---

ᖁᑦᑎᑦᑐᖅᐸᖅ ᒥᕐᖑᐃᓯᕐᕕᒻᒥᑦ ᐊᐅᓚᑦᑎᓂᕐᒧᑦ ᐸᕐᓇᐅᑎ (2009) ᓇᓗᓇᐃᖅᓯᓯᒪᔪᖅ ᐊᑯᓂᐅᔪᒧᑦ ᐱᓕᕆᐊᖑᔪᒪᔪᒧᑦ ᑐᕌᒐᖏᓐᓂᑦ ᐊᒻᒪ ᐊᐅᓚᑦᑎᓂᕐᒧᑦ ᑐᕌᒐᖏᓐᓂᑦ ᑲᓇᑕᐅᑉ ᐅᑭᐅᖅᑕᖅᑐᖓᓐᓄᑦ ᐊᒻᒪ ᐊᐃᑉᐸᖓ ᐊᖏᓂᖅᐸᐅᔪᖅ ᑲᓇᑕᓕᒫᒥᑦ ᒥᕐᖑᐃᓯᕐᕕᒻᒧᑦ. ᑖᓐᓇ ᐱᕙᒌᔭᖅᑕᐅᓯᒪᔪᖅ ᒪᓕᒃᐳᖅ ᓄᓇᕗᒻᒥ ᐊᖏᖃᑎᒌᒍᑕᐅᓯᒪᔪᒥᒃ, ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑕᐅᔪᓐᓇᖅᑐᓄᓪᓗ ᐊᖏᖃᑎᒌᒍᑕᐅᓯᒪᔪᒥᒃ ᐊᐅᔪᐃᑦᑐᖅᒧᑦ, ᐊᒻᒪ ᖁᑦᑎᓂᖅᐸᖅ ᓯᕐᒥᓕᒃ ᑲᓇᑕᒥ ᒥᕐᖑᐃᖅᓯᕕᒃ (ᑕᐃᔭᐅᓂᐊᖅᖢᓂ ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎ) ᐊᒻᒪ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ (PCA) ᐱᓕᕆᐊᒃᓴᖏᑦ. ᒪᓕᒃᑐᖃᖅᖢᓂ ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᒥᒃ ᖁᑦᑎᒃᑐᖅ ᒥᕐᖑᐃᖅᓯᕐᕕᒃ (QuNP) ᑲᑐᔾᔨᖃᑎᒌᒃᖢᑎᒃ ᐊᐅᓚᑕᐅᕗᑦ ᖁᑦᑎᒃᑐᖅ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᓕᕆᔨᒃᑯᑦ ᐊᐅᓚᑦᑎᔨᓪᓗ ᑲᑎᒪᔨᕋᓛᓄᑦ (JPMC).

ᖁᑦᑎᖕᓂᖅᐹᖅ ᒥᕐᖑᐃᖅᓯᕐᕕᐊᓂ ᐊᐅᓚᑦᑎᓂᕐᒧᑦ ᐸᕐᓇᐅᑎ ᒫᓐᓇᐅᔪᖅ ᐊᑐᓕᖅᑐᖅ ᐊᒻᒪ ᐊᑐᓕᖅᖢᓂ ᐊᕐᕌᒍᑦ ᖁᓕᑦ ᒪᓕᒐᖓ ᐊᑐᕈᓐᓇᕐᓂᐊᓕᖅᖢᓂ (2009-2019). ᓄᑖᖅ ᐊᐅᓚᑦᑎᓂᕐᒧᑦ ᐸᕐᓇᐅᑎ ᑎᑎᕋᖅᑕᐅᙵᓚᐅᖅᑐᖅ ᐊᑐᐃᓐᓇᐅᓕᖅᖢᓂᓗ ᑭᒃᑯᓕᒫᓄᑦ ᑐᓴᕋᓱᖕᓂᖕᒧᑦ 2020−ᒥᑦ; ᑭᓯᐊᓂᓕ, ᐃᓚᐅᓂᓕᒫᑦ ᑭᖑᕙᕆᐊᖅᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19−ᒧᑦ ᓄᓇᕐᔪᐊᒥᑦ. ᑐᓴᕋᓱᒃᐸᓪᓕᐊᔪᑦ ᒫᓐᓇ ᑲᔪᓯᕙᓪᓕᐊᕗᑦ ᐅᓪᓗᐊᓂ ᑖᔅᓱᒪ ᐅᓂᒃᑲᐅᓯᐅᑉ, ᓂᕆᐅᒋᔭᐅᓪᓗᓂᓗ ᑖᓐᓇ ᓄᑖᖅ ᐊᐅᓚᑦᑎᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᓴᖅᑭᑎᑕᐅᓛᕐᓂᖓᓂᒃ ᒪᓕᒐᓕᐅᕐᕕᒡᔪᐊᒥ 2023−ᒥ. ᒫᓐᓇᑲᐃᓐᓇᖅ, ᑐᕌᒐᐅᔪᖅ ᓯᕗᓂᑦᓴᕐᒥᑦ ᑐᑭᒧᐊᑦᑎᑦᓯᓂᕐᒥᑦ ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒻᒧᑦ ᓇᓗᓇᐃᖅᑕᐅᓯᒪᔪᖅ ᑎᑎᕋᖅᑕᐅᒋᐊᖓᖅᑐᒥᑦ ᐱᕙᒌᔭᐅᑎᒥᑦ ᑐᓴᕐᓇᖅᓯᒪᔪᖅ ᐃᓱᒪᓕᐅᕐᓂᕐᒧᑦ ᐊᔪᕐᓇᖏᒐᐃᑉᐸᑦ.

ᑖᓐᓇ ᐊᕐᕌᒍᑕᒫᑦ ᐊᑐᓕᖅᑎᑦᑎᓂᕐᒧᑦ ᓄᑖᙳᕆᐊᖅᓯᒪᔪᖅ ᑕᐃᒪᐃᓐᓂᖓᓄᑦ ᐱᑎᑦᑎᕗᖅ ᖃᓄᐃᓕᖓᓂᖓᓄᑦ ᐅᓂᒃᑲᐅᓯᕐᒥᒃ ᒥᕐᙳᐃᖅᓯᕐᕕᖕᓄᑦ ᑲᓇᑕᒥ ᑐᑦᑕᕐᕕᒋᔭᐅᔫᑉ ᑲᔪᓯᕙᓪᓕᐊᓂᕆᔭᖓᓂᒃ 2021-22−ᒥ ᐊᕐᕌᒍ ᐊᑐᓕᖅᑎᓪᓗᒍ ᖃᓄᖅᑑᕈᑎᓄᑦ ᑐᕌᒐᕆᔭᐅᔪᑦ 2009-ᒥ ᐊᐅᓚᑦᑎᓂᕐᒧᑦ ᐸᕐᓇᐅᑎᒧᑦ ᐊᒻᒪ, ᐊᔪᕐᓇᙱᑐᐊᕌᖓᑦ, ᓇᓗᓇᐃᕐᓗᒋᑦ ᒪᓕᖕᓂᖏᑦ 2020-ᒥ ᑎᑎᕋᖅᑕᐅᒋᐊᕐᖓᖅᑐᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ.

---

ᐃᓗᓕᖏᑦ

• ᓄᕙᒡᔪᐊᕐᓇᖅ-19−ᒧᑦ ᑭᒡᒍᑎᑦ
• ᓯᕗᓪᓕᐅᔾᔭᖅ 1 – ᐊᐅᓚᑦᑎᓂᐊᕐᓗᓂ ᐊᑐᖅᑕᐅᓂᖓᓂᒃ ᖁᑦᑎᓐᓂᖅᐹᖅᓴᐳᒻᒥᓗᒋᑦ ᑲᔪᓯᑎᓪᓗᒋᓪᓗ ᓄᓇᒥᙶᖅᑐᑦ ᓱᓕᓂᖏᑦ, ᐃᓕᖅᑯᓯᖏᑦ ᐊᒻᒪ ᐱᔾᔪᑎᒃᓴᖏᑦ ᐊᒻᒪ ᐅᑭᐅᖅᑕᖅᑐᒥ ᓄᓇᑐᐃᓐᓇᕐᒥ ᐊᑐᖅᑕᐅᖃᑦᑕᖅᓯᒪᔪᑦ.
• ᓯᕗᓂᐊᒍᑦ 2 – ᓇᓗᓇᐃᔭᐃᓂᖅ ᑐᑭᓯᓂᕐᓗ ᒥᕐᖑᐃᖅᓯᕐᕕᐅᑉ ᐊᕙᑎᖏᓐᓂᑦ ᖃᐅᔨᓴᕐᓂᒃᑯᑦ ᐃᓄᐃᓪᓗ ᖃᐅᔨᒪᔭᑐᖃᖏᓐᓂᑦ ᐊᒻᒪ ᐅᓂᒃᑳᖅᑐᐊᒃᑯᑦ ᐊᒻᒪ ᖃᐅᔨᒪᓂᒃᑯᑦ ᐃᓄᖕᓂᒃ ᐊᑯᓂᐊᓗᒃ ᐊᒃᑐᐊᓂᖃᖅᓯᒪᔪᓄᑦ ᒥᕐᖑᐃᖅᓯᕐᕕᖕᒧᑦ, ᐃᓚᓕᐅᑎᓗᒋᓪᓗ ᑖᒃᑯᐊ ᑐᑭᓯᒋᐊᒐᒃᓴᑦ ᐃᑦᑕᕐᓂᓴᕐᓂᒃ ᐅᓂᒃᑳᖅᑕᐅᔪᓂᒃ.
• ᓯᕗᓪᓕᐅᔭᐅᔪᒪᔪᑦ 3 – ᐱᐅᓯᒋᐊᖅᑎᓐᓂᕐᒧᑦ ᐃᓂᐅᔪᒥᑦ-ᐱᔾᔪᑎᓕᖕᒧᑦ ᐃᓂᐅᔪᒥᑦ ᓴᓗᒪᑎᑦᑎᓂᖅ ᐊᕙᑎᒥᒃ ᐊᐅᓚᑦᑎᓂᕐᒧᑦ ᐋᖅᑭᐅᒪᔪᑎᒍᑦ, ᓄᓇᓕᖕᒥᑦ ᓴᓗᒪᓴᐃᓂᖅ, ᐊᒻᒪᓗ ᐃᓂᐅᔪᒥᑦ ᐋᕿᒃᓯᓂᕐᒧᑦ.
• ᓯᕗᓪᓕᐅᔭᐅᔪᒪᔪᑦ 4 – ᓇᓗᓇᐃᖅᑕᐅᓗᑎᒃ ᐃᓄᐃᑦ ᐃᑦᑕᕐᓂᓴᖃᕐᕕᖏᑦ ᐊᒻᒪ ᐃᑦᑕᕐᓂᓴᑐᖃᐃᑦ ᒥᕐᖑᐃᖅᓯᕐᕕᖕᒥ ᖃᐅᔨᓴᖅᐸᒡᓗᒋᑦ ᑭᒡᒐᖅᑐᐃᔨᑦ ᐊᒻᒪ ᐊᔾᔨᖃᙱᑦᑐᑦ ᐃᑦᑕᕐᓂᓴᖃᕐᕖᑦ.
• ᓯᕗᓪᓕᐅᔭᐅᔪᒪᔪᑦ 5 – ᑐᓴᐅᒪᑎᓪᓗᒋᑦ ᖃᓄᐃᓕᖓᓕᕐᓂᕆᔭᖏᑦ ᖃᐅᔨᓴᓪᓚᕆᖕᓂᕐᒧᑦ ᓇᐅᑦᑎᖅᓱᕐᓂᕐᒧᓪᓗ ᐱᓕᕆᐊᖑᕙᒃᑐᒥᒃ, ᐅᖃᐅᓯᖃᓪᓚᕆᖕᓂᖅ ᓄᓇᕐᔪᐊᓕᒫᒥ ᐊᕙᑎᐅᑉ ᐊᓯᔾᔨᕐᓂᖓᓂᒃ, ᐋᖅᑭᒃᓱᐃᔪᒪᓂᕐᒥᓄᑦ ᖁᑦᑎᓂᖅᐸᖅ ᐊᑑᑎᖃᓕᖅᑎᑦᑎᓗᓂ ᑲᓇᑕᒥᐅᓄᑦ.
• ᓯᕗᓪᓕᐅᔭᐅᔪᒪᔪᑦ 6 – ᐅᔾᔨᕈᓱᓕᖅᑎᑦᓯᓂᕐᒥᑦ, ᑐᑭᓯᐅᒪᓂᕐᒥᑦ ᐃᑲᔪᖅᑐᕐᓂᕐᒥᓪᓗ ᖁᑦᑎᓂᖅᐸᖅ ᑲᓇᑕᒥᐅᓂᒃ ᐱᖃᑎᖃᕐᓗᑎᒃ, ᐳᓛᕆᐊᖅᑐᓂᒃ, ᓄᓇᓕᖕᒥᐅᓂᒡᓗ ᐊᐅᓱᐃᑦᑐᒥᐅᑦ ᖃᐅᓱᐃᑦᑐᒥᐅᓪᓗ ᐅᑯᑎᒎᓇᖅ, ᐃᓱᒪᒃᓴᖅᓯᐅᑦᑎᐊᖅᓯᒪᓂᒃᑯᑦ ᐊᑐᖅᑕᐅᕙᒃᑐᑐᖃᕐᓄᑦ ᐱᑖᕆᔭᐅᕙᒃᑐᑎᒍᑦ.
• ᓯᕗᓪᓕᐅᔭᐅᔪᒪᔪᑦ 7 – ᐅᓄᖅᓯᒋᐊᖁᓪᓗᒋᑦ ᓄᓇᓕᖕᓂ ᐳᓚᕋᖅᑐᓕᕆᔨᑦ ᐱᔪᓐᓇᕐᓂᕆᔭᖏᑦ ᐳᓚᕋᖅᑐᓕᕆᓂᕐᒧᑦ ᐃᑲᔫᑎᑦ ᐊᐅᓱᐃᑦᑐᒧᑦ ᐊᒻᒪ ᖃᐅᓱᐃᑦᑐᒧᑦ ᐊᓯᖏᓐᓂᒃ ᐱᓕᕆᖃᑎᖃᕐᓗᑎᒃ.
• ᓯᕗᓪᓕᐅᔭᐅᔪᒪᔪᑦ 8 – ᐊᐅᓚᑦᑏᓐᓇᕐᓗᑎᒃ ᖁᑦᑎᓐᓂᖅᐸᒥᒃ ᐱᓕᕆᖃᑎᒌᒡᓗᑎᒃ.
• ᓯᕗᓪᓕᐅᔭᐅᔪᒪᔪᑦ 9 – ᑐᕌᒐᖃᕈᒪᓂᕐᒧᑦ ᐅᑎᕐᕕᖃᕈᓐᓇᕐᓂᕐᒥᑦ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒥᑦ ᓄᓇᕗᒻᒥ ᒥᕐᖑᐃᖅᓯᕐᕖᑦ ᑲᓇᑕᒥ 2020-ᒥ.
• ᓯᕗᓪᓕᐅᔭᐅᔪᒪᔪᑦ 10 – ᐱᒋᐊᖅᑎᑦᑎᓗᑎᒃ, ᑲᔪᓯᑎᑦᑎᓗᑎᒃ, ᐊᒻᒪ ᐱᓕᕆᖃᑎᒌᓪᓗᐊᑕᕐᓗᑎᒃ ᖃᐅᔨᓴᖅᑐᓕᕆᓂᕐᒥᒃ, ᐃᓕᖅᑯᓯᓕᕆᓂᕐᒥᒃ ᐊᐅᓚᑦᑎᓂᕐᒥᒃ, ᐱᓕᕆᔾᔪᑎᒃᓴᓂᒃ, ᐳᓚᕋᖅᑐᓕᕆᓂᕐᒥᒃ ᐊᒻᒪ ᓂᐅᕐᕈᑎᖃᕋᓱᐊᕐᓂᕐᒥᒃ, ᐊᒻᒪ ᐃᓕᓐᓂᐊᖅᑎᑦᑎᓂᕐᒥᒃ.
• ᓯᕗᓪᓕᐅᔭᐅᔪᒪᔪᑦ 11 – ᐋᖅᑭᒃᓱᐃᓗᑎᒃ ᓇᓗᓇᐃᒃᑯᑕᓂᒃ ᐊᒻᒪ ᑎᑭᑕᐅᓇᓱᒃᑐᓂᒃ ᖁᑦᑎᓐᓂᖅᐸᓯᐅᑉ ᐊᐅᓚᑕᐅᓂᖓᓄᑦ.
• ᑲᔪᓯᓂᖃᑦᑎᐊᖅᑐᖅ ᐅᓂᒃᑲᐅᓯᖅ
• ᑭᖑᓪᓕᕐᒥ ᐱᓕᕆᐊᒃᓴᑦ

---

ᓄᕙᒡᔪᐊᕐᓇᖅ-19−ᒧᑦ ᑭᒡᒍᑎᑦ

ᒫᑦᓯ 18, 2020−ᒥ, ᒥᕐᙳᐃᖅᓯᕐᕕᓕᕆᔩᑦ ᑲᓇᑕᒥ ᒪᑐᓯᓚᐅᖅᐳᑦ ᑕᒪᐃᓐᓂᑦᑎᐊᖅ ᓄᓇᕗᒻᒥ ᐃᓂᓂᒃ ᐳᓛᕆᐊᖅᑐᓄᑦ, ᐃᓚᒋᔭᐅᓪᓗᑎᒃ ᖃᐅᔨᓴᖅᑏᑦ ᓇᖕᒥᓂᕆᔭᐅᔪᓄᓪᓗ ᓚᐃᓴᖃᖅᑎᐅᔪᑦ, ᐊᖓᔪᖅᑳᒻᒪᕆᐅᑉ ᑎᓕᓯᔾᔪᑎᖓ. ᖁᑦᑎᒃᑐᖅ ᒥᕐᖑᐃᖅᓯᕐᕕᒃ, ᑖᓐᓇ ᑎᓕᓯᔾᔪᑕᐅᔪᖅ ᐊᑐᓕᓚᐅᖅᑐᖅ 2021-22−ᒥ ᐅᑭᐅᓕᒫᑲᓴᖕᒧᑦ;ᑭᐅᔾᔪᑎᒋᓪᓗᒋᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔾᔪᓯᖏᑦ ᓄᓇᕗᒻᒥ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᒪᒃᐱᒃᑲᓐᓂᓚᐅᖅᐳᑦ ᐃᓄᖕᓄᑦ ᒫᑦᓯ 18, 2022−ᒥ ᐊᒻᒪ ᒪᒃᐱᖅᓯᒪᐃᓐᓇᖅᖢᑎᒃ ᑖᓐᓇ ᐅᓂᒃᑳᖅ ᐱᒋᐊᖅᖢᓂ. ᐱᒻᒪᕆᐅᖕᒥᔪᖅ, ᑎᓕᓯᔾᔪᑎᑦ ᐊᔪᖅᑎᑕᐅᔪᑦ ᐊᑐᓚᐅᖅᓯᒪᔾᔮᖖᒋᑦᑐᑦ ᐊᑐᓚᐅᖅᓯᒪᔾᔮᖖᒋᖦᖢᑎᒃᓗ ᓄᓇᕗᒻᒥ ᐃᓄᖕᓄᑦ, ᐃᓱᒪᖅᓱᕐᓗᑎᒃ ᐊᒻᒪ ᐱᔪᓐᓇᐅᑎᖃᕐᓗᑎᒃ ᐃᓯᕈᓐᓇᕐᓂᕐᒧᑦ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᓕᒫᖏᓐᓄᑦ ᓄᓇᕗᒻᒥ ᐱᔾᔪᑎᒋᓪᓗᒍ ᐃᓚᐅᖃᑦᑕᕐᓂᖅ ᑕᒻᒪᖓᙱᑦᑐᓂᒃ−ᑐᙵᕕᓕᖕᓂᒃ ᐱᓕᕆᐊᒃᓴᓂᒃ ᐊᑐᐃᓐᓇᕈᖅᑎᑕᐅᓲᖑᕗᑦ ᓄᓇᕗᒻᒥ ᐊᖏᖃᑎᒌᒍᑎᒥ.

ᓄᕙᒡᔪᐊᕐᓇᖅ-19 ᓄᓇᕐᔪᐊᕐᒥ ᐅᔾᔨᕐᓇᖅᑐᒥᒃ ᐊᒃᑐᐃᔾᔪᑕᐅᓲᑦ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᓄᓇᕗᒻᒥ ᓯᓚᒥ ᐱᓕᕆᔪᓄᑦᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒃ 2021-22−ᒥ ᐅᑭᐅᖓᓂ. ᐱᓗᐊᖅᑐᒥᑦ, ᐊᒥᓲᓂᕐᓴᐃᑦ ᓯᓚᒥᑦ, ᐸᖕᓇᒃᑕᐅᓯᒪᔪᑦ ᐊᐅᓪᓚᖕᓃᑦ, ᓇᔫᑎᔪᓪᓗ ᑲᑎᒪᓃᑦ ᓄᖅᑲᖅᑎᑕᐅᓚᐅᖅᑐᑦ. ᐱᕙᓪᓕᐊᓂᖃᓚᐅᖅᑐᑦ ᐱᐅᓯᒋᐊᖅᑎᑦᑎᓂᕐᒥᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᓯᕗᓂᐊᒍᑦ ᐊᔪᕐᓇᙱᑐᐊᕌᖓᑦ ᓇᓗᓇᐃᖅᓯᒪᔪᖅ ᐊᑖᓂ.

---

2009: ᓯᕗᓪᓕᐅᔾᔭᖅ 1 – ᐊᐅᓚᑦᑎᓂᐊᕐᓗᓂ ᐊᑐᖅᑕᐅᓂᖓᓂᒃ ᖁᑦᑎᓐᓂᖅᐹᖅᓴᐳᒻᒥᓗᒋᑦ ᑲᔪᓯᑎᓪᓗᒋᓪᓗ ᓄᓇᒥᙶᖅᑐᑦ ᓱᓕᓂᖏᑦ, ᐃᓕᖅᑯᓯᖏᑦ ᐊᒻᒪ ᐱᔾᔪᑎᒃᓴᖏᑦ ᐊᒻᒪ ᐅᑭᐅᖅᑕᖅᑐᒥ ᓄᓇᑐᐃᓐᓇᕐᒥ ᐊᑐᖅᑕᐅᖃᑦᑕᖅᓯᒪᔪᑦ.

2020: ᑐᕌᒐᖅ 2.1 – ᖁᑦᑎᖕᓂᖅᐹᖅ ᐊᑦᑕᖕᓇᙱᑦᑐᒦᑎᑦᑎᕗᖅ, ᓈᒻᒪᒃᔫᒥᔪᓂᑦ ᐋᖅᑭᐅᒪᑎᑦᑎᕗᖅ ᐃᑲᔪᖅᑐᐃᓂᐊᕐᓗᓂ ᒫᓐᓇ ᓂᕆᐅᒋᔭᓂᒡᓗ ᐱᓕᕆᖃᑎᒋᔭᓂᑦ ᐊᑐᖅᐸᒃᑐᓂᒡᓗ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᐱᐅᓯᑎᑕᐅᒋᐊᖁᓪᓗᒍ ᖃᓄᐃᓕᖓᓂᖓ ᑕᓯᖅ ᕼᐊᔭᓐ ᑕᖕᒫᖅᓯᒪᕝᕕᒃ ᐅᖃᐅᓯᖃᕈᒪᓂᕐᒧᓪᓗ ᐊᕙᑎᓕᕆᓂᕐᒥᒃ ᐃᖅᑲᓇᐃᔭᕐᕕᒋᔭᐅᔪᓂᓗ ᖃᓄᐃᙱᑦᑐᓐᓇᕐᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᐃᓱᒫᓘᑕᐅᕙᒃᑐᓂᒃ, ᐱᓕᕆᔪᖃᖅᐸᓪᓕᐊᓕᓚᐅᖅᐳᖅ ᑎᑎᕋᖅᓯᒪᓕᖅᑎᑦᑎᓂᕐᒥᒃ ᓱᕋᒃᑎᕆᓂᕐᒥᒡᓗ ᖃᑦᑕᐅᔭᕐᔪᐊᑉ ᖄᖏᓐᓂᒃ. ᑕᒪᓐᓇ ᐱᓕᕆᐊᒃᓴᖅ ᐊᑐᕐᓂᐊᖅᐳᖅ 2022-23−ᒥ ᑮᓇᐅᔭᓄᑦ ᐊᕐᕌᒍᒋᔭᐅᔪᒥ.
• ᐱᕙᓪᓕᐊᑎᑕᐅᓂᖓ ᓄᑖᖅ ᐊᐅᓚᑦᑎᓂᕐᒧᑦ ᐸᕐᓇᐅᑎ ᓄᑖᙳᕆᐊᖅᑕᐅᓯᒪᔪᖅ ᐱᖁᑎᓄᑦ ᐸᕐᓇᐅᑎᒥᒃ ᒪᓕᒃᑐᒥᒃ ᐊᑯᓂᐅᔪᒃᑯᑦ ᐱᔭᐅᔭᕆᐊᓕᖕᓄᑦ ᒥᕐᖑᐃᖅᓯᕕᖕᓂ ᐊᐅᓚᓂᕆᔭᐅᔪᓄᑦ, ᐊᐅᓚᑦᑎᓂᖅ, ᐊᒻᒪ ᖃᐅᔨᓴᕐᓂᖅ. ᒫᓐᓇᑲᐃᓐᓇᕐᓕ, ᐃᓱᒪᒋᔭᐅᓚᐅᖅᑐᖅ ᐋᖅᑭᒋᐊᖅᑕᐅᓂᖓᓄᑦ ᑕᓯᐅᑉ ᑕᖕᒫᖅᓯᒪᕝᕕᖓ ᓱᕋᖅᑎᖅᑕᐅᓚᐅᖅᑐᖅ ᐃᓚᒋᔭᐅᓪᓗᓂ ᖃᑦᑕᐅᔭᕐᔪᐊᖅ ᓱᕋᒃᑎᖅᑕᐅᓂᖓᓄᑦ. ᐋᓪᐴᑕᒥ ᓯᓚᑦᑐᖅᓴᕐᕕᒡᔪᐊᖅ ᑐᓂᓯᓚᐅᖅᐳᑦ ᑐᓐᓂᖅᑯᓯᐊᓂᒃ ᒥᕐᖑᐃᖅᓯᕐᕕᖕᒧᑦ 2021-22−ᒥ, ᐃᑲᔫᑕᐅᓂᐊᖅᑐᖅ ᓴᖅᑭᔾᔪᑕᐅᓗᓂ ᑐᖅᑯᖅᑕᐅᓯᒪᖏᓐᓇᖅᑐᓄᑦ ᐊᒻᒪ ᖃᓄᐃᙱᑦᑎᐊᕈᓯᕐᒧᑦ ᐊᒻᒪ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᔾᔪᑕᐅᓲᓄᑦ ᓄᓇᓕᕋᓛᖃᕐᕕᖕᒥ.
• ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᖅᑎᖏᑦ ᐊᒃᑐᖅᑕᐅᔪᓂᒃ ᖃᐅᔨᓴᓲᖑᕗᑦ ᐊᕐᕌᒍᑕᒫᑦ ᖃᐅᔨᓴᖅᑕᐅᔪᓕᒫᓂᒃ, ᐅᐸᒃᑕᐅᕈᓘᔭᓲᓂᒃ, ᐊᒻᒪ ᐳᓛᖅᑎᓄᑦ ᐱᓕᕆᐊᖑᓲᓂᒃ ᒥᕐᖑᐃᖅᓯᕐᕕᖕᒥ, ᐊᒻᒪ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᓕᕆᓂᕐᒧᑦ ᐸᕐᓇᐅᑎᑦ ᐅᖃᐅᔾᔨᒋᐊᖅᑎᐅᕗᑦ ᒥᒃᖠᒋᐊᕈᑎᒃᓴᓂᒃ ᓯᕘᕋᓵᖅᑕᐅᓲᓄᑦ ᐃᓕᖅᑯᓯᕆᔭᐅᔪᒃᑯᑦ ᐱᔾᔪᑎᒃᓴᓄᑦ ᑕᐃᒪᐃᑦᑕᕆᐊᖃᕌᖓᑦ.
• ᑭᒃᑯᑐᐃᓐᓇᓂᒃ ᖁᐊᖅᓵᕐᓇᖅᑐᒦᑎᑦᑎᔪᖃᓚᐅᙱᑦᑐᖅ ᖂᑎᓂᖅᐹᖅ ᑲᓇᑕᒥ ᒥᕐᖑᐃᖅᓯᕕᒃᒥ 2021-22−ᒥ ᐊᕐᕌᒍᒋᔭᐅᔪᒥᑦ. ᓄᓇᕗᒻᒥ ᑭᒃᑯᑐᐃᓐᓇᕐᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᕙᒌᔭᐅᑦ ᒫᓐᓇᐅᔪᖅ ᕿᒥᕐᕈᔭᐅᔪᖅ ᐊᕐᕌᒍᓄᑦ ᑕᓪᓕᒪᓄᑦ, ᑲᔪᓯᓂᐊᖅᑐᖅ 2022-23−ᒧᑦ, ᐊᒻᒪᓗᑦᑕᐅᖅ, ᐊᐅᓚᑦᑎᓂᕐᒧᑦ ᒪᓕᒃᑕᐅᕙᓪᓕᐊᕙᒃᑐᑦ ᑐᐊᕕᕐᓇᖅᑐᖅᑕᖃᓕᖅᑎᓪᓗᒍ ᑭᐅᓯᓂᕐᒧᑦ ᓄᑖᙳᕆᐊᖅᑎᑕᐅᕙᒃᐳᑦ ᐊᕐᕌᒍᑕᒫᑦ ᑐᐊᕕᕐᓇᖅᑐᖅᑕᖃᓕᖅᑎᓪᓗᒍᓗ ᓱᓕᔪᑦ ᑎᑎᕋᖅᓯᒪᔪᑦ ᓄᑖᙳᕆᐊᖅᑎᑕᐅᕙᒃᐳᑦ ᒪᕐᕈᐃᖅᓱᖅᖢᑎᒃ ᐊᕐᕌᒍᑕᒫᑦ, ᑕᒪᕐᒥᒃ ᑲᑐᔾᔭᐅᔪᑦ ᒥᕐᙳᐃᖅᓯᕕᓕᕆᔨᒃᑯᑦ ᑲᓇᑕᒥ ᐱᓕᕆᔨᖏᓐᓄᑦ ᐃᖅᑲᓇᐃᔭᖅᑎᖏᓐᓄᓪᓗ ᑕᒪᑐᒪᓂ ᐊᕐᕌᒍᒥ.

---

2009: ᓯᕗᓂᐊᒍᑦ 2 – ᓇᓗᓇᐃᔭᐃᓂᖅ ᑐᑭᓯᓂᕐᓗ ᒥᕐᖑᐃᖅᓯᕐᕕᐅᑉ ᐊᕙᑎᖏᓐᓂᑦ ᖃᐅᔨᓴᕐᓂᒃᑯᑦ ᐃᓄᐃᓪᓗ ᖃᐅᔨᒪᔭᑐᖃᖏᓐᓂᑦ ᐊᒻᒪ ᐅᓂᒃᑳᖅᑐᐊᒃᑯᑦ ᐊᒻᒪ ᖃᐅᔨᒪᓂᒃᑯᑦ ᐃᓄᖕᓂᒃ ᐊᑯᓂᐊᓗᒃ ᐊᒃᑐᐊᓂᖃᖅᓯᒪᔪᓄᑦ ᒥᕐᖑᐃᖅᓯᕐᕕᖕᒧᑦ, ᐃᓚᓕᐅᑎᓗᒋᓪᓗ ᑖᒃᑯᐊ ᑐᑭᓯᒋᐊᒐᒃᓴᑦ ᐃᑦᑕᕐᓂᓴᕐᓂᒃ ᐅᓂᒃᑳᖅᑕᐅᔪᓂᒃ.

2020: ᑐᕌᒐᖅ 2.4 – ᐱᓕᕆᖃᑎᖃᕐᓂᒃᑯᑦ ᖃᐅᔨᓴᖅᑎᓂᑦ ᐅᖃᖃᑎᖃᕐᓂᕐᓂᓪᓗ ᓄᓇᓕᓐᓂᑦ, ᖃᐅᔨᓴᖅᑐᑦ ᖁᑦᑎᒃᑐᖅᐹᕐᒥ ᑲᑎᖃᑦᑕᖅᐳᑦ ᖃᐅᔨᓴᖅᑎᑦ ᓯᕗᓪᓕᐅᑎᔭᕆᐊᓕᖏᓐᓂᒃ, ᓄᓇᓕᖕᓂ ᐱᓕᕆᐊᒃᑯᒥᒋᔭᐅᔪᓂᒃ, ᐊᒻᒪ ᓴᙱᒃᑎᒋᐊᕈᑕᐅᓪᓗᓂ ᐃᓄᖕᓄᑦ ᐃᓚᐅᓂᕆᔭᐅᕙᒃᑐᓄᑦ ᖃᐅᔨᓴᖅᑐᓂᒃ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᖃᐅᔨᓴᕐᓂᕐᒧᑦ ᓯᕗᓂᐊᒍᑦ ᓄᑖᙳᕆᐊᖅᑕᐅᓚᐅᖅᑐᑦ ᒥᕐᖑᐃᖅᓯᕐᕕᖕᒧᑦ 2011-ᒥ ᑐᙵᕕᒋᔭᐅᓪᓗᑎᒃ ᐅᖃᐅᔾᔪᖅᓱᖅᑕᐅᓪᓗᑎᒃ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᖕᒧᑦ ᐸᕐᓇᐅᑎᑦ ᐊᒻᒪ ᐊᐅᓚᑦᑎᔨᑦ, ᐊᑐᐃᓐᓇᐅᓪᓗᑎᒡᓗ ᖃᕆᑕᐅᔭᒃᑯᑦ. 2021-22−ᒥ, ᑎᓴᒪᑦ ᐊᕐᕌᒍᒐᓴᖕᓄᑦ ᐱᔪᓐᓇᐅᑏᑦ ᐊᑐᐃᓐᓇᓚᐅᖅᑐᑦ ᖁᑦᑎᓐᓂᖅᐹᖅ ᒥᕐᖑᐃᓯᕐᕕᒃ (ᐱᖓᓱᑦ ᑖᒃᑯᐊ ᐊᑯᓂᐅᔪᒧᑦ ᐱᓕᕆᐊᓄᑦ) ᑭᓯᐊᓂ, ᓯᓚᒥ ᐱᓕᕆᔪᖃᓚᐅᙱᑦᑐᖅ ᑖᒃᑯᑎᒎᓇᖅ ᐱᔪᓐᓇᐅᑎᒃᑯᑦ ᖃᓂᒻᒪᒍᑕᐅᕙᓪᓕᐊᓂᖓᓄᑦ. ᐊᑕᐅᓯᖅ ᐱᔪᓐᓇᐅᑎ ᓄᑖᙳᕆᐊᖅᑕᐅᓚᐅᖅᐳᖅ 2021-22−ᒥ ᐃᖃᓗᖕᓂ ᖃᐅᔨᓴᖅᐸᓪᓕᐊᓂᕐᒧᑦ, ᐊᒻᒪ ᑭᒡᓕᖃᖅᑐᓂᒃ ᓯᓚᒥ ᐱᓕᕆᔪᖃᓚᐅᖅᖢᓂ ᑲᑐᔾᔨᖃᑎᒌᒍᑕᐅᓪᓗᑎᒃ ᐃᖅᑲᓇᐃᔭᖅᑎᓄᑦ ᐅᑯᓇᙵᑦ ᒥᕐᙳᐃᖅᓯᕕᒃ ᑲᓇᑕᒥ ᐱᓕᕆᕝᕕᒃ ᐊᒻᒪ ᐊᕙᑎᓕᕆᔨᒃᑯᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ (ECCC).
• ᑎᓕᐅᕈᒪᓪᓗᒋᑦ ᑲᓇᑕᒥ ᓄᓇᕐᔪᐊᕐᒥᓗ ᖃᐅᔨᓴᖅᑏᑦ, ᖃᐅᔨᓴᖅᑎᓄᑦ ᑲᑐᔾᔨᖃᑎᒌᑦ, ᐊᒻᒪ ᓯᓚᑦᑐᖅᓴᕐᕕᖕᒥ ᖃᐅᔨᓴᖃᑦᑕᖁᓪᓗᒋᑦ ᖁᑦᑎᒃᑐᖅᐹᖅ ᑕᐅᑐᓪᓗᐊᑕᕐᖢᓂ ᒥᕐᙳᐃᖅᓯᕕᖕᓄᑦ ᑲᓇᑕᒥ ᐱᓕᕆᕝᕕᐅᑉ ᓯᕗᓪᓕᐅᑎᔭᕆᐊᖃᖅᑕᖏᓐᓂ, ᐅᖃᓗᒃᓗᓂ ᑎᑎᖅᑲᖅ ᑐᓂᐅᖃᖅᑕᐅᓪᓗᓂ ᖃᐅᔨᓴᖅᑎᓄᑦ ᔭᓄᐊᕆ 7, 2022. ᓄᓇᕗᒻᒥ ᓯᓚᒥ ᐱᓕᕆᕙᒃᑐᑦ (NFU−ᑯᑦ) ᐱᔾᔪᑎᖃᖅᐸᒃᐳᑦ ᐊᐅᓚᑦᑎᓂᕐᒥᒃ ᐃᑲᔪᖅᑐᐃᓂᕐᒥᒡᓗ ᓯᓚᑖᓃᑦᑐᓂᒃ ᖃᐅᔨᓴᖅᑎᓂᒃ. ᐆᒃᑑᑎᒋᓗᒍ, ᒥᙳᐃᖅᓯᕕᒃ ᑲᓇᑕᒥ ᑎᒥᐅᔪᖅ ᐱᓕᕆᖃᑎᖃᑦᑎᐊᖅᑐᖅ ᐊᕙᑎᓕᕆᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ ᕈᐃᐅᓪ ᒥᐅᓪᑐᕆ ᓯᓚᑦᑐᓴᕐᕕᐊᓂᑦ ᑲᔪᓯᖁᓪᓗᒋᑦ ᐊᕙᑎᒥᒃ ᖃᐅᔨᓴᖅᐸᓪᓕᐊᓂᕐᒧᑦ ᐱᓕᕆᐊᖓᑦ ᓱᕈᕐᓇᖅᑐᓄᑦ ᑕᐃᑲᓂ ᕗᐊᑦ ᑳᒍᒥ, ᐊᒻᒪᓗᑦᑕᐅᖅ ᐊᕙᑎᓕᕆᔨᒃᑯᑦ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᐊᑯᓂᐅᔪᒥᑦ ᖃᐅᔨᓴᖅᐸᓪᓕᐊᔭᒥᒃ ᐃᒪᐅᑉ ᖃᓄᐃᓐᓂᖓᓂ (ᐊᑕᐅᓯᖅ ᐃᒪᖅ ᖃᐅᔨᓴᒐᒃᓴᖅ ᐱᔭᐅᔪᖅ ᖃᖑᕈᓯᐅᑉ ᑰᖓᓂᑦ), ᐃᒪᐅᑉ ᐃᖏᕐᕋᓂᖓ, ᑕᓯᖅ ᓯᑯ ᐃᔾᔪᓂᖓ, ᐊᒻᒪᓗ ᓱᕈᕐᓇᖅᑐᑦ ᓇᓂᔭᐅᔪᑦ ᐃᖃᓗᖕᓂᑦ. ᐃᓄᐃᑦ ᐃᓚᐅᑦᑎᐊᕆᐊᖃᕐᓂᖏᑦ ᖃᐅᔨᓴᖅᑕᐅᔪᓂᒃ ᐅᖃᐅᓯᐅᒃᑲᓐᓂᓚᐅᖅᐳᖅ ᑐᓂᐅᖅᑲᐅᑕᐅᔪᓂᒃ ᑎᑎᖅᑲᓂᒃ.
• ᑐᕙᖅ ᑲᖏᖅᖢᐊᓗᒃᒥ ᐃᓚᓕᐅᔾᔭᐅᓚᐅᖅᐳᖅ ᐱᕐᔪᐊᖑᓪᓗᑎᒃ ᐊᕙᑎᓕᕆᔨᒃᑯᓐᓂ ᐊᒻᒪ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑲᓇᑕᒥ 2021−ᒥ ᐅᑎᖅᑎᑦᑎᓂᕐᒧᑦ ᖃᓄᐃᓕᐅᖅᑕᐅᕙᓪᓕᐊᔪᒪᔪᑦ ᖁᑦᑎᒃᑐᒥ ᑐᒃᑐᓄᑦ. ᒥᕐᖑᐃᖅᓯᕕᓕᕆᔩᑦ ᑲᓇᑕᒥ ᑐᓴᖅᑎᑦᑎᓚᐅᖅᐳᑦ ᑎᑎᕋᖅᑕᐅᒋᐊᕐᖓᖅᑐᒥᒃ ᖃᓄᐃᓕᐅᕈᑕᐅᔪᒪᔪᓂᒃ 2021-22−ᒥ, ᐱᓕᕇᓐᓇᕐᓂᐊᖅᖢᑎᒡᓗ ᐊᓯᖏᓐᓂᒃ ᑲᓇᑕᒥ ᐱᓕᕆᔨᐅᖃᑎᖏᓐᓂᒃ ᐱᓕᕆᖃᑎᖃᕐᓗᑎᒃ ᑲᒪᒋᔭᐅᖁᓪᓗᒋᑦ ᐱᐅᓯᒋᐊᖅᓯᒪᔪᑦ ᓴᐳᔾᔭᐅᔾᔪᑎᓄᑦ ᐃᓱᒪᒋᔭᒃᓴᑦ. ᒥᕐᙳᐃᖅᓯᕕᒃ ᑲᓇᑕᒥ ᐱᓕᕆᕝᕕᒃ ᐊᕙᑎᓕᕆᔨᒃᑯᓐᓂ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᐅᓂᒃᑳᕐᓂᖓ ᑎᑎᕋᖅᑕᐅᒋᐊᕐᖓᖅᑐᖅ ᖃᓄᐃᓕᐅᕈᑕᐅᔪᒪᔪᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᖏᖅᑕᐅᓂᕐᒧᑦ ᒫᑦᓯ 9, 2022-ᒥ, ᐃᓚᐅᖏᓐᓇᕐᓗᓂᓗ ᐊᓯᖏᓐᓄᑦ ᐆᒪᔪᓄᑦ−ᐅᓗᕆᐊᓇᖅᑐᓄᑦ ᐅᑎᖅᑎᑦᑎᓂᕐᒧᑦ ᐱᓕᕆᐊᓄᑦ ᐊᑦᑐᐊᓂᓕᓐᓄᑦ ᖁᑦᑎᓂᖅᐸᖅ ᑲᓇᑕᒥ ᒥᙳᐃᖅᓯᕕᒃ ᑕᒪᑐᒪᓂ ᐊᕐᕌᒍᒥ, ᐃᓚᓕᐅᔾᔭᐅᓪᓗᑎᒃ ᑲᓇᑕᒥ ᓇᓄᓕᕆᓂᕐᒧᑦ ᖃᐅᔨᒪᔨᑕᑦ ᑲᑎᒪᔨᕋᓛᑦ ᐊᒻᒪ ᓇᓄᓕᕆᓂᕐᒧᑦ ᐊᐅᓚᑦᑎᔨᑦ ᑲᑎᒪᔨᕋᓛᑦ.
• ᖃᑉᓯᐊᕐᔪᖕᓂᒃ ᖃᐅᔨᒋᐊᖃᑦᑕᕐᓂᕐᒧᑦ ᑐᕌᖓᔪᓂᒃ ᐱᑕᖃᖅᑐᖅ ᖁᑦᑎᒃᑐᖅᐹᕐᒥᑦ, ᐃᓚᐅᑉᓗᓂ ᓄᓇᕐᔪᐊᕐᒥᑦ ᓄᓇᒥᑦ ᐆᒃᑐᕋᐃᓂᖅ/ᑲᓇᑕ ᓄᓇᒥᑦ ᐊᒻᒪᓗ ᐊᒻᒪ ᑕᐃᒐ ᖃᐅᔨᓴᖅᐸᓪᓕᐊᓂᕐᒧᑦ ᖃᐅᔨᓴᕈᑎ, ᐊᒻᒪ ᐅᑭᐅᖅᑕᖅᑐᒥ ᐃᖏᕐᕋᔪᑦ ᖃᐅᔨᓴᕈᑎᒃᓴᑦ (CALM). ᑖᒃᑯᐊ ᑕᒪᕐᒥᒃ ᐱᐊᓂᒃᑕᐅᓚᐅᖅᐳᑦ 2021-22−ᒥ.

---

2009: ᓯᕗᓪᓕᐅᔭᐅᔪᒪᔪᑦ 3 – ᐱᐅᓯᒋᐊᖅᑎᓐᓂᕐᒧᑦ ᐃᓂᐅᔪᒥᑦ-ᐱᔾᔪᑎᓕᖕᒧᑦ ᐃᓂᐅᔪᒥᑦ ᓴᓗᒪᑎᑦᑎᓂᖅ ᐊᕙᑎᒥᒃ ᐊᐅᓚᑦᑎᓂᕐᒧᑦ ᐋᖅᑭᐅᒪᔪᑎᒍᑦ, ᓄᓇᓕᖕᒥᑦ ᓴᓗᒪᓴᐃᓂᖅ, ᐊᒻᒪᓗ ᐃᓂᐅᔪᒥᑦ ᐋᕿᒃᓯᓂᕐᒧᑦ.

2020: ᑐᕌᒐᖅ 3.3 – ᐊᑐᖅᑎᐅᔪᑦ ᐱᔭᕆᐊᓕᖏᑦ ᑐᙵᕕᖏᓪᓗ ᐊᕙᑎᒧᑦ ᑲᔪᓰᓐᓇᕈᓐᓇᕐᓂᕐᒧᑦ ᑲᑎᒍᑎᔭᐅᓗᑎᒃ ᒥᒃᓴᐅᑦᑎᓯᒪᔪᒃᑯᑦ ᓈᒻᒪᖖᒋᓐᓂᕐᒧᑦ ᐊᒻᒪᓗ ᐱᐅᓯᒋᐊᖅᑐᓄᑦ ᐃᓕᑦᑎᓂᕐᒧᑦ ᐱᕕᒃᓴᓂᑦ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᓄᓇᒥᑦ ᓈᓴᐅᑎᓂᒃ ᑎᑎᖅᑲᓂᒃ ᑲᑎᖅᓱᐃᓂᖅ ᕗᐊᑦ ᑳᔾᔪᒥ ᐃᓂᖓ ᐱᔭᕇᖅᑕᐅᓚᐅᙱᑦᑐᖅ 2021-22−ᒥ ᓱᕈᖅᓯᒪᔪᖅ ᖃᓂᒪᓐᓇᖅ ᑭᒡᓕᖃᖅᑎᑕᐅᓂᖓᓄᑦ, ᑭᓯᐊᓂ ᐊᔾᔨᖁᑎᓂᒃ ᐱᓚᐅᖅᑐᑦ ᖃᐅᔨᓴᐃᓂᕐᒧᑦ ᒪᓕᒃᖢᒍ ᐃᓂᐅᔪᒥᒃ ᖃᐅᔨᒋᐊᖃᑦᑕᕐᓂᕐᒧᑦ ᐸᕐᓇᐅᑎ. ᐅᓂᒃᑳᕐᓂᖅ ᓱᕈᖅᓯᒪᔪᒧᑦ ᐃᓂᐅᔪᒧᑦ ᐱᐊᓂᒃᑕᐅᓚᐅᖅᑐᖅ ᐱᔭᕆᐊᖃᕐᓂᖓᓄᑦ ᐊᒻᒪᓗ ᑐᒃᓯᕋᐅᑕᐅᓪᓗᓂ ᑮᓇᐅᔭᖃᖅᑎᑕᐅᖏᓐᓇᕐᓂᕐᒧᑦ ᐊᐅᓚᑦᑎᓂᕐᒧᑦ ᕗᐊᑦ ᑳᒍᒥ ᓱᕈᖅᓯᒪᔪᖅ ᑐᓐᓂᖅᑯᑕᐅᓚᐅᖅᐳᖅ 2022-23−ᒧᑦ. ᓴᓗᒻᒪᕐᓴᖅᑕᐅᓂᖓᓄᑦ ᓱᕈᖅᓯᒪᔪᖅ ᓄᓇ ᑕᖁᕆ ᑲᖏᖅᖢᐊᓗᖕᒥ, ᑕᓯᖅ ᕼᐊᔭᓐ, ᐊᒻᒪ ᐅᖅᓲᑉ ᕿᑭᖅᑕᖓ ᐱᔭᕇᖅᑕᐅᓚᐅᖅᑐᖅ 2018−ᒥ ᐱᒋᐊᖅᖢᓂ, ᐊᒻᒪ ᐅᔭᕋᖕᓂᐊᕐᕕᖕᒥ ᖃᐅᔨᓴᖅᐸᓪᓕᐊᓂᕐᒧᑦ ᐱᓕᕆᐊᒃᓴᑦ ᑲᔪᓯᓂᐊᕋᓱᒋᔭᐅᕗᑦ 2022-23−ᒥ.
• ᓄᑖᓂᒃ ᓇᓗᓇᐃᖅᓯᔾᔪᑎᓂᒃ ᐃᓕᐅᖅᑲᖅᑕᐅᔪᖃᓚᐅᖅᐳᖅ ᑕᓯᕐᒥ ᐊᒻᒪ ᖃᖏᖅᖢᐊᓗᒃ 2018−ᒥ, ᐃᓄᐃᑦ ᐊᒃᑕᑯᖏᓐᓂᒃ ᒪᓕᖁᓪᓗᒋᑦ. 2019−ᒥ ᓴᓇᔭᐅᓚᐅᖅᐳᑦ ᑲᔪᓯᑦᑎᐊᖁᓪᓗᒋᑦ. ᓴᓇᔭᐅᒃᑲᓐᓂᕆᐊᓕᑦ ᐸᕐᓇᒃᑕᐅᓚᐅᖅᐳᑦ 2020-21−ᒧᑦ, ᑭᓯᐊᓂ ᐅᖓᕙᕆᐊᖅᑕᐅᓚᐅᖅᐳᑦ 2022-23−ᒧᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᔭᕆᐊᓖᑦ ᐊᔪᖅᑎᑕᐅᓂᖏᓐᓄᑦ ᑳᓐᑐᓛᒃᑎᑦᑎᔨᑦ ᒥᕐᖑᐃᖅᓯᕕᖕᒧᐊᕆᐊᖃᙱᖦᖢᑎᒃ ᑕᒪᑐᒪᓂ ᐊᕐᕌᒍᒥ.
• ᐃᒪᐃᒃᑲᓗᐊᖅᑎᓪᓗᒍ, ᖁᑦᑎᓂᖅᐸᖅ ᑲᓇᑕᓕᒫᒥ ᒥᕐᙳᐃᖅᓯᕐᕕᒃ ᒪᑐᓯᒪᓚᐅᖅᑐᖅ 2021-22−ᒥ, ᐱᓕᕆᐊᖑᐃᓐᓇᖅᖢᓂ ᐱᕙᓪᓕᐊᑎᑕᐅᑎᓪᓗᒍ ᓯᕗᓂᒃᓴᑦᑎᓐᓂ ᐳᓛᕆᐊᖅᐸᒃᑐᑦ ᖃᐅᔨᒪᔾᔪᑎᒃᓴᖏᑦ ᕗᐊᑦ ᑳᒍᒧᑦ. ᒥᕐᖑᐃᖅᓯᕐᕕᖕᒧᐊᓚᐅᙱᓐᓂᖏᓐᓂᒃ, ᐳᓛᖅᑎᓕᒫᑦ ᑐᑭᓯᑎᑕᐅᕚᓪᓕᕆᐊᖃᖅᐳᑦ ᐅᑯᓂᖓ ᐱᓕᕆᓗᑎᒃ ᐃᓕᖅᑯᓯᕆᔭᐅᔪᒃᑯᑦ ᐃᑲᔫᑎᒃᓴᓂᒃ ᓴᐳᔾᔨᔾᔪᑎᒃᓴᓂᒃ. ᐊᕐᕌᒍᓄᑦ ᑕᓪᓕᒪᓄᑦ ᖃᐅᔨᓴᖅᐸᓪᓕᐊᓕᕐᒥᔪᑦ (2018-2023) ᕗᐊᑦ ᑳᒍᒥ ᕿᔪᐃᑦ ᒪᑐᓖᑦ ᐊᑐᖅᑕᐅᓂᖏᓐᓄᑦ ᐱᐅᕐᓱᐊᕐᓂᕐᒧᑦ ᐃᓪᓗᒥᑦ.

---

2009: ᓯᕗᓪᓕᐅᔭᐅᔪᒪᔪᑦ 4 – ᓇᓗᓇᐃᖅᑕᐅᓗᑎᒃ ᐃᓄᐃᑦ ᐃᑦᑕᕐᓂᓴᖃᕐᕕᖏᑦ ᐊᒻᒪ ᐃᑦᑕᕐᓂᓴᑐᖃᐃᑦ ᒥᕐᖑᐃᖅᓯᕐᕕᖕᒥ ᖃᐅᔨᓴᖅᐸᒡᓗᒋᑦ ᑭᒡᒐᖅᑐᐃᔨᑦ ᐊᒻᒪ ᐊᔾᔨᖃᙱᑦᑐᑦ ᐃᑦᑕᕐᓂᓴᖃᕐᕖᑦ.

2020: ᑐᕌᒐᖅ 3.2 – ᖃᐅᔨᓴᕐᓂᕐᒧᑦ ᖃᐅᔨᓴᐃᓐᓇᕐᓂᕐᒧᓪᓗ ᐱᓕᕆᐊᑦ ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒃᒥᑦ ᐱᐅᓯᕚᓪᓕᕐᓗᒋᑦ ᖃᐅᔨᒪᓂᕗᑦ ᑐᑭᓯᐅᒪᓂᕗᓪᓗ ᒥᕐᖑᐃᕐᓯᕐᕕᖕᒥᑦ ᐅᑭᐅᖅᑕᖅᑐᒥᓪᓗ ᐊᕙᑎᖏᓐᓂᑦ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᐃᑦᑕᕐᓂᓴᖃᕐᕖᑦ ᖃᐅᔨᓴᖅᑕᐅᓚᐅᖅᐳᑦ ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ 2021-22−ᒥ ᖃᐅᔨᓴᕈᒪᓪᓗᑎᒃ ᖃᓄᑐᐃᓐᓇᖅ ᐊᑦᑕᕐᓇᑐᐃᓐᓇᕆᐊᓕᖕᓂᒃ ᒥᕐᖑᐃᖅᓯᕐᕕᖕᒥ ᐃᓄᖕᓄᑦ ᐃᑦᑕᕐᓂᓴᕐᓄᑦ, ᐅᓗᕆᐊᓇᖅᑐᓂᒡᓗ ᓇᓗᓇᐃᖅᑕᐅᔪᖃᓚᐅᕋᓂ. ᑭᓯᐊᓂ, ᖃᐅᔨᓴᖅᑕᐅᓂᖏᑦ ᐊᒃᑐᖅᑕᐅᓴᕋᐃᑦᑐᑦ ᓄᓇᐃᑦ ᕗᐊᑦ ᑳᔾᔪᒥ, ᐱᖃᓯᐅᑎᓪᓗᓂᑦ ᖃᐅᔨᓴᕐᓂᖅ ᖃᕐᒪᕕᓂᑦ, ᐊᔪᕐᓇᓚᐅᖅᑐᖅ ᐱᔾᔪᑎᖃᖅᖢᓂ ᐊᑐᖅᑕᐅᑦᑎᐊᕈᓐᓇᖅᑐᓂᒃ ᐊᓂᒍᖅᑎᓐᓇᓱᒋᐊᓕᖕᓂᒃ (ᓲᕐᓗ, ᐱᑕᖃᑦᑎᐊᙱᓐᓂᖓᓄᑦ ᖁᓕᒥᒎᓕᖕᒥᒃ ᒪᓂᒪᔪᖃᕐᓂᖓᓄᑦ) ᑭᒡᓕᖃᖅᑎᑕᐅᔪᓪᓗ ᓄᕙᒡᔪᐊᕐᓇᖅ-19−ᒧᑦ ᐊᒃᑐᐊᓂᓕᖕᓂᑦ.
• ᐃᓕᖅᑯᓯᕆᔭᐅᔪᒧᑦ ᐃᑲᔫᑎᒃᓴᓂᒃ ᐊᒃᑐᖅᑕᐅᔪᓂᒃ ᖃᐅᔨᓴᕐᓂᖅ ᐱᕙᒌᔭᖅᑕᐅᓚᐅᖅᐳᖅ ᓯᕗᓂᒃᓴᒥ ᐊᐅᓚᔪᓐᓇᐅᑎᓄᑦ ᐱᓕᕆᐊᖑᓛᖅᑐᓄᑦ ᐱᐊᓂᒃᑕᐅᓛᖅᑐᓄᑦ ᑕᓯᕐᒥ. ᐱᓕᕆᐊᖑᓚᐅᖅᑐᖅ ᐱᐊᓂᒃᑕᐅᓇᓱᐊᖅᖢᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᐅᔨᓴᕈᑎᓂᑦ 2021-22−ᒥᑦ, ᓯᕗᓪᓕᖅᐹᒥᓪᓗ ᑎᑎᕋᖅᑕᐅᙵᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓇᐃᓈᖅᓯᒪᔪᑦ ᐱᐊᓂᒃᑕᐅᓚᐅᖅᑐᑦ ᓇᓗᓇᐃᖅᓯᓇᓱᒃᑎᓪᓗᒋᑦ ᑕᒡᔪᐊᖅᐸᓪᓕᐊᔪᓂᒃ ᐊᒃᑐᐊᓂᓕᖕᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᐃᔾᔪᑕᐅᓲᓂᒃ ᐃᓕᖅᑯᓯᕆᔭᐅᔪᒃᑯᑦ ᐱᔾᔪᑎᒃᓴᓂᒃ ᒥᕐᖑᐃᖅᓯᕐᕕᖕᒥ.
• ᓇᐅᑦᑎᖅᓱᕐᓂᕐᒧᑦ ᒪᓕᒋᐊᓖᑦ ᑕᓯᕐᒧᑦ, ᐸᓚᐅᑦᑎ ᑰᒐᓛᒃ, ᐊᒻᒪᓗ ᕗᐊᑦ ᑳᒍ ᓄᑖᕈᕆᐊᖅᑕᐅᓚᐅᖅᑐᑦ, ᓄᑖᕈᕆᐊᖅᑕᐅᓪᓗᑎᓪᓗᑎᓪᓗ 2019ᖑᑎᓪᓗᒍ. ᓇᐅᑦᑎᖅᓱᕐᓂᕐᒧᑦ ᒪᓕᒋᐊᓖᑦ ᐃᓂᒋᔭᐅᔪᒧᑦ ᖃᐅᔨᒪᔭᐅᔪᖅ ᐊᖑᓇᓱᒃᑎᑦ ᐊᑭᓐᓇᖓ ᐋᖅᑭᒃᑕᐅᓚᐅᕐᒥᔪᖅ ᐱᓕᕆᐊᖑᓪᓗᓂᓗ 2021-22−ᒥ.
• ᐃᑦᑕᕐᓂᓴᓕᕆᓂᕐᒧᑦ ᐱᔪᓐᓇᐅᑎᑦ ᑐᓐᓂᖅᑯᑕᐅᔪᑦ ᒥᕐᖑᐃᖅᓯᕐᕕᓕᕆᔨᒃᑯᓐᓂ ᑲᓇᑕᒥ ᐃᓚᖃᖅᐳᑦ ᖃᓄᐃᓕᖓᓂᖓᓂᒃ ᓇᓗᓇᐃᖅᑕᐅᓯᒪᔪᒥᒃ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᖏᓐᓂᒃ ᑲᓇᑕᒥ ᑎᑎᕋᕐᕕᖏᓐᓂᒃ. ᐃᑦᑕᕐᓂᓴᓕᕆᓂᕐᒧᑦ ᐱᔪᓐᓇᐅᑎᑦ ᑐᓐᓂᖅᑯᑕᐅᔪᑦ ᒥᕐᖑᐃᖅᓯᕐᕕᓕᕆᔨᒃᑯᓐᓂ ᑲᓇᑕᒥ ᐃᓚᖃᖅᐳᑦ ᖃᓄᐃᓕᖓᓂᖓᓂᒃ ᓇᓗᓇᐃᖅᑕᐅᓯᒪᔪᒥᒃ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᖏᓐᓂᒃ ᑲᓇᑕᒥ ᑎᑎᕋᕐᕕᖏᓐᓂᒃ.

---

2009: ᓯᕗᓪᓕᐅᔭᐅᔪᒪᔪᑦ 5 – ᑐᓴᐅᒪᑎᓪᓗᒋᑦ ᖃᓄᐃᓕᖓᓕᕐᓂᕆᔭᖏᑦ ᖃᐅᔨᓴᓪᓚᕆᖕᓂᕐᒧᑦ ᓇᐅᑦᑎᖅᓱᕐᓂᕐᒧᓪᓗ ᐱᓕᕆᐊᖑᕙᒃᑐᒥᒃ, ᐅᖃᐅᓯᖃᓪᓚᕆᖕᓂᖅ ᓄᓇᕐᔪᐊᓕᒫᒥ ᐊᕙᑎᐅᑉ ᐊᓯᔾᔨᕐᓂᖓᓂᒃ, ᐋᖅᑭᒃᓱᐃᔪᒪᓂᕐᒥᓄᑦ ᖁᑦᑎᓂᖅᐸᖅ ᐊᑑᑎᖃᓕᖅᑎᑦᑎᓗᓂ ᑲᓇᑕᒥᐅᓄᑦ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᓯᓚᒥ ᐱᓕᕆᓂᕆᔭᐅᔪᖅ ᐊᒃᑐᐊᓂᓕᒃ ᓄᓇᒥ ᓱᓕᑦᑎᐊᕐᓂᕐᒧᑦ ᓇᐅᑦᑎᖅᓱᖅᓯᓂᕐᒧᑦ ᐱᓕᕆᐊᖑᕙᒃᑐᒥᒃ ᐃᒪᑦᑎᐊᕙᖕᒧᑦ ᓄᓇᒥᓗ ᐃᓂᓄᑦ ᐱᓕᕆᐊᖑᓚᐅᖅᐳᖅ ᐊᔪᕐᓇᙱᑐᐊᕌᖓᑦ 2021-22−ᒥ ᓯᓚᐃᓐᓇᕐᒥ ᐊᕐᕌᒍᒥ. ᐊᒻᒪ ᓱᓕ, ᐱᓕᕆᖃᑎᒌᑦ ᐊᕐᕌᒍᓄᑦ ᐅᓄᖅᑐᓄᑦ ᐆᒪᔪᖃᖃᑎᒌᙱᑦᑐᓄᑦ ᐱᓕᕆᑎᑦᑎᔪᑦ ᐊᓘᑦ−ᒥ (ᑑᒥᓂᒃ ᐲᑑ ᑯᐸᐃᒃ ᓯᓚᑦᑐᖅᓴᕐᕕᒡᔪᐊᖓᓂ ᕆᒨᔅᑭᒥ) ᓄᑖᙳᕆᐊᖅᓯᒪᔪᓂᒃ ᓴᖅᑭᑎᑦᑎᓚᐅᖅᐳᑦ ᒥᕐᙳᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᖓᓄᑦ ᐊᒻᒪ ᖁᑦᑎᓐᓂᖅᐹᖅ ᒥᕐᖑᐃᓯᕐᕕᒃ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᑦ ᒥᕐᖑᐃᖅᓯᕕᖏᓐᓄᑦ ᐸᕐᓇᐃᔨᑦ ᐊᐅᓚᑦᑎᔨᓪᓗ ᐅᑭᐅᖅᑕᖅᑐᒥ ᐅᑲᓕᕐᓘᔭᐃᑦ ᐊᑐᖅᑕᐅᖃᑦᑕᕐᓂᖏᑦ ᓄᓇᑦ ᒥᕐᖑᐃᖅᓯᕐᕕᖕᒥ.
• ᐱᓕᕆᖃᑎᒌᑦ ᐱᓕᕆᐊᖃᓚᐅᖅᑐᑦ ᐃᓱᓕᑦᑕᖅᑐᒥᒃ ᓯᓚᒥ ᐱᓕᕆᓂᕐᒥᒃ 2021-22−ᒥ ᖃᐅᔨᓴᕐᓂᕐᒥᒃ ᐃᓚᐅᑎᑦᑎᔪᓂᒃ ᓱᕈᖅᑎᕆᔪᓂᒃ ᐃᖃᓗᖕᓂ ᓴᖅᑭᑎᑦᑎᓚᐅᖅᐳᑦ ᓇᔪᖅᑕᐅᓪᓗᑎᒃ ᓄᑖᙳᕆᐊᖅᓯᒪᔪᓂᒃ ᒪᐃᔭᒋᔭᐅᔪᒧᑦ ᖃᐅᓱᐃᑦᑐᒥᐅᓄᑦ ᐊᖓᔪᖅᑳᑉ ᑐᒡᓕᐊᓄᓪᓗ ᖃᐅᓱᐃᑦᑐᒥᐅᓄᑦ ᐊᖑᓇᓱᒃᑐᓕᕆᔨᓄᑦ ᔪᓚᐃ 2021−ᒥ. ᑲᑎᖦᖢᒋᑦ, ᓯᒡᔭᒥ ᐱᓕᕆᔨᐅᖃᑎᒌᑦ 20-ᓂᒃ ᐃᖃᓗᒃᑖᓚᐅᖅᐳᑦ ᒪᑦᑎᑦᑕᐅᑎᒃᑯᑦ ᐊᐅᔭᑐᖃᐅᓕᖅᑎᓪᓗᒍ.
• ᖃᐅᔨᓴᖅᑏᑦ ᑐᓴᖅᑎᑦᑎᖃᑦᑕᕆᐊᖃᖅᐳᑦ ᖃᐅᔨᓴᕈᑎᕕᓂᖏᓐᓂᑦ ᐊᐅᓱᐃᑦᑐᒥᐅᓕᒫᓄᑦ ᐊᒻᒪ/ᐅᕝᕙᓘᓐᓃᑦ ᖃᐅᓱᐃᑦᑐᒥᐅᓄᑦ. ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑎᓕᐅᕆᕗᑦ ᑖᒃᑯᓂᖓ ᓄᑖᙳᕆᐊᖅᓯᒪᔪᓂᒃ ᐱᓕᕆᐊᖑᖁᓪᓗᒋᑦ ᐅᐸᒍᑎᓗᑎᒃ, ᑭᓯᐊᓂ ᐱᕕᒃᓴᕆᔭᐅᔪᑦ ᐅᐸᒍᑎᓗᑎᒃ ᐅᓂᒃᑳᕆᐊᖅᑐᖅᑐᓄᑦ ᑭᒡᓕᖃᖅᑎᑕᐅᓚᐅᖅᐳᑦ 2021-22−ᒥ ᓄᕙᒡᔪᐊᕐᓇᖅ-19 ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᖅ ᐱᔾᔪᑎᒋᓪᓗᒍ. ᑐᑭᓯᒋᐊᒐᒃᓴᑦ ᖃᐅᔨᓴᖅᑕᐅᔪᓂᒃ ᐊᒻᒪ ᖃᐅᔨᓴᖅᑕᐅᔪᓂᒃ ᑐᓴᖅᑕᐅᑎᑕᐅᓲᖑᖕᒥᔪᑦ ᐃᑭᐊᖅᑭᕕᒃᑯᑦ ᑲᓇᑕᒥ ᒐᕙᒪᒃᑯᓐᓂ (ᖃᓪᓗᓈᑎᑐᑦ ᑭᓯᐊᓂ).
• ᖁᑦᑎᓐᓂᖅᐹᖅ ᒥᕐᖑᐃᓯᕐᕕᒃ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᑦ ᒥᕐᖑᐃᖅᓯᕕᖏᓐᓄᑦ ᐸᕐᓇᐃᔨᑦ ᐊᐅᓚᑦᑎᔨᓪᓗ ᐃᓱᒪᒋᔭᒥᓂᒃ ᑐᓴᖅᑎᑦᑎᒃᑲᓐᓂᕐᓗᑎᒃ ᑕᓯᖅ ᐱᓱᒃᓗᑎᒃ ᑎᑎᖅᑲᑦ 2021-22−ᒥ, ᐃᓚᐅᑎᑦᑎᓪᓗᓂ ᓇᓗᓇᐃᔭᐅᑎᓂᒃ ᐃᓄᐃᑦ ᐊᑐᖃᑦᑕᕐᓂᑯᖏᓐᓂ, ᐃᑦᑕᕐᓂᓴᑐᖃᕕᓂᕐᓂ ᐃᓕᖅᑯᓯᑐᖃᕐᓄᓪᓗ ᓄᓇᖃᕐᕕᖕᓂ, ᐱᕈᖅᑐᑐᖃᖏᓐᓂᒃᓗ ᒥᕐᖑᐃᖅᓯᕐᕕᖕᒥ.

---

2009: ᓯᕗᓪᓕᐅᔭᐅᔪᒪᔪᑦ 6 – ᐅᔾᔨᕈᓱᓕᖅᑎᑦᓯᓂᕐᒥᑦ, ᑐᑭᓯᐅᒪᓂᕐᒥᑦ ᐃᑲᔪᖅᑐᕐᓂᕐᒥᓪᓗ ᖁᑦᑎᓂᖅᐸᖅ ᑲᓇᑕᒥᐅᓂᒃ ᐱᖃᑎᖃᕐᓗᑎᒃ, ᐳᓛᕆᐊᖅᑐᓂᒃ, ᓄᓇᓕᖕᒥᐅᓂᒡᓗ ᐊᐅᓱᐃᑦᑐᒥᐅᑦ ᖃᐅᓱᐃᑦᑐᒥᐅᓪᓗ ᐅᑯᑎᒎᓇᖅ, ᐃᓱᒪᒃᓴᖅᓯᐅᑦᑎᐊᖅᓯᒪᓂᒃᑯᑦ ᐊᑐᖅᑕᐅᕙᒃᑐᑐᖃᕐᓄᑦ ᐱᑖᕆᔭᐅᕙᒃᑐᑎᒍᑦ.

2020: ᑐᕌᒐᖅ 1.3 – ᒥᕐᖑᐃᖅᓯᕐᕕᒻᒥᑦ ᐊᐅᓚᑦᓯᓂᖅ, ᐸᕐᓇᓂᖅ ᐊᐅᓚᑦᓯᓂᕐᓗ ᐊᑐᐃᓐᓇᐅᑎᑦᓯᓂᐊᖅᑐᖅ ᐱᕕᖃᖅᑎᑦᓯᓂᕐᒥᑦ ᐃᓄᓐᓄᑦ ᖃᐅᓱᐃᑦᑐᒥᑦ ᐊᐅᓱᐃᑦᑐᒥᓪᓗ ᐱᕙᓪᓕᐊᑎᑦᓯᓂᕐᒥᑦ ᓴᙱᓂᖅᓴᒥᑦ ᑲᓲᒪᓂᕐᒥᑦ ᒥᕐᖑᐃᖅᓯᕐᕕᒻᒧᑦ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᖃᕆᑕᐅᔭᒃᑯᑦ, ᑐᓴᖅᑕᐅᔪᒃᓴᐃᑦ ᑐᕌᖓᓪᓗᐊᑕᖅᖢᑎᒃ ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒃ 9−ᓂᑦ ᖃᕆᑕᐅᔭᒃᑯᑦ ᓴᖅᑭᑕᐅᓚᐅᖅᑐᑦ ᒥᕐᙳᐃᖅᓯᕕᓕᕆᔨᒃᑯᑦ ᑲᓇᑕᒥᑦ ᓄᓇᕗᒻᒥᑦ ᕙᐃᔅᐳᖓᓂᑦ, 18,361-ᓂᒃ ᐊᑐᖅᐸᒃᑐᓂᒃ ᐊᑐᓚᐅᖅᑐᑦ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᒫᓐᓇ ᐋᖅᑭᒋᐊᖅᓯᕙᓪᓕᐊᕗᑦ ᓄᓇᕗᒻᒥ ᓯᓚᒥ ᐱᓕᕆᔨᓂᒃ ᐃᑭᐊᖅᑭᕕᒃᑯᑦ ᒪᒃᐱᒐᕐᓂᒃ ᑲᒪᒋᔭᖃᓪᓗᐊᑕᖅᖢᑎᒃ ᖃᐅᔨᒪᖁᓪᓗᒋᑦ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᒃᓴᓕᒫᑦ ᐃᓄᒃᑎᑐᑦ ᐊᑐᐃᓐᓇᐅᓂᖏᓐᓂᒃ.
• ᑭᖑᓪᓕᖅᐹᖅ ᑎᑎᕋᖅᑕᐅᒋᐊᕐᖓᖅᑐᖅ ᓇᖕᒥᓂᖅ−ᑲᒪᔨ ᐱᓱᔪᖕᓂᕐᒧᑦ ᕿᒥᕐᕈᑎᑕᐅᓂᖅ ᐃᑦᑕᕐᓂᓴᕐᓄᑦ ᐱᔾᔪᑎᒃᓴᓄᑦ ᐅᕙᓂ ᑕᓯᖅᒥᑦ (ᖃᓂᒋᔮᓂ ᑲᖏᖅᖢᐊᓗᒃ) ᐱᕙᒌᔭᖅᑕᐅᓚᐅᖅᑐᖅ 2021-22−ᒥ ᕿᒥᕐᕈᔭᐅᓂᕐᒧᑦ ᐊᒻᒪ ᑭᖑᓪᓕᖅᐹᒥ ᐊᖏᖅᑕᐅᓂᕐᒧᑦ ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒃ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᖕᒧᑦ ᐸᕐᓇᐅᑎᑦ ᐊᒻᒪ ᐊᐅᓚᑦᑎᔨᑦ 2022-23−ᒥ. ᑎᑎᖅᑲᖅ ᐱᖃᖃᑕᐅᕗᖅ ᐃᓄᐃᑦ ᓯᕗᕚᑦᑕ ᑐᓂᖃᕐᕕᕕᓂᐊ, ᑐᓃᑦ, ᐃᒻᒪᓂᓴᐃᑦ ᓯᕗᓕᐊᕐᔪᑦᑕ ᐱᐅᓯᑐᖃᖏᑦ ᐊᒃᑐᐊᓂᓕᒃ ᖁᑦᑎᓐᓂᖅᐹᖅ ᒥᕐᖑᐃᓯᕐᕕᒃᒧᑦ.

---

2009: ᓯᕗᓪᓕᐅᔭᐅᔪᒪᔪᑦ 7 – ᐅᓄᖅᓯᒋᐊᖁᓪᓗᒋᑦ ᓄᓇᓕᖕᓂ ᐳᓚᕋᖅᑐᓕᕆᔨᑦ ᐱᔪᓐᓇᕐᓂᕆᔭᖏᑦ ᐳᓚᕋᖅᑐᓕᕆᓂᕐᒧᑦ ᐃᑲᔫᑎᑦ ᐊᐅᓱᐃᑦᑐᒧᑦ ᐊᒻᒪ ᖃᐅᓱᐃᑦᑐᒧᑦ ᐊᓯᖏᓐᓂᒃ ᐱᓕᕆᖃᑎᖃᕐᓗᑎᒃ.

2020- ᑐᕌᒐᖅ 2.2 – ᐱᓕᕆᖃᑎᒌᖕᓂᖏᑦ ᒥᕐᙳᐃᖅᓯᕖᑦ ᑲᓇᑕᒥ ᐊᒻᒪᓗ ᐳᓚᕋᖅᑐᓕᕆᓂᖅ ᓴᙱᒃᑎᑉᐹᓪᓕᖅᑎᑦᑎᓚᐅᖅᑐᖅ ᐊᑐᕐᓂᐊᕐᓗᓂ ᑐᑭᖃᑦᑎᐊᖅᑐᒥᒃ ᐳᓚᕋᖅᑐᓕᕆᓂᕐᒧᑦ ᑲᑐᔾᔭᐅᔪᓂᒃ ᕿᑎᕐᒥᐅᓂ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒃ ᒪᑐᐃᖓᑎᓪᓗᒍ ᐳᓛᖅᑎᓄᑦ, ᒥᕐᙳᐃᖅᓯᕕᒃ ᑲᓇᑕᒥ ᑐᑦᑕᕐᕕᒃ ᐊᒥᖅᑳᖃᑎᖃᖅᐳᖅ ᐳᓛᕆᐊᖅᑐᓄᑦ ᐊᑐᖅᑕᐅᓕᕈᓐᓇᖅᑐᓂᒃ ᑲᑎᖅᓱᖅᓯᒪᔪᓂᒃ (VIP−ᒥᒃ) ᑕᒪᐃᓐᓄᑦ ᐳᓛᕆᐊᖅᐸᒃᑐᓄᑦ. ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᑦ ᒥᕐᖑᐃᖅᓯᕐᕕᖏᓐᓄᑦ ᐸᕐᓇᐃᔩᑦ ᐊᐅᓚᑦᑎᓃᓪᓗ ᕿᒥᕐᕈᓚᐅᖅᐳᑦ ᑭᐅᔾᔪᑕᐅᔪᓂᒃ ᐳᓛᖅᑎᑦ ᑐᑭᓯᒋᐊᕈᑎᖏᑕ ᒥᒃᓵᓄᑦ, ᐊᑐᐃᓐᓇᐅᖕᒥᔪᑦ ᖁᑦᑎᓂᐹᖅ ᒥᕐᖑᐃᖅᓯᕐᕕᒃ ᐃᑭᐊᖅᑭᕕᖓᓂ, ᓇᓗᓇᐃᔭᖅᓯᒪᔪᑦ ᑐᓴᐅᒪᔭᒃᓴᑦ ᐊᑐᐃᓐᓇᐅᑎᑕᐅᖕᒥᔪᑦ ᐳᓛᕆᐊᕈᓐᓇᑐᐃᓐᓇᕆᐊᓕᖕᓄᑦ ᐱᔪᒪᔪᓄᓪᓗ ᐅᖄᓚᐅᑎᒃᑯᑦ ᐃᕐᖐᓐᓇᒃᑰᕈᑎᒃᑯᓪᓘᓐᓃᑦ ᐅᑎᕐᑎᑕᐅᒃᐸᑕ, ᐊᒻᒪ ᐳᓛᕆᐊᖅᓯᒪᔪᑦ ᑐᑭᓯᑎᑕᐅᕚᓪᓕᕐᓂᕐᒧᑦ ᑲᑎᒪᔭᖅᑐᕆᐊᖃᖅᐳᑦ ᒥᕐᙳᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᖅᑎᖏᑦ ᒥᕐᖑᐃᖅᓯᕐᕕᖕᒧᐊᓚᐅᙱᓐᓂᖏᓐᓂᒃ.
• ᐊᕐᕌᒍᑕᒫᑦ ᐊᔪᕈᓐᓃᖅᓴᕐᓃᑦ ᓇᓗᙱᑦᑎᐊᕈᑕᐅᕙᒃᐳᖅ ᐃᖅᑲᓇᐃᔭᖅᑏᑦ ᐱᕙᒌᔭᖅᓯᒪᒐᓗᐊᕐᒪᖔᑕ ᖁᐊᖅᓵᕆᓂᕐᒧᑦ ᑭᐅᓯᓂᕐᒧᑦ.

---

2009: ᓯᕗᓪᓕᐅᔭᐅᔪᒪᔪᑦ 8 – ᐊᐅᓚᑦᑏᓐᓇᕐᓗᑎᒃ ᖁᑦᑎᓐᓂᖅᐸᒥᒃ ᐱᓕᕆᖃᑎᒌᒡᓗᑎᒃ.

2020: ᑐᕌᒐᖅ 1.1 – ᐃᓄᐃᑦ ᐃᓚᒋᔭᐅᖏᓐᓇᖅᑐᑦ ᐊᐅᓚᑦᓯᓂᕐᒧᑦ ᖁᑦᑎᓐᓂᖅᐹᕐᒧᑦ

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᐱᔾᔪᑎᒋᓪᓗᒍ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᓯᒪᔪᑦ ᐊᒃᑐᐊᓂᓖᑦ ᓄᕙᒡᔪᐊᕐᓇᖅ-19−ᒧᑦ, ᐊᒻᒪᓗᑦᑕᐅᖅ ᐃᓚᒋᔭᐅᔪᒧᑦ ᒪᓂᒪᔪᓄᑦ, ᐃᓐᓄᒃᓯᒪᙱᑦᑐᓄᑦ, ᐱᓕᕆᔾᔪᑎᓄᓪᓗ ᐃᓱᓕᑦᑕᖅᑎᑕᐅᔪᓄᑦ, ᐊᒃᓱᕈᕐᓇᓚᐅᖅᑐᖅ ᓇᖕᒥᓂᖅ ᐅᐸᒋᐊᒃᓴᖅ ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᑲᑐᔾᔨᖃᑎᒌᒃᖢᑎᒃ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᓕᕆᔨᒃᑯᑦ ᐸᕐᓇᐃᔨᖏᑦ ᐊᒻᒪ ᐊᐅᓚᑦᑎᔨᑦ ᑲᑎᒪᖃᑦᑕᖅᑎᓪᓗᒋᑦ 2021-22−ᒥ. ᑕᐃᒪᐃᒃᑲᓗᐊᖅᑎᓪᓗᒍ, ᐱᖓᓱᑦ ᑲᑎᒪᓚᐅᖅᑐᑦ, ᑲᑎᒪᔪᓐᓇᖅᖢᑎᒡᓗ ᒪᕐᕈᐃᖅᖢᑎᒃ.
• ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᖕᒥ ᐸᕐᓇᐃᔨᑦ ᐊᐅᓚᑦᑎᔨᓪᓗ ᑐᙵᓱᒃᑎᑦᑎᓚᐅᖅᐳᑦ ᒪᕐᕉᖕᓂ ᑲᑎᒪᔨᙳᓵᖅᑑᖕᓂᒃ ᑲᑎᒪᔨᕋᓛᓄᑦ−ᕉᑕ ᐃᓪᓚᐅᑦ ᖃᐅᓱᐃᑦᑐᒥ ᐊᒻᒪ ᐋᓂ ᐊᐅᓪᓚᓗᒃ ᐊᐅᓱᐃᑦᑐᕐᒥᐅᖅ- ᑕᒪᕐᒥᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (QIA) ᑎᒃᑯᐊᖅᑕᐅᔪᑦ. ᓄᑖᑦ ᐃᓚᒋᔭᐅᔪᑦ ᐱᑎᑕᐅᓚᐅᖅᐳᑦ ᐅᖃᐅᓯᒃᑯᑦ ᖃᐅᔨᑎᑕᐅᒃᑲᓐᓂᕐᓂᕐᒥᒃ ᐃᓂᒃᓴᓕᐅᖅᑐᖃᓕᖅᑎᓪᓗᒍ.

---

2009: ᓯᕗᓪᓕᐅᔭᐅᔪᒪᔪᑦ 9 – ᑐᕌᒐᖃᕈᒪᓂᕐᒧᑦ ᐅᑎᕐᕕᖃᕈᓐᓇᕐᓂᕐᒥᑦ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒥᑦ ᓄᓇᕗᒻᒥ ᒥᕐᖑᐃᖅᓯᕐᕖᑦ ᑲᓇᑕᒥ 2020-ᒥ.

2020: ᑐᕌᒐᖅ 1.2 – ᐱᕕᒃᓴᐃᑦ ᐃᓚᐅᓂᖅᓴᐅᓂᕐᒧᑦ ᐃᖅᑲᓇᐃᔭᕐᓂᕐᒧᑦ ᐊᖏᒡᓕᒋᐊᖅᑐᓄᓪᓗ ᑮᓇᐅᔭᓕᐅᕋᓱᖕᓂᕐᒧᑦ ᐱᕚᓪᓕᕈᑕᐅᕙᒃᑐᑦ ᐊᑐᖅᑕᐅᒃᑲᓐᓂᖅᐳᑦ ᖃᓂᒋᔭᖏᓐᓂ ᓄᓇᓕᖕᓂ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᕐᓇᐅᑦ ᓄᑖᙳᕆᐊᖅᑕᐅᓚᐅᖅᐳᖅ 2019−ᒥ. ᐱᓕᒻᒪᒃᓴᕐᕕᒃ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᒪᓕᒐᖅᑎᒍᑦ ᐱᔨᑦᑎᕋᖅᑎᑦ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᐃᖅᑲᓇᐃᔭᖅᑎᓄᑦ ᖃᓄᐃᓕᐅᕈᑕᐅᔪᒪᔪᑦ ᐱᓕᕆᖃᑎᒌᑦ, ᐊᒻᒪ ᑕᓪᓕᒪᑦ ᑲᓇᑕᒥ ᒥᕐᖑᐃᖅᓯᕕᓕᕆᔩᑦ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᖕᓄᑦ ᐸᕐᓇᐅᑎᑦ ᐊᒻᒪ ᐊᐅᓚᑦᑎᔨᑦ ᐱᓕᕆᐊᖑᓂᐊᕐᓂᕋᖅᓯᒪᔪᑦ ᕿᒥᕐᕈᓚᐅᖅᐳᑦ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᕐᓇᐅᑎᒥᒃ. ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥ ᐊᖓᔪᖅᑳᒻᒪᕆᖓ ᐊᐅᓚᓂᖏᓐᓄᑦ ᐊᖏᓚᐅᖅᑐᖅ ᐸᕐᓇᐅᑎᒥᒃ ᐊᐃᕆᓕ 2020−ᒥ.

---

2009: ᓯᕗᓪᓕᐅᔭᐅᔪᒪᔪᑦ 10 – ᐱᒋᐊᖅᑎᑦᑎᓗᑎᒃ, ᑲᔪᓯᑎᑦᑎᓗᑎᒃ, ᐊᒻᒪ ᐱᓕᕆᖃᑎᒌᓪᓗᐊᑕᕐᓗᑎᒃ ᖃᐅᔨᓴᖅᑐᓕᕆᓂᕐᒥᒃ, ᐃᓕᖅᑯᓯᓕᕆᓂᕐᒥᒃ ᐊᐅᓚᑦᑎᓂᕐᒥᒃ, ᐱᓕᕆᔾᔪᑎᒃᓴᓂᒃ, ᐳᓚᕋᖅᑐᓕᕆᓂᕐᒥᒃ ᐊᒻᒪ ᓂᐅᕐᕈᑎᖃᕋᓱᐊᕐᓂᕐᒥᒃ, ᐊᒻᒪ ᐃᓕᓐᓂᐊᖅᑎᑦᑎᓂᕐᒥᒃ.

2020: ᑐᕌᒐᖅ 2.3 – ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᒃᑯᑦ ᐱᓕᕆᔾᔪᓰᑦ ᓴᖅᑭᔾᔪᑎᒃᓴᑦ ᒥᕐᖑᐃᖅᓯᕐᕕᖕᒥ ᐊᐅᓚᑦᑎᓂᕐᒧᑦ ᐱᔾᔪᑕᐅᔪᑦ ᑲᒪᒋᔭᐅᓲᖑᕗᑦ ᓂᒡᓕᓇᖅᑐᒃᑰᖅᐸᒡᓗᑎᒃ, ᒪᕐᕈᐃᓕᖓᔪᒃᑯᑦ ᑐᓴᐅᒪᔪᓕᕆᔾᔪᑎᒃᑯᑦ ᐊᒻᒪ ᐱᓕᕆᖃᑎᒌᒍᓯᕐᓂᒃ ᐱᓕᕆᖃᑎᒌᓂᒃ ᐱᓕᕆᖃᑎᒌᓂᒃ ᐊᒻᒪ ᐱᑖᖃᑕᐅᓯᒪᔪᓂᒃ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᐱᓕᕆᖃᑎᖃᑦᑎᐊᕋᓱᒃᑐᑦ ᐅᑭᐅᖅᑕᖅᑐᒥ ᑲᔪᓰᓐᓇᖅᑐᓂᒃ 2020-21−ᒥ, ᐱᓗᐊᖅᑐᒥᑦ ᓇᓕᒧᓕᖅᑎᓐᓇᓱᒡᓗᒋᑦ ᓄᕙᒡᔪᐊᕐᓇᖅ-19 ᓄᓇᕐᔪᐊᒥᑦ ᖃᓂᒪᓂᖅ ᑐᓴᐅᒪᖃᑎᒌᖕᓂᕐᓗ ᐊᒃᑐᐃᓂᐅᕙᒃᑐᑦ ᖃᐅᔨᓴᖕᓂᖕᓄᑦ. ᐊᖏᖃᑎᒌᒍᑎ ᐅᑭᐅᖅᑕᖅᑐᒥ ᑲᔪᓰᓐᓇᕐᓂᕐᒧᑦ ᓴᓪᓕᐊᑉ ᐱᓕᕆᐊᒃᓴᖓᓂ ᐊᖏᖃᑎᒌᒍᑎ ᐅᑭᐅᖅᑕᖅᑐᒥ ᑲᔪᓰᓐᓇᕐᓂᕐᒧᑦ ᓴᓪᓕᐊᑉ ᐱᓕᕆᐊᒃᓴᖓᓂ; ᑭᓯᐊᓂ, 2021-22−ᒥ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑲᑎᒪᓚᐅᕆᕗᑦ ᐅᖃᐅᓯᖃᖅᖢᑎᒃ ᖃᐅᔨᓴᖅᑕᐅᖅᑳᕆᐊᓕᖕᓂᒃ ᐅᑭᐅᖅᑕᖅᑐᒥ ᐊᖏᖃᑎᒌᓚᐅᖅᖢᑎᒡᓗ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ (MOU) ᓇᓗᓇᐃᔭᖅᑐᖅ ᑕᒪᒃᑮᓄᑦ ᐱᓕᕆᖃᑕᐅᔪᓄᑦ.
• ᒥᕐᖑᐃᖅᓯᕕᓕᕆᓂᕐᒧᑦ ᐸᕐᓇᐃᑎᓪᓗᒋᑦ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᓴᖅᑭᑦᑎᔪᒪᓪᓚᑦᑖᓚᐅᖅᐳᑦ ᐊᖏᖃᑎᒌᒍᑎᒥᒃ ᑲᓇᑕᒥ ᐅᓇᑕᖅᑐᒃᓴᒃᑯᓐᓂ ᐅᑭᐅᑦ ᐱᖓᓱᑦ ᐃᓗᐊᓂ. ᑲᑎᒪᖃᑎᖃᕐᓂᖅ ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᓐᓂ ᐅᖃᐅᓯᖃᕐᓂᐊᕐᓗᑎᒃ ᑕᒪᑐᒥᖓ, ᐊᒻᒪᓗᑦᑕᐅᖅ ᐱᕕᒃᓴᓂᒃ ᑕᒪᐃᓐᓄᑦ ᐱᕚᓪᓕᕈᑕᐅᔪᓐᓇᖅᑐᓄᑦ ᐱᓕᕆᖃᑎᒌᖕᓂᕐᒥᒃ ᐃᖅᑲᓇᐃᔭᕐᓂᕆᔭᒥᓂ ᐱᔭᕇᖅᑕᐅᓯᒪᔪᓂᒃ ᐃᓗᐊᓂ ᖃᓂᒋᔭᖓᓂᓗ ᖁᑦᑎᕐᓂᖅᐹᖅ ᒥᕐᖑᐃᖅᓯᕐᕕᒃ (ᓲᕐᓗ, ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᖓ−ᐊᐅᓚᑦᑎᓪᓗᑎᒃ ᐱᔪᓐᓇᕐᓂᕐᒥᒃ ᒥᕐᖑᐃᖅᓯᕐᕕᖕᒧᑦ ᐋᖅᑭᒃᓯᒪᐃᓐᓇᖅᑎᓪᓗᒍ ᐱᔭᕆᐊᖃᒻᒪᕆᒃᑐᖅ ᑲᓇᑕᒥ ᐅᓇᑕᖅᑐᒃᓴᑦ ᐱᖁᑎᖏᑦ) ᑲᔪᓯᓪᓗᓂ 2021-22. ᑎᑎᕋᖅᑕᐅᒋᐊᖓᖅᑐᖅ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᕿᒥᕐᕈᔭᐅᓕᖅᑐᖅ.
• ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐱᓕᕆᖃᑎᖃᐃᓐᓇᖃᑦᑕᖅᐳᑦ ᐅᑭᐅᖅᑕᖅᑐᒥᑦ ᑲᔪᓯᓯᒪᐃᓐᓇᖅᑎᑦᑎᓂᖕᒧᑦ ᓯᐅᕝ ᐱᓕᕆᐊᖅ, ᐅᑭᐅᖅᑕᖅᑐᒥ ᐸᓖᓯᒃᑯᓐᓂ, ᑲᓇᑕᒥ ᐅᓇᑕᖅᑐᒃᓴᒃᑯᓐᓂ, ᐸᓖᓯᒃᑯᓐᓂ(ᐸᓖᓯᒃᑯᓐᓂ) ᓄᓇᓕᖕᓂ ᐱᖏᖕᓇᖅᑐᓕᕆᔨᒃᑯᑦ ᐊᐅᓱᐃᑦᑐᒥ ᐊᒻᒪ ᖃᐅᓱᐃᑦᑐᒥ, ᖃᖓᑕᓲᒃᑯᑦ ᐱᖏᖕᓇᖅᑐᓕᕆᔨᒃᑯᑦ ᑲᑐᔾᔨᖃᑎᒌᑦ, ᑐᕆᓐᑕᓐ ᐱᖏᖕᓇᖅᑐᓕᕆᔨᒃᑯᑦ ᐊᐅᓚᑦᑎᕝᕕᖓ, ᒥᕐᙳᐃᖅᓯᕕᒃ ᑲᓇᑕᒥ ᑐᑦᑕᕐᕕᒃ ᔮᔅᐳ ᐅᖄᓚᕝᕕᒃ, ᐊᒻᒪ ᑭᒃᑯᑐᐃᓐᓇᕐᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᒪᔨᑕᑦ ᒥᕐᙳᐃᖅᓯᕕᖕᒥ ᑲᓇᑕᒥ ᑐᑦᑕᕐᕕᖕᒥ ᐱᑎᑦᑎᓂᕐᒧᑦ ᐱᑎᑦᑎᓂᕐᒥᒃ ᑭᒃᑯᑐᐃᓐᓇᕐᓄᑦ ᐊᑦᑕᕐᓇᖅᑕᐃᓕᒪᓂᕐᒥᒃ.
• ᐊᒻᒪ ᓱᓕ, ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᖓ ᐱᓕᕆᖃᑎᖃᓲᖑᕗᑦ ᖃᔅᓯᑲᓪᓚᖕᓂᒃ ᓯᓚᑦᑐᖅᓴᕐᕕᖕᓂ ᐊᒻᒪ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᑎᑎᕋᖅᓯᒪᔪᓂᒃ ᑲᑎᖅᓱᐃᓂᕐᒧᑦ ᐊᒻᒪ ᑐᑭᓯᒋᐊᒐᒃᓴᓂᒃ ᑐᓴᖅᑎᑦᑎᖃᑦᑕᐅᑎᓂᕐᒧᑦ ᖃᐅᔨᓴᖅᐸᓪᓕᐊᔭᒥᒃ ᐊᒻᒪ ᖃᐅᔨᓴᕐᓂᕐᒥᒃ. ᐆᒃᑑᑎᒋᓗᒍ, 2021-22−ᒥᑦ, ᖁᓛᓂ ᓇᓗᓇᐃᖅᓯᒪᔪᑦ ᐃᖃᓗᖕᓂᑦ ᖃᐅᔨᓴᖕᓂᐅᔪᑦ ᐱᐊᓂᒃᑕᐅᓚᐅᖅᑐᑦ ᐱᓕᕆᖃᑎᖃᖅᖢᑎᒃ ᐊᕙᑎᓕᕆᔨᒃᑯᑦ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᖃᐅᔨᓴᖅᑎᓂᑦ.
• ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᓚᐅᖅᐳᑦ ᐆᒪᔪᓂᒃ ᖃᐅᔨᓴᕈᑎᓂᒃ ᓯᕗᓪᓕᐅᔾᔭᐅᔪᒪᔪᓂᒃ ᑲᓇᑕᓕᒫᒥ ᒥᕐᙳᐃᖅᓯᕐᕕᓕᒫᓂᒃ, ᐅᑯᓂᖓᓗ ᖁᑦᑎᓂᖅᐸᖅ ᒥᕐᖑᐃᖅᓯᕕᒃ, ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ 2021−ᒥ ᐅᑭᐊᒃᓵᒃᑯᑦ.

---

2009: ᓯᕗᓪᓕᐅᔭᐅᔪᒪᔪᑦ 11 – ᐋᖅᑭᒃᓱᐃᓗᑎᒃ ᓇᓗᓇᐃᒃᑯᑕᓂᒃ ᐊᒻᒪ ᑎᑭᑕᐅᓇᓱᒃᑐᓂᒃ ᖁᑦᑎᓐᓂᖅᐸᓯᐅᑉ ᐊᐅᓚᑕᐅᓂᖓᓄᑦ.

ᐱᕙᓪᓕᐊᓂᐅᔪᑦ/ᐱᔾᔪᑕᐅᓗᐊᖅᓯᒪᔪᑦ:

• ᓄᓇᒥᑦ ᖃᐅᔨᓴᕐᓂᖅ ᓱᓕᓂᖓᓄᑦ ᓇᓗᓇᐃᖅᓯᔾᔪᑏᑦ ᑐᕌᒐᐃᓪᓗ ᓄᓇᒥᑦ ᐃᒪᑐᐃᓐᓇᕐᒥᓪᓗ ᐊᕙᑎᖏᓐᓂᑦ ᓇᓗᓇᐃᖅᑕᐅᓯᒪᔪᑦ ᑭᓪᓕᖃᖅᓱᑎᒃ. 2021-22−ᒥ, ᐃᒪᑐᐃᓐᓇᕐᒥ ᖃᐅᔨᓴᒐᒃᓴᑦ ᑲᑎᑕᐅᓚᐅᖅᐳᑦ ᑎᓴᒪᐅᓪᓗᑎᒃ ᓇᓗᓇᐃᖅᑕᐅᓯᒪᔪᑦ, ᐊᒻᒪ 20−ᐅᓪᓗᑎᒃ ᐃᖃᓗᑦ ᒪᑦᑎᑦᑕᐅᑎᓕᖅᑕᐅᓚᐅᖅᐳᑦ ᐊᕿᕐᕉᔭᖅ ᖃᐅᔨᓴᖅᑕᐅᓪᓗᓂ. ᓄᓇᐅᑉ ᖄᖓᓂᑦ ᐊᒻᒪᓗ ᐱᕈᖅᑐᓂᑦ ᓄᓇᓕᓐᓂᑦ ᖃᐅᔨᓴᕐᓂᕐᒧᑦ ᐱᓕᕆᐊᑦ ᑲᒪᒋᔭᐅᓚᐅᖅᑐᑦ 2021-ᒥ, ᑭᓯᐊᓂ ᐃᓚᖏᑦ ᐱᓕᕆᐊᒃᓴᑦ ᐱᐊᓂᒃᑕᐅᔪᓐᓇᓚᐅᙱᑦᑐᑦ (ᓲᕐᓗ, ᐃᒪᕐᒥᒃ ᑯᕕᔪᖅ) ᐅᕝᕙᓘᓐᓃᑦ ᐃᓚᐃᓐᓇᖏᓐᓂᒃ ᐱᐊᓂᒃᑕᐅᔪᖃᓚᐅᖅᑐᖅ (ᓲᕐᓗ, ᐱᕈᖅᑐᓂᒃ ᖃᐅᔨᓴᕐᓂᖅ, ᐃᒪᑦᑎᐊᕙᖕᒥᒃ ᖃᐅᔨᓴᕐᓂᖅ) ᐱᓗᐊᖅᑐᒥᒃ ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᒧᑦ ᑭᒡᓕᖃᖅᑎᑕᐅᔪᑦ ᐊᓯᖏᓪᓗ ᐱᓕᕆᔾᔪᑎᑦ ᓲᕐᓗ ᖁᓕᒥᒎᓕᒃᑯᑦ ᐃᑲᔪᖅᓱᖅᑕᐅᑦᑎᐊᙱᓐᓂᖏᓐᓄᑦ. ᐃᓄᐃᑦ ᖃᐅᔨᒪᔭᖏᑦ ᐃᓕᓐᓂᐊᖅᑕᐅᔪᒃᓴᑦ ᓱᓕ ᐋᖅᑭᒃᑕᐅᔭᕆᐊᖃᖅᐳᑦ ᒥᕐᖑᐃᖅᓯᕐᕕᖕᒧᑦ.

---

---

ᑭᖑᓪᓕᕐᒥ ᐱᓕᕆᐊᒃᓴᑦ

ᒥᕐᖑᐃᖅᓯᕕᓕᕆᔩᑦ ᑲᓇᑕᒥ ᓄᓇᕗᒻᒥ ᓯᓚᒥ ᐱᓕᕆᖃᑎᒌᖏᑦ ᐊᒻᒪ ᖁᑦᑎᒃᑐᖅ ᑲᑐᔾᔨᖃᑎᒌᑦ ᐃᓄᐃᑦ/ᒐᕙᒪᒃᑯᓐᓂ ᒥᕐᖑᐃᖅᓯᕕᓕᕆᔨᒃᑯᑦ ᐸᕐᓇᐅᑎᖓ ᐊᒻᒪ ᐊᐅᓚᑦᑎᔨᖏᑦ ᓂᕆᐅᑦᑎᐊᖅᐳᑦ ᐊᕐᕌᒍᒃᑲᓐᓂᕐᒧᑦ ᐱᓕᕆᐊᖑᑦᑎᐊᓛᕐᓂᐊᕐᓂᖓᓂᒃ. ᐸᕐᓇᐅᑎᑦ 2021-22−ᒧᑦ ᐋᖅᑭᒋᐊᖅᑕᐅᕙᓪᓕᐊᕗᑦ ᐱᔾᔪᑎᒋᓪᓗᒍ ᐊᓯᔾᔨᖅᐸᓪᓕᐊᖏᓐᓇᖅᑐᖅ ᓄᕙᒡᔪᐊᕐᓇᖅ-19−ᒧᑦ. ᐱᒋᐊᖅᑕᐅᓪᓗᐊᑕᖅᓯᒪᔪᑦ ᐊᕐᕌᒎᓂᐊᓕᕐᒥᔪᒧᑦ ᐅᑯᓂᖓ ᐃᓚᖃᓚᐅᖅᐳᑦ:

• ᐃᓄᓕᒫᖅᑎᑦᑎᓗᑎᒃ ᑎᑎᕋᖅᑕᐅᒋᐊᕐᖓᖅᑐᒧᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒧᑦ ᐊᑐᓕᖅᑎᑕᐅᓂᐊᖅᑐᒧᑦ ᓄᑖᒧᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒧᑦ 2023-24-ᒥ;
• ᐱᐅᓯᒋᐊᖅᑎᑦᑎᓂᖅ ᐱᓕᕆᖃᑎᒌᒃᐸᖕᓂᕆᔭᖏᓐᓂᒃ ᒥᕐᙳᐃᖅᓯᕐᕕᓕᕆᔩᑦ ᑲᓇᑕᒥ ᓄᓇᓕᖕᒥᐅᓪᓗ ᐊᐅᓱᐃᑦᑐᒥ ᖃᐅᓱᐃᑦᑐᒥᓗ ᐅᑯᑎᒎᓇᖅ, ᐱᓕᕆᖃᑎᖃᕐᓂᕐᒧᑦ ᐱᓕᕆᐊᖑᕙᒃᑐᑎᒍᑦ ᓲᕐᓗ ᓄᓇᓕᖕᓂ ᐃᓕᖅᑯᓯᓕᕆᓂᕐᒧᑦ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ, ᐃᓕᓐᓂᐊᕐᕕᖕᒥ ᑲᒪᔨᑦ, ᐊᒻᒪ ᐱᓕᒻᒪᒃᓴᖅᑎᑦᑎᓂᖅ ᐊᒻᒪ ᐃᖅᑲᓇᐃᔭᖅᑎᑖᕐᓂᖅ ᐊᒻᒪ,
• ᐱᐅᓯᒋᐊᖅᑎᑦᑎᓂᖅ ᐱᓕᕆᐊᒃᓴᓂᒃ ᐱᖁᑎᓄᑦ ᐱᓕᕆᐊᒃᓴᓄᑦ ᐃᓚᐅᓪᓗᓂ ᑲᔪᓯᓂᖅ ᖃᑦᑕᐅᔭᕐᔪᐊᒥ ᓯᕐᓗᐊᕐᒥ ᐊᒻᒪ ᐃᓄᖕᓄᑦ ᐊᒃᑕᑯᓂᑦ ᐱᖁᑎᓄᑦ ᐱᓕᕆᐊᒃᓴᓄᑦ ᐃᑎᕈᐃᑦ ᒫᓐᓇᐅᔪᖅ ᐃᖅᑲᓇᐃᔭᕐᕕᒋᔭᒥ ᖃᓄᐃᙱᑦᑎᐊᕋᓱᖕᓂᖅ ᐊᑦᑕᕐᓇᕐᑕᐃᓕᒪᓂᕐᓗ ᐊᕙᑎᒧᓪᓗ ᓱᕈᕐᓇᖅᑐᓄᑦ ᐊᑦᑕᕐᓇᖅᑐᑦ.