂᕐᒧᑦ ᐱᖁᔭᐃᑦ, ᑕᒪᓐᓇ ᑕᕆᐅᖓ ᑕᐃᒪᖓᓕᒫᖅ ᐊᔪᓕᕐᑎᑦᑎᓯᒪᓂᐊᕐᑐᖅ ᕿᓂᕐᓂᕐᒥᒃ ᐊᒻᒪᓗ ᐱᓇᓱᒃᓂᕐᒥᒃ ᐅᕐᓱᐊᓗᒃᓂᒃ, ᐅᔭᕋᒃᓂᒃ, ᓴᕕᕋᔭᒃᓴᓂᒃ ᐊᓯᖏᓐᓂᒃᓗ ᐱᓇᓱᒃᑕᐅᕙᒃᑐᓂᒃ.
  • ᑕᓪᓗᕈᐅᑎᑦ ᐃᒪᖓ ᐱᒪᒋᔭᐅᕗᖅ 29−ᖑᔪᓄᑦ ᑕᕆᐅᖓᓂᒃ ᑕᒪᕐᒥᒃ ᐊᕙᑖᓃᑦᑐᑦ ᑕᕆᐅᖓᓂ ᐆᒪᔪᖃᕐᕕᐅᔪᑦ ᑲᓇᑕᐅᑦ ᑕᕆᐅᖏᓐᓂᐊᑦᒫᓐᑎᒃ Atlantic,ᐅᑭᐅᕐᑕᕐᑐᖅ Arctic, ᐊᒻᒪᓗ ᐸᓯᕕᒃ Pacific ᑕᕆᐅᖏᓐᓂᒃ, ᐊᒻᒪᓗ ᑕᓯᕐᔪᐊᖏᓐᓂᒃ. ᑲᓇᑕᒥ ᑕᕆᐅᖓᓂᒃ ᐱᑕᖃᐃᓐᓇᕐᑎᑦᑎᓂᕐᒧᑦ ᐊᐅᓚᑕᐅᔪᑦ ᐸᕐᓇᐅᑎᒧᑦ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑐᕋᒐᖃᕐᑐᑦ ᓴᕿᑦᑎᔪᒪᓪᓗᑎᒃ ᑲᓇᑕᒥ ᑕᕆᐅᖓᓂᒃ ᓴᐳᔾᔨᓯᒪᓂᕐᒥᒃ ᐊᑐᓂ 29 ᑕᕆᐅᖏᑦ ᐃᒪᖏᓪᓗ..
  • ᑕᓪᓗᕈᑎᐅᑦ ᐃᒪᖓ ᐃᓄᔾᔪᑕᐅᖏᓐᓇᕐᓯᒪᒃᒪᑦ ᐃᓄᒃᓄᑦ ᐃᓄᓯᖏᓐᓂ ᑭᖑᕚᕆᒃᓄᑦ ᐃᓄᔪᓄᑦ ᐊᓐᓇᐅᒪᔾᔪᑕᐅᓪᓗᓂ. ᐊᑐᕐᑕᐅᓪᓗᑎᒃ ᐃᓕᖁᓯᕐᒥᒍᑦ ᐊᖑᓇᓱᒃᓂᐅᔪᑦ ᓂᕿᒃᓴᕐᓯᐅᕐᓂᐅᔪᓪᓗ ᐅᓪᓗᒥ ᓱᓕ ᑲᔪᓯᕗᑦ, ᐃᓄᐃᑦ ᓇᖕᒥᓂᖅ ᓂᕿᒃᓴᕐᓯᐅᕈᓐᓇᕐᐳᑦ ᐃᓚᒋᔭᕐᒥᓂᒃᓗ ᐃᓕᖁᓯᕐᒥᓂᒃᓗ ᐊᑐᐃᓐᓇᕐᖢᑎᒃ ᑭᖑᕚᕇᒃᓄᑦ. ᓴᐳᔾᔭᐅᓯᒪᓂᖓ ᑕᕆᐅᖓ ᐱᓪᓚᕆᐅᕗᖅ ᖃᓄᐃᖏᑦᑎᐊᕐᓂᖏᓐᓄᑦ ᐃᓄᓯᖃᑦᑎᐊᓂᖏᓐᓄᓪᓗ ᐃᓄᐃᑦ ᖁᑦᑎᒃᑐᒦᑦᑐᑦ ᐊᒻᒪᓗ ᐃᑲᔪᕐᑐᕐᑕᐅᓪᓗᓂ ᐅᓄᕐᓂᕐᓴᐅᔪᓄᑦ ᓄᓇᓕᒃᓂ ᐃᓄᖏᓐᓄᑦ.
  • ᐃᓄᐃᑦ ᐱᓕᕆᓂᖏᑦ ᓴᐳᔾᔭᐅᓯᒪᔪᒪᓪᓗᓂ ᑕᓪᓗᕈᑎᐅᑦ ᐃᒪᖓ ᐱᒋᐊᓚᐅᕐᓯᒪᔪᖅ 1960−1970 ᐊᒻᒪᓗ ᐱᒋᐊᕈᑕᐅᓚᐅᕐᑐᖅ ᓯᕗᓪᓕᕐᐊᖑᓪᓗᓂ ᑕᓪᓗᕈᐅᑎᐅᑦ ᐃᒪᖓᓂᒃ ᐊᑐᕐᑕᐅᓂᖏᓐᓄᑦ ᐸᕐᓇᐅᑎᓂᒃ 1990. ᐅᓪᓗᒥ ᑐᓴᕐᑎᑦᑎᔾᔪᑕᐅᔪᖅ ᐊᕋᒍᒐᓴᒃᓄᑦ ᐱᓕᕆᐊᖑᖃᑦᑕᕐᓯᒪᔪᖅ ᐃᓄᒃᓄᑦ ᖃᐅᔨᒪᔭᐅᑎᑦᑎᓪᓗᑎᒃ ᐊᒻᒪᓗ ᓴᐳᔾᔨᓯᒪᓪᓗᑎᒃ ᐃᓚᐅᕕᒋᓯᒪᓂᕐᒥᓄᑦ.

ᐊᕋᒍᖓᓂ 2016, ᒐᕙᒪᒃᑯᑦ ᑲᓇᑕᒥ ᐊᖏᓚᐅᕐᑐᑦ ᑲᔪᓯᑎᑦᑎᔪᒪᓪᓗᑎᒃ, ᑲᑎᒪᑎᑦᑎᑎᓪᓗᒋᑦ ᓄᓇᕐᔪᐊᕐᒥ ᐆᒪᔪᓕᕆᓂᕐᒧᑦ ᑮᓇᐅᔭᕐᑖᕐᕕᐅᕙᒃᑐᖅ ᐊᕋᒍᑕᒫᕐᓯᐅᑕᖓᓂᒃ ᑕᕆᐅᒃ ᒥᒃᓵᓄᑦ ᑲᑎᒪᑎᓪᓗᒋᑦ, ᐱᔭᕇᕈᒪᓪᓗᑎᒃ ᑕᕆᐅᖓᓂᒃ ᐱᓕᕆᐊᖑᓂᐊᕐᑐᓂᒃ ᑐᕋᒐᐅᔪᓂᒃ. ᐃᓚᒋᓪᓗᓂᐅᒃ, ᐅᕐᓱᐊᓗᓕᕆᔨᐅᔪᑦ Shell Canada ᓇᖕᒥᓂᖅ ᑐᓂᓯᓚᐅᕐᑐᑦ ᖁᔭᓈᕐᓯᓪᓗᑎᒃ ᐱᔪᓐᓇᐅᑎᒥᓂᒃ ᑕᕆᐅᖓᓂ ᕿᓂᕈᓐᓇᐅᑎᖓᓂᒃ ᑖᒃᑯᓄᐊ ᓄᓇᒥᒃ ᐱᑕᖃᐃᓐᓇᕐᑎᑦᑎᓂᕐᒧᑦ ᑲᓇᑕᒥ Nature Conservancy of Canada, ᐅᑎᕐᑎᑕᐅᓪᓗᑎᒃ ᐱᒧᓐᓇᐅᑎᖏᑦ ᕿᓂᕐᓂᕐᒧᑦ ᒐᕙᒪᒃᑯᓐᓄᑦ ᑲᓇᑕᒥ, ᐅᓪᓗᒥ ᐊᔪᕈᓐᓂᕈᑕᐅᓪᓗᑎᒃ ᑐᓴᒐᒃᓴᐅᔪᒧᑦ.

ᑎᑎᕋᕐᓯᒪᔪᑦ ᑕᑯᔭᐅᔪᓐᓇᕐᒥᔪᑦ

ᖃᓄᐃᓕᖓᓂᑯᓂᖓ: ᑕᓪᓗᕈᑎᐅᑦ ᐃᒪᖓ

ᐊᒃᑐᐊᔪᑦ ᖃᐅᔨᒋᐊᕐᕕᐅᔪᓐᓇᕐᑐᑦ

ᖃᐅᔨᒋᐊᕐᕖᑦ

ᒪᕆ-ᐸᔅᑲᐅ ᑎ ᕈᓯᐊ Marie-Pascale Des Rosiers
ᑎᑎᕋᕐᕕᖓ ᒥᓂᔅᑕᐅᑦ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑦᖅ ᐊᓯᓪᓕᕐᐸᓪᓕᐊᓂᖓᓄᑦ
613-462-5473
marie-pascale.desrosiers@canada.ca

ᐃᓄᑐᐃᓐᓇᕐᓄᑦ ᑐᓴᒐᒃᓴᓕᕆᕕᒃ
ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ
855-862-1812
pc.media@pc.gc.ca

ᓯᒪ ᓵᕼᐊᕐ ᔨᕆᕼᐃ Sima Sahar Zerehi
ᐊᐅᓚᑦᑎᔨᒻᒪᕆᒃ ᑐᓴᐅᒐᒃᓴᐅᔪᓄᑦ
ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᖏᑦ
867-975-8413
867-222-5079
1-800-667-2742
szerehi@qia.ca

ᕼᐊᐃᕗᐊᑦ ᕼᐊᕆᔅ Hayward Harris
ᐊᕙᑎᓕᕆᔨᒃᑯᑦ ᐱᓕᕆᕕᖓ
ᒐᕙᒪᒃᑯᑦ ᓄᓇᕗᑦ
867-975-7769
hharris@gov.nu.ca