ᐊᕌᒍᓕᒫᖅ ᐊᐅᓚᓯᓂᕐᒧᑦ ᐸᕐᓇᐅᑎᐅᑉ ᐊᑐᓕᕐᑎᑕᐅᓂᖓᑕ ᖃᓄᐃᓕᖓᓕᕐᓂᖓ 2021-2022

---

---

ᐃᓗᓕᕆᔭᖏᑦ

• ᓄᕙᒡᔪᐊᕐᓇᖅ-19−ᒧᑦ ᑭᒡᒍᑎᑦ ᑭᐅᒃᔪᑦᒃ
• ᐸᕐᓇᐅᑎ 1: ᓄᓇᓖᑦ ᒪᑭᒪᔾᔪᑎᖏᑦ ᐱᖁᑎᕐᔪᐊᖁᑎᖏᑦ– ᓇᓗᓇᐃᖅᓯᓂᕐᒥᑦ ᓈᒻᒪᑦᑐᓂᑦ ᐃᒡᓗᕐᔪᐃᑦ ᐊᑐᐃᓐᓇᐅᒐᓗᐊᕐᒪᖔᑕ ᓴᐳᔾᔨᓂᕐᒧᑦ, ᐅᓂᒃᑳᕐᓂᕐᒧᑦ, ᓴᖅᑭᔮᖅᑎᑦᓯᓂᕐᒥᓪᓗ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᒻᒥᑦ.
• ᐸᕐᓇᐅᑎ 2: ᐃᓅᓂᖅ ᓄᓇᒥ − ᓴᙱᒃᑎᒋᐊᕐᓗᒍ ᐃᓄᐃᑦ ᐊᒃᑐᐊᓂᖏᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕕᖓᓂ.
• ᐸᕐᓇᐅᑎ 3: ᑲᑎᖅᓱᐃᓂᖅ ᖃᐅᔨᒪᔭᐅᔪᓂᒃ – ᑲᑎᖅᓱᐃᓂᖅ ᖃᐅᔨᓴᕐᓂᕐᒧᑦ ᖃᐅᔨᒪᔭᐅᔭᕆᐊᓕᖕᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔪᖅᓱᐃᓂᕐᒧᑦ ᓴᐳᔾᔨᓯᒪᓂᕐᒥᒃ, ᐅᓂᒃᑲᐅᓯᖃᕐᓂᕐᒥᒃ ᐊᒻᒪᓗ ᖁᕝᕙᖅᓴᐃᓂᕐᒥᒃ ᐅᒃᑯᓯᒃᓴᓕᒃ ᑲᓇᑕᒥ ᒥᕐᙳᐃᖅᓯᕕᖕᒥ ᓄᓇᒥᙶᖅᑐᓂᒃ ᐊᒻᒪᓗ ᐃᓕᖅᑯᓯᒃᑯᑦ ᐱᔾᔪᑎᒃᓴᓂᒃ.
• ᑲᔪᓯᓂᖃᑦᑎᐊᖅᑐᖅ ᐅᓂᒃᑲᐅᓯᖅ
• ᑭᖑᓪᓕᕐᒥ ᐱᓕᕆᐊᒃᓴᑦ

---

ᓄᕙᒡᔪᐊᕐᓇᖅ-19−ᒧᑦ ᑭᒡᒍᑎᑦ ᑭᐅᒃᔪᑦᒃ

ᒫᕐᔨ 18, 2020−ᒥ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᐅᒃᑯᐊᖅᓯᓚᐅᖅᐳᑦ ᑕᒪᐃᓐᓂᒃ ᓄᓇᕗᒻᒥ ᒥᓐᖑᐃᖅᓯᕕᓗᒃᑖᓂᒃ ᑕᒪᐃᓐᓄᑦ ᒥᐊᓂᕐᓯᕝ ᕕᓗᒃᑖᓄᑦ ᓄᓇᓕᒐᓛᖓᓄᑦ ᐃᑦᓴᕐᓂᑕᖃᕐᕕᖓᓄᑦ ᐃᖅᑲᓇᐃᔭᕆᐊᖅᑐᔪᓄᑦ ᖃᐅᔨᓴᖅᑎᓗᒃᑖᓄᑦ ᐳᓛᕆᐊᖅᓯᒪᔪᓄᑦ, ᐃᓚᒋᔭᐅᓪᓗᑎᒃ ᖃᐅᔨᓴᖅᑎᑦ ᐊᒻᒪ ᓇᖕᒥᓂᖃᕐᕕᐅᔪᑦ ᓚᐃᓴᓐᓯᖃᖅᑎᑦ, ᐊᖓᔪᖅᑳᒻᒪᕆᐅᑉ ᑎᓕᓯᔾᔪᑎᖓ ᒪᓕᒃᖢᒍ. UNP−ᒧᑦ, ᐅᒃᑐᓯᕐᓴᓕᐅᑉ ᒥᐊᓂᕆᔭᐅᕝᕕᖓᓄᑦ ᑖᓐᓇ ᑎᓕᓯᔾᔪᑕᐅᔪᖅ ᐊᑐᓕᓚᐅᖅᐳᖅ ᑕᒪᐃᓐᓄᑲᓴᒃ 2021-22− ᒧᑦ ᑮᓇᐅᔭᓄᑦ ᐊᕐᕌᒍᒋᔭᐅᔪᒧᑦ, ᐊᑐᐃᓐᓇᖅᖢᓂᓗ ᒪᓕᒐᖅ ᓱᓕ ᐅᓪᓗᐊᓂᑦ ᑖᔅᓱᒪ ᐅᓂᒃᑲᐅᓯᐅᑉ. ᖃᐅᔨᒪᓂᐊᕐᐳᓯ ᑖᒃᑯᐊ ᐊᔪᖅᑎᑕᐅᔪᑦ ᐊᒃᑐᐃᓚᐅᖅᓯᒪᔾᔮᙱᒻᒪᑕ ᐊᑐᓚᐅᖅᓯᒪᔾᔮᓇᑎᒡᓗ ᓄᓇᕗᒻᒥ ᐃᓄᖏᓐᓄᑦ. ᑖᑉᑯᐊᓕ ᓄᓇᕗᑦ ᐃᓄᖏᑦ ᐃᓱᒪᖅᓱᕐᓗᑎᒃ ᑭᒡᓕᖃᖅᑎᑕᐅᙱᓪᓗᑎᒡᓗ ᓄᓇᒥ ᐱᔪᓐᓇᐅᑎᖏᓄᑦ ᐊᑐᕈᓐᓇᕐᓂᕐᒧᑦ ᑕᒪᐃᓐᓂᒃ ᒥᐊᓂᕆᔭᐅᕝᕕᓕᕆᔨᑦ PCA−ᒋᔭᐅᔪᒃᑯᑦ ᐃᓂᖏᓐᓂᒃ ᓄᓇᕗᒻᒥ ᐱᔾᔪᑎᖃᕐᓗᑎᒃ ᐃᓚᐅᓂᕐᒥᓐᓂᒃ ᐱᔪᓐᓇᐅᑎᓅᖓᔪᓂᒃ ᐱᓕᕆᐊᒃᓴᓂᒃ (ᒪᖃᐃᑦᑑᓗᐊᕐᓂᕐᒥᒃ, ᐊᓐᓂᐅᒪᓂᓗᒍᑎᑎᒃ ᐊᑐᕐᓗᒋᑦ) ᐊᑐᐃᓐᓇᕈᖅᑎᑕᐅᓯᒪᔪᓂᒃ ᓄᓇᕗᒻᒥ ᐊᖏᕈᑎᒥᒃ.

ᓄᕙᒡᔪᐊᕐᓇᖅ-19 ᓄᓇᕐᔪᐊᕐᒥ ᖃᓂᒻᒪᒍᑕᐅᓚᐅᖅᑐᖅ ᐅᔾᔨᕐᓇᖅᑐᒥᒃ ᐊᒃᑐᐃᔾᔪᑕᐅᓚᐅᖅᐳᖅ PCA−ᑯᑦ ᒥᐊᓂᕆᔭᐅᕝᕕᒃᑯᑦ ᓄᓇᕗᒻᒥ ᓯᓚᒥ ᐱᓕᕆᔪᓄᑦ 2021-22−ᒥ ᑮᓇᐅᔭᓕᕆᓐᓇᒥ ᐊᕐᕌᒍᒥ. ᐱᓗᐊᖅᑐᒥᑦ, ᑕᒪᕐᒥᑲᓴᑦᑎᐊᖅ ᓯᓚᒥ ᐱᓕᕆᓂᕆᔭᐅᔪᖅ, ᐱᕙᒌᔭᖅᑕᐅᓯᒪᔪᑦ ᐃᖏᓪᕋᖃᑦᑕᕐᓃᑦ, ᐃᓄᑐᐃᓐᓇᐃᓪᓗ ᑲᑎᒪᓂᕆᔭᖏᑦ ᓄᖅᑲᖅᑎᑕᐅᓚᐅᖅᐳᑦ. ᑕᒪᓐᓇ ᐅᔾᔨᕐᓇᖅᑐᒻᒪᕆᒃᑯᑦ ᐊᒃᑐᖅᓯᓚᐅᖅᐳᖅ ᐱᓕᕆᐊᒃᓴᓂᒃ ᐊᒃᑐᐊᓂᓕᖕᓂᒃ ᓄᓇᓕᖕᓂ ᐃᓚᐅᑎᑦᓯᓂᕐᒥᒃ ᐱᓕᕆᖃᑎᖃᖅᐸᖕᓂᕐᒥᒡᓗ, ᓄᓇᒥ ᓱᓕᑦᑎᐊᕐᓂᕐᒧᑦ ᓇᐅᑦᓯᖅᑐᕈᓐᓇᕐᓂᕐᒥᒃ, ᐃᓕᖅᑯᓯᑐᖃᕐᓄᑦ ᐊᑐᖅᑕᐅᔪᓐᓇᖅᑐᓂᒃ ᓇᐅᑦᑎᓯᖅᑐᖅᓂᕐᒥᒃ ᖃᐅᔨᓴᕐᓂᕐᒥᒃ, ᐱᓕᕆᖃᑎᒌᖕᓂᕐᒥᒡᓗ ᐊᐅᓚᑦᓯᕝᕕᖃᕐᓂᕐᒥᒃ. ᐱᓕᕆᐊᖃᖅᑎᓪᓗᒋᑦ ᐅᓄᖅᑐᓂᒃ ᖃᐅᔨᒪᔾᔪᑎᐅᑉ ᒪᓕᒋᐊᖃᓪᓗᐊᑕᖅᑕᖏᓐᓂ ᑐᕌᒐᒃᓴᖏᓐᓂᒃᓗ ᑭᖑᕙᕆᐊᖅᑕᐅᑎᑦᓯᑉᓗᑎᒃ, ᐱᕙᓪᓕᐊᓂᖅ ᐋᖅᑭᒋᐊᖅᑕᐅᓪᓗᓂ ᐊᔪᕐᓇᙱᑐᐊᕌᖓᑦ ᑲᔪᓯᑐᐃᓐᓇᖅᖢᓂ ᓇᓗᓇᐃᖅᓯᒪᔪᖅ ᑕᑲᓐᓇ ᑎᑎᕋᐅᒥᕐᓂ ᐊᑖᓃᑦᑐᒥ.

---

ᐸᕐᓇᐅᑎ 1: ᓄᓇᓖᑦ ᒪᑭᒪᔾᔪᑎᖏᑦ ᐱᖁᑎᕐᔪᐊᖁᑎᖏᑦ– ᓇᓗᓇᐃᖅᓯᓂᕐᒥᑦ ᓈᒻᒪᑦᑐᓂᑦ ᐃᒡᓗᕐᔪᐃᑦ ᐊᑐᐃᓐᓇᐅᒐᓗᐊᕐᒪᖔᑕ ᓴᐳᔾᔨᓂᕐᒧᑦ, ᐅᓂᒃᑳᕐᓂᕐᒧᑦ, ᓴᖅᑭᔮᖅᑎᑦᓯᓂᕐᒥᓪᓗ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᒻᒥᑦ.

ᑐᕌᒐᖅ 1.1: ᑐᙵᕕᐅᔪᑦ ᐊᐅᓚᓂᕐᓄᑦ ᐊᐅᓚᑦᓯᓂᕐᓄᑦ ᐊᒻᒪ ᓯᖁᒥᓚᐃᑦᑐᑦ ᐃᓪᓗᕐᔪᐃᑦ ᐊᑐᐃᓐᓇᐅᔪᑦ ᒥᕐᖑᐃᓯᕐᕕᒻᒥᑦ.

ᖃᓄᐃᑉᐸᓪᓕᐊᓂᖓ/ᐅᔾᔨᕐᓇᖅᑐᑦ:

• ᑐᙵᕕᒋᔭᐅᔪᖅ ᐊᐅᓚᓂᕆᔭᐅᔪᓄᑦ: ᓇᓗᓇᐃᖅᑐᖅᓯᒪᓂᖅ ᓇᑉᐸᖅᑎᖅᑕᐅᓂᐊᖅᑐᓄᑦ ᐱᖁᑏᓪᓗ ᐊᑐᖅᑕᐅᔭᕆᐊᓖᑦ ᐃᓂᒃᓴᐅᓂᐊᖅᑐᓄᑦ ᐊᐅᓚᓂᕆᔭᐅᔪᓄᑦ ᒥᓐᖑᐃᖅᓯᑯᓕᕿᔨᓄᑦ UNP−ᒥ ᑲᔪᓰᓐᓇᖅᐳᑦ; ᑕᖕᒫᕐᕕᓪᒥᒃ ᐋᖅᑭᒃᓯᒪᔪᖃᖅᐳᖅ ᖃᓂᒋᔭᖓᓂ ᓯᓚ ᒥᕝᕕᐅᑉ. ᒫᓐᓇ ᐱᔪᒪᔪᑦ ᓄᓇᒥᒃ ᐃᖅᑲᓇᐃᔭᖅᑎᑦ ᐃᖅᑲᓇᐃᔭᕐᕕᒃᓴᖓᓂᒃ ᐃᖅᑲᓇᐃᔭᓕᖅᐸᑕ ᖁᐊᖅᓵᕐᓇᙱᑦᑐᒥᒃ ᑭᓯᐊᓂ ᑕᒪᒃᑯᐊ ᑐᙵᕕᒋᔭᐅᔪᑦ ᐋᑦᕿᒃᑕᐅᕌᓪᓚᓚᐅᕐᓗᑎᒃ ᑭᖑᕌᒍᑦ ᓄᓇᒥ ᓇᑉᐸᖅᑎᖅᑕᐅᔪᒪᖅᐳᑦ ᐱᕙᒌᔭᖅᑕᐅᓯᒪᔪᓄᑦ ᑐᑭᒧᐊᒍᑎᒧᑦ ᒪᓕᖁᔭᐅᔪᒥᒃ.
• ᒪᑭᒪᔾᔪᑎᓄᑦ ᐱᕙᓪᓕᐊᑎᑦᓯᓂᕐᒧᑦ ᐸᕐᓇᐅᑦ: ᑎᑎᕋᖅᑕᐅᒋᐊᕐᓴᖅᑐᖅ UNP ᒥᓐᖑᐃᖅᓯᕕᓕᕆᔨᒃᑯᓐᓄᑦ ᖃᓄᐃᑦᑐᒥᒃ ᐱᕙᓪᓕᐊᑎᓯᓂᐊᕐᒪᖔᑖ ᐸᕐᓇᕈᑦ ᐱᐊᓂᒃᑕᐅᓚᐅᖅᐳᖅ ᑐᓐᓂᖅᑯᑕᐅᓪᓗᓂᓗ ᓯᓚᒥ ᐊᖓᔪᖅᑳᒻᒪᕆᖕᒧᑦ 2021-22-ᒥ ᐋᖅᑭᒋᐊᖅᑕᐅᖄᕐᓗᓂ ᐊᖏᖅᑕᐅᔪᒃᓴᐅᔪᖅ 2022-23-ᒥ. ᑖᓐᓇ ᐱᕙᒌᔭᖅᑕᐅᓯᒪᔪᖅ ᓇᓗᓇᐃᔭᐃᕗᖅ ᐱᖁᑎᒋᔭᐅᔭᕆᐊᓕᖕᓂᒃ ᑲᔪᓯᑎᑦᓯᓂᐊᕐᓗᓂ ᐃᖅᑲᓇᐃᔮᒃᓴᓂᒃ ᑲᔪᓯᓂᖃᑦᑎᐊᕐᓗᓂ ᖁᐊᖅᓵᕐᓇᙱᑦᑐᒃᑯᓪᓗ, ᐃᑲᔪᖅᑐᐃᔪᒪᓂᕐᒧᑦ ᐃᓄᐃᑦ ᐊᖑᓇᓱᒃᐸᖕᓂᖏᓐᓄᑦ ᐱᓕᕆᐊᖑᕙᒃᑐᓂᒡᓗ, ᑲᔪᓯᑎᑦᓯᑦᓯᐊᖁᔨᑉᓗᓂᓗ ᖃᐅᔨᓴᕐᓂᕐᒥᒃ ᓇᐅᑦᑎᖅᓱᖅᓯᓂᕐᒧᓪᓗ ᐱᓕᕆᐊᖑᕙᒃᑐᓂᒃ, ᑐᙵᓱᒃᑎᑦᑎᔪᒪᓂᕐᒧᓪᓗ ᐳᓛᕆᐊᖅᑐᓂᒃ ᑕᑯᓴᐃᔪᓂᒃ ᐃᖅᑲᓇᐃᔭᕆᐊᖅᑐᖅᑐᓂᒃ ᑕᑯᓴᐃᑐᐃᓐᓇᖅᑐᓂᒡᓗ.
• ᓯᑎᔪᑦ ᕿᒫᕝᕖᑦ: ᑲᑎᖦᖢᒋᑦ, ᒥᓐᖑᐃᖅᓯᕝᕕᕆᓕᔨᒃᑯᑦ UNP−ᑯᑦ ᒫᓐᓇ ᑎᓴᒪᓂᒃ "MonGazebo−ᓂᒃ" ᐃᒡᓗᕈᓯᕐᓂᒃ ᓴᓇᓯᒪᕙᒌᖅᑐᓂᒃ ᕿᒫᕝᕕᖃᖅᐳᑦ ᐊᑐᖅᑕᐅᕙᒌᖅᑐᓂᒃ ᐅᕝᕙᓘᓐᓃᑦ ᐊᑐᐃᓐᓇᐅᓕᖅᑐᓂᒃ ᐃᓕᐅᖅᑲᖅᑕᐅᑉᓗᑎᒃ: ᐊᑕᐅᓯᖅ ᐃᓕᐅᖅᑲᖅᑕᐅᓚᐅᖅᑐᖅ ᑕᖕᒫᖅᓯᒪᕝᕕᐅᓚᐅᑲᒃᑐᒥ, ᐊᑕᐅᓯᖅ ᓄᒃᑕᖅᑎᑕᐅᓚᐅᖅᑐᖅ ᒥᕐᙳᐃᖅᓯᕐᕕᖕᒧᑦ ᐊᐃᕐᕆᓕ 2021−ᒥ ᐃᓕᐅᖅᑲᖅᑕᐅᓂᐊᕐᓗᓂ 2022-23−ᒥ (ᐃᖅᑲᓇᐃᔭᖅᑎᑦ ᐱᔭᕇᖅᓯᓚᐅᖅᐳᑦ ᖃᐅᔨᓴᕈᑎᒥᒃ ᓴᓇᔭᐅᔪᒥᒃ 2021−ᒥ ᐊᐅᔭᒃᑯᑦ UNP−ᒥ ᓄᓇᓯᐅᑎᖃᕐᕕᖕᒥ), ᐊᒻᒪ ᒪᕐᕈᒃᑲᓐᓃᒃ ᓇᐅᔮᑦ ᐅᑕᖅᑭᓪᓗᑎᒃ ᓄᒃᑕᖅᑎᑕᐅᓂᐊᕐᓂᕐᒥᒃ ᒥᕐᙳᐃᖅᓯᕐᕕᖕᒧᑦ 2022-23−ᒥ. ᐃᓂᖓ ᖃᐅᔨᓴᖅᑕᐅᓂᖓ ᑕᒡᓚᔅ ᑐᓚᒃᑕᕐᕕᒃ ᐱᖃᑖ ᓄᓇᓕᕋᓛᖃᕐᕕᒃ ᑲᔪᓯᔪᖅ.

ᑐᕌᒐᖅ 1.2: ᐊᖅᑯᑎᑦ ᐊᒻᒪ ᐱᕚᓪᓕᕈᑕᐅᔪᑦ, ᐊᑦᑕᕐᓇᙱᑦᑐᑦ ᐸᒡᕕᓇᖅᑐᑦ, ᐊᒃᑐᖅᑕᐅᓴᕋᐃᑦᑐᑦ ᐃᑦᑕᕐᓂᓴᖃᕐᕖᑦ, ᐊᓯᖏᓪᓗ ᐅᔾᔨᕐᓇᕐᓂᐅᔪᑦ ᓇᓗᓇᐃᖅᑕᐅᓲᖑᕗᑦ ᐅᖃᐅᓯᐅᕙᒃᖢᑎᒡᓗ ᒥᕐᖑᐃᖅᓯᕐᕕᖕᒥ ᐊᑐᖅᑎᓄᑦ.

ᖃᓄᐃᑉᐸᓪᓕᐊᓂᖓ/ᑕᑯᕋᓐᓂᖅᑐᑦ:

• ᐊᖅᑯᑎᑦ, ᐊᑦᑕᕐᓇᙱᑦᑐᑦ ᑲᑉᐱᐊᓇᓐᖑᑦᑯᑦ ᑐᓚᒃᑕᕐᕖᑦ, ᐊᒃᑐᖅᑕᐅᓴᕋᐃᑦᑐᑦ ᐃᓃᑦ, ᐊᓯᖏᓪᓗ ᐅᔾᔨᕐᓇᕐᓂᐅᔪᑦ: PCA−ᑯᑦ ᒥᓐᖑᐃᐃᖅᓯᓕᕆᔨᑉᑯᑦ ᒫᓐᓇ ᐊᑐᓕᖅᑐᑦ ᐊᑕᐅᓰᓐᓇᒃᑰᖅᑎᑕᐅᓯᒪᔪᒥᒃ ᐊᑐᖅᑕᐅᔪᓐᓇᖅᑐᒥᒃ ᑲᑎᖅᓱᐃᓂᐊᕐᓗᓂ ᑐᓴᖅᑕᐅᔪᒃᓴᓂᒃ ᖃᐅᔨᓴᖅᓯᓂᕐᒧᓪᓗ ᐱᕕᒃᓴᓂᒃ ᐃᓂᓂ ᐊᒃᑐᐊᓂᓕᖕᓂᒃ ᐃᓯᕈᓐᓇᕐᓂᕐᒧᑦ ᐊᖅᑯᑎᓂᒃ, ᑐᓚᒡᕕᖕᓂᒃ, ᖁᐊᖅᓵᕐᓇᙱᑦᑐᒃᑯᑦ ᐅᖅᑯᐃᓯᒪᕝᕕᖕᓂᒃ, ᑐᐊᕕᕐᓇᖅᑐᖅᑕᖃᓕᖅᑎᓪᓗᒍ ᐅᖅᑯᐃᓯᒪᕝᕕᖕᓂᒃ, ᐊᒃᑐᖅᑕᐅᓴᕋᐃᑦᑐᓂᒃ ᐃᓂᓂᒃ ᐊᓯᖏᓐᓂᒡᓗ ᐃᓱᒪᒋᔭᐅᕙᒃᑐᓂᒃ ᐃᑲᔪᖅᑐᐃᓂᐊᕐᓗᓂ ᐳᓛᕆᐊᖅᐸᒃᑐᑦ ᐊᑐᖃᑦᑕᖅᓯᒪᔭᖏᓐᓄᑦ ᐱᕕᒃᓴᐅᕙᒃᑐᓄᑦ, ᐃᓕᓐᓂᐊᖅᑎᑦᑎᓂᕐᒧᓪᓗ ᐅᔾᔨᕐᓇᖅᓯᑎᑦᑎᓂᕐᒧᓪᓗ ᐱᔾᔪᑕᐅᔪᓄᑦ. ᑲᑎᖅᓱᐃᕙᓪᓕᐊᓗᑎᒃ ᑖᒃᑯᓂᖓ ᑐᑭᓯᒋᐊᒐᒃᓴᓂᒃ ᐃᓚᓕᐅᑎᓗᒋᓪᓗ ᑐᑭᓯᒋᐊᒐᒃᓴᑦ ᐳᓚᕋᖅᑎᓄᑦ ᖃᐅᔨᔭᐅᖃᑦᑕᖅᓯᒪᔪᑦ ᐱᖁᑎᓄᑦ ᐱᓕᕆᐊᖑᐃᓐᓇᕐᓂᐊᖅᐳᑦ 2022-23−ᒥ.
• ᒥᕐᖑᐃᖅᓯᕐᕕᖕᒥ ᑕᑯᒃᓴᐅᑎᑦᑎᓃᑦ: ᐱᖓᓱᑦ ᑕᑯᒃᓴᐅᑎᑕᐅᔪᑦ ᐃᓕᐅᖅᑲᖅᑕᐅᓚᐅᖅᑐᑦ ᓇᐅᔮᓂ (UNP ᒥᕐᙳᐃᖅᓯᕖᑦ ᑲᓇᑕᒥ ᑎᑎᕋᕐᕕᖓ), ᑲᖏᖅᖠᓂᕐᒥ (ᑭᕙᓪᓕᕐᒥ ᐳᓚᕋᕐᕕᒃ), ᐊᒻᒪᓗ ᖃᒪᓂ'ᑐᐊᕐᒥ (ᐊᑯᒪᓕᒃ ᐳᓛᕐᕕᒃ). ᐊᑐᓂ ᑕᑯᒃᓴᐅᑎᑕᐅᔪᑦ ᐃᓚᖃᓚᐅᖅᐳᑦ ᐊᖏᔪᓂᑦ, ᐊᒃᑐᖅᑕᐅᔪᓐᓇᖅᑐᓂᑦ 3D ᓄᓇᙳᐊᓂᑦ ᐊᒻᒪᓗᑦᑕᐅᖅ ᑐᓴᐅᒪᔾᔪᑎᒃᓴᓂᑦ ᓇᓗᓇᐃᖅᓯᔪᓂᑦ ᑕᓪᓕᒪᓂᑦ ᐃᓂᐅᔪᓂᑦ ᐃᓄᖕᓄᑦ ᒥᕐᖑᐃᖅᓯᕐᕕᖕᒦᑦᑐᑦ (ᓄᕗᒃ ᑭᒡᒐᖅᑐᖅᑕᓕᒃ, ᐊᒃᖤᑎᑕᓕᒃ, ᐱᑉᓯᒪᓂᖅ ᑰᒃ, ᑎᓂᑦᑐᒃᑐᖅ, ᐊᒻᒪᓗ ᑕᓯᔭᖅ (ᓂᐅᕕᖅᑎᒃᑯᑦ ᐃᓂᖃᕐᕕᕕᓂᐊ)). ᐃᓚᒃᑲᓐᓂᖏᑦ ᓴᖅᑭᔮᖅᑐᑦ ᑐᑭᓕᐅᕆᔾᔪᑕᐅᓪᓗᐊᑕᖅᑐᓂᒃ ᐅᓂᒃᑳᓂᒃ ᑐᕌᖓᔪᑦ ᐊᑐᓂ ᓄᓇᓕᖕᓄᑦ − ᐃᓚᐅᓪᓗᑎᒃ ᐅᖃᐅᓰᑦ, ᐅᖃᐅᓯᐅᔪᑦ, ᐊᔾᔨᙳᐊᑦ, ᑎᑎᕋᐅᔭᖅᓯᒪᔪᓪᓗ − ᓴᖅᑭᔮᖅᑎᑕᐅᓚᐅᕐᒥᔪᑦ.

---

ᐸᕐᓇᐅᑎ 2: ᐃᓅᓂᖅ ᓄᓇᒥ − ᓴᙱᒃᑎᒋᐊᕐᓗᒍ ᐃᓄᐃᑦ ᐊᒃᑐᐊᓂᖏᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕕᖓᓂ.

ᑐᕌᒐᖅ 2.1: ᐃᓄᐃᑦ ᐊᒃᑐᐊᓂᖏᑦ ᐅᒃᑯᓯᒃᓴᓕᒃ ᒥᕐᖑᐃᖅᓯᕐᕕᖕᒧᑦ ᓴᙱᒃᑎᒋᐊᖅᑕᐅᕗᑦ ᐊᒻᒪ ᑐᓴᖅᑕᐅᑎᑕᐅᓪᓗᑎᒃ ᐅᒃᑯᓯᒃᓴᓕᐅᑉ ᐃᓅᓯᕆᓚᐅᖅᑕᖏᓐᓂᒃ.

ᖃᓄᐃᑉᐸᓪᓕᐊᓂᖓ/ᑕᑯᕋᓐᓂᖅᑐᑦ:

• ᓄᓇᓕᖕᓂ ᑐᓴᐅᒪᑎᑦᓯᓂᕐᒧᑦ ᐱᓕᕆᐊᖑᕙᒃᑐᑦ: ᑕᐃᒪᐃᔾᔪᑎᖃᖅᖢᓂ ᓄᕙᒡᔪᐊᕐᓇᖅ-19−ᒧᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᔭᕆᐊᓕᖕᓄᑦ, ᑕᒪᕐᒥᑦᑎᐊᖅ ᐱᓕᕆᖃᑎᖃᕐᓂᕐᒧᑦ ᐱᓕᕆᐊᖑᔪᑦ ᐅᖓᕙᕆᐊᖅᑕᐅᓚᐅᖅᐳᑦ 2021-22−ᒥ. PCA−ᑯᑦ ᑲᓇᑕᒥ ᒥᓐᖑᐃᖅᓯᓕᕆᔨᑦ ᓂᕆᐅᒋᔭᖃᖅᐳᑦ ᓴᖅᑭᑎᑦᓯᒃᑲᓐᓂᕈᒪᓪᓗᑎᒃ ᑭᒃᑯᑐᐃᓐᓇᓄᑦ ᐱᓕᕆᖃᑎᖃᖅᐸᖕᓂᕐᒧᑦ ᐱᓕᕆᐊᖑᕙᒃᑐᓂᒃ 2022-23−ᒥ, ᓲᕐᓗ ᓈᓚᐅᑎᒃᑯᑦ ᐅᓂᒃᑲᐅᓯᖃᕐᓂᕐᒧᑦ ᐱᓕᕆᐊᖑᕙᒃᑐᒥᒃ ᐋᖅᑭᒃᓱᖅᑕᐅᓚᐅᖅᓯᒪᔪᒥᒃ 2020−ᒥ ᑕᑯᒃᓴᐅᑎᑦᑐᒪᓪᓗᒋᑦ ᐃᓄᐃᑦ ᖃᐅᔨᒪᓂᑐᖃᖏᑦ ᑲᑎᑕᐅᓯᒪᔪᑦ ᐅᒃᑯᓯᒃᓴᓕᖕᒥ ᐅᓂᒃᑲᐅᓯᑐᖃᕐᓂᑦ.
• ᐅᒃᑯᓯᒃᓴᓕᒃ ᒥᕐᖑᐃᖅᓯᕕᖕᒥ ᐊᐅᓚᑦᑎᔨᑦ ᑲᑎᒪᔨᕋᓛᑦ ᑲᑎᒪᖃᑦᑕᕐᓂᖏᑦ: ᑎᑎᕋᕐᕕᖏᑦ ᒪᑐᓯᒪᓂᖏᓐᓄᑦ ᐊᒻᒪ ᐅᐸᒍᑎᔪᓐᓇᙱᓐᓂᖏᓐᓄᑦ, ᐊᒃᓱᕈᕐᓇᓚᐅᖅᐳᖅ ᑲᑎᒪᖃᑦᑕᕆᐊᒃᓴᖅ 2021-22 ᑮᓇᐅᔭᓕᕆᓐᓇᖅ ᐊᕐᕌᒍᒥ. ᑕᐃᒪᐃᒃᑲᓗᐊᖅᑎᓪᓗᒍ, UPMC−ᑯᑦ 6−ᓂᒃ ᐅᖃᓘᑎᒃᑯᑦ ᑲᑎᒪᓚᐅᖅᐳᑦ ᐊᐃᕆᓕ 1, 2021 ᐊᒻᒪ ᒫᔾᔨ 31, 2022 ᐊᑯᓐᓂᖓᓂ.

ᑐᕌᒐᖅ 2.2: ᐱᕕᒃᓴᐃᑦ ᒥᕐᖑᐃᖅᓯᕐᕕᓕᐊᖅᑐᓄᑦ ᖃᐅᔨᓗᑎᒃ ᓄᓇᐅᑉ ᑕᐅᑦᑐᐊᓂᒃ ᑐᓵᓗᒋᓪᓗ ᐅᓂᒃᑳᖅᑐᐊᑦ ᐅᒃᑯᓯᒃᓴᓕᒃ.

ᖃᓄᐃᑉᐸᓪᓕᐊᓂᖓ/ᑕᑯᕋᓐᓂᖅᑐᖅ:

• ᑐᑭᓕᐅᕆᓂᖅ ᐱᕙᓪᓕᐊᓂᕐᒧᑦ ᐱᕙᓪᓕᐊᑎᑦᑎᓂᖅ: ᐃᑲᔪᖅᓱᖅᓯᓪᓗᑎᒃ ᑕᑯᒃᓴᐅᑎᑦᑎᓂᕐᒥᒃ (ᑐᕌᒐᕆᔭᐅᔪᖅ 1.2), ᐃᖅᑲᓇᐃᔭᖅᑏᑦ ᓴᖅᑭᑎᑦᑎᓚᐅᖅᐳᑦ ᐊᑕᖐᑦᑎᐊᖅᑐᓂᑦ ᖃᐅᔨᒋᐊᕐᕕᒃᓴᓂᒃ ᑎᑎᖅᑲᓂᒃ ᑕᓪᓕᒪᓄᑦ ᓯᕗᓪᓕᐅᑎᑕᐅᔪᒪᔪᓄᑦ ᐃᓄᖕᓄᑦ UNP−ᒥ. ᑖᓐᓇ ᑎᑎᖅᑲᖅ ᑐᙵᕕᒋᔭᐅᓚᐅᖅᐳᖅ ᑕᑯᒃᓴᐅᑎᑦᑎᔪᓄᑦ , ᐃᑲᔪᖅᑐᐃᓂᐊᖅᖢᓂᓗ ᐱᕙᓪᓕᐊᑎᑕᐅᔪᓂᒃ ᓯᕗᓂᒃᓴᒥ ᑐᑭᓕᐅᖅᓯᒪᔪᓂᒃ.
• ᐆᒪᔪᓂᒃ ᕿᒥᕐᕈᓂᐊᕐᓗᓂ ᖃᐅᔨᒪᔾᔪᑎᒃᓴᑦ: ᓄᑖᙳᕆᐊᖅᓯᒪᔪᑦ ᐆᒪᔪᓂᒃ ᕿᒥᕐᕈᓂᐊᕐᓗᓂ ᖃᐅᔨᒪᔾᔪᑎᑦ ᒥᕐᖑᐃᖅᓯᕐᕕᖕᒥ ᐊᑐᖅᐸᒃᑐᓄᑦ ᑎᑎᕋᖅᑕᐅᒋᐊᕐᖓᓚᐅᖅᐳᑦ, ᕿᒥᕐᕈᔭᐅᑐᐃᓐᓇᕆᐊᖃᓕᖅᖢᑎᒡᓗ UPMC−ᑯᓐᓂ (ᐅᒃᑯᓯᒃᓴᓕᐅᑉ ᑲᑎᒪᔨᐅᓛᖏᓄᑦ) ᐊᒻᒪ ᐃᓄᐃᑦ ᖃᐅᔨᒪᔭᖏᓐᓂᒃ ᐱᓕᕆᔨᐅᖃᑎᒌᓄᑦ . ᐱᓕᕆᐊᖑᐃᓐᓇᕐᓂᐊᖅᑐᑦ ᑖᒃᑯᐊ ᖃᐅᔨᒪᔾᔪᑎᒃᓴᑦ 2022-23−ᒥ ᐊᐅᓚᑕᐅᓗᑎᒃ ᐱᕙᓪᓕᐊᑎᑕᐅᔪᑦ ᐳᓚᕋᖅᑎᓄᑦ ᐱᓱᔪᖕᓂᕐᒧᑦ ᖃᐅᔨᒪᔾᔪᑎᑦ (ᐊᑖᓃᑦᑐᖅ ᑕᑯᓗᒍ).
• ᖃᕆᑕᐅᔭᒃᑯᑦ ᒥᕐᖑᐃᖅᓯᕕᓕᐊᕐᓃᑦ: ᐱᓕᕆᐊᖑᐃᓐᓇᖅᑐᑦ ᐱᖓᓱᑦ ᐅᖃᐅᓯᑦ ᓇᕈᓇᒡᕕᐅᓲᑦ ᑕᓪᓕᒪᐅᓪᓗᑎᒃ ᐃᓄᖕᓄᑦ ᑐᕌᖓᓪᓗᑎᒃ ᓄᓇᓕᖕᓂ ᑕᑯᒃᓴᐅᑎᑕᐅᔪᑦ ᐅᓄᕐᓂᖅᓴᓄᑦ ᐃᓄᖕᓄᑦ ᑕᑯᔭᐅᔪᓐᓇᕐᓗᑎᒃ. ᑕᒪᓐᓇ ᐳᓚᕋᕐᓂᖅ ᐋᖅᑭᒃᓱᖅᑕᐅᓂᐊᖅᐳᖅ ᐅᓂᒃᑳᖅᑐᐊᑎᒍᑦMaps−ᑯᑦ ᖃᕆᑕᐅᔭᒃᑯᑦ ᐅᓂᒃᑳᖅᑕᐅᔪᑎᒍᑦ, ᐃᓚᒋᔭᐅᓗᑎᒃ ᓂᐱᓕᐅᖅᓯᒪᔪᑦ ᐊᒻᒪᓗ ᑲᓇᑕᓕᒫᒥ ᑕᕐᕆᔭᒐᒃᓴᓕᕆᔩᑦ ᑲᑎᒪᔨᖏᑦ.
• ᒥᕐᖑᐃᖅᓯᕐᕕᖕᒥ ᐳᓛᖅᑎᓄᑦ ᖃᐅᔨᔭᐅᖃᑦᑕᖅᓯᒪᔪᑦ: ᑎᑎᕋᖅᑕᐅᒋᐊᕐᖓᖅᑐᖅ ᐆᒪᔪᓂᒃ ᕿᒥᕐᕈᓂᐊᕐᓗᓂ ᖃᐅᔨᒪᔾᔪᑎᑦ, ᓯᕗᓪᓕᖅᐹᖅ ᑎᑎᕋᖅᑕᐅᒋᐊᕐᖓᖅᑐᖅ ᐳᓛᖅᑎᓄᑦ ᐱᓱᔪᖕᓂᕐᒧᑦ ᖃᐅᔨᒪᔾᔪᑎᑦ ᐋᖅᑭᒃᑕᐅᓚᐅᖅᐳᖅ 2021-22−ᒥ, ᐊᒻᒪ PCA−ᑯᑦ ᓂᕆᐅᒃᖢᑎᒃ ᑭᖑᓪᓕᖅᐹᒥ ᑎᑎᕋᖅᑕᐅᓛᕋᓱᒋᔭᐅᓪᓗᓂ ᕿᒥᕐᕈᔭᐅᔪᒃᓴᖅ UPMC−ᑯᓐᓄᑦ 2022-23−ᒥ. ᐊᒻᒪ ᓱᓕ, PCA−ᑯᑦ ᐱᒋᐊᖅᑎᑦᑎᓚᐅᕐᒥᔪᑦ ᐱᔪᒪᔪᓂᒃ ᐊᑭᑦᑐᕋᐅᑎᔪᓂᒃ ᓴᖅᑭᑦᑎᖁᔨᓪᓗᑎᒃ ᕿᓯᖕᓂᒃ ᑐᐱᕐᓂᒃ ᐃᑦᓴᕐᓂᒃ ᑕᒪᑐᒪᓂ ᐊᕐᕌᒍᒥ, ᐱᓕᕆᐊᖑᑦᑎᐊᙱᖦᖢᑎᒃ. ᐱᓕᕆᐊᖅ ᐱᓕᕆᐊᖑᐃᓐᓇᕐᓂᐊᕐᒥᔪᖅ 2022-23−ᒥ.

---

ᐸᕐᓇᐅᑎ 3: ᑲᑎᖅᓱᐃᓂᖅ ᖃᐅᔨᒪᔭᐅᔪᓂᒃ – ᑲᑎᖅᓱᐃᓂᖅ ᖃᐅᔨᓴᕐᓂᕐᒧᑦ ᖃᐅᔨᒪᔭᐅᔭᕆᐊᓕᖕᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔪᖅᓱᐃᓂᕐᒧᑦ ᓴᐳᔾᔨᓯᒪᓂᕐᒥᒃ, ᐅᓂᒃᑲᐅᓯᖃᕐᓂᕐᒥᒃ ᐊᒻᒪᓗ ᖁᕝᕙᖅᓴᐃᓂᕐᒥᒃ ᐅᒃᑯᓯᒃᓴᓕᒃ ᑲᓇᑕᒥ ᒥᕐᙳᐃᖅᓯᕕᖕᒥ ᓄᓇᒥᙶᖅᑐᓂᒃ ᐊᒻᒪᓗ ᐃᓕᖅᑯᓯᒃᑯᑦ ᐱᔾᔪᑎᒃᓴᓂᒃ.

ᑐᕌᒐᖅ 3.1: ᖃᐅᔨᓴᕐᓂᕐᒧᑦ ᑐᑭᓯᒋᐊᕈᑏᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᓄᐊᑕᐅᕙᑦᑐᑦ ᓇᓗᓇᐃᖅᓯᓂᕐᒧᑦ ᒫᓐᓇᐅᔪᖅ ᖃᓄᐃᓐᓂᖓᓂᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᐅᑉ ᐊᕙᑎᖏᑦ ᐊᒻᒪ ᖃᐅᔨᓗᑎ ᐊᓯᔾᔨᖅᑐᓂᑦ ᓯᕗᓂᔅᓴᒥ.

ᖃᓄᐃᑉᐸᓪᓕᐊᓂᖓ/ᑕᑯᕋᓐᓂᖅᑐᑦ:

• ᐃᒪᕐᒥᐅᑕᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᑦᑑᓂᖏᑦ ᖃᐅᔨᓴᖅᑕᐅᔪᑦ: ᐅᖓᓯᒋᔭᐅᔪᒦᑦᑐᑦ ᖃᐅᔨᓴᖅᐸᓪᓕᐊᔭᒥᓐᓂᑦ ᖃᐅᔨᓴᕐᓂᖅ ᐊᐅᓚᑕᐅᕗᖅ PCA−ᑯᑦ ᑲᓇᑕ ᒥᓐᖑᐃᖅᓯᕕᓕᕆᔩᖏᓄᑦ ᑎᑎᕋᕐᕕᐊᓂ (ᓲᕐᓗ, ᓯᑯᖃᕐᓂᖓ ᐊᒻᒪ ᐆᒪᔪᓕᕆᓂᖅ, ᐃᒪᕐᒥᐅᑕᓂᒃ ᐃᕐᓂᐅᕐᓂᖅ/Chlorophyll A, ᐃᒪᐅᑉ ᖄᖓᑕ ᐅᖅᑰᓂᖓ) ᐊᑐᖅᑕᐅᕙᒌᖅᐳᖅ ᐊᒻᒪ ᐃᖏᕐᕋᐃᓐᓇᖅᖢᓂ (ᐃᒪᖃᕋᓗᐊᖅᖢᓂ ᐊᒻᒪ ᒪᓂᕋᕐᒥ ᓱᓕᔪᖃᕆᐊᖃᖅᖢᓂ). PCA−ᑯᑦ ᑲᓇᑕ ᒥᓐᖑᐃᖅᓯᕕᓕᕆᔩᖏᑦ ᐃᓱᒪᒋᔭᖃᖅᓯᒪᕗᑦ ᖃᔅᓯᑲᓪᓚᖕᓂᒃ ᐊᔾᔨᒌᙱᑦᑐᓂᒃ ᐊᑐᖅᑕᐅᖔᕈᓐᓇᖅᑐᓂᒃ ᐊᑐᓕᖅᑎᑦᑎᓂᐊᕐᓗᓂ ᐃᒪᕐᒥᐅᑕᓂᒃ ᐃᓂᒋᔭᐅᕙᒃᑐᓂᒃ ᐃᓂᒥᒃ ᐊᑐᖅᑕᐅᓇᔭᖅᑐᒥᒃ, ᑕᒪᒃᑯᐊᓗ ᐱᑐᐃᓐᓇᕆᐊᖃᓕᖅᖢᑎᒃ ᐅᖃᐅᓯᐅᔪᓐᓇᖅᖢᑎᒃ ᕿᒥᕐᕈᐊᖅᑕᐅᓗᑎᒡᓗ IKWG−ᑯᓐᓂᑦ ᐊᒻᒪᐃᓛᒃ UPMC−ᑯᓐᓂᑦ.
• ᓄᓇᒥᑦ (ᓇᐹᖅᑐᖃᕐᖏᑐᒥ) ᐆᒪᓂᖃᖅᑐᑦ ᓇᔪᒐᕐᒥᓂᑦ ᖃᐅᔨᓴᕐᓂᖅ ᐱᓕᕆᐊᒃᑯᑦ: ᖃᐅᔨᓴᓂᕐᒧᑦ ᑎᑎᕋᖅᓯᒪᔪᑦ ᖃᐅᔨᓴᖅᑕᐅᓂᑯᐃᑦ ᓄᐊᑕᐅᔪᓐᓇᓚᐅᖏᑦᑐᑦ 2021−ᒥ ᐱᔾᔪᑎᒋᓪᓗᒍ ᓄᕙᕐᔪᐊᕐᓇᖅ-19 ᑭᒃᑯᑐᐃᓐᓇᕐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᑐᖅᑕᐅᓯᒪᔪᑦ. ᑭᓯᐊᓂ, ᖁᐊᖑᔪᒥᑦ ᓱᓪᓗᓕᖕᒥᑦ ᖃᐅᔨᓴᕈᒻᒥᒃ ᖃᓄᖅ ᐃᑎᑎᒋᓐᒪᖔᑦ ᓄᓇᐅᑉ ᐃᓄᓄᐊᓂ ᕿᕿᔪᖅ ᐃᓕᓯᓚᐅᖅᑐᑦ ᐅᐱᕐᖔᒥᑦ 2022−ᒥᑦ, ᒥᕐᖑᐃᖅᓯᕐᕕᖕᒥᓪᓗ ᐃᖅᑲᓇᐃᔭᖅᑎᑦ ᐱᓕᒻᒪᒃᓴᖅᑎᑕᐅᓚᐅᖅᖢᑎᒃ ᑖᒻᓇ ᖃᓄᖅ ᐊᑐᒐᐅᓱᕐᒪᖔᑦ ᓯᓚᒥᑦ ᐱᓕᕆᐊᕆᔪᓪᓗᐊᕐᓂᐊᕐᒪ’ᑐᒃ ᓯᕗᓂᒃᓴᑉᑎᓂ.
• ᖃᐅᔨᓴᖅᑳᒐᐅᓂᑯᑦ ᖃᔨᓴᕐᓂᒃᒥᒃ ᐱᒋᐊᖅᑳᑎᓐᓇᒋᑦ: ᐅᓂᒃᑳᓕᐊᑦ ᖃᐅᔨᓴᕐᓂᑯᑦ ᐃᒪᕐᒥᐅᑕᓂᒃ ᖃᐅᔨᓴᖅᑕᐅᔪᓂ ᑎᑎᖅᑲᖁᑎᖏᓐᓂ ᑲᑎᖅᓱᐃᓂᕐᒧᑦ 2016−ᒥᑦ ᐊᑐᐃᓐᓇᐅᑎᑕᐅᓕᓚᐅᖅᐳᑦ PCA−ᑯᑦ ᑲᓇᑕᒥ ᒥᓐᖑᐃᖅᓯᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᖏᓐᓄᑦ, ᐊᒻᒪ ᑲᑎᖅᓱᖅᑕᐅᓯᒪᔪᑦ ᐅᓂᒃᑳᓕᐊᑦ ᐱᖃᓯᐅᔾᔨᕗᑦ ᐃᓄᐃᑦ ᖃᐅᔨᒪᔭᖏᓐᓂ ᐱᖁᔭᐅᔪᓂ ᑭᖑᓪᓕᕐᒥ ᐱᓕᕆᐊᖑᓕᖅᐳᑦ. PCA−ᑯᑦ ᓂᕆᐅᒋᔭᖃᖅᐳᑦ ᓄᑖᙳᕆᐊᖅᓯᒪᔪᒥᒃ ᑖᔅᓱᒥᖓ ᐅᓂᒃᑲᐅᓯᕐᒥᒃ ᕿᒥᕐᕈᐊᖅᑕᐅᒃᑲᓐᓂᕈᓐᓇᖅᓯᓂᐊᕐᓂᖓᓂᒃ ᖃᐅᔨᓴᖅᑎᓂᑦ 2022-23−ᒥ.

ᑐᕌᒐᖅ 3.2: ᖃᐅᔨᓴᕐᓂᕐᒧᑦ ᑐᑭᓯᒋᐊᕈᑏᑦ ᐃᓄᐃᓪᓗ ᖃᐅᔨᒪᔭᑐᖃᖏᑦ ᐊᑐᖅᑕᐅᔪᑦ ᑐᓴᖅᑎᓪᓗᒋᑦ ᐃᑲᔪᖅᑐᕐᓂᕐᒥᓪᓗ ᐊᑯᓂᐅᔪᒧᑦ ᐊᐅᓚᑦᓯᓂᕐᒧᑦ ᐃᓱᒪᓕᐅᕈᑕᐅᔪᓂᑦ.

ᖃᓄᐃᑉᐸᓪᓕᐊᓂᖓ/ᑕᑯᕋᓐᓂᖅᑐᑦ:

• ᐃᓄᐃᑦ ᖃᐅᔨᒪᔭᖏᑦ ᐱᓕᕆᖃᑎᒌᑦ ᐋᖅᑭᒃᓯᒪᓂᖓ ᑐᓐᖓᕕᐅᔪᖅ ᑕᐃᔭᐅᔪᖅ IKWG: ᐱᕙᓪᓕᐊᑎᑦᑎᓂᖅ ᐊᑐᒐᒃᓴᒥᒃ ᐃᓚᓕᐅᔾᔨᓂᕐᒧᑦ ᐅᖃᐅᓯᐅᔪᓂᒃ IKWG−ᒃᑯᓐᓂ ᐊᐅᓚᑦᑎᓂᕐᒧᑦ ᐋᖅᑭᒃᑕᐅᔪᓄᑦ ᑲᔪᓯᔪᖅ ᑐᓐᖓᕝᕕᐅᔪᖅ. ᐱᓕᕆᔾᔪᑕᐅᓂᐊᖅᑐᒥᒃ ᑎᑎᕋᖅᑕᐅᔪᖃᖅᓯᒪᓕᖅᑐᖅ ᑐᖓᕕᒃᓴᒥᒃ ᕿᒥᕐᕈᔭᐅᑐᐃᓐᓇᕆᐊᖃᓕᖅᖢᓂᓗ IKWG−ᒃᑯᓐᓂ ᑲᑎᒪᒐᔪᓕᖅᐸᑕ 2022-23−ᒥ.
• ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ ᐃᓐᓇᐃᑦ ᐅᓂᒃᑳᖏᑦ: ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ ᐃᓐᓇᐃᑦ ᐅᓂᒃᑳᖏᑦ UNP ᐅᒃᑯᓯᒃᓴᓕᐅᑉ ᒥᒃᓵᓄᑦ ᐃᓚᓕᐅᔾᔭᐅᓯᒪᕗᑦ ᐱᖓᓱᓂᒃ ᓄᓇᓕᖕᓂ ᑕᑯᒃᓴᐅᑎᑕᐅᔪᓂᒃ ᓇᐅᔮᓂ, ᑲᖏᖅᖠᓂᕐᒥ, ᐊᒻᒪ ᖃᒪᓂ'ᑐᐊᕐᒥ (ᑕᑯᓗᒍᑦᑕᐅᖅ ᑐᕌᒐᖅ 1.2).
• ᖃᐅᔨᓴᕐᓂᕐᒧᑦ ᓯᕗᓪᓕᖅᐸᐅᔾᔭᐅᓯᒪᔪᑦ ᐆᒪᔪᓕᕆᓂᕐᒧᓪᓗ ᖃᐅᔨᓴᕐᓂᕆᔭᐅᔪᑦ: ᑕᐃᒪᐃᔾᔪᑎᖃᖅᖢᓂ ᓄᕙᒡᔪᐊᕐᓇᖅ-19−ᒧᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᔭᕆᐊᓕᖕᓄᑦ, ᐱᓕᕆᖃᑎᒌᖕᓂᖅ ᓇᓗᓇᐃᖅᓯᓂᐊᕐᓗᓂ ᐱᑕᖃᙱᓐᓂᕆᔭᖏᓐᓂᒃ ᖃᐅᔨᓴᕐᓂᕐᒧᓪᓗ ᓯᕗᓪᓕᖅᐸᐅᔾᔭᐅᓯᒪᔪᓂᒃ ᐱᕙᒌᔭᖅᑕᐅᓚᐅᖅᓯᒪᔪᓂᒃ 2021−ᒧᑦ ᐅᖓᕙᕆᐊᖅᑕᐅᓚᐅᖅᐳᖅ. ᔫᓂ 2021−ᒥᑦ ᑐᒃᑐᓂ ᖃᐅᔨᓴᕇᓚᐅᖅᐳᑦ ᓄᓇᕗᑦ ᒐᕙᒪᖓᓂ.

ᑐᕌᒐᖅ 3.3: ᐱᕙᓪᓕᐊᓂᖃᖅᓯᒪᔪᑦ ᓇᓗᓇᐃᖅᓯᓂᕐᒥᑦ ᓴᐳᔾᔨᓂᕐᒥᓪᓗ ᐃᓕᖅᑯᓯᕐᒥᑦ ᐃᑲᔫᑎᓂᑦ ᐅᖃᕈᓐᓇᖅᑐᓂᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᐅᑉ ᐅᓂᒃᑳᖓᓂᑦ.

ᖃᓄᐃᑉᐸᓪᓕᐊᓂᖓ/ᖃᓄᐃᑉᐸᓪᓕᐊᓂᖓ:

• ᓂᐅᕕᖅᑎᒃᑯᑦ ᐃᓂᖅᑎᕈᑎᒋᓚᐅᖅᑕᖓᑦ ᐊᒻᒪ ᑐᑭᓕᐅᖅᑕᐅᓂᖓ: ᐋᖅᑭᒋᐊᖅᑎᑦᑎᒃᑲᓐᓂᔾᔮᙱᑦᑐᑦ ᐅᕝᕙᓘᓐᓃᑦ ᑐᑭᓕᐅᖅᓯᒪᔪᓂᒃ ᐱᓕᕆᐊᒃᓴᓂᒃ ᒫᓐᓇ ᐸᕐᓇᒃᑕᐅᔪᖃᙱᑦᑐᖅ ᐃᑦᑕᕐᓂᓴᖃᕐᕕᖕᒧᑦ. ᓇᔪᖅᑕᐅᔪᖅ ᐅᐸᒐᒃᓴᐅᙱᖦᖢᓂ ᓴᖅᑭᔮᖅᑎᑕᐅᔾᔮᙱᖦᖢᓂᓗ ᐳᓚᕋᖅᑐᓄᑦ ᕿᓂᕐᕕᐅᔪᓐᓇᙱᖦᖢᓂ.
• ᓇᐅᑦᑎᖅᓱᖅᓯᓂᕐᒧᑦ ᐱᓕᕆᐊᖑᕙᒃᑐᖅ ᐃᓕᖅᑯᓯᑐᖃᕐᓄᑦ ᐊᑐᖅᑕᐅᔪᓐᓇᖅᑐᓄᑦ ᖁᐊᖅᓵᕐᓇᖅᑐᒦᑎᑦᑎᓪᓗᑎᒃ: ᐱᖓᓱᓪᓗᐊᑕᕐᓂᒃ ᐃᓕᖅᑯᓯᑐᖃᕐᓄᑦ ᐊᑐᖅᑕᐅᔪᓐᓇᖅᑐᓂᒃ ᐃᓂᖃᖅᑐᓂᒃ ᑕᕝᕙᓂ ᐃᓂᒥ (ᓲᕐᓗ ᐃᒪᓐᓇ, ᓂᐅᕕᖅᑎᒃᑯᑦ ᐃᒡᓗᕐᔪᐊᕕᓂᖏᑦ) ᖃᐅᔨᒪᔭᐅᕗᑦ ᖁᐊᖅᓵᕐᓇᖅᑐᒦᓐᓂᖏᓐᓂᒃ, ᑕᒪᓐᓇ ᑐᙵᕕᖃᖅᑎᑕᐅᓪᓗᓂ ᑭᖑᓂᑦᑎᓐᓂ ᓇᐅᑦᓯᖅᓱᖅᓯᓂᕆᔭᐅᓚᐅᖅᓯᒪᔪᒥᒃ. ᒥᑭᑦᑐᓂᒃ ᑲᒪᒋᔭᖃᖅᑐᖃᓚᐅᖅᐳᖅ ᓴᓗᒻᒪᖅᓴᐃᔪᖃᖅᖢᓂᓗ ᑕᐃᑲᓂ ᐃᓂᒥ ᑕᒪᑐᒪᓂ ᐊᕐᕌᒍᒥ, ᑭᓯᐊᓂᓗᑦᑕᐅᖅ ᖃᖓᙳᕌᖓᑦ ᓇᐅᑦᑎᖅᓱᖅᓯᓂᕐᒧᑦ ᐱᓕᕆᐊᒃᓴᓂᒃ ᓴᖅᑭᑦᑐᖃᓚᐅᙱᓚᖅ ᑕᐃᒪᐃᔾᔪᑎᖃᖅᖢᓂ ᓄᕙᒡᔪᐊᕐᓇᖅ-19−ᒧᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓱᓕᑦᑕᖅᑎᑕᐅᔪᓂᒃ; ᓂᕆᐅᒋᔭᐅᔪᑦ ᐱᒋᐊᓛᕐᓂᖏᓐᓂᑦ 2022-23.
• ᓈᓴᖅᑕᐅᔪᑦ ᐃᓕᖅᑯᓯᖃᕐᕖᑦ: ᐃᓕᖅᑯᓯᕆᔭᐅᔪᒃᑯᑦ ᐃᑲᔫᑎᒃᓴᓂᒃ ᐊᐅᓚᑦᑎᓂᕐᒧᑦ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑦ ᑎᑎᕋᖅᑕᐅᒋᐊᕐᖓᓚᐅᖅᐳᖅ PCA−ᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᑲᔫᑕᐅᓇᓱᒃᖢᑎᒃ ᐊᓂᒍᕈᑕᐅᓪᓗᑎᒃ ᐊᒃᑐᐊᓂᓕᖕᓄᑦ ᐊᐅᓚᑦᑎᔾᔪᑎᓄᑦ ᐸᕐᓇᐅᑎᓄᑦ ᑎᑭᑕᐅᓇᓱᒃᑐᓄᑦ ᐊᒻᒪ ᓯᕗᓪᓕᐅᑎᔭᕆᐊᓕᖕᓄᑦ ᐃᓕᖅᑯᓯᕆᔭᐅᔪᒧᑦ ᐃᑲᔫᑎᒃᓴᓂᒃ ᐊᐅᓚᑦᑎᓂᕐᒧᑦ ᐱᓕᕆᐊᖑᒋᐊᓕᖕᓄᑦ UNP−ᑯᓐᓂ ᑲᓇᑕᒥ ᐅᒃᑯᓯᒃᓴᓕᐅᑉ ᒥᓐᖑᐃᖅᓯᕐᕕᖑᓂ. ᑎᑎᕋᖅᑕᐅᒋᐊᖓᖅᑐᖅ ᐸᕐᓇᐅᑎ ᑐᕌᒐᖃᖅᑐᖅ ᒪᕐᕉᓐᓂᑦ ᐱᖓᓱᓂᓪᓘᓐᓃᑦ ᐱᒻᒪᕆᐅᔪᓂᑦ ᐃᓕᖅᑯᓯᕐᓄᑦ ᐃᓂᒋᔭᐅᔪᓂᑦ ᓇᓗᓇᐃᖅᑕᐅᓯᒪᔪᓂᑦ ᐅᖃᐅᔾᔪᐃᓂᕐᒥᑦ UPMC-ᑯᓐᓄᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖑᓄᑦ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᖏᓄᑦ ᓇᓗᓇᐃᔭᐃᑦᓱᑎᓪᓗ ᐱᓕᕆᔾᔪᓯᕐᒥᑦ ᐊᑐᓕᖅᑎᑦᓯᓂᕐᒥᑦ ᐊᑦᑐᐊᓂᓕᓐᓂᑦ ᑐᕌᒐᕐᓂᑦ. ᐸᕐᓇᐅᑎ ᕿᒥᕐᕈᔭᐅᑐᐃᓐᓇᕆᐊᖃᓕᖅᑐᖅ UPMC−ᑯᓐᓄᑦ, ᐊᒻᒪ PCA−ᑯᓐᓄᑦ ᓂᕆᐅᒃᑐᖅ ᐱᐊᓂᒃᑕᐅᓛᕐᓂᖓᓂᒃ 2022-23−ᒥ.

---

---

ᑭᖑᓪᓕᕐᒥ ᐱᓕᕆᐊᒃᓴᑦ

• ᑭᖑᓪᓕᖅᐹᖅᓯᐅᑎᓂᒃ ᐋᖅᑭᒃᓱᐃᓂᖅ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᕙᒌᔭᖅᑕᐅᓯᒪᔪᒥᒃ ᐃᓄᐃᓪᓗ ᖃᐅᔨᒪᓂᖏᓐᓄᑦ ᐊᑐᖅᑕᐅᖃᑦᑕᕋᔭᖅᑐᒥᒃ ᐅᑯᑎᒎᓇᖅ, UPMC−ᑯᓐᓄᑦ ᐃᓄᐃᓪᓗ ᖃᐅᔨᒪᓂᖏᓐᓄᑦ ᐱᓕᕆᖃᑎᒌᒃᐸᒃᑐᓄᑦ;
• ᓴᙱᓕᑎᑦᓯᓂᕐᒥᑦ ᐱᔪᓐᓇᕐᓂᖓᓂᑦ UPMC-ᑯᑦ ᐃᓕᓐᓂᐊᑎᑦᓯᓂᕐᒥᑦ ᐃᓚᒋᔭᐅᔪᓂᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓄᑦ ᐃᑲᔫᖅᑕᐅᔾᔪᑎᒃᓴᖏᓄᓪᓗ ᐊᖏᕈᑎᒥᑦ, ᒐᕙᒪᓕᕆᓂᕐᒥᑦ, ᐱᓕᕆᐊᖏᓐᓂᓪᓗ ᒥᕐᖑᐃᖅᓯᕐᕕᒻᒥᑦ ᐊᐅᓚᑦᓯᓂᕐᒥᑦ, ᐱᐅᓯᕚᓪᓕᑎᑦᓯᓂᕐᒥᓪᓗ ᑲᑎᒪᔨᕋᓛᑦ ᐊᐅᓚᑦᓯᓂᖏᓐᓂᑦ;
• ᑲᔪᓯᑎᓪᓗᒍ ᐱᕙᓪᓕᐊᓂᕆᔭᐅᔪᖅ ᒥᕐᖑᐃᖅᓯᕐᕕᖕᒥ ᓄᓇᒥᙶᖅᑐᓂᒃ ᓱᓕᔪᓂᒃ ᖃᐅᔨᓴᕈᑎᓂᒃ;
• ᕿᒥᕐᕈᓗᒋᑦ ᖃᐅᔨᓴᕐᓂᕐᒧᑦ ᓯᕗᓪᓕᐅᔾᔭᐅᓂᓖᑦ ᐊᑕᐅᑦᑎᒃᑯᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓂᒃ.
• ᓴᐱᒋᐊᖅᑎᑦᑎᓗᑎᒃ ᐱᕙᓪᓕᐊᑎᑦᑎᓂᕐᒥᒃ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᒃᓴᓂᒃ ᓇᐅᑦᑎᖅᓱᕐᓂᕐᒧᑦ ᐱᓕᕆᐊᒃᓴᓂᒃ; ᐊᒻᒪᓗ
• ᓴᕿᒥᕐᕈᓗᒋᑦ ᖃᐅᔨᓴᕐᓂᕐᒧᑦ ᓯᕗᓪᓕᐅᔾᔭᐅᓯᒪᔪᑦ UPMC−ᑯᓐᓄᑦ (ᐅᒃᑯᓯᒃᓴᓕᐅᑉ ᒥᕐᖑᐃᓯᕐᕕᖓᓄᑦ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᖏᓄᑦ ).