ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᕿᑎᕐᒥᐅᑦ ᐃᓄᐃᑦ ᖁᕕᐊᓲᑎᖃᖅᐳᑦ ᓇᓪᓕᐅᓐᓂᖓᓂᑦ ᐅᑭᐅᑦ ᖁᓕᑦ ᓇᓂᔭᐅᓚᐅᕐᓯᒪᓂᖓ ᐅᒦᔭᕈᑕᐅᔪᕕᓂ ᑯᐃᓐ ᐅᒥᐅᖁᑖ ᐃᕆᐸᔅ

ᐱᕙᑦᓕᐊᔪᑎᒍᑦ ᓴᕿᑕᐅᔪᑦ

ᐃᓄᐃᑦ ᐅᖃᐅᓯᒃᑯᑦ ᐊᑐᓚᐅᖅᓯᒪᔪᓂᑦ ᐃᑦᑕᕐᓂᓴᓂᓪᓗ ᐅᓂᒃᑳᖏᑦ ᖃᐅᔨᓴᖅᑎᓂᑦ ᓇᓂᓯᓚᕿᑎᑦᓯᓚᐅᕐᐳᑦ ᑐᓴᐅᒪᔭᐅᒻᒪᕆᑦᑐᒥᑦ ᓯᓚᕐᔪᐊᓕᒫᒥ ᕗᕋᐃᖕᓕᓐ ᐊᐅᓚᖅᓂᖓ ᐅᒦᔭᕈᑕᐅᔪᕕᓂ

ᐅᓪᓗᒥ ᓇᓪᓕᐅᑉᐳᖅ ᐊᕐᕌᒍᑦ ᖁᓕᑦ ᓇᓂᔭᐅᓚᐅᖅᑎᓪᓗᒍ ᐅᒦᔭᕈᑕᐅᔪᕕᓂ ᑯᐃᓐ ᐅᒥᐅᖁᑖ ᐃᕆᐸᔅ – ᐊᐃᑉᐸᖓ ᒪᕐᕉᒃ ᐅᒥᐊᒃ ᐅᖃᐅᑕᐅᔫᒃ ᐅᓂᒃᑳᖓᓂ 1845−ᒥ ᕗᕋᐃᖕᓕᓐ ᓇᒧᓐᖓᐅᕙᓪᓕᐊᓂᕆᓚᐅᖅᑕᖓᓄᑦ. ᐃᑲᔪᖅᑕᐅᓪᓗᑎᒃ ᐃᓄᐃᑦ ᐅᓂᒃᑲᐅᓯᑐᖃᖏᓐᓄᑦ, ᓇᓂᔭᐅᓂᖓ ᑯᐃᓐ ᐅᒥᐊᖁᑖ ᐃᕆᐸᔅ 2014-ᒥ ᐱᒋᐊᖅᑎᑦᑎᓚᐅᕐᐳᖅ ᖃᔅᓯᑲᓪᓚᖕᓂᒃ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᓂᐊᖅᑏᑦ ᖃᐅᔨᓇᓱᐊᕐᓂᖏᓐᓂᑦ. ᑕᒪᓐᓇ ᓴᖅᑮᓚᐅᖅᐳᖅ ᐅᔾᔨᕐᓇᖅᑐᒻᒪᕆᖕᓂᒃ ᖃᐅᔨᓴᖅᓯᓂᕐᒧᑦ ᐱᓕᕆᐊᖑᔪᓂᒃ ᑕᐃᑲᓂ ᐃᑦᑕᕐᓂᓴᖃᕐᕕᖓᓂ ᖃᓂᒋᔭᖓᓂᓗ ᐃᓚᒋᔭᐅᓪᓗᓂ ᑭᖑᓂᖓᒍᑦ ᐃᓂᖓ ᑯᐃᓐ ᐅᒥᐅᖁᑖ ᑎᐅᕐᕈᕐ 2016−ᒥ ᓇᕝᕚᖅᑕᐅᓪᓗᑎᒡᓗ 1,500 ᐅᖓᑖᓃᑦᑐᑦ ᐃᕆᐸᔅ ᐱᖁᑎᑐᖃᒥᓂᖏᑦ.

ᐅᒦᔭᖅᑐᑦ ᖁᕕᐊᓲᑕᐅᑎᓪᓗᒍ ᐅᖅᓱᖅᑑᖅᒥ, ᐋᓐᑐᕈ ᑳᒻᐳᓪ, ᐊᖓᔪᒃᖠᖅ ᐊᖓᔪᒃᖄᖅ ᑐᖓᓕᐊ ᐊᐅᓚᑦᑎᓂᕐᒧᑦ, ᑭᒡᒐᕐᑐᐃᓪᓗᓂ ᕌᓐ ᕼᐊᓪᒪᓐᒥᒃ, ᐊᖓᔪᒃᖄᖅ ᐊᒻᒪ ᐊᐅᓚᑎᔨᒻᒪᕆᖕᒥᒃ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ, ᐃᓚᒋᔭᐅᓪᓗᓂ ᐋᓚᓐ ᐊᒡᓘᒃᑲᖅ, ᐊᖏᔪᖅᑳᖅ ᓇᑦᑎᓕᒃ ᐅᑐᖅᑲᖅᑲᕐᕕᒃ ᑲᑐᔾᔨᖃᑎᒌᓄᑦ ᐊᒻᒪ ᑲᑎᒪᔨᐅᖃᑕᐅᔪᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᓄᑦ, ᖁᕕᐊᓱᖃᑎᒌᓚᐅᕐᐳᑦ ᓇᓪᓕᐅᓐᓂᖅᓯᐅᖅᑕᐅᑎᓪᓗᒍ ᑖᓐᓇ ᐅᒦᔭᕈᑕᐅᔪᕕᓂ. ᐃᓂᒋᔭᐅᔫᒃ ᑲᔪᓯᑦᓯᐊᖁᓪᓗᒋᒃ ᐃᑦᑕᕐᓂᓴᓕᕆᓂᕐᒥ ᖃᐅᔨᓴᖅᑕᐅᓂᖓ ᑯᐃᓐ ᐅᒥᐅᖁᑖ ᐃᕆᐸᔅ ᐊᔪᕐᓇᕋᔭᓚᐅᕐᐳᑦ ᖃᐅᔨᒪᔪᖃᓚᐅᓐᖏᑉᐸᑦ ᐃᑲᔪᖅᑕᐅᓚᐅᓐᖏᑉᐸᑕᓗ ᐅᖅᓱᖅᑑᖅᒥᐅᑕᓄᑦ ᓄᓇᕘᓕᒫᒥᓗ, ᐊᒥᓱᓪᓗ ᑭᒃᑯᑐᐃᓐᓇᐃᑦ ᐃᑲᔪᓚᐅᓐᖏᑉᐸᑕ, ᓲᕐᓗ ᐃᓛᒃᑰᖅᑐᑦ ᑮᓇᐅᔭᓕᐅᕋᓱᒃᑎᐅᓐᖏᑦᑐᓪᓗ ᑲᑐᔾᔨᖃᑎᒌᑦ ᑕᓐᓇ ᑲᔪᓯᓇᔭᓚᐅᓐᖏᑦᑐᖅ.

ᐱᓕᕆᐊᖑᖃᑎᒌᒍᑕᐅᓯᒪᔪᑦ ᐃᓄᐃᑦ ᐱᓕᕆᖃᑎᒋᔭᖏᓐᓄᑦ ᐊᕐᕌᒍᕋᓴᖕᓄᑦ ᐃᑲᔫᑎᖃᖅᓯᒪᔪᑦ ᖃᑦᓯᑲᓪᓚᓐᓂᑦ ᐊᓂᒍᐃᒍᑕᐅᓪᓗᑎᒃ, ᐃᓚᒋᔭᐅᓪᓗᑎᒃ: ᓴᖅᑭᖅᑕᐅᓂᖏᒃ ᐅᒦᔭᕈᑕᐅᔪᕕᓃᒃ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐃᓐ ᐅᒥᐅᖁᑖ ᑎᐅᕐᕈᕐ ᑲᓇᑕᒥ ᐃᑦᑕᕐᓂᓴᖃᕐᕖᒃ 2015−ᒥ, ᓯᕗᓪᓕᖅᐹᖑᓪᓗᑎᒃ ᑲᓇᑕᒥ ᐃᑦᑕᕐᓂᓴᖃᕐᕕᒃ ᓄᓇᕗᒻᒥ ᑲᑐᔾᔨᖃᑎᒌᒍᑕᐅᕗᖅ ᐊᐅᓚᑕᐅᓗᓂ ᐃᓄᖕᓄᑦ ᓇᑦᑎᓕᖕᒥ ᐅᑐᖅᑲᖅᑲᕐᕕᒃ ᑲᑐᔾᔨᖃᑎᒌᓄᑦ ᐊᒻᒪ ᒥᕐᖑᐃᓯᕐᕕᓕᕆᔨᒃᑯᓐᓄ ᑲᓇᑕᒥ, 2019−ᒥ ᐊᑎᓕᐅᖅᑕᐅᓚᐅᖅᑐᖅ ᓄᓇᒥᒃ ᓇᖕᒥᓂᖃᖃᑕᐅᔪᓄᑦ ᐊᖏᖃᑎᒌᒍᑦ ᒪᓕᓪᓗᒍ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑎᒃᑯᓐᓄᑦ ᐊᒃᑐᐊᓂᖏᑦ ᒪᓕᓪᓗᖏᑦ ᐅᑎᖅᑎᑕᐅᔪᓄᑦ ᐱᖁᑎᑐᖃᕐᓄᑦ, ᐊᑎᓕᐅᖃᑎᒌᒍᑕᐅᔪᖅ ᐊᕐᕌᒍᓄᑦ ᖁᓕᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᖃᑎᒌᒍᑎ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ 2023−ᒥ.

ᒥᕐᖑᐃᓯᕐᕕᒃ ᑲᓇᑕᒥ ᐊᒻᒪ ᓄᓇᕗᒻᒥ ᐃᓄᐃᑦ ᐱᓕᕆᖃᑎᒌᒃᐳᑦ ᓴᐳᑎᔭᐅᓯᒪᖁᓪᓗᒋᑦ ᓄᓇᒥᓐᖔᖅᑐᑦ ᐊᒻᒪ ᐃᓕᖅᑯᓯᕐᒨᖓᔪᑦ ᐃᑦᑕᕐᓂᓴᐃᑦ ᐊᒥᖅᑳᕈᑕᐅᖁᓪᓗᒋᓪᓗ ᐅᓂᒃᑳᑦ ᐱᓐᓇᕆᔭᐅᔪᓂ ᐃᓂᖃᖅᑐᑦ ᓲᕐᓗ ᐅᒦᔭᕈᑕᐅᔪᕕᓃᒃ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐃᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᒃ ᑲᓇᑕᒥ. ᓇᑦᑎᓕᖕᒥ ᐅᑐᖅᑲᖅᑲᕐᕕᒃ ᑲᑐᔾᔨᖃᑎᒌᑦ, ᐅᖅᓱᖅᑑᖅᒦᑦᑐᖅ, ᐊᐅᓚᑦᑎᓲᖑᕗᑦ ᐅᒥᐊᕕᓂᕐᒥ ᑲᒪᔨᐊᑕ ᐊᑐᒐᒃᓴᐃ ᐱᓕᕆᖃᑎᖃᖅᐸᒃᑐᑎᓪᓗ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᓴᐳᑎᔭᐅᖁᓪᓗᒋᑦ ᐊᑐᐃᓐᓇᕈᖅᑕᐅᖁᓪᓗᒋᓪᓗ ᐅᓂᒃᑳᖏᑦ ᑕᒪᑐᒪ ᓄᓇᕐᔪᐊᕐᒥ ᐃᓕᑕᕆᔭᐅᓯᒪᔫᒃ ᐃᓂᖏᒃ.

ᐅᖃᖅᑕᐅᓯᒪᔪᑦ

"ᓇᓂᔭᐅᓚᐅᕐᑎᓪᓗᒍ ᐅᒦᔭᕈᑕᐅᔪᕕᓂ ᑯᐃᓐ ᐅᒥᐅᖁᑖ ᐃᕆᐸᔅ, ᑐᑭᓯᐅᒪᓂᖅᓴᐅᓕᖅᐳᒍᑦ ᕗᕋᐃᖕᑭᓕᓐ ᐊᐅᓚᖅᓂᖓ ᒥᑦᓵᓄᑦ ᐃᑎᓂᖅᓴᐅᓕᖅᑐᓂᓗ ᑲᑎᑕᐅᓂᖏᓐᓄᑦ ᑐᓴᐅᒪᔭᐅᔪᑦ ᐅᐊᓕᓂᕐᒥ ᖃᐅᔨᓴᖅᑐᓕᕆᔨᒻᒪᕇᑦ ᐊᒻᒪᓗ ᐃᑲᔪᖅᓯᒪᓂᖏᑦ ᐃᓄᐃᑦ ᐊᐅᓚᑦᑎᖃᑕᐅᓂᕐᒧᑦ ᐱᓕᕆᖃᑎᖏᑦ, ᑐᓂᓯᑦᓯᐊᕐᒪᑕ ᒥᓐᓂᒐᑎᒃ ᖃᐅᔨᒪᓂᕐᒥᓂᒃ, ᐊᔪᐃᓐᓇᑦᓯᐊᖅᑐᑎᒃ, ᐱᓕᕆᔪᓐᓇᕐᓂᕐᒥᒍ. ᐅᓪᓗᒥ ᖁᕕᐊᓲᑕᐅᑦᓯᐊᖅᐳᖅ ᐱᓕᕆᖃᑎᒌᖕᓂᖅ − ᐃᓄᓐᓄᑦ ᐱᒻᒪᕆᐊᓘᔪᖅ ᐊᔪᓐᖏᑎᑦᓯᑲᓐᓂᕈᓐᓇᕐᓂᖓ ᐱᓕᕆᖃᑎᒌᑦᓯᐊᕐᓂᐅᑉ ᐱᔾᔪᑎᖃᑦᓯᐊᑎᓪᓗᒍ ᑐᕌᖅᑕᐅᔪᒪᔪᖅ. ᐅᕙᖓ, ᑐᓴᕈᒪᖃᑕᐅᓪᓗᖓ ᕗᕋᐃᖕᑭᓕᓐ ᒥᒃᓵᓄᑦ ᑲᓇᑕᓕᒫᒥᐅᑦ ᓄᓇᕐᔪᐊᕐᒥᐅᓄᓪᓗ, ᕿᓚᓈᐳᖓ ᓴᖅᑭᓂᐊᖅᑐᓂᑦ ᑭᖑᓪᓕᕐᒥ ᐅᓂᒃᑳᖅᑕᐅᓯᒪᔪᓂᒃ ᐊᕐᕌᒍᓂ ᐊᒡᒋᖅᑐᓂ."

"ᐅᑭᐅᑦ ᖁᓕᑦ ᐊᓂᒍᖅᑐ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᒐᕙᒪᑐᖃᒃᑯᓪᓗ ᐱᓕᕆᖃᑎᒋᕙᒃᑕᕗᓪᓗ ᓴᖅᑭᑎᑦᑎᕗᑦ ᐱᓕᕆᖃᑎᒌᖕᓂᐅᑉ ᐊᑑᑎᖃᕐᓂᖓᓂᑦ, ᐃᓄᐃᑦ ᑐᓐᖓᕕᒋᔭᖓᑕ ᐃᓚᖓ ᐱᓕᕆᖃᑎᒌᑦᓯᐊᕐᓂᖅ ᐱᔾᔪᑎᖃᑦᓯᐊᑎᓪᓗᒍ ᑐᕌᖅᑕᐅᔪᒪᔪᖅ. ᐊᐅᓚᑦᑎᒐᓱᐊᑦᓯᐊᖅᓯᒪᕗᒍᑦ ᓄᓇᒥᒃ, ᖁᕕᐊᓲᑎᖃᖅᑐᑕ ᐱᐅᓯᕆᕙᓚᐅᖅᑕᖏᓐᓂᒃ, ᐊᒻᒪ ᐅᐱᒋᔭᐅᓪᓗᑎᒃ ᐃᓄᐃᑦ ᐅᓂᒃᑳᖅᑐᐊᑐᖃᖏᑦ ᖃᐅᔨᔭᐅᔾᔪᑕᐅᓚᐅᖅᑐᑦ ᑯᐃᓐ ᐅᒥᐅᖁᑖ ᐃᕆᐸᔅᒥᑦ. ᑕᒪᓐᓇ ᐱᓕᕆᖃᑎᒌᖕᓂᖅ ᑕᑯᒃᓴᐅᑎᑦᑎᑐᐃᓐᓇᓐᖏᓚᖅ ᐱᒻᒪᕆᐊᓘᓂᖓᓂᒃ ᐃᓄᐃᑦ ᐊᐅᓚᑦᑎᕙᖕᓂᖏᓐᓄᑦ ᑭᓯᐊᓂᑦᑕᐅᖅ ᑕᑯᒃᓴᐅᑎᑦᑎᒋᕗᖅ ᐱᓕᕆᐊᖃᓪᓚᕆᒍᒪᓂᑦᑎᓐᓂᒃ ᓴᐳᔾᔨᓯᒪᔪᒪᓂᕐᒥᒃ ᐊᒥᖅᑳᖃᑎᖃᕐᓂᕐᒥᒡᓗ ᐱᐅᔪᒻᒪᕆᖕᓂᒃ ᐃᓕᖅᑯᓯᑐᖃᕐᓂᒃ ᕿᑎᕐᒥᐅᓂ ᓄᓇᕐᔪᐊᓕᒫᒧᑦ."

"ᐱᓕᕆᖃᑎᒌᖕᓂᖅ ᑲᑐᔾᔨᖃᑎᒌᖕᓂᕐᓗ ᐆᒻᒪᑎᒥᐅᑕᕆᔭᐅᕗ ᒥᕐᖑᐃᓯᕐᕕᓕᕆᔨᒃᑯᓐᓄ ᑲᓇᑕᒥ ᓴᐳᔾᔨᔪᒪᓪᓗᑎᒃ ᑲᓇᑕᒥ ᐅᔾᔨᕐᓇᖅᑐᓂᒃ ᓄᓇᒥᓐᖓᖅᑐᓂᒃ ᐃᓕᖅᑯᓯᕐᒨᖓᔪᓂᓪᓗ ᐊᒻᒪ ᐅᓂᒃᑳᖅᑐᐊᓂᒃ ᑐᓴᖅᑎᑦᑎᓗᑎᒃ ᑖᒃᑯᓂᖓ ᓄᓇᓂᒃ ᓴᐳᔾᔭᐅᓯᒪᔪᓂᒃ ᓄᓇᕐᔪᐊᕐᒥ. ᐅᐱᒍᓱᑦᑎᐊᖅᐳᖓ ᖃᐅᔨᓴᖅᑐᓕᕆᓂᕐᒥ, ᓴᐳᔾᔨᓇᓱᐊᖅᑐᓂᑦ ᐊᒻᒪ ᑐᑭᓕᐅᖅᑕᐅᓯᒪᔪᓂᒃ ᐱᓕᕆᐊᖑᓯᒪᔪᓂᒃ ᐅᑭᐅᑦ ᖁᓕᑦ ᐊᓂᒍᖅᑐᓂᒃ ᐊᔾᔨᒌᓐᖏᑦᑐᓄᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑲᑐᔾᔨᑦᓯᐊᓂᒃᑯᑦ ᐱᓕᕆᖃᑎᒌᒍᑕᐅᓚᐅᕐᑐᓂᑦ ᐊᐅᓚᑦᑎᔨᐅᖃᑕᐅᔪᓄᑦ ᐃᓄᖕᓄᑦ ᐱᓕᕆᔨᐅᖃᑎᖏᓐᓂᒃ ᓇᓗᒋᔭᐅᓯᒪᔪᑦ ᕗᕋᐃᖕᑭᓕᓐ ᐊᐅᓚᖅᓂᖓ ᖃᓄᐃᓕᓚᐅᕐᒪᖔᑕ ᓴᖅᑭᑎᑦᑐᒪᓪᓗᒋᑦ. ᖁᔭᓐᓇᒦᒃ ᑲᑐᔾᔨᓪᓗᑎᒃ ᐱᓇᔪᖕᓂᖏᓐᓄᑦ, ᖃᐅᔨᒍᒥᓇᖅᑐᒻᒪᕆᐅᓂᖓ ᑐᓴᐅᒪᔭᐅᒻᒪᕆᓐᓂᖓᓗ ᐅᓂᒃᑳᖓ ᐅᒦᔭᕈᑕᐅᔪᕕᓂ ᑯᐃᓐ ᐅᒥᐅᖁᑖ ᐃᕆᐸᔅ ᒥᑦᓵᓄᑦ ᓴᖅᑭᑎᑦᑎᒍᑕᐅᓂᐊᓕᕐᒪᑕ ᑕᐅᑐᓐᖑᐊᖅᑕᐅᒍᓐᓇᖅᓯᓗᓂᓗ ᐃᓄᖕᓄᑦ ᐊᕐᕌᒍᒐᓴᖕᓄᑦ ᐊᒡᒋᖅᑐᓄᑦ."

ᓇᐃᓈᖅᓯᒪᔪᑦ ᐊᑐᓪᓚᑦᑖᖅᓯᒪᔪᑦ

• ᓇᒦᒻᒪᖔᑎᒃ 1845−ᒥ ᕗᕋᐃᖕᓕᓐ ᐊᐅᓚᖅᓂᖓ ᐅᒥᐊᒃ ᓇᓗᓇᕈᔪᓚᐅᖅᐳᖅ 150 ᐅᑭᐅᑦ ᐅᖓᑖᓄᑦ ᓯᕐ ᔮᓐ ᕗᕋᐃᖕᑭᓕᓐ ᐱᓕᕆᔨᖏᓪᓗ ᐊᓯᐅᓚᐅᖅᓯᒪᑎᓪᓗᒋᑦ 1846−ᒥ ᕿᓂᖅᑎᓪᓗᒋᑦ ᐅᐊᖕᓇᖅᐸᓯᐅᑉ ᐊᖅᑯᑖᓂᑦ. ᑯᐃᓐ ᐅᒥᐅᖁᑖ ᐃᕆᐸᔅ ᓇᓂᔭᐅᓚᐅᕐᑐᖅ 2014-ᒥ ᐊᒻᒪ ᑯᐃᓐ ᐅᒥᐅᖁᑖ ᑎᐅᕐᕈᕐ ᓇᓂᔭᐅᓚᐅᖅᑐᖅ 2016-ᒥ.
• ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᕿᓂᖅᑎᓪᓗᒋᑦ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐃᓐ ᐅᒥᐅᖁᑖ ᑎᐅᕐᕈᕐ, ᐱᓕᕆᖃᑎᖃᖅᑐᑎᒃ ᐃᓄᖕᓂᒃ, ᐊᖏᓛᖑᖃᑕᐅᕗᖅ, ᐱᔭᕆᐊᑐᓛᖑᖃᑕᐅᓪᓗᓂᓗ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᕐᓂᒃ ᐱᓕᕆᐊᖑᖃᑦᑕᖅᓯᒪᔪᓂᒃ ᑲᓇᑕᒥ ᑭᖑᓂᑦᑎᓐᓂ ᐊᑐᖅᑕᐅᖃᑦᑕᖅᓯᒪᔪᓂᒃ ᐱᓕᕆᓂᐅᔪᓂ.
• ᐅᒦᔭᕈᑕᐅᔪᕕᓂ ᑯᐃᓐ ᐅᒥᐅᖁᑖ ᐃᕆᐸᔅ ᐃᓚᓕᐅᔾᔭᐅᓚᐅᖅᐳᖅ ᑲᓇᑕᒥ ᐃᑦᑕᕐᓂᓴᖃᕐᕕᖕᓄᑦ ᐃᓕᓴᕆᔭᐅᓂᖓ 2015−ᒥ, ᓴᐳᔾᔭᐅᑦᓯᐊᖁᓪᓗᒍ ᐅᒦᔭᕈᑕᐅᔪᕕᓂ ᑲᓇᑕᒥ ᒥᕐᖑᐃᓯᕐᕕᖕᓂ ᐱᖁᔭᖓ ᒪᓕᒃᑐᒍ. ᑯᐃᓐ ᐅᒥᐅᖁᑖ ᑎᐅᕐᕈᕐ ᐃᓚᓕᐅᔾᔭᐅᓚᐅᖅᐳᖅ 2017−ᒥ, ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᑲᐃᓐᓇᖅᑕᖏᓐᓂᑦ ᐊᑐᓕᖁᔭᐅᓚᐅᖅᑎᓪᓗᒍ.
• ᐊᕐᕌᒍᑦ ᖁᓕᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓄᑦ ᐃᑲᔫᖅᑕᐅᔾᔪᑎᒃᓴᖏᓄᓪᓗ ᐊᖏᕈᑦ ᐅᒦᔭᕈᑕᐅᔪᕕᓃᒃ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐃᓐ ᐅᒥᐅᖁᑖ ᑎᐅᕐᕈᕐ ᐊᑎᓕᐅᖅᑕᐅᓚᐅᖅᑐᖅ ᐊᕗᓐᓂᕕᒃ 2023−ᒥᑦ ᓄᓇᕗᒻᒥ ᐊᖏᕈᑎᑎᒍᑦ.

ᐊᒃᑐᐊᔪᑦ ᑎᑎᖅᑲᑦ

• ᐅᓂᒃᑳᖅᓯᒪᓂᖓ: ᓇᓃᓐᓂᖓ ᑯᐃᓐ ᐅᒥᐅᖁᑖ ᐃᕆᐸᔅ
• ᐃᓄᒃᑎᑑᖓᔪᖅ ᐱᕙᑦᓕᐊᔪᑎᒍᑦ ᓴᕿᑕᐅᔪᑦ

ᐊᒃᑐᐊᓂᔪᒃ ᑕᑯᓂᐊᖅᑕᐅᔪᓐᓇᖅᑐᑦ ᐅᕗᖓ

• ᒥᕐᖑᐃᓯᕐᕖᑦ ᑲᓇᑕᒥ (ᖃᓪᓗᓈᑎᑐᑦ ᑭᓯᐊᓂ)
• ᒥᕐᖑᐃᓯᕐᕖᑦ ᑲᓇᑕᒥ ᐃᑦᑕᕐᓂᑕᓕᕆᔩᑦ (ᖃᓪᓗᓈᑎᑐᑦ ᑭᓯᐊᓂ)
• ᐅᒦᔭᕈᑕᐅᔪᕕᓃᒃ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐃᓐ ᐅᒥᐅᖁᑖ ᑎᐅᕐᕈᕐ ᑲᓇᑕᒥ ᐃᑦᑲᕐᓂᑕᖃᕐᕖᒃ (ᖃᓪᓗᓈᑎᑐᑦ ᑭᓯᐊᓂ)
• ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪ ᐊᖏᖃᑎᒌᒍᑦ − ᐅᒦᔭᕈᑕᐅᔪᕕᓃᒃ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐃᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᑕᖃᕐᕖᑦ

ᖃᐅᔨᒋᐊᕐᕕᒃᓴᑦ

ᑲᐃᑦᓕᓐ ᐸᐅᕗ
ᐱᕙᓪᓕᐊᔪᓄᑦ ᑎᑎᕋᖅᑎ
ᑎᑎᕋᕐᕕᐊ ᒥᓂᔅᑕ ᐊᕙᑎᓕᕆᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᓪᓗ ᑲᓇᑕᒥ
819-230-1557
kaitlin.power@ec.gc.ca

ᑐᓴᒐᒃᓴᓕᕆᔨᑦ
ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ
855-862-1812
pc.media@pc.gc.ca