ᓯᕐᒥᓕᒃ ᒥᕐᖑᐃᓯᕐᕕᒃ ᑲᓇᑕᒥ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ 2016-ᒥ

ᑎᑎᕋᕐᓯᒪᔪᑦ ᐃᓗᓕᖏᑦ

• ᒥᓂᔅᑕᐅᑉ ᐅᖃᐅᓯᒃᓴᖓ
• ᐊᑐᓕᖁᔭᐅᔪᑦ
• ᓇᐃᓈᕐᓯᒪᔪᑦ ᐅᓂᒃᑲᒃᓴᐃᑦ
• 1.0 ᐱᒋᐊᕐᓂᖓ
• 2.0 ᐱᓪᓚᕆᐅᓂᖓ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᑯᒃ
• 3.0 ᐸᕐᓇᒃᑕᐅᓂᖓᑕ ᐃᓗᓕᖏᑦ
• 4.0 ᐸᕐᓇᒃᑕᐅᓂᖓᑕ ᓯᕗᓪᓕᐅᔾᔭᐅᔪᒪᔪᑦ
• 5.0 ᑕᑯᓐᖑᐊᕐᓂᖅ
• 6.0 ᐱᓗᐊᕐᑐᒥᒃ ᑐᕋᒐᐅᔪᑦ
• 7.0 ᐊᐅᓚᑕᐅᔪᑦ ᓇᒥᓐᓂᖏᑦ
• 8.0 ᑭᒃᓕᓕᐅᕐᓯᒪᔪᑦ
• 9.0 ᓇᐃᓈᕐᓯᒪᔪᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᑕᐅᔪᑦ
• 10.0 ᖁᔭᒋᔭᐅᔪᑦ

ᓄᓇᖑᐊᑦ

• ᓄᓇᖑᐊᖅ 1: ᓄᓇᖓ ᓇᒥᒻᒪᖓᑦ
• ᓄᓇᖑᐊᖅ 2: ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ
• ᓄᓇᖑᐊᖅ 3: ᓴᓐᓂᕈᑎᐊᓗᒃ ᕿᑭᕐᑕᖅ, ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ
• ᓄᓇᖑᐊᖅ 4: ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᑭᒃᓕᓕᐅᕐᓯᒪᔪᑦ
• ᓄᓇᖑᐊᖅ 5: ᓂᒋᕐᐸᓯᐊᓂ ᑎᕆᖁᐊᓂ ᓴᓐᓂᕈᑎᐊᓗᑦ ᑭᒃᓕᓕᐅᕐᓯᒪᓂᖓ
• ᓄᓇᖑᐊᖅ 6: ᓄᓇᐃᑦ ᐱᓪᓚᕆᐅᔪᑦ ᐃᓄᒃᓄᑦ

 

© © ᑯᐃᓐ ᐱᔾᔪᑎᒋᓪᓗᒍ ᑲᓇᑕᒥ, ᑭᒐᕐᑐᕐᑕᐅᓪᓗᓂ ᐊᐅᓚᑦᑎᔨᒪᕆᒃᒧᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ, 2015

ᑲᓇᑕᒥ ᐅᖃᓕᒪᒐᖃᕐᕕᒃ ᓇᒥᑎᑕᐅᒃᒪᖓᑕ ᐅᖃᓕᒪᒐᐃᑦ :

• ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕ
• ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᐊᐅᓚᑕᐅᓂᖓᓄᑦ ᐸᕐᓇᐅᑎᑦ

ᑐᑭᓯᒋᐊᒃᑲᓐᓂᕈᒪᒍᕕᑦ ᐊᐅᓚᑕᐅᓂᖓᓄᑦ ᐸᕐᓇᐅᑎᒧᑦ ᐅᕙᓗᓐᓂᑦ ᓯᕐᒥᓕᒃ ᒥᕐᖑᐃᕐᓯᕐᕕᐅᑦ ᒥᒃᓴᓄᑦ:

ᒥᓂᔅᑕᐅᑉ ᐅᖃᐅᓯᒃᓴᖓ

ᑲᓇᑕᐅᑉ ᒥᕐᖑᐃᓯᕐᕕᖏᑦ, ᑲᓇᑕᐅᑉ ᐃᑦᑕᖕᓂᑕᖃᕐᕕᖏᑦ ᐊᒻᒪᓗ ᑲᓇᑕᐅᑉ ᑕᕆᐅᖕᒥ ᓴᐳᓐᓂᐊᖅᑕᖏᑦ ᐱᒋᔭᐅᔪᑦ ᑕᒪᐃᓐᓄᑦ ᑲᓇᑕᒥᐅᓄᑦ ᐊᑐᖅᓯᑦᓯᓪᓗᑎᒃ ᑲᓇᑕᒥᐅᑦ ᐊᑐᖃᑦᑕᓪᓚᕆᒃᑕᖏᓐᓂᒃ.

ᐅᑯᐊ ᓄᓇᑦᑎᐊᕙᐃᑦ ᐱᐅᓂᖅᐹᑦ ᐊᒻᒪᓗ ᐱᓕᕆᔾᔪᑎᖃᖅᑐᑦ ᓴᐳᒻᒥᓪᓗᒋᑦ ᓄᓇᐃᑦ ᐊᒻᒪᓗ ᐱᐅᓯᑐᖃᐃᑦ ᐃᓅᓯᑐᖃᖃᕐᕖᑦ ᓄᓇᐃᑦ ᓄᓇᕐᔪᐊᒥ.

ᒐᕙᒪᒃᑯᑦ ᐊᔪᐃᓐᓈᕆᔭᖃᖅᑐᑦ ᒪᑭᒪᐃᓐᓇᖅᑎᑦᑎᓛᕐᓂᕐᒥᓂᒃ ᑲᓇᑕᐅᑉ ᒥᕐᖑᐃᓯᕐᕕᖏᓐᓂᒃ. ᐊᖏᓕᒋᐊᖅᑎᑦᑎᓂᖕᒥᒃ ᓴᐳᓐᓂᐊᖅᑕᐅᔪᓂᒃ ᓄᓇᓄᑦ ᐊᒻᒪᓗ ᐃᑲᔪᕐᓂᖕᒥᒃ ᐅᓄᖅᓯᑎᑲᓐᓂᖕᓂᖏᓐᓄᑦ ᐆᒪᔪᑦ ᐃᓄᐃᓴᒡᓕᓗᐊᓕᖅᑐᑦ. ᐊᑕᐅᑦᑎᒃᑯᑦᑕᐅᖅ, ᓄᑖᓂᒃ ᐱᓕᕆᐊᒃᓴᓂᒃ ᐃᓴᒪᑖᕆᔭᐅᔪᓂᒃ ᓴᓇᕙᓪᓕᐊᖏᓐᓇᕆᐊᖃᖅᑐᒍᑦ ᐱᔨᑦᑎᕈᓯᑖᕆᐊᖃᖅᖢᑎᓗ ᑲᓇᑕᒥᐅᑦ ᐊᑐᕈᓐᓇᓛᖕᒪᑕ ᐃᓕᑦᑐᓐᓇᓛᕐᒪᑕᓗ ᐊᕙᑎᑦᑎᓐᓂ ᐊᒻᒪᓗ ᐃᒻᒪᑲᓪᓚᓂᑕᖕᓂᒃ ᖃᓄᐃᓕᖓᓂᕕᓂᖓᓐᓂᒃ.

ᑖᓐᓇ ᓄᑖᖅ ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐸᕐᓇᐅᑎ ᓯᕐᒥᓕᖕᒧᑦ ᒥᕐᖑᐃᓯᕐᕕᖕᒧᑦ ᐃᑲᔪᖅᑐᖅ ᑕᒪᑐᒥᖓᑕᐅᖅ ᑐᖔᓂ.

ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐸᕐᓇᐅᑎ ᓴᓇᔭᐅᕙᒃᑐᑦ ᓯᕕᑐᔪᒥᒃ ᖃᐅᔨᒋᐊᕐᕕᒋᔭᖃᖅᓯᒪᓂᒃᑯᑦ ᑐᓴᖅᑎᑕᐅᖃᑦᑕᖅᓯᒪᓂᒃᑯᓪᓗ ᐊᔾᔨᒌᖏᑦᑐᓂᒃ ᐃᓄᖕᓂᒃ ᑎᒥᐅᔪᓄᓪᓗ, ᐃᓚᒋᔭᐅᓗᑎᒃ ᓄᓇᖃᖄᖅᓯᒪᔪᑦ, ᓄᓇᓕᖕᓂ ᐊᕕᒃᑐᖅᓯᒪᔪᓂᒡᓗ ᓄᓇᖃᖅᑐᑦ, ᐳᓚᕋᖅᑏᑦ ᐊᒻᒪᓗ ᐱᓕᕆᑦᑎᐊᖅᑐᑦ ᐱᓇᓱᐊᖃᑎᒌᑦ ᒥᕐᖑᐃᓯᕐᕕᓕᕆᔨᒃᑯᓐᓂᒃ ᑲᓇᑕᒥ.

ᑲᓇᑕᐅᑉ ᒥᕐᖑᐃᖅᓯᕐᕕᖏᑦ, ᑲᓇᑕᐅᑉ ᐃᑦᑕᖕᓂᑕᖃᕐᕕᖏᑦ ᐊᒻᒪᓗ ᑲᓇᑕᐅᑉ ᑕᕆᐅᕐᒥ ᓴᐳᓐᓂᐊᖅᑕᖏᑦ ᓯᕗᓪᓕᖅᐸᐅᑎᓯᒪᓂᐊᖅᑕᖏᑦ ᑲᓇᑕᐅᑉ ᒐᕙᒪᒃᑯᖏᑦᑕ. ᖁᔭᓐᓇᒦᕈᒪᔭᒃᑲ ᐃᑲᔪᖃᑦᑕᖅᓯᒪᔪᓗᒃᑖᑦ ᑖᑉᓱᒧᖓ ᐸᖕᓇᐅᑎᒧᑦ ᐊᔪᐃᓐᓈᕆᔭᖃᐃᓐᓇᓚᐅᕐᓂᖕᓐᓄᑦ ᐃᑲᔪᖃᑎᒌᑦᑎᐊᓚᐅᕐᓂᖏᓐᓄᓪᓗ.

ᒥᓂᔅᑕᐅᓪᓗᖓ ᑲᒪᒋᔭᖃᖅᖢᖓ ᒥᕐᖑᐃᖅᓯᕐᕕᓕᕆᔨᒃᑯᓐᓂᒃ ᑲᓇᑕᒥ, ᖁᕕᐊᓲᑎᒋᕙᕋ ᑕᒪᓐᓇ ᐱᓕᕆᖃᑎᒌᑦᑎᐊᕐᓂᖅ ᖁᕕᐊᓱᒃᖢᖓᓗ ᐊᖏᕋᒃᑯ ᓯᕐᒥᓕᒃ ᒥᕐᖑᐃᖅᓯᕐᕕᖓᓂᒃ ᑲᓇᑕᒥ ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐸᕐᓇᐅᑎ.

ᓯᕗᓪᓕᖅᐹᖅ ᐆᒪ ᐊᑎᓕᐅᖅᑕᖓ

---

ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ

ᔪᓚᐃ 3, 2015

ᒥᓂᔅᑖᒧᑦ,

ᐱᔾᔪᑎᓕᒃ: ᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕐᕕᖓ ᐊᐅᓚᑦᑎᔾᔪᑎᒃᓴᓄᑦ ᐸᕐᓇᐅᑎ

ᐅᑯᐊ ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑐᓂᓯᕗᑦ ᐊᑎᓕᐅᖕᖢᒍᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕐᕕᖓ ᐊᐅᓚ°ᑎᔾᔪᑎᒃᓴᓄᑦ ᐸᕐᓇᐅᑎ, ᐅᓇᓗ ᐊᖕᖏᖅᑕᐅᓯᒪᔪᓐ ᓄᓇᕗᒻᒥ ᐆᒪᔪᓕᕆᔨ'ᔪᐊᑦ ᑲᑎᒪᔨᖏᑦ ᒪᓕᔅᖢᒍ ᐃᓚᖓ 5.2.34(6) ᓄᓇᕗᒻᒥ ᓄᓇᑖᕈᑎᑦ ᐊᖕᖏᕈᑎᖏᑦ .

ᐅᑯᐊ ᓄᓇᕗᒻᒥ ᐆᒪᔪᓕᕆᔨᑦᔪᐊᑦ ᑲᑎᒪᔨᖏᑦ ᖁᔭᓕᑎᕙᐃᑦ ᒥᑦᖑᐃᓐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᑲᑐᔾᔨᖃᑎᒌᑦ ᒥᕐᖑᐃᖅᓯᕐᕕᖕᒥ ᐸᕐᓇᐃᔩᑦ ᐱᓇᓱᐊᖃᑎᒌᑦ ᐱᕙᓪᓕᐊᑎᑕᐅᓂᖓᓄᑦ ᐊᑑᑎᖃᑦᑎᐊᓐᑐᒥᒃ ᐊᐅᓚᑦᑎᔾᔪᑎᒃᓴᓄᑦ ᐸᕐᓇᐅᑎ ᑪᐠᓱᒧᖓ ᓯᕐᒥᓕᒃ ᑲᓇᑕᐅᑉ ᒥᕐᖑᐃᓐᓯᕐᕕᖓ. ᐅᓇ ᐊᐅᓚᑦᑎᔾᔪᑎᒃᓴᓄᑦ ᐸᕐᓇᐅᑎ ᐊᑐᖅᓯᓂᐊᖅᑐᖅᓐ ᒪᓕᒡᓗᓂ ᓴᓇᓯᒪᑦᑎᐊᖅᑐᓂᒃ ᐋᕿᔅᓯᒪᔾᔪᑎᓂᒃ ᐊᒻᒪᓗ ᑐᑭᓕᐅᕈᑎᒋᕙᓪᓕᐊᓂᐊᖅᑕᖏᓐᓄᑦ. ᐊᒻᒪᓗ ᐊᓐᖏᓐᓯᒪᓂᑎ'ᒃ ᓴᐳᒻᒥᔪᒪᓪᓗᒋᑦ ᐊᒻᒪᓗ ᐊᐅᓚᑦᑎᐊᕐᓗᒋᑦ ᓄᓇᒥᐅᑕᓕᒫᑦ ᐊᕙᑎᖏᓪᓗᓂ ᒪᓕᑦᑎᐊᕐᓂᖓᓄᑦ ᓯᕐᒥᓕᒃ ᒥᕐᖑᐃᓐᓯᕐᕕᒃ ᑕᒪᐅᓐᓇ ᐃᓱᒪᒋᑦᑎᐊᖕᖢᒋᑦ ᐊᑐᖅᖢᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᐅᔨᓴᖅᑎᒻᒪᕇᑦ ᖃᐅᔨᓴᖅᓯᓂᖓᑦᑎᒍᑦ ᖃᐅᔨᒪᔭᖏᓐᓂᒃ.

ᐅᓇ ᐊᐅᓚᑦᑎᔾᔪᑎᒃᓴᓄᑦ ᐸᕐᓇᐅᑎ ᐱᓕᕆᐊᖃᓪᓗᐊᖃᑦᑕᓐᑐᖅᓐ ᐊᖕᖏᔫᓂᖓᓕᓂᒃ ᓯᕐᒥᓕᒃ ᑲᓇᑕᐅᑉ ᒥᕐᖑᐃᓐᓯᕐᕕᖓ, ᐱᓗᐊᖅᑐᒥᒃ ᓄᓇᓖᑦ ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ, ᐊᒻᒪᓗ ᐊᑐᖅᑕᐅᔭᕆᐊᖃᕐᑎᑦᑎᔪᑦ ᐃᑲᔪᖃᑎᒌᒡᓗᑎᒃ ᐱᒋᐊᕈᑎᖃᕐᓗᑎᒃ ᐊᐅᓚᑦᑎᓂᕐᒧᑦ ᒥᕐᖑᐃᓯᕐᕕᖕᒥᒃ. ᐅᓇ ᑭᒡᓕᓕᐅᕐᓂᖓ ᑎᓕᐅᕆᔪᓐ ᐱᑐᖅᐸᓪᓕᐊᑎᐊᖁᓪᓗᒍ ᐳᓚᕋᑦᑐᓕᕆᓂᖓᑮᓇᐅᔭᓕᐅᕈᑕᐅᓗᓂ ᑕᐃᒪᓗ ᖄᖓᒍᑦ ᐊᐅᓚᑕᐅᑦᑎᐊᕐᓗᓂ ᐊᒻᒪᓗ ᓴᐳᒻᒥᔭᐅᓗᑎᒃ ᐱᒻᒪᕆᐅᔪᑦ ᐃᓂᒋᔭᐅᔪᑦ, ᐱᐅᓯᑐᖃᖃᑦᕕᐅᔪᓐ ᐊᒻᒪᓗ ᓄᓇᖏ ᐱᒻᒪᕆᐅᔪᑦ ᐃᓄᖕᓄᑦ.

ᐅᑯᐊ ᓄᓇᕗᒻᒥ ᐆᒪᔪᓕᕆᔨᑦᔪᐊᑦ ᑲᑎᒪᔨᖏᑦ ᓂᕆᐅᒃᑐᑦ ᓴᓇᖃᑦᑎᖃᑦᑎᐊᕈᒪᓪᓗᑎᒃ ᐃᑲᔪᕐᑎᒋᓪᓗᒋᑦ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᑲᑐᔾᐪᔨᔪ ᒥᕐᖑᐃᓯᕐᕕᖕᒥ ᐸᕐᓇᐃᔩᑦ ᐱᓕᕆᖃᑎᒌᑦ ᖃᐅᔨᒪᓂᐊᕋᑦᑕ ᒪᓕᒃᑕᐅᑦᑎᐊᕐᓗᑎᒃ ᓂᑦᔪᑎᑦ ᐊᒻᒪᓗ ᐃᓂᖏᑦ ᐊᐅᓚᑦᑎᖃᑎᒌᒍᑕᐅᔪᑦ ᑐᕌᕆᔭᖏᑦ ᐊᒻᒪᓗ ᑐᑭᓕᐅᕈᑎᒋᕙᓪᓕᐊᓂᐊᓐᑕᖏᑦ ᑎᑭᐅᑎᑦᑎᐊᕐᓗᑎᒃ ᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕐᕕᖓᓄᑦ.

ᑕᔾᕙᕝᕙᐅᕗᑎ,

ᐊᑐᓕᖁᔭᐅᔪᑦ

ᐱᖁᔭᖓ ᐊᒻᒪᓗ ᓯᕗᓪᓕᖅᐹᖅ ᐊᑎᓕᐅᖅᑕᖓ ᐆᒪ:

ᓇᐃᓈᕐᓯᒪᔪᑦ ᐅᓂᒃᑲᒃᓴᐃᑦ

ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᓄᓇᖓ ᐅᐊᒃᓇᖓᓂ ᕿᑭᕐᑖᓪᓗᑦ, ᐊᑯᓐᓂᖓᓂᑦᑐᖅ ᓄᓇᓕᐅᔪᑦ ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ. ᐊᖏᓂᖃᕐᑐᖅ 22,200 ᑭᑉᐸᕆᒃᓯᓗᒍ ᑭᒪᒥᑕ, ᐊᖏᓚᖑᖃᑕᐅᔪᖅ ᒥᕐᖑᐃᕐᓯᕐᕕᐅᔪᓂ ᑲᓇᑕᒥ. ᓴᕿᑕᐅᓂᑯᓪᓗᓂ 2001 ᐊᒻᒪᓗ ᐃᑲᔪᕐᑎᒋᒃᖢᑎᒃ ᐊᐅᓚᑕᐅᔪᖅ ᐃᓄᐃᑦ ᐊᒻᒪᓗ ᒥᕐᖑᐃᕐᓯᕐᕕᓕᕿᔨᒃᑯᑦ ᑲᓇᑕᒥ ᒪᓕᒃᖢᒋᑦ ᓄᓇᕗᑦ ᓄᓇᑕᕆᔭᐅᓂᖓᓄᑦ ᐊᖏᖃᑎᒋᒍᑎᑦ, ᐃᓄᐃᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕙᓪᓕᐅᑎᑦ ᐊᖏᖃᑎᒋᒍᑎᑦ ᐅᑯᓄᖓ ᐊᐅᔪᐃᑦᑐᖅ, ᖁᑦᑎᒃᓂᕐᐸᖅ ᐊᒻᒪᓗ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᑦ ᐊᒻᒪᓗ ᑲᓇᑕᒥ ᒥᕐᖑᐃᕐᓯᕐᕕᓕᕆᓂᕐᒧᑦ ᐱᖁᔭᐃᑦ.

ᐱᖓᓱᑦ ᑐᕋᒐᐅᔪᑦ ᓯᕗᒧᐊᒍᑕᐅᓂᐊᕐᑐᑦ ᐊᕿᒃᓱᕐᑕᐅᑎᓪᓗᒍ ᐊᐅᓚᑕᐅᓂᖓᓄᑦ ᒥᕐᖑᐃᕐᓯᕐᕕᒃ ᓯᕗᓂᒃᓴᑦᑎᓐᓄᑦ. ᐃᖃᓇᐃᔭᖃᑎᒋᓗᒋᑦ ᐃᓄᐃᑦ ᓄᓇᓕᒃᓂᑦᑐᑦ ᐃᓚᐅᖃᑕᐅᓗᑎᒃᓗ ᑐᕋᒐᐅᔪᓄᑦ. ᐊᑐᓂ ᑐᕋᒐᐅᔪᑦ ᓴᓐᖏᓂᖓᓂᒃ ᐱᕙᓪᓕᐊᑎᑦᑎᔪᑦ ᐃᑲᔪᕐᑎᒋᒍᓐᓇᕐᓗᑎᒃ ᐱᓕᕆᐊᒃᓴᒥᓂᒃ ᑲᔪᓯᑎᑦᑎᓗᑎᒃ ᐊᒻᒪᓗ ᐱᔪᓐᓇᕐᑎᑦᑎᓗᑎᒃ ᓄᓇᓕᐅᔪᒃᓂᒃ ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ ᓂᕆᐅᒋᔭᖏᓐᓂᒃ ᐱᔪᒪᔭᖏᓐᓂᒃᓗ ᐱᔪᓐᓇᕐᓗᑎᒃ.

ᐱᓗᐊᕐᓂᖓ ᑐᕋᒐᐅᔪᖅ 1:

ᖁᕕᐊᓱᑕᐅᓗᓂ ᐊᔾᔨᐅᖏᓐᓂᖓ ᐊᒃᑐᐊᓂᕆᔭᖏᑦ ᐃᓚᐅᖃᑕᐅᓂᖏᑦ ᓯᕐᒥᓕᒃ ᒥᕐᖑᐃᕐᓯᕐᕕᒃ ᑲᓇᑕᒥ ᐊᒻᒪᓗ ᐃᓄᐃᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ

ᑖᓐᓇ ᑐᕋᒐᐅᔪᖅ ᐱᕙᓪᓕᐊᑎᑦᑎᕗᖅ ᑭᖑᓂᖓᑦᑎᓐᓂ ᐊᑐᕐᓯᒪᔭᖏᓐᓂᒃ ᐃᓄᐃᑦ ᐃᓕᖁᓯᕆᓚᐅᕐᑕᖏᓐᓂᒃ ᓄᓇᒥ, ᓱᓕ ᒫᓐᓇ ᐊᑐᕐᑕᐅᔪᑦ ᐅᑭᐅᕐᑕᕐᑐᒥ ᐃᓄᓯᖏᓐᓂ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑲᔪᓯᓂᐊᕐᑐᑦ ᖁᕕᐊᓱᑎᖃᕐᓗᑎᒃ ᐊᒻᒪᓗ ᑲᔪᓯᓐᓇᖁᔨᓗᑎᒃ ᐊᒃᑐᐊᓂᕆᔭᖏᑦ ᐊᒻᒪᓗ ᐃᓄᐃᑦ ᐱᕕᖃᕐᑎᑕᐅᓗᑎᒃ ᐱᕚᓪᓕᕈᓐᓇᕐᓗᑎᒃ ᒥᕐᖑᐃᕐᓯᕐᕕᒃᑕᖃᕐᓂᖓᓄᑦ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑲᔪᓯᓂᐊᕐᑐᑦ ᐱᕙᓪᓕᐊᑎᑦᑎᓗᑎᒃ ᐃᑲᔪᕐᑎᒋᔭᐅᓗᑎᒃ ᓄᓇᓕᒃᓂᑦᑐᑦ ᖃᓂᒋᔭᓂᑦᑐᑦ, ᐃᓄᖏᓪᓗ ᖃᐅᔨᒪᔭᕐᒥᓂᒃ, ᐃᓕᓯᒪᔭᕐᒥᓂᒃ ᐊᒻᒪᓗ ᐱᔪᒪᓂᕐᒥᓂᒃ ᐊᐅᓚᑕᐅᓂᖓᓄᑦ ᒥᕐᖑᐃᕐᓯᕐᕕᒃ.

ᑐᕋᒐᐅᔪᖅ ᐱᓇᓱᒃᓂᐊᕐᑐᖅ ᐅᑯᓂᖓ:

• ᐃᓚᐅᖃᑕᐅᕕᐅᓗᓂ ᐊᒻᒪᓗ ᐊᑐᕐᑕᐅᓗᓂ ᒥᕐᖑᐃᕐᓯᕐᕕᒃ ᐃᓄᒃᓄᑦ
• ᐃᓚᐅᑎᑕᐅᒃᑲᓐᓂᕐᓗᑎᒃ ᐃᓄᐃᑦ ᐊᐅᓚᑕᐅᓂᖓᓄᑦ ᒥᕐᖑᐃᕐᓯᕐᕕᒃ ᐊᕿᒃᑕᐅᑎᓪᓗᒋᑦ
• ᐃᓄᒃᓄᑦ ᐱᕚᓪᓕᐅᑎᔪᑦ ᐱᑕᖃᕐᓂᕐᓴᐅᖁᓪᓗᒋᑦ ᑭᓇᐅᔾᔭᒃᓴᕐᕕᐅᔪᓐᓇᕐᑐᒃᑯᑦ

ᐱᓗᐊᕐᓂᖓ ᑐᕋᒐᐅᔪᖅ 2:

ᐊᕿᒃᓯᓗᑎᒃ ᐱᕙᓪᓕᐊᑎᑕᐅᓗᓂ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᑯᒃᒧᑦ ᐳᓚᕆᐊᕐᑐᑦ ᖃᐅᔨᔪᓐᓇᕐᑕᖏᓐᓂᒃ

ᐱᔾᔪᑎᖃᕐᑐᑦ ᑐᕋᒐᐅᔫᑦ ᐱᕙᓪᓕᐊᑎᑦᑎᓗᓂ ᐊᕿᒃᓯᓗᑎᒃ ᓄᑕᒥᒃ ᐳᓚᕋᑎᑦ ᖃᐅᔨᖃᑦᑕᕐᓂᐊᕐᑕᖏᓐᓂᒃ ᓯᕐᒥᓕᒃ ᒥᕐᖑᐃᕐᓯᕐᕕᒃᒥ ᐱᖃᓯᐅᑎᔭᐅᓯᒪᓗᑎᒃ ᓄᓇᓕᒃ ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ ᐊᒻᒪᓗ ᐳᓚᕋᑦᑐᓕᕆᖃᑦᑕᕐᑐᑦ.

ᑐᕋᒐᐅᔪᖅ ᐱᓇᓱᒃᓂᐊᕐᑐᖅ ᐅᑯᓂᖓ:

• ᐅᓄᕐᓯᒋᐊᕐᓗᒋᑦ ᐱᒪᕆᐊᖃᕐᑕᕐᑐᑦ ᒥᕐᖑᐃᕐᓯᕐᕕᒃᒧᑦ
• ᐊᔾᔨᒋᖏᑦᑐᓂᒃ ᐳᓚᕋᑎᑦ ᖃᐅᔨᔪᓐᓇᕐᑕᖏᓐᓂᒃ ᐱᕕᖃᕐᑎᑦᑎᓗᓂ ᑐᑭᓯᒋᐊᕈᑎᓂᒃ ᐊᐅᓚᑕᐅᔪᓂᒃᓗ
• ᐃᒃᐱᒋᑦᑎᐊᕐᓗᒋᑦ ᐅᒪᔪᐃᑦ ᖃᐅᔨᔭᐅᔪᑦ ᐳᓚᕋᑎᓄᑦ ᑕᑯᔭᐅᔪᒪᔪᑦ
• ᑲᔪᓯᓗᒋᑦ ᐳᓚᕋᑎᑦ ᐊᑦᑕᕐᓇᕐᑕᐃᓕᒪᑎᑕᐅᓂᖏᑦ
• ᐃᒃᐱᒋᓗᒋᑦ ᐃᓄᐃᑦ ᐊᖑᓇᓱᒍᓐᓇᕐᓂᖏᑦ ᐃᓕᖁᓯᒥᓂᒃᓗ ᐊᑐᕐᑎᓪᓗᒋᑦ
• ᐃᑲᔪᕐᑎᒋᓗᒋᑦ ᑲᑎᒪᔨᕈᔪᐃᑦ ᑲᑐᔾᔨᖃᑎᒋᖑᒧᓪᓗ ᐃᑲᔪᕐᑐᐃᓗᓂ ᐳᓚᕋᑦᑐᓕᕆᓂᕐᒥᒃ ᐱᕙᓪᓕᐊᑎᑦᑎᓂᕐᒧᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ

ᐱᓗᐊᕐᓂᖓ ᑐᕋᒐᐅᔪᖅ 3:

ᖃᐅᔨᒪᔭᐅᓕᒃᑲᓐᓂᕐᓗᓂ ᐅᔾᔨᕆᔭᐅᓂᕐᓴᐅᓕᕐᓗᓂᓗ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ

ᑐᕋᒐᐅᔪᖅ ᐱᔾᔪᑎᖃᕐᑐᖅ ᐱᔭᕆᐊᖃᕐᓂᖓᓂᒃ ᐃᓄᐃᑦ ᐊᒻᒪᓗ ᑭᒃᓕᓯᓂᐊᕐᑎᑦ ᖃᐅᔨᒪᔭᖏᓐᓂᒃ ᒥᕐᖑᐃᕐᓯᕐᕕᐅᑦ ᐃᓗᐊᓂᑦᑐᓂᒃ ᓴᐳᑎᓯᒪᔭᐅᒃᑲᓐᓂᖁᓪᓗᒍ ᐊᕙᑎᖓ ᐊᒻᒪᓗ ᐃᓕᖁᓯᓕᕆᕕᐅᖃᑦᑕᕐᑐᑦ ᐊᒻᒪᓗ ᐊᒃᑐᐊᖃᑎᒋᒃᓂᖏᑦ ᓴᖏᒃᓕᒋᐊᕐᓗᒋᑦ ᑲᓇᑕᒥᐅᓄᑦ ᒥᕐᖑᐃᕐᓯᕐᕕᒃᓄᑦ. ᑐᕋᒐᐅᔪᖅ ᑐᓐᖓᕕᖃᕐᖢᓂ ᐃᑲᔪᕐᑎᒋᒃᓂᒃᑯᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᓄᓇᓕᐅᔪᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᕐᒥᓗ, ᐊᒻᒪᓗ ᐃᑲᔪᕐᑎᒋᓗᒋᑦ ᐃᖃᓇᐃᔭᖃᑎᒋᓗᒋᓪᓗᓐᓂᑦ ᐊᔾᔨᒋᖏᑦᑐᑦ ᑲᑎᒪᔨᐅᔪᑦ ᑲᑐᔨᖃᑎᒋᖑᔪᓪᓗ ᓱᕐᓗ ᐃᓕᓐᓂᐊᕐᕕᒃᔪᐊᕐᒥ, ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯ ᑎᑦ, ᕿᑭᕐᑕᓂ ᐃᓄᐃᑦ ᑲᑐᔨᖃᑎᒋᖏᑦ, ᐊᓐᒪᓗ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᑎᒍᒥᐊᕐᑎᑦ. ᖃᐅᔨᒪᔭᐅᓕᒃᑲᓐᓂᕈᑕᐅᓂᐊᕐᒪᑦ ᒥᕐᖑᐃᕐᓯᕐᕕᒃ ᐃᑲᔪᕐᑎᒋᒃᓂᒃᑯᑦ, ᐳᓚᕋᑎᓄᑦ ᐊᒻᒪᓗ ᐃᓄᑐᐃᓐᓇᕐᓄᑦ.

ᑐᕋᒐᐅᔪᑦ ᐱᓇᓱᒃᑐᖅ ᐅᑯᓂᖓ:

• ᑭᓱᑕᖃᕐᒪᖓᑦ ᑎᑎᕋᕐᑕᐅᓗᑎᒃ, ᖃᐅᔨᓴᕐᕕᐅᓗᓂ ᐊᒻᒪᓗ ᖃᐅᔨᒪᓇᓱᒃᑕᐅᓗᓂ ᐊᕙᑎᖓ ᐊᒻᒪᓗ ᐃᓕᖁᓯᓕᕆᕕᐅᔪᑦ, ᐊᒻᒪᓗ ᐱᖃᓯᐅᑎᓗᒋᑦ ᐅᖃᐅᓯᒃᑯᑦ ᐅᓂᑲᐅᓯᐅᓯᒪᔪᑦ ᐊᒻᒪᓗ ᐃᓄᐃᒃᑎᑐᑦ ᐊᑎᖏᑦ ᓄᓇᐃᑦ.
• ᑎᑎᕋᕐᑕᐅᕙᓪᓕᐊᖏᓐᓇᕐᓗᑎᒃ ᐊᒻᒪᓗ ᐊᑐᕐᑕᐅᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑦ.
• ᖃᐅᔨᒋᐊᕐᑕᐅᓗᓂ ᐃᑦᑕᕐᓂᓴᓕᕆᓂᒃᑯᑦ ᐊᑐᑎᖃᕐᓂᖓ ᐊᒻᒪᓗ ᓇᓗᓇᐃᕐᑕᐅᓗᓂ ᐃᓕᖁᓯᖏᓐᓄᑦ ᐊᒃᑐᐊᓂᕆᓯᒪᔭᖓ.
• ᐃᑲᔪᕐᑎᒋᒃᓂᒃᑯᑦ ᐱᕙᓪᓕᐊᑎᑕᐅᓗᓂ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᓄᓇᓕᐅᔪᒃ ᒥᑦᑎᒪᑕᓕᒃᓂ ᐃᒃᐱᐊᕐᔪᖕᒥᓗ, ᐱᓗᐊᕐᑐᒥᒃ ᒪᒃᑯᒃᑐᑦ ᖃᓄᐃᓕᐅᕐᑎᑕᐅᖃᑦᑕᕐᓗᑎᒃ ᒥᕐᖑᐃᕐᓯᕐᑯᒃᒥ.
• ᐃᑲᔪᕐᑎᒋᒃᓂᕐᓴᐅᓗᑎᒃ ᖃᐅᔨᓴᕐᑎᐅᔪᑦ ᐊᒻᒪᓗ ᓄᓇᓕᑦ.
• ᐊᕿᒃᓯᓗᑎᒃ ᑐᓴᐅᒪᑎᑦᑎᔾᔪᑕᐅᓂᐊᕐᑐᒥᒃ ᐊᒻᒪᓗ ᐃᓕᓐᓂᐊᕐᑎᑦᑎᔾᔪᑕᐅᓂᐊᕐᑐᒥᒃ ᐊᒻᒪᓗ ᐊᐅᓚᑕᐅᓂᐊᕐᑐᒥᒃ ᑲᓇᑕᒥᐅᓄᑦ, ᐱᖃᓯᐅᑎᓗᒋᑦ ᐱᓇᓱᒃᑕᐅᔪᑦ ᐊᐅᒪᔾᔪᑕᐅᓂᐊᕐᑐᑦ ᐃᓄᖏᓐᓄᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ, ᐊᑐᕐᑕᐅᓗᓂ ᒥᕐᖑᐃᕐᓯᕐᑯᓕᕆᔨᒃᑯᑦ ᑲᓇᑕᒥ ᖃᕋᓴᐅᔭᒃᑯᑦᕈᑎᖓ.

1.0 ᐱᒋᐊᕐᓂᖓ

ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕ ᐊᐅᓚᑦᑎᒃᒪᑕ ᐱᐅᓚᖑᔪᓂᒃ ᐊᒻᒪᓗ ᐊᖏᓚᖑᒧᓂᒃ ᓴᐳᔾᔭᐅᓯᒪᔪᓂᒃ ᐃᓕᖁᓯᕐᓱᕐᑐᓂᒃ ᐊᒻᒪᓗ ᐱᑐᖃᓕᕆᓂᐅᔪᓂᒃ ᓄᓇᐅᔪᓂᒃ ᓄᓇᕐᔪᐊᕐᒥ. ᒥᕐᖑᐃᕐᓯᕐᕕᓕᕆᔨᒃᑯᑦ ᐱᓕᕆᐊᒃᓴᖃᕐᒪᑕ ᓴᐳᔾᔨᓯᒪᓇᓱᒃᓗᑎᒃ ᐊᒻᒪᓗ ᓴᕿᔭᕐᑎᑕᐅᓗᑎᒃ ᓄᓇᐃᑦ ᐱᕙᓪᓕᐅᑕᐅᖁᓪᓗᒋᑦ ᐊᒻᒪᓗ ᐅᐸᒃᑕᐅᖃᑦᑕᕐᓗᑎᒃ ᒪᓐᓇ ᓯᕗᓂᒃᓴᑦᑎᓐᓂᓗ ᐃᓄᓂᐊᕐᑐᓄᑦ. ᓯᕗᓂᒃᓴᑦᑎᓐᓂ, ᐊᐅᓚᓂᖏᑦ ᐊᑐᓂ ᒥᕐᖑᐃᕐᓯᕐᕕᐅᔪᑦ, ᑕᕆᐅᖓᓂᓗ ᓴᐳᔾᔭᐅᓯᒪᔪᑦ, ᐃᑦᑕᕐᓂᓴᐃᑦ ᑕᕆᐅᒃᑯᑦ ᐊᕐᖁᑎᑦ ᓱᓪᓗᒃᑯᑦ ᐊᒻᒪᓗ ᐃᒻᒪᕐᓂᓴᐃᑦ ᓄᓇᒋᔭᐅᓂᑯᔪᑦ ᐊᐅᓚᑕᐅᔪᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᑲᒧᕐᑐᐃᒃᒪᑕ ᒥᕐᖑᐃᕐᓯᕐᕕᓕᕆᔨᒃᑯᑦ ᑕᑯᖑᐊᕐᓂᖓᓂᒃ ᐃᒪᓐᓇ:

ᑲᓇᑕᒥ ᒥᕐᖑᐃᕐᓯᕐᑯᑦ ᐱᖁᔭᖏᑦ ᐊᒻᒪᓗ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᖃᓇᐃᔭᕐᕕᖓ ᐱᖁᔭᐃᑦ ᐱᔭᕆᐊᖃᕐᑎᑦᑎᒃᒪᑕ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᕿᒃᓯᐅᓗᑎᒃ ᐊᐅᓚᑕᐅᓂᖓᓄᑦ ᐸᕐᓇᐅᑎᓂᒃ ᐊᑐᓂ ᒥᕐᖑᐃᕐᓯᕐᕕᐅᔪᓄᑦ. ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᑯᒃ ᐊᐅᓚᑕᐅᓂᖓᓄᑦ ᐸᕐᓇᐅᑎ, ᐊᖏᕐᑕᐅᓯᒪᓕᕈᑎᒃ ᒥᓂᔅᑕᒧᑦ ᑲᒪᒋᔭᖃᕐᑐᒧᑦ ᒥᕐᖑᐃᕐᓯᕐᑯᓕᕆᓂᕐᒧᑦ ᐊᒻᒪᓗ ᑐᓂᔭᐅᓯᒪᓕᕐᑎᓪᓗᒍ ᐱᖁᔭᓕᐅᕐᕕᒃᒥ, ᐱᔪᓐᓇᕐᑎᑦᑎᓂᐊᕐᒪᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑲᓴᑕᒥᐅᓄᑦ ᓴᖓᔾᔪᑎᒋᔪᓐᓇᕐᓗᒍ, ᑎᑎᕋᕐᓯᒪᓗᓂ ᖃᓄᖅ ᒥᕐᖑᐃᕐᓯᕐᕕᒃ ᐊᐅᓚᑕᑎᓪᓗᒍ ᑕᑯᒃᓴᐅᔪᒃᑯᑦ ᐱᕙᓪᓕᐊᓂᐅᒐᔭᕐᒪᖓᑦ ᐃᑲᔪᕐᑐᐃᓗᓂᓗ ᒥᕐᖑᐃᕐᓯᕐᕕᓕᕆᔨᒃᑯᑦ ᐱᓕᕆᐊᒃᓴᖓᓂᒃ.

ᐃᓄᐃᑦ, ᐃᑲᔪᕐᑎᒋᔭᐅᔪᓪᓗ, ᑎᒍᒥᐊᕐᑎᐅᔪᓪᓗ, ᓄᓇᓕᒃᒥᐅᓪᓗ ᐃᒃᐱᐊᕐᔪᒃ ᒥᑦᑎᒪᑕᓕᒃ, ᐊᒻᒪᓗ ᐃᓄᑐᐃᓐᓇᐃᑦ ᐃᓚᐅᖃᑦᑕᓚᐅᕐᑐᑦ ᐊᕿᒃᓱᕐᑕᐅᑎᓪᓗᒍ ᐊᐅᓚᑕᐅᓂᖓᓄᑦ ᐸᕐᓇᐅᑎ, ᐃᑲᔪᑕᐅᓂᐊᕐᒪᑦ ᓯᕗᓂᒃᓴᒧᑦ ᑐᕋᕐᐸᓪᓕᐊᑎᓪᓗᑕ ᑲᓇᑕᒥ ᒥᕐᖑᐃᕐᓯᕐᕕᐅᔪᑦ. ᐸᕐᓇᐅᑎᐅᔪᖅ ᐊᑐᕐᑕᐅᓂᐊᕐᒪᑦ ᑐᑭᓯᓇᕐᑐᒃᑯᑦ, ᑐᕋᒐᖃᕐᓗᓂ ᐊᐅᓚᑕᐅᓗᓂ ᑲᒪᒋᔭᐅᓗᓂᓗ ᓯᕐᒥᓕᒃ ᒥᕐᖑᐃᕐᓯᕐᕕᒃ ᑎᑎᕋᕐᓯᒪᓗᑎᒃ ᑕᑯᖑᐊᕐᓂᖏᑦ, ᐱᓗᐊᕐᓂᖏᑦ ᑐᕋᒐᐅᔪᑦ ᐊᒻᒪᓗ ᐱᔭᐅᓇᓱᒃᑐᑦ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐅᓂᑲᓕᐅᖃᑦᑕᕐᓂᐊᕐᑐᑦ ᐊᕋᒍᑕᒪᑦ ᖃᓄᐃᓕᕙᓪᓕᐊᓂᖓᓂᒃ ᐸᕐᓇᐅᑎ ᐊᑐᕐᑕᐅᕙᓪᓕᐊᑎᓪᓗᒍ ᐱᓇᓱᒃᑕᐅᔪᓂᒃ ᐊᒻᒪᓗ ᕿᒥᕈᔭᐅᖃᑦᑕᓗᓂ ᐸᕐᓇᐅᑎ ᐊᕋᒍ ᖁᓕᑦ (10) ᐊᓂᒍᕋᖓᑕ ᕿᓚᒻᒥᐅᓂᕐᓴᐅᔪᒃᑯᓪᓗᓐᓂᑦ ᐱᔭᕆᐊᖃᕈᓂ.

ᐸᕐᓇᐅᑎ ᐃᓱᒋᖏᑕᖓ ᐃᓱᓕᕕᐅᖏᓚᕐᓗᓐᓂᑦ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᓴᕿᔭᕐᓂᐊᕐᑐᑦ ᒪᑐᐃᖓᓗᑎᒃᓗ ᐅᖃᐅᓯᒃᓴᖃᕐᕕᐅᒐᖓᑦ ᐊᑐᓕᕐᑎᑕᐅᕙᓪᓕᐊᓂᖏᑦ ᐊᐅᓚᓂᖓᓄᑦ ᐸᕐᓇᐅᑎᑦ, ᐊᑐᑎᖃᐃᓐᓇᕐᑎᓐᓇᓱᒃᓗᒍ ᑐᑭᖃᑦᑎᐊᕐᑐᒃᑯᓪᓗ. ᐸᕐᓇᐅᑎ ᐊᑐᕐᑕᐅᓂᐊᕐᑐᑦ ᑐᕋᒐᖏᓐᓂᒃ ᐱᓇᓱᒃᑎᓪᓗᒋᑦ ᐃᓚᐅᕕᐅᕙᓪᓕᐊᓗᓂ ᐅᖃᐅᓯᐅᕙᓪᓕᐊᓗᓂᓗ ᐊᐅᓚᑕᐅᓂᖓ ᓯᕐᒥᓕᒃ ᒥᕐᖑᐃᕐᓯᕐᕕᒃ ᐊᕋᒍᒐᓴᒃᓄᑦ.

2.0 ᐱᓪᓚᕆᐅᓂᖓ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ

ᐱᔾᔪᑎᒋᔭᖏᑦ ᒥᕐᖑᐃᕐᓯᕐᑯᒃ ᓴᕿᑕᐅᓂᖓ ᓇᓗᓇᐃᕐᑕᐅᓯᒪᔪᑦ ᐱᕙᓪᓕᐊᑎᓂᕐᒧᑦ ᐊᖏᖃᑎᒋᒍᑎᓂ ᐃᒪᐃᓕᖓᔪᑦ:

1. ᓴᐳᔾᔭᐅᓯᒪᓗᓂ ᖃᖓᓕᒪᒃᑯᑦ ᓄᓇᖓ ᓱᕋᒃᑕᐅᓯᒪᖏᑦᑐᖅ ᐃᓕᖁᓯᕐᓱᕐᑐᖅ ᑲᓇᑕᒥ ᐊᒃᑐᐊᓂᕆᔭᖓ ᐅᑭᐅᕐᑕᕐᑐᒥ ᑲᓇᖕᓇᖓᓂ ᐊᑎᒃᑐᕐᒥ ᓄᓇᐅᔪᑦ;
2. ᐃᒃᐱᒋᓗᒋᑦ ᐃᓄᐃᑦ ᐊᒃᑐᐊᓂᕆᓚᐅᕐᑕᖏᑦ ᓄᓇᖓᓄᑦ;
3. ᐊᑯᓂᐅᔪᒧᑦ ᓴᐳᔾᔭᐅᓯᒪᔪᓐᓇᖁᓪᓗᒋᑦ ᑎᑭᑦᑕᕐᑐᑦ ᑎᖕᒥᐊᑦ ᑎᖕᒥᐊᖃᕐᕕᐅᔪᓪᓗ ᒥᕐᖑᐃᕐᓯᕐᕕᐅᑦ ᐃᓗᐊᓂᑦᑐᑦ; ᐊᒻᒪᓗ
4. ᐃᓄᑐᐃᓐᓇᐃᑦ ᑐᑭᓯᐅᒪᖁᓪᓗᒋᑦ, ᐅᐱᒋᔭᐅᓗᓂᓗ ᐊᒻᒪᓗ ᐅᐸᒃᑕᐅᖃᑦᑕᕐᓗᓂ ᒥᕐᖑᐃᕐᓯᕐᕕᒃ, ᐱᖃᓯᐅᑎᓗᒋᑦ ᐃᓄᐃᑦ ᓇᔪᑎᓯᒪᓂᖏᑦ, ᓱᕋᒃᑕᐅᑦᑕᐃᓕᖁᓪᓗᒍ ᓯᕗᓂᒃᓴᒧᑦ ᐃᓄᓂᐊᕐᑐᓄᑦ.

ᓴᓐᓂᕈᑎᐊᓗᑦ ᕿᑭᕐᑕᖓ, ᐃᓚᖓ ᑎᓴᒪᐅᓕᖃᖓᔪᓂ ᒥᕐᖑᐃᕐᓯᕐᕕᒃᒥ, ᑎᖕᒥᐊᖃᕐᕕᐅᒃᒥᒃᒪᑦ ᑎᑭᑦᑕᕐᑐᓄᑦ. ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕙᓪᓕᐅᑎᒃᓴᐃᑦ ᐊᖏᖃᑎᒋᒍᑎᑦ ᑲᓇᑕᒥ ᐅᒪᔪᖃᕐᕕᐅᔪᓄᑦ ᐊᒻᒪᓗ ᑎᑭᑦᑕᕐᑐᓄᑦ ᑎᖕᒥᐊᓄᑦ ᓄᓇᒋᔭᐅᔪᑦ ᓄᓇᕗᑦᒥ ᓄᓇᖏᓐᓂ ᑐᑭᖓ ᐅᖃᕐᓯᒪᒃᒪᑦ ᓯᓚᑕᒍᖓᓗᓂ ᐊᒻᒪᓗ ᐃᑲᔪᕐᑎᒋᒃᓗᑎᒃ ᐊᐅᓚᑦᑎᖃᑎᒋᒃᓗᑎᒃ ᓴᓐᓂᕈᑎᐊᓗᑦ ᕿᑭᕐᑕᖓᓂ ᑎᖕᒥᐊᖃᕐᕕᐅᔪᒥ.

ᒥᕐᖑᐃᕐᓯᕐᑯᒃ ᓇᑎᕐᓇᖃᕐᒪᑦ, ᓯᕐᒥᖃᐅᕐᖢᓂᓗ ᐃᒪᕐᓱᖃᐅᕐᖢᓂᓗ, ᓯᒃᔭᖃᐅᕐᖢᓂᓗ, ᑕᕆᐅᖓᓂᒃᓗ ᐊᒻᒪᓗ ᑕᓯᖃᐅᕐᖢᓂ. ᓇᑎᕐᓇᖓ ᐊᖏᓂᖃᕋᓗᒃᑐᖅ 6 ᐳᓴᖓᓂᒃ (%) ᒥᕐᖑᐃᕐᓯᕐᕕᐅᑦ. ᐅᖃᕐᓯᒪᓂᖓ ᒪᓕᒃᓗᒍ “ᓯᕐᒥᓕᒃ” ᑐᑭᖃᕐᑐᖅ “ᓯᕐᒥᒃᑕᖃᐅᕐᓂᖓᓂᒃ”, ᓄᓇᖓ ᐳᕐᑐᔪᑕᐅᒃᒪᑕ ᐱᖑᖃᐅᕐᖢᓂ ᓯᕐᒥᖃᐅᕐᖢᓂᓗ.

ᓯᕐᒥᓕᒃ ᒥᕐᖑᐃᕐᓯᕐᑯᒃ ᐱᓪᓚᕆᐅᒃᒪᑦ ᐃᓕᖁᓯᐅᔪᓄᑦ. ᐊᑐᕐᑕᐅᖃᑦᑕᕐᓯᒪᐃᓐᓇᕐᖢᓂᓗ ᐃᓄᒃᓄᑦ ᒪᓐᓇᒧᑦ, ᐊᔾᔨᒋᖏᑦᑐᓄᑦ ᐃᓕᖁᓯᖏᑎᒍᑦ ᐊᑐᕐᑎᓪᓗᒋᑦ ᐊᖑᓇᓱᒃᕕᐅᕙᒃᖢᓂᓗ ᐃᓄᖏᓐᓄᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ. ᒥᕐᖑᐃᕐᓯᕐᕕᒃ ᐊᕙᑖᓗ ᐃᑦᑕᕐᓂᓴᖃᕐᕕᐅᒃᒥᒃᒪᑦ ᐅᓂᑲᖑᔪᓐᓇᕐᑐᓂᒃ ᓇᔪᕐᑕᐅᓚᐅᕐᓯᒪᓂᖓᓂᒃ ᐊᕋᒍᑦ 2000 ᐃᓗᐊᓂ.

3.0 ᐸᕐᓇᒃᓂᐅᑦ ᐃᓗᓕᖏᑦ

ᐸᕐᓇᒃᑕᐅᓂᖓ ᓯᕗᓂᒃᓴᒧᑦ ᓯᕐᒥᓕᒃ ᒥᕐᖑᐃᕐᓯᕐᕕᒃ ᐃᓱᒪᒋᔭᐅᔭᕆᐊᖃᕐᑐᑦ ᐱᖁᔭᑎᒍᑦ ᐊᒻᒪᓗ ᑎᕋᓕᕆᓂᒃᑯᑦ ᐊᐅᓚᔭᕆᖃᕐᓂᖓ ᒥᕐᖑᐃᕐᓯᕐᕕᐅᑦ, ᐊᖏᓇᕐᑐᒃᑯᑦ ᐊᓯᓪᓕᕐᐸᓪᓕᐊᓂᐅᓂᐊᕐᑐᑦ ᐃᒃᐱᒃᓇᐅᑎᓂᐊᕐᑐᑦ ᒥᕐᖑᐃᕐᓯᕐᕕᒃᒧᑦ ᐊᕋᒍᒐᓴᒃᓄᑦ ᐊᒻᒪᓗ ᐃᓱᒪᒋᔭᖏᑦ ᐃᓄᖏᑕ ᓄᓇᓕᒃᓂᑦᑐᑦ ᖃᓂᒋᔭᓂᑦᑐᑦ, ᐃᓄᐃᑦ, ᑎᒍᒥᐊᕐᑎᐅᔪᑦ, ᐊᓯᖏᓪᓗ ᐃᓄᑐᐃᓐᓇᐅᔪᑦ. ᐊᑖᓂᑦᑐᑦ ᑎᑎᕋᕐᓯᒪᔪᑦ ᐱᓪᓚᕆᐅᔪᑦ ᐃᓱᒪᒃᓴᕐᓯᐅᕈᑕᐅᔭᕆᐊᓕᑦ ᐱᕙᓪᓕᐊᓂᖓᓄᑦ ᐊᒃᑐᐃᒐᔭᕐᑐᑦ ᐊᐅᓚᓂᖓᑕ ᐸᕐᓇᐅᑎᓄᑦ.

3.1 ᐱᖁᔭᑎᒍᑦ ᐊᒻᒪᓗ ᑎᑎᕋᕐᓯᒪᔪᒃᑯᑦ ᐃᓗᓕᖏᑦ ᒥᕐᖑᐃᕐᓯᕐᕕᒃᒧᑦ

ᓄᓇᕗᑦ ᓄᓇᑕᕆᔭᐅᓂᖓᓄᑦ ᐊᖏᖃᑎᒋᒍᑎᑦ (NLCA) ᐃᓕᓴᕐᓯᐅᒪᒃᒪᑕ ᐊᔾᔨᒋᖏᑦᑐᓂᒃ ᐃᓄᐃᑦ ᐱᔪᓐᓇᐅᑎᖃᕐᓂᖏᓐᓂᒃ ᐊᒻᒪᓗ ᐋᕐᕿᒃᓯᓯᒪᓪᓗᑎᒃ ᐃᑲᔪᕐᑎᒋᒃᓗᑎᒃ ᐊᐅᓚᑦᑎᓂᕐᒥᒃ ᐊᕿᒃᓯᒪᓗᓂ ᓄᓇᕗᑦᑕᕆᔭᐅᔪᑦ ᐃᓗᐊᓂ. ᐱᓗᐊᕐᑐᒥᒃᓕ, ᓄᓇᕗᕐᑕᕈᑎᑦ ᐃᓕᓴᕐᓯᐅᒪᒃᒪᑕ ᐱᔪᓐᓇᕐᓂᖏᓐᓂᒃ ᐊᖑᓇᓱᒍᓐᓇᕐᓗᑎᒃ ᐃᓄᐃᑦ ᐅᒪᔪᓂᒃ ᒥᕐᖑᐃᕐᓯᕐᕕᐅᑦ ᐃᓗᐊᓂ ᓱᕐᓗ ᓯᕐᒥᓕᒃᒥ, ᐅᐸᒍᑎᔪᓐᓴᕐᓗᑎᒃᓗ ᐊᑭᓕᖏᓪᓗᑎᒃ ᐊᖑᓇᓱᒃᓗᑎᒃ, ᐊᒻᒪᓗ ᓄᓇᓕᕋᓚᖃᕐᓗᑎᒃ ᑭᓯᐊᓂ ᒪᓕᒃᓯᒪᒍᓂ ᒥᕐᖑᐃᕐᓯᕐᐳᑦ ᐊᐅᓚᓂᖓᑕ ᐸᕐᓇᐅᑎᓂᒃ.

ᓄᓇᕗᕐᑕᕈᑎᑦ ᐊᒻᒪᓗ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕙᓪᓕᐅᑎᒃᓴᐃᑦ ᐊᖏᖃᑎᒋᒍᑎ ᐅᑯᓄᖓ ᐊᐅᔪᐃᑦᑐᖅ, ᖁᑦᑎᒃᓂᕐᐸᖅ ᐊᒻᒪᓗ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᓄᑦ ᑐᑭᖓ ᐃᑲᔪᕐᑎᒋᒃᓂᒃᑯᑦ ᐊᐅᓚᑦᑎᓂᖅ ᐊᕿᒃᓯᒪᓗᓂ ᒥᕐᖑᐃᕐᓯᕐᕕᒃᒥ. ᓯᕐᒥᓕᒃ ᒥᕐᖑᐃᕐᓯᕐᕕᒃ ᑲᑎᖓᓪᓗᑎᒃ ᒥᕐᖑᐃᕐᓯᕐᕕᒃᒥ ᐊᐅᓚᓂᖓᓄᑦ ᑲᑎᒪᔨᑦ (JPMC) ᐃᑲᔪᕐᑎᒋᒃᖢᑎᒃ ᐊᐅᓚᑦᑎᔪᑦ ᑲᑎᒪᔨᐅᓪᓗᑎᒃ ᒥᕐᖑᐃᕐᓯᕐᕕᒃᒧᑦ. ᐅᑯᐊᖑᔪᑦ 6-ᖑᔪᑦ ᑲᑎᒪᔨᑦ, ᐱᖓᓱᑦ ᑎᒃᑯᐊᕐᑕᐅᓯᒪᔪᑦ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᖏᖏᓐᓄᑦ (QIA) ᐊᒻᒪᓗ ᐱᖓᓱᑦ ᑎᒃᑯᐊᕐᑕᐅᓯᒪᔪᑦ ᒥᓂᔅᑕᒧᑦ ᑲᒪᔪᒧᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ. ᐃᓚᖓᑦ ᒥᓂᔅᑕᒧᑦ ᑎᒃᑯᐊᕐᑕᐅᔪᖅ ᐊᖏᕐᑕᐅᓯᒪᓗᓂ ᒥᖤᔅᑕᐅᔪᒧᑦ ᐅᒪᔪᓕᕆᓂᕐᒧᑦ ᐱᔨᓯᕐᑎᐅᔪᓂᑦ (CWS) ᐱᔾᔪᑎᒋᓪᓗᒍ ᓴᓐᓂᕈᑎᐊᓗᒃᒥ ᕿᑭᕐᑕᖓᓂ ᑎᖕᒥᐊᖃᕐᕕᐅᓂᖓᓄᑦ. ᑲᑎᒪᔨᑦ ᐱᔭᒃᓴᖃᕐᑐᑦ ᐅᖃᐅᔾᔨᒋᐊᕐᑎᐅᓗᑎᒃ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ, ᓄᓇᕗᑦᒥ ᐅᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᓯᖏᓐᓂᒃᓗ ᐃᖃᓇᐃᔭᕐᕕᐅᔪᓂᒃ ᒥᕐᖑᐃᕐᓯᕐᕕᐅᑦ ᐃᓗᐊᓂ ᐊᐅᓚᑕᐅᔪᓄᑦ ᐱᔾᔪᑎᓕᒃᓄᑦ. ᐱᕙᓪᓕᐊᑎᓂᕐᒧᑦ ᐊᖏᖃᑎᒋᒍᑎᑦ ᐱᔭᕆᐊᖃᕐᑎᑦᑎᒃᒪᑕ ᐊᐅᓚᑕᐅᓂᖓᓄᑦ ᐸᕐᓇᐅᑎᑦ ᐊᕿᒃᑕᐅᔭᕆᐊᖃᕐᖢᑎᒃ ᒥᕐᖑᐃᕐᓯᕐᕕᒃᒧᑦ ᐸᕐᓇᒃᑎᑦ ᑲᑎᒪᔨᖏᓐᓄᑦ (PPT). ᓯᕐᒥᓕᒃᒥ ᒥᕐᖑᐃᕐᓯᕐᕕᒃᒧᑦ ᐸᕐᓇᒃᑎᑦ ᑎᓴᒪᓂᒃ ᑲᑎᒪᔨᖃᕐᑐᑦ, ᒪᕈᒃ ᑎᒃᑯᐊᕐᑕᐅᓯᒪᔪᒃ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᖏᓐᓄᑦ, ᐊᑕᐅᓯᖅ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᐊᑕᐅᓯᖅ ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ.

ᐊᑕᐅᓯᐅᖏᒻᒪᑕ ᖃᓕᕆᒃᓯᒪᔪᑦ ᐊᒃᑐᐊᖃᑎᒋᒃᑐᓪᓗ ᐊᐅᓚᑦᑎᓂᕐᒧᑦ ᐱᔪᓐᓇᐅᑎᖃᕐᑐᑦ ᐱᓪᓚᕆᐅᓪᓗᑎᒃᓗ ᓯᕐᒥᓕᒃ ᒥᕐᖑᐃᕐᓯᕐᕕᒃᒧᑦ; ᐱᕕᖃᕐᑎᑦᑎᒃᒪᑕ ᐃᑲᔪᕐᑎᒋᒃᓂᒃᑯᑦ ᑐᓴᐅᒪᖃᑦᑕᐅᑎᓗᑎᒃ ᖃᐅᔨᒋᐊᕐᖃᑦᑕᕐᓗᑎᒃ. ᐃᓄᐃᑦ ᓄᓇᖁᑎᖏᑦ (IOL)ᐊᒻᒪᓗ ᑕᕆᐅᕐᒥᑦᑐᑦ ᓴᓐᓂᕈᑎᐊᓗᑦ ᕿᑭᕐᑕᖓᑕ ᖃᓂᒋᔭᓂ ᑎᖕᒥᐊᖃᕐᕕᐅᔪᒥ ᐊᒃᑐᐊᓂᖃᕐᒪᑦ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒧᑦ. ᐱᔭᒃᓴᐅᓂᖓᓂᒃ ᖃᐅᔨᓴᕐᑕᐅᓪᓗᓂ ᐊᕿᒐᓱᒃᖢᓂ ᑲᓇᑕᒥ ᑕᕆᐅᖓᓂᒃ ᑕᓪᓗᕈᑎᐅᑦ ᐃᒪᖓᓂ, ᐱᖃᓯᐅᑎᓯᒪᒐᔭᕐᑐᖅ ᑕᕆᐅᖓᓂᒃ ᖃᓂᒋᔭᓂ ᒥᕐᖑᐃᕐᓯᕐᕕᐅᑦᒪᓐᓇ ᐱᓕᕆᐊᖑᕙᓪᓕᐊᔪᖅ ᐊᒻᒪᓗ, ᐊᖏᕐᑕᐅᓯᒪᔪᖅ ᐅᔭᕋᒃᑕᕐᕕᐅᔪᖅ ᐊᒻᒪᓗ ᑐᓚᒃᑕᕐᕕᐅᔪᖅ ᐃᓄᐃᑦ ᓄᓇᖁᑎᖓᓂᑦᑐᑦ ᓄᓘᔭᓂ, ᐅᖓᓯᒃᓂᖃᕐᑐᖅ 160 ᑭᓚᒥᑕ ᓂᒋᐊᓂ ᒥᑦᑎᒪᑕᓕᐅᑦ ᐊᒻᒪᓗ ᐅᖓᓯᒃᓂᖃᕐᑐᖅ 100 ᑭᓚᒥᑕ ᓂᒋᐊᓂ ᖃᖏᕐᓗᕈᓗᑦ ᐃᓚᖓᓂ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒥ.

3.2 ᐊᒃᑐᐊᓂᕆᔭᖏᑦ ᒥᕐᖑᐃᕐᓯᕐᕕᐅᑦ ᖃᓂᒋᔮᓂᑦᑐᑦ ᓄᓇᓕᑦ ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ

ᐃᓄᐃᑦ ᖃᔪᓯᑎᑦᑎᓐᓇᕐᒪᑕ ᑕᐃᒪᖓᓂᐊᓗᒃ ᓄᓇᒥ ᑕᕆᐅᕐᒥᓗ ᐊᕙᑎᖓᓂᒃ ᓇᔪᑎᓪᓗᑎᒃ. ᐃᓄᐃᑦ ᒥᑦᑎᒪᑕᓕᒃᒥᐅᑦ ᐊᒻᒪᓗ ᐃᒃᐱᐊᕐᔪᖕᒥᐅᑦ ᓇᕈᐃᓐᓇᕐᑐᑦ ᑕᐃᒪᖓᑦ ᐅᐸᒍᓐᓇᕐᑕᒥᓄᑦ ᐃᓕᖁᓯᕐᒥᓂᒃ ᐊᑐᕐᖢᑎᒃ ᐃᓄᓯᕆᔭᕐᒥᓂᒃᓗ, ᓯᕐᒥᓕᒃᒧᐊᖃᑦᑕᕆᓪᓗᑎᒃᓗ ᒥᕐᖑᐃᕐᓯᕐᕕᒃᒧᑦ. ᐃᓄᐃᑦ ᖃᐅᔨᒪᔭᑐᖃᖏᑦ ᐱᓪᓚᕆᐅᖃᑕᐅᒪᑦ ᑐᑭᓯᐅᒪᔭᐅᓇᓱᒃᓗᓂ ᒥᕐᖑᐃᕐᓯᕐᕕᐅᑦ ᐊᕙᑕᓂᑦᑐᓂᒃ ᐊᒻᒪᓗ ᒥᕐᖑᐃᕐᓯᕐᑯᓕᕆᔨᒃᑯᑦ ᑲᓇᑕᒥ ᐃᓚᐅᓂᕐᓴᐅᔾᔪᑕᐅᓪᓗᓂ ᐃᓄᖏᓐᓄᑦ ᓄᓇᓕᒃᓂᑦᑐᓄᑦ ᒪᕈᔪᒃᓄᑦ. ᑭᓱᑕᖃᕐᓂᖓᓂᒃ ᑎᑎᕋᕐᑕᐅᓇᓱᒃᓗᑎᒃ ᐊᒻᒪᓗ ᖃᐅᔨᓴᕐᑕᐅᕙᓪᓕᐊᓂᖓ ᐊᒻᒪᓗ ᖃᐅᔨᒪᓇᓱᒃᑕᐅᓂᖓ ᒥᕐᖑᐃᕐᓯᕐᕕᒃᒥᑦᑐᑦ ᐱᓪᓚᕆᐅᖃᑕᐅᒋᓪᓗᓂ. ᖃᐅᔨᒪᑎᑦᑎᓇᓱᒃᓗᓂ ᐃᓕᓐᓂᐊᕐᑎᑦᑎᓗᓂᓗ ᐊᒻᒪᓗ ᐊᑐᕐᑕᐅᔪᓐᓇᕐᑐᓂᒃ ᒪᒃᑯᒃᑐᓄᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ ᐱᓪᓚᕆᐅᓂᕋᑦᑕᐅᖃᑦᑕᕐᒥᔪᖅ ᐃᓄᖏᓐᓄᑦ.

ᒥᑦᑎᒪᑕᓕᒃ ᐃᒃᐱᐊᕐᔪᒃᓗ ᐅᓄᖏᒻᒪᑕ ᐊᐅᓪᓚᐅᔾᔨᔨᐅᔪᑦ, ᐱᕙᓪᓕᐊᖏᔾᔪᑕᐅᓪᓗᓂᓗ ᓄᓇᒃᓄᑦ ᐳᓚᕋᑦᑐᓕᕆᓂᕐᒥᒃ ᐊᐅᓚᑕᐅᔪᓂᓗ. ᐳᓚᕋᑦᑐᓕᕆᓂᖅ ᐱᕙᓪᓕᐊᑎᑕᐅᓂᖓ ᐱᓗᐊᕐᓂᕆᔭᐅᒋᕗᖅ ᐳᓚᕋᑎᑦ ᐅᓄᕐᓯᒋᐊᕐᑎᑕᐅᓇᓱᒃᑎᓪᓗᒋᑦ ᒥᕐᖑᐃᕐᓯᕐᕕᒃᒧᑦ ᐊᒻᒪᓗ ᐱᓕᕆᖃᑎᒋᒃᓂᖏᓐᓄᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᐃᓄᖏᑦ ᐃᒃᐱᐊᕐᔪᖕᒥ.

3.3 ᓯᓚ ᐊᒻᒪᓗ ᐳᓚᕋᑦᑐᓕᕆᓂᖅ ᖃᓄᐃᓕᕙᓪᓕᐊᓂᖓ ᐃᒃᐱᒃᓇᐅᑎᓂᐊᕐᑐᑦ ᒥᕐᖑᐃᕐᓯᕐᕕᒃᒧᑦ ᓯᕗᓂᒃᓴᑦᑎᓐᓂ

ᒥᕐᖑᐃᕐᓯᕐᕕᒃ ᓴᐳᔾᔨᓯᒪᔪᖅ ᐃᓚᖓᓂ ᐅᒪᔪᖏᓐᓂᒃ ᐊᕙᑎᖓᓂᒃᓗ, ᑭᓯᐊᓂ ᐅᑭᐅᕐᑕᕐᑐᕐᒥᐅᑦ ᐅᒪᒧᖏᑦ ᓱᕐᓗ ᑐᒃᑐᐃᑦ, ᓇᓄᐃᑦ, ᑎᖕᒥᐊᑦ ᑕᕆᐅᕐᒥᐅᑕᐃᑦ, ᐊᒻᒪᓗ ᐳᐃᔩᑦ ᐅᖓᑕᓄᐊᖃᑦᑕᕐᒪᑕ ᑭᒃᓕᖓᑕ ᒥᕐᖑᐃᕐᓯᕐᕕᐅᑦ ᐊᒻᒪᓗ ᐃᒃᐱᒃᓂᕐᑎᑕᐅᓯᒪᒋᓪᓗᑎᒃ ᓄᓇᕐᔪᐊᕐᒥ ᐊᓯᓪᓕᕐᐸᓪᓕᐊᒧᒧᑦ. ᐊᓯᓪᓕᕐᐸᓪᓕᐊᔾᔪᑕᐅᔪᑦ ᐊᓯᓪᓕᔾᕐᐸᓪᓕᐊᒥᒃᒪᑦ ᐅᑭᐅᕐᑕᕐᑐᒥ ᐃᒃᐱᒃᓴᐅᑎᓪᓗᓂᓗ ᐃᓄᓯᖏᓐᓄᑦ ᐃᓄᐃᑦ ᓄᓇᖃᕐᑐᑦ ᑕᐃᑲᓂ. ᐊᕙᑎᕗᑦ ᖃᐅᔨᒪᓇᓱᒃᑕᐅᓂᖓ ᑐᑭᓯᔾᔪᑕᐅᕙᓪᓕᐊᔪᖅ ᐱᐅᔪᓐᓂᕐᐸᓪᓕᐊᓂᖓᓂᒃ ᐃᓕᖁᓯᕐᓱᕐᖢᓂ ᐱᑕᖃᕐᓂᕆᔭᖏᑦ ᐃᓗᐊᓂᑦᑐᑦ ᒥᕐᖑᐃᕐᓯᕐᕕᐅᑦ ᐊᕙᑕᓂᑦᑐᓪᓗ.

ᐱᔾᔪᑎᒋᓪᓗᒍ ᒥᕐᖑᐃᕐᕕᒃ ᐅᐸᑲᐅᑎᒋᔭᒃᓴᐅᖏᓐᓂᖓᓄᑦ ᐊᒻᒪᓗ ᐊᑭᑐᓂᖓᓄᑦ ᐅᐸᒐᓱᒃᖢᒍ, ᐅᓄᖏᒻᒪᑕ ᖃᓪᓗᓇᒥᖓᕐᑐᑦ ᐳᓚᕆᐊᖃᑦᑕᕐᑐᑦ ᓯᕐᒥᓕᒃ ᒥᕐᖑᐃᕐᓯᕐᕕᒃᒧᑦ. ᒫᓐᓇ ᐳᓚᕋᑎᑦ ᑎᑭᖃᑦᑕᕐᑐᑦ ᐱ)ᒃᑎᑦ, ᓯᐊᕆᔮᕐᑐᑦ ᐊᐳᑎᒃᑯᑦ, ᐃᓐᓇᕐᑐᕆᐊᕐᑐᑦ, ᐅᒥᐊᕐᑐᕐᑐᑦ ᐊᒻᒪᓗ ᐳᓚᕋᑎᑦ ᐅᒥᐊᕐᔪᐊᒃᑯᑦ ᑎᑭᑦᑐᑦ. ᐳᓚᕋᑎᑦ ᐅᒥᐊᕐᔪᐊᒃᑯᑦ ᓄᓇᕗᑦᒧᑦ ᐅᓄᕐᓯᕙᓪᓕᐊᖏᓐᓇᕐᑐᑦ ᑕᐃᒪᖓᑦ 2006 ᐊᒻᒪᓗ ᖃᐅᔨᓇᓱᒃᑕᐅᒐᒥ ᐅᓄᕐᓯᕙᓪᓕᐊᓂᐊᕐᓂᕋᕐᑕᐅᓪᓗᑎᒃ. ᐅᓄᕐᓯᕙᓪᓕᐊᓗᑎᒃᓗ ᑎᖏᕋᐅᑎᓕᑦ ᐅᒥᐊᕐᔪᐊᕋᓚᑦ, ᐊᑭᑐᔪᑎᓪᓗ ᐅᒥᐊᕐᔪᐊᕋᓚᑦ ᖃᐅᔨᒪᔾᔪᑕᐅᔪᑦ ᐱᑕᖃᕐᐸᓪᓕᐊᓂᐊᕐᓂᖏᓐᓂᒃ. ᐅᒥᐊᕐᔪᐊᒃᑯᑦ ᑎᖏᕈᐅᑎᓕᒃᑯᓪᓗ ᐊᑲᐅᓚᕿᒃᑐᖅ ᐳᓚᕋᑎᓄᑦ ᐊᕙᑎᖓᓂᒃ ᑕᑯᔪᒪᔪᓄᑦ ᐅᓄᕐᓯᒋᐊᕈᑕᐅᔪᓐᓇᕐᖢᓂ ᐳᓚᕋᑎᓄᑦ ᑎᑭᖃᑦᑕᕐᑐᓄᑦ ᐱᔾᔪᑎᒋᓪᓗᒍ ᐅᒥᐊᕐᔪᐊᑦ ᑎᑭᑎᑦᑎᔪᓐᓇᕐᒪᑕ ᐳᓚᕋᑎᓂᒃ ᒪᓐᓇ ᐱᑕᖃᖏᒻᒪᑕ ᓄᓇᕗᑦᒥ (ᓱᕐᓗ ᑐᔪᕐᒥᕕᑦ ᐊᒻᒪᓗ ᓂᕆᔭᕐᑐᕐᕕᑦ) ᐊᒻᒪᓗ ᐱᔾᔪᑎᒋᓪᓗᒍ ᐅᓄᖏᒻᒪᑕ ᐊᐅᓪᓚᐅᔨᔨᐅᔪᑦ ᓄᓇᓕᒃᓂ ᐊᖑᒻᒪᑎᖏᒻᒪᑕ ᐳᓚᕋᑎᓄᑦ.

ᐳᓚᕋᑎᓂᒃ ᖃᖓᑕᓱᒃᑯᑦ ᑎᑭᑦᑐᖃᓚᐅᕐᓯᒪᖏᑦᑐᖅ, ᑭᓯᐊᓂ ᐱᕈᕐᐸᓪᓕᐊᔪᓐᓇᕐᑐᖅ, ᐱᓗᐊᕐᑐᒥᒃ ᑭᓇᐅᔭᒃᓴᕐᑎᐅᔪᓄᑦ ᐊᒻᒪᓗ ᐳᓚᕋᑎᓄᑦ ᓄᓇᓕᒃᓂ ᓯᑯᐃᕐᐸᓪᓕᐊᓕᕋᖓᑦ. ᐃᓱᒪᓗᑕᐅᖃᑦᑕᕐᓯᒪᔪᖅ ᐃᓄᖏᓐᓄᑦ ᐃᓚᖏᓐᓄᑦ ᖃᖓᑕᓱᒃᑯᑦ ᑎᑭᖃᑦᑕᓕᕐᐸᑕ ᐸᒃᕕᓴᕈᑕᐅᒐᔭᕐᒪᖓᑦ ᐅᒪᔪᓄᑦ ᐃᓄᒃᓄᓪᓗ ᐊᖑᓇᓱᒃᑐᓄᑦ ᐊᐅᓪᓚᕐᓯᒪᔪᓄᓪᓗᓐᓂᑦ ᑐᒃᑐᓄᓪᓗ ᐳᐃᔨᓄᓪᓗ.

4.0 ᐸᕐᓇᒃᑕᐅᓂᖓᑕ ᓯᕗᓪᓕᐅᔾᔭᐅᔪᒪᔪᑦ

ᐊᑖᓂᑦᑐᑦ ᑎᑎᕋᕐᓯᒪᔪᑦ ᓯᕗᓪᓕᐅᔾᔭᐅᔪᒪᓯᒪᔪᑦ ᓇᓗᓇᐃᕐᑕᐅᓯᒪᔪᑦ ᐊᒋᓯ 2012 ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒥ ᖃᓄᐃᓕᖓᓂᖓᓂᒃ ᐅᓂᑲᓕᐊᖑᔪᒥ ᐊᒻᒪᓗ ᐱᖃᓯᐅᔾᔨᓯᒪᓪᓗᑎᒃ ᐊᑐᓕᖁᔭᐅᔪᓂᒃ ᒥᕐᖑᐃᕐᓯᕐᑯᒃᒧᑦ ᐸᕐᓇᒃᑎᐅᔪᓂᑦ ᐊᒻᒪᓗ ᑲᑎᖓᓪᓗᑎᒃ ᐊᐅᒪᓂᖓᓂᒃ ᑲᑎᒪᔨᐅᔪᑦ, ᐊᒻᒪᓗ ᐅᖃᐅᓯᐅᓯᒪᔪᑦ ᐃᓄᖏᓐᓂᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ ᐊᒻᒪᓗ ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ. ᑖᓐᓇ ᐊᐅᓚᓂᖓᓄᑦ ᐸᕐᓇᐅᑎ ᐊᕿᒃᓯᒪᔪᖅ ᐱᖃᓯᐅᔾᔭᐅᓪᓗᑎᒃ ᓇᓗᓇᐃᕐᑕᐅᓯᒪᔪᑦ ᓯᕗᓪᓕᐅᔭᐅᖁᔭᐅᓯᒪᔪᑦ.

4.1 ᐊᕿᒃᓱᐃᓂᖅ ᐱᕕᖃᕐᓂᐅᔪᓂᒃ ᐳᓚᕋᑎᑦ ᖃᐅᔨᔪᓐᓇᕐᑕᖏᓐᓂᒃ

ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᐱᕕᖃᕐᑎᑦᑎᒃᒪᑦ ᐅᑭᐅᕐᑕᕐᑐᒥ ᖁᑦᑎᒃᑐᒥ ᐳᓚᕋᑎᓂᒃ ᖃᐅᔨᔭᐅᔪᓐᓇᕐᑎᑦᑎᓪᓗᑎᒃ, ᑲᔾᔭᕐᓇᕐᑐᓂᒃ ᐊᔾᔨᖏᖏᑦᑐᓂᒃᓗ ᓄᓇᐅᔪᓂᒃ, ᐅᒪᔪᖃᕐᓂᐅᔪᓂᒃ, ᐊᒻᒪᓗ ᐃᓄᐃᑦ ᐃᓄᕕᒋᓯᒪᔭᖏᓐᓂᒃ ᐃᓕᖁᓯᖏᓂᒃᓗ. ᐃᓄᐃᑦ ᓄᓇᖃᕐᑐᑦ ᖃᓂᒋᔭᓂ ᒥᕐᖑᐃᕐᓯᕐᕕᐅᑦ ᐊᑐᖃᑦᑕᕐᒪᑕ ᐃᓕᖁᓯᕐᒥᓂᒃ ᐱᔪᓐᓇᕐᑎᑕᐅᓪᓗᑎᒃᓗ ᓄᓇᕗᑦ ᓄᓇᑕᕆᔭᐅᓂᖓᓄᑦ ᐊᖏᖃᑎᒋᒍᑎᓂ. ᐳᓚᕋᑎᑦ ᐅᓄᖏᔾᔪᑎᖃᕐᑐᖅ ᐊᔾᔨᒋᖏᑦᑐᓂᒃ ᐱᔾᔪᑎᖃᐅᕐᑐᑦ ᐊᑭᑐᓂᖓᓄᑦ ᑕᒪᐅᖓᕋᓱᒃᓗᓂ ᓄᓇᕗᑦᒧᑦ ᒥᕐᖑᐃᕐᓯᕐᕕᒃᒧᓪᓗᓐᓂᑦ. ᐅᓄᕐᓂᕐᓴᐃᑦ ᐳᓚᕋᑎᑦ ᒥᕐᖑᐃᕐᓯᕐᕕᒃᒧᐊᖃᑦᑕᕐᑐᑦ ᐅᐱᖓᒃᑯᑦ ᓯᐊᕆᔭᕆᐊᕐᑐᕐᖢᑎᒃ ᐊᒻᒪᓗ ᓯᓇᖓᓄᖓᐅᓪᓗᑎᒃ ᐊᒻᒪᓗ ᐱᓱᔪᒋᐊᕐᓯᒪᔪᑦ ᐅᕙᓗᓐᓂᑦ ᐅᒥᐊᕐᔪᐊᒃᑯᑦ ᑎᑭᖃᑕᐅᔪᑦ ᐳᓚᕋᑎᓂᑦ ᐊᐅᔭᒃᑯᑦ. ᐅᓚᕋᑎᑦ ᑎᑎᕋᕐᑕᐅᓯᒪᓂᖏᑦ ᐅᖃᕐᓯᒪᖏᒻᒪᑕ ᖃᓄᑎᒋ ᐃᓄᐃᑦ ᐊᑐᖃᑦᑕᕐᑎᒋᒃᒪᖓᑕ ᐅᐊᒍᑎᖃᑦᑕᕐᒪᖓᑕᓗᓐᓂᑦ ᒥᕐᖑᐃᕐᓯᕐᑯᒃᒧᑦ ᒥᑦᑎᒪᑕᓕᒃᒥᑦ ᐃᒃᐱᐊᕐᔪᖕᒥᓗ ᐱᔾᔪᑎᒋᓪᓗᒍ ᒥᕐᖑᐃᕐᓯᕐᕕᓕᕆᔨᒃᑯᑦ ᑎᑎᕋᕐᐸᓪᓕᐊᖏᒻᒪᑕ ᐃᓄᐃᑦ ᐅᐸᒍᑎᖃᑦᑕᕐᑐᓂᒃ. ᐅᓄᓚᖑᓯᒪᔪᑦ ᐳᓚᕋᑎᑦ ᑎᑭᓯᒪᔪᑦ ᐅᒥᐊᕐᔪᐊᒃᑯᕐᑐᕕᓂᑦ ᐳᓚᕋᑎᑦ. ᖃᖓᑦᑎᐊᓴᖑᓚᐅᕐᑐᕐᓗ ᐊᐅᔭᐅᔪᒥ ᐅᓄᕐᓂᕐᓴᐅᓚᐅᕐᒥᔪᑦ ᐅᒥᐊᕐᔪᐊᕋᓚᑦ ᑎᖏᕋᐅᑎᓕᑦ. ᐅᓄᕐᓯᕙᓪᓕᐊᓂᐊᕋᓱᒋᔭᐅᓪᓗᑎᒃᓗ ᓯᑯᖃᕈᓐᓂᕐᐸᓪᓕᐊᑎᓪᓗᒍ ᓯᓚ ᐅᕐᖁᓯᕙᓪᓕᐊᓂᖓᓄᑦ ᐊᔾᔨᒋᖏᑦᑐᓪᓗ ᐅᒥᐅᐊᑦ ᓴᕿᐸᓪᓕᐊᓂᐊᕋᓱᒋᔭᐅᔪᑦ. ᐱᓱᔪᒃᑐᑦ, ᓯᐊᕆᔭᕐᑐᑦ ᐅᕙᓗᓐᓂᑦ ᐊᓯᖏᑦ ᖃᓄᐃᓕᐅᕐᑕᐅᔪᓐᓇᕐᑐᑦ ᓱᓕ ᓴᕿᑎᑕᐅᓯᒪᖏᒻᒪᑕ ᐊᒻᒪᓗ ᒥᕐᖑᐃᕐᓯᕐᕕᒃᒥ ᑐᑭᓯᒋᐊᕈᑎᒃᓴᓂ ᐱᑕᖃᖏᓗᐊᕐᖢᓂ. ᐱᖁᑎᖃᐅᖏᒻᒪᑕ ᓱᓕ ᒥᕐᖑᐃᕐᓯᕐᕕᒃᒥ. ᑕᐃᒪᓐᓇᑦᑕᐅᖅ ᐊᓯᖏᑎᑐᑦ ᓄᓇᓕᐅᔪᑐᑦ ᐳᓚᕋᑦᑐᓕᕆᓂᕐᒧᑦ ᐱᖁᑎᖃᑦᑎᐊᖏᒻᒪᑕ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ.

4.2 ᐃᓄᐃᑦ ᑐᓴᐅᒪᑎᑕᐅᓂᖏᑦ ᖃᐅᔨᒪᑎᑕᐅᓂᖏᑦ

ᒥᕐᖑᐃᕐᓯᕐᕕᒃ ᓄᑕᖑᓂᖓᓄᑦ ᓄᓇᓕᑦ ᐊᕙᑕᓂᑦᑐᑦ ᐱᒋᐊᕐᐸᓪᓕᐊᓕᓴᕐᒪᑕ ᐃᓚᐅᕕᖃᕐᖢᑎᒃ ᐳᓚᖃᑦᑐᓕᕆᓂᕐ ᐱᕙᓪᓕᐊᑎᑕᐅᓇᓱᒃᖢᓂ. ᐃᓄᒃᓂᒃ ᓄᓇᒋᔭᐅᓂᕐᓴᐅᓪᓗᓂᓗ ᐊᒃᑐᐊᓂᕆᔭᖓ ᐊᖏᖃᑎᒋᒍᑎᒃᑯᑦ ᓇᓗᓇᐃᕐᑕᐅᓯᒪᓪᓗᑎᒃ ᐱᒋᐊᕐᕕᐅᖃᑦᑕᕋᔭᕐᓂᖏᓐᓂᒃᓗ ᓯᕐᒥᓕᒃ ᒥᕐᖑᐃᕐᓯᕐᕕᒃᒧᑦ. ᒥᕐᖑᐃᕐᓯᕕᓕᕆᔨᒃᑯᑦ ᑲᓇᑕᒥ ᐃᖃᓇᐃᔭᕐᑎᖏᑦ ᒥᑦᑎᒪᑕᓕᒃᒥᒻᒪᑕ ᑭᓯᐊᓂ ᐱᑕᖃᖏᑦᑐᖅ ᐃᒃᐱᐊᕐᔪᖕᒥ.

4.3 ᖃᐅᔨᒪᓇᓱᒃᓂᖅ ᐊᒻᒪᓗ ᓴᐳᔾᔨᓯᒪᓂᖅ ᒥᕐᖑᐃᕐᓯᕐᕕᐅᑦ ᐊᕙᑎᖓᓂᑦᑐᓂᒃ ᐃᑦᑕᕐᓂᓴᐃᓂᒃᓗ

ᐃᒃᐱᒃᓇᐅᑎᔪᑦ ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ ᐅᑭᐅᕐᑕᕐᑐᒥ ᑎᑎᕋᕐᑕᐅᓯᒪᒃᒪᑦ. ᐃᐱᒃᓇᐅᑎᓂᐊᕐᑐᑦ ᐊᕙᑎᑦᑎᓐᓄᑦ, ᐳᓚᕋᑎᑦ ᖃᓄᐃᓕᖓᓂᐊᕐᒪᖓᑕ ᐃᓄᐃᓪᓗ ᐃᓕᖁᓯᖏᑦ ᓄᓇᒧᑦ ᒃᑐᐊᓂᕆᔭᖓ ᑕᕆᐅᕐᒥᐅᑕᓄᓪᓗ. ᖃᐅᔨᒪᓇᓱᒃᑕᐅᓂᖓ ᖃᓄᐃᓕᕙᓪᓕᐊᒃᒪᖓᑦ ᒥᕐᖑᐃᕐᓯᕐᕕᐅᑦ ᐃᓗᐊᓂ, ᐃᑦᑕᕐᓂᓴᓕᕆᓂᕐᓗ, ᐳᓚᕋᑎᓪᓗ ᖃᓄᐃᓕᕙᓪᓕᐊᓂᖏᑦ ᐊᒻᒪᓗ ᐃᓄᐃᑦ ᑐᓴᐅᒪᑎᑕᐅᕙᓪᓕᐊᓂᖏᑦ ᐊᒻᒪᓗ ᐃᓕᓐᓂᐊᕐᑎᑦᑎᖃᑦᑕᕐᓂᖅ ᐱᒋᐊᕐᑎᑕᐅᓯᒪᓕᕐᑐᑦ ᑭᓯᐊᓂ ᖃᐅᔨᒪᔭᐅᔪᑦ ᐊᔾᔨᒋᖏᓗᐊᕐᒪᑕ ᐃᓚᖏᓐᓄ. ᖃᐅᔨᓴᕐᓂᖅ ᖃᐅᔨᒪᓇᓱᒃᓂᕐᓗ ᐱᓕᕆᐊᖑᓂᕐᓴᐅᒃᒪᑦ ᐃᓕᓐᓂᐊᕐᕕᒃᔪᐊᕐᒥᐅᓄᑦ ᐊᓯᖏᓐᓄᓪᓗ. ᓄᓇᕗᑦᒥ ᒥᕐᖑᐃᕐᓯᕐᕕᓕᕆᔨᒃᑯᑦ ᐱᒋᐊᕐᑎᑦᑎᓯᒪᓕᕐᑐᑦ ᐊᑐᕐᑕᐅᓂᕐᓴᐅᓕᕐᖢᑎᒃᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑲᑎᑦᑎᕙᓪᓕᐊᓗᑎᒃ ᓄᓇᓕᒃᓂ. ᐊᖑᓇᓱᒃᕕᒋᕙᒃᑕᖏᑦ ᒥᖑᐊᕐᓯᕐᕕᒃᒥ ᑲᔪᓯᓐᓇᕐᑐᖅ ᐱᔪᓐᓇᕐᓂᖏᓐᓄᑦ ᓄᓇᕗᑦ ᓄᓇᑕᕆᔭᐅᓂᖓᓄᑦ ᐊᖏᖃᑎᒋᒍᑎᓂ.

5.0 ᑕᑯᖑᐊᕐᓂᖅ

ᐊᕋᒍᐃᑦ 15-ᒥᑦ 20-ᒧᑦ, ᐅᐊᖕᓇᖓᓂ ᕿᑭᕐᑕᕐᓗᑦ ᓯᕐᒥᓕᒃ ᒥᕐᖑᐃᕐᓯᕐᕕᒃ ᐱᑕᖃᐃᓐᓇᕐᒪᑦ ᑲᔪᓯᓐᓇᕐᖢᓂ ᓄᓇ ᓯᑯᖓᓗ ᐊᒃᑐᐊᓂᕆᒃᖢᑎᒃ ᐊᕙᑎᖓᓗ ᖃᓄᐃᖏᑦᑎᐊᕐᖢᓂ ᐊᔾᔨᒋᖏᑦᑐᓂᒃ ᐅᒪᒧᖃᐅᕐᖢᓂ ᐃᓚᖏᑦ ᐅᑯᐊ ᓇᓄᐃᑦ,ᕿᓚᓗᒐᐃ,ᑎᕆᒐᓂᐊᑦ,ᐊᒪᕈᐃᑦ, ᑐᒃᑐᐃᑦ,ᐊᕕᖓᐃᑦ,ᐅᑲᓕᑦ,ᐃᖃᓗᐃᑦ, ᑎᖕᒥᐊᓪᓗ ᑎᑭᑦᑕᕐᑐᑦ ᓯᒃᔭᕐᒥᐅᑕᐃᑦ ᑕᕆᐅᕐᒥᐅᑕᐃᑦ, ᑭᒐᕕᐊᕐᔪᐃᑦ ᑲᔪᓪᓗ, ᐅᒃᐱᒃᔪᐊᓪᓗ ᑲᖑᐃᓪᓗ. ᓱᕈᕐᓯᒪᖏᑦᑐᑦ ᓯᕐᒥᑦ ᑕᕆᐅᕐᒧᐊᖓᓪᓗᑎᒃ ᑐᖑᔪᕐᓯᓯᒪᓪᓗᓂ ᐃᖃᖓ ᑕᕆᐅᕐᒥ ᑲᖏᕐᖢᖏᓐᓂ ᐊᕙᑕᓂ ᑎᓴᒪᐅᓕᖓᔪᑦ ᒥᕐᖑᐃᕐᓯᕐᕕᑦ. ᖃᖓᓂᓪᖢᑎᒃ ᓯᕐᒥᐅᓂᖏᑦ ᓄᓇᖓ ᕿᕐᓈᖓᓪᓗᓂ ᓇᑎᕐᓇᖃᕐᖢᓂᓗ ᐊᑯᓂᖏᓐᓂ, ᐊᓱᖓᓱᖓᖃᕐᖢᓂᓗ ᓄᓇᖓ, ᑕᕐᓴᖃᐅᕐᑐᓂᒃᓗ ᐅᔭᕋᖃᐅᕐᖢᓂ. ᓄᓇᖓ ᓄᓇᒋᔭᐅᓂᑯᓪᓗᓂ ᐃᓄᒃᓄᑦ ᐃᒻᒪᑲᓪᓚᒃ ᐅᒪᔪᕋᓱᒃᕕᐅᕙᒃᖢᓂ ᐊᕋᒍᐃᑦ 2000 ᐊᓂᒍᕐᑐᑦ.

ᐃᓄᐃᑦ ᐃᓕᖁᓯᕐᒥᓂᒃ ᐊᑐᐃᓐᓇᕐᒪᑕ, ᐊᖑᓇᓱᖃᑦᑕᕐᓗᑎᒃᓗ ᓄᓇᒥᑦ ᑕᕆᐅᕐᒥᓪᓗ. ᐃᓗᐊᓂ ᓯᕐᒥᓕᒃ ᒥᕐᖑᐃᕐᓯᕐᕕᒃᒥ, ᖃᓂᒋᔭᓂᑦᑐᑦ ᓄᓇᓕᐅᔪᒃ ᐃᒃᐱᐊᕐᔪᒃ ᒥᑦᑎᒪᑕᓕᒃᓗ, ᐃᓐᓇᐃᑦ ᐅᖃᐅᓯᖃᖃᑦᑕᕐᑐᑦ ᖃᐅᔨᒪᔭᕐᒥᓂᒃ ᐃᓄᒃᓄᑦ ᒪᒃᑯᒃᑐᔪᓄᑦ ᐱᓕᒻᒪᒃᓴᐃᓪᓗᑎᒃ ᐊᒻᒪᓗ ᐅᓂᑲᕐᓂᖏᑎᒍᑦ. ᐃᓄᐃᑦ ᐃᓚᐅᑎᑕᐅᑦᑎᐊᕐᒪᑕ ᐊᐅᓚᓂᖓᓄᑦ ᒥᕐᖑᐃᕐᓯᕐᕕᒃ ᐃᖃᓇᐃᔭᕐᑎᑕᐅᓂᒃᑯᑦ ᐊᐅᓚᓂᖓᓂ, ᑲᑎᒪᔨᐅᖃᑕᐅᓂᒃᑯᓪᓗ, ᑎᒍᒥᐊᕐᑎᐅᖃᑕᐅᓂᒃᑯᓪᓗ. ᐃᓄᐃᑦ ᐃᖃᓴᐃᔭᕐᑎᐅᔪᑦ ᒪᓕᒐᑦᑎᐊᕙᐅᓂᕐᒥᒃ ᓴᕿᔭᕐᑎᑦᑎᔪᑦ ᓯᕗᓕᕐᑎᐅᓂᕐᒥᒃᓗ ᓄᓇᓕᒋᔭᕐᒥᓂ, ᐊᒻᒪᓗ ᓄᓇᓕᐅᔪᑦ ᐱᕙᓪᓕᕈᑎᖃᕐᐸᓪᓕᐊᓪᓗᑎᒃ ᑭᓴᐅᔭᑎᒍᑦ ᐳᓚᕋᑦᑐᓕᕆᓂᒃᑯᑦ.

ᑲᓇᑕᒥ ᓄᓇᕐᔪᐊᕐᒥᓗ ᐳᓚᕋᑦᑐᓕᕆᓂᕐ ᐱᕈᕐᐸᓪᓕᐊᒃᒪᑦ ᐳᓚᕋᑎᑦ ᖃᐅᔨᕙᓪᓕᐊᓪᓗᑎᒃ ᓄᓇᒋᔭᑦᑎᓐᓂᒃ ᑕᑯᔪᒥᓇᕐᑐᓂᒃᓗ, ᐃᓕᖁᓯᓕᕆᓂᒃᑯᓪᓗ, ᐊᒻᒪᓗ ᐊᔾᔨᐅᖏᑦᑐᓂᒃ ᖃᐅᔨᔭᐅᔪᓐᓇᕐᑐᓂᒃ ᑕᑯᔭᐅᔪᓐᓇᕐᑐᓂᒃᓗ ᐱᕈᕐᑐᐃᑦ ᓄᓇᕋᐃᑦ ᐅᒪᔪᖏᓪᓗ. ᐊᔾᔨᒋᖏᑦᑐᑦ ᐊᐅᓚᑕᐅᓯᒪᔪᑦ ᐊᑦᑕᕐᓇᖏᑦᑐᒃᑯᑦ, ᖃᓄᐃᓕᐅᕐᑎᑕᐅᓂᐅᔪᑦ, ᐳᓚᕋᑏᓪᓗ ᖃᐅᔨᔪᓐᓇᕐᑕᖏᓐᓂᒃ ᒥᕐᖑᐃᕐᓯᕐᕕᐅᑦ ᐃᓗᐊᓂ ᓄᓇᓕᒃᓂᓗ ᐃᒃᐱᐊᕐᔪᒃ ᒥᑦᑎᒪᑕᓕᒃᓗ ᐃᓚᐅᖃᑕᐅᖁᓪᓗᒋᑦ ᓄᓇᒥ ᐊᒃᑐᐊᓂᕆᔭᖏᓐᓂᒃ ᑕᕆᐅᖓᓂ ᐃᓄᖏᓐᓂᒃᓗ. ᑕᒪᐅᖓᕈᓐᓇᖏᑦᑐᑦ ᖃᐅᔨᑎᑕᐅᔪᓐᓇᕐᒥᔪᑦ ᑐᓴᒐᒃᓴᓕᐅᕐᕕᒃᑯᑦ ᖃᐅᔨᒋᐊᕐᕕᐅᕙᒃᑐᒃᑯᓪᓗ ᐃᑲᔪᕐᑎᒋᔭᐅᓗᑎᒃ ᑐᓴᐅᒪᑎᑦᑎᓂᕐᒧᑦ ᖃᐅᔨᒪᑎᑦᑎᓂᕐᒧᓪᓗ ᐊᐅᓚᑕᐅᔪᑦ.

ᖃᐅᔨᒪᓇᓱᒃᓂᖅ ᐊᒻᒪᓗ ᖃᐅᔨᓴᕐᓂᖅ ᐱᕙᓪᓕᐊᒃᒪᑕ ᖃᐅᔨᒪᔭᐅᔪᑦ ᑐᑭᓯᔭᐅᓴᓱᒃᑐᓪᓗ ᒥᕐᖑᐃᕐᓯᕐᕕᐅᑦ ᐃᓗᐊᓂᑦᑐᓂᒃ, ᐅᓂᑲᖑᔪᓪᓗ ᓴᕿᓯᒪᔪᑦ ᐃᓄᓯᕆᔭᐅᕙᓚᐅᕐᑐᒃᑯ ᑭᖑᓂᖓᑦᑎᓐᓂ, ᖃᓄᕐᓗ ᐊᕙᑎᖓ ᐊᓯᓪᓕᕐᐸᓪᓕᐊᔪᖅ ᓯᕗᓂᒃᓴᒧᑦ ᐊᕿᒍᑎᓂᐊᕐᒪᖓᑦ. ᓯᕐᒥᓕᒃ ᒥᕐᖑᐃᕐᓯᕐᕕᒃ ᓄᓇᕐᔪᐊᕐᒥ ᐃᓕᓴᕆᔭᐅᓯᒪᔪᒃᑯᑦ ᖃᐅᔨᓴᕐᕕᐅᒃᒪᑦ, ᐊᒻᒪᓗ ᐃᓄᐃᑦ ᑭᒃᓕᓯᓂᐊᕐᑎᐅᒧᓪᓗ ᐊᑐᓂ ᖃᐅᔨᒪᔭᕐᒥᓂᒃ ᐊᑐᕐᖢᑎᒃ ᐃᑲᔪᕐᑎᒋᒃᓗᑎᒃᓗ ᒥᕐᖑᐃᕐᓯᕐᕕᒃ ᐱᕙᓪᓕᐅᑕᐅᖁᓪᓗᒍ ᑭᓇᒃᑯᓕᒪᓄᑦ ᐅᐸᖃᑦᑕᕐᑐᓄᑦ ᐃᒃᐱᒋᔭᐅᑦᑎᐊᖁᓪᓗᒍᓗ.

6.0 ᐱᓗᐊᕐᓂᖏᑦ ᑐᒐᕋᐅᔪᑦ

ᑐᕋᒐᓕᐅᕐᓂᖅ ᓇᒧᖓᐅᕙᓪᓕᐊᓂᐊᕐᓂᖓᓂᒃ ᓯᕐᒥᓕᒃ ᒥᕐᖑᐃᕐᓯᕐᕕᒃ ᐊᕕᒃᑐᕐᑕᐅᓪᓗᓂ ᐱᖓᓱᓕᖓᓕᕐᑎᑕᐅᓪᓗᓂ, ᐊᑐᓂ ᐱᔭᕆᕐᑕᐅᓇᓱᒃᑐᓂᒃ ᑎᑭᑕᐅᓇᓱᒃᑐᓂᒃᓗ ᐅᖃᐅᓯᖃᕐᖢᑎᒃ. ᐱᔭᕆᕐᑕᐅᓇᓱᒃᑐᑦ ᐊᑕᓂ ᐱᓗᐊᕐᓂᖏᑦ ᑐᕋᒐᐅᔪᑦ ᐱᖓᓱᔪᑦ ᐃᑲᔪᕐᑐᕐᑕᐅᓯᒪᓪᓗᑎᒃ. ᐊᑐᑎᖃᕐᓂᐊᕐᒪᑕ ᐱᔪᒪᔭᐅᓯᒪᔪᓂᒃ ᓄᑕᒥ ᒥᕐᖑᐃᕐᓯᕐᕕᒃ ᖃᐅᔨᒪᔭᐅᓕᒃᑲᓐᓂᖁᓪᓗᒍ, ᐃᒃᐱᒋᔭᐅᑦᑎᐊᕐᓗᓂ ᐊᒻᒪᓗ ᐅᐸᒃᑕᐅᖃᑦᑕᕐᓗᓂ ᑲᓇᑕᒥᐅᑕᐅᔪᓄᑦ ᐊᒻᒪᓗ ᒥᕐᖑᐃᕐᓯᕐᕕᓕᕆᔨᒃᑯᓪᓗ ᐱᕙᓪᓕᐊᑎᑦᑎᓗᑎᒃ ᐃᓄᒃᓂᒃ ᐃᑲᔪᕐᑎᖃᕐᓗᑎᒃ ᐃᓄᖏᓐᓂᒃ ᒥᑦᑎᒪᑕᓕᒃᒥᑦ ᐊᒻᒪᓗ ᐃᒃᐱᐊᕐᔪᖕᒥᒃ.

ᐱᓗᐊᕐᓂᖓ ᑐᕋᒐᐅᔪᖅ 1

ᖁᕕᐊᓱᑕᐅᓗᓂ ᐊᔾᔨᐅᖏᓐᓂᖓ ᐊᒃᑐᐊᓂᕆᔭᖏᑦ ᐃᓚᐅᖃᑕᐅᓂᖏᑦ ᓯᕐᒥᓕᒃ ᒥᕐᖑᐃᕐᓯᕐᕕᒃ ᑲᓇᑕᒥ ᐊᒻᒪᓗ ᐃᓄᐃᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ

ᑕᓐᓇ ᑐᕋᒐᐅᔪᖅ ᐱᕙᓪᓕᐊᑎᑦᑎᕗᖅ ᑭᖑᓂᖓᑦᑎᓐᓂ ᐃᓄᓯᐅᓚᐅᕐᑐᓂᒃ ᐃᓄᒃᓄᑦ ᐊᒃᑐᐊᓂᕆᔭᖏᑦ ᓄᓇᒧᑦ, ᓱᓕ ᒪᓐᓇ ᐊᑐᕐᑕᐅᓪᓗᓂ ᐅᑭᐅᕐᑕᕐᑐᒥ ᐃᓄᓯᖏᓐᓂ. ᐅᓄᕐᑐᑦ ᐃᓄᑐᐃᓐᓇᐃᑦ ᐃᓱᒪᖃᕐᑐᒐᓗᐊᑦ ᐅᑭᐅᕐᑕᕐᑐᖅ ᑭᓱᑕᖃᖏᓐᓂᖓᓂᒃ, ᐃᓄᐃᑦ ᐅᒪᓂᑯᒃᒪᑕ ᐃᓄᓯᖃᕐᖢᑎᒃᓗ ᓄᓇᒥ ᐊᕋᒍᒐᓴᒃᓄᑦ ᑕᐅᓴᓄᑦ ᐱᓚᒋᔭᐅᒃᒪᑕ ᐊᐅᓚᓂᖓᑕ ᐅᑭᐅᕐᑕᕐᑐᑦ ᐊᕙᑎᖓᓄᑦ ᐊᒻᒪᓗ ᓯᕐᒥᓕᒃ ᒥᕐᖑᐃᕐᓯᕐᑯᒃ ᑲᔪᓯᓂᐊᕈᓂ ᖃᓄᐃᖏᑦᑎᐊᕐᓗᓂ, ᐃᓄᐃᑦ ᑲᔪᓯᔭᕆᐊᖃᕐᒪᑕ ᐃᓚᒋᔭᐅᖏᓐᓇᕐᓗᑎᒃ, ᐊᕿᒃᓱᐃᖃᑕᐅᖃᑦᑕᕐᓗᑎᒃ, ᐃᓕᖁᓯᕐᒥᓂᒃᓗ ᐊᑐᐃᓐᓇᕐᓗᑎᒃ ᐃᓗᐊᓂ ᓯᓚᑕᓂᓗ ᒥᕐᖑᐃᕐᓯᕐᕕᐅᑦ, ᐅᓂᑲᖏᓐᓂᒃᓗ ᖃᐅᔨᒪᔭᕐᒥᓂᒃᓗ ᑐᓴᐅᒪᑎᑦᑎᓗᑎᒃ ᑕᓱᒪ ᒥᒃᓴᓄᑦ.

ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑲᔪᓯᓂᐊᕐᑐᑦ ᖁᕕᐊᓱᑎᖃᕐᐸᒃᓗᑎᒃ ᐊᒻᒪᓗ ᑲᔪᓯᑎᑦᑎᓗᑎᒃ ᐊᒃᑐᐊᕆᔭᖓᓂᒃ ᐊᒻᒪᓗ ᐃᓄᐃᑦ ᐱᕕᖃᕈᓐᓇᕐᓂᐊᕐᒪᑕ ᐱᕚᓪᓕᕈᓐᓇᕐᓗᑎᒃ ᒥᕐᖑᐃᕐᓯᕐᕕᒃᑕᖃᕐᓂᖓᓄᑦ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᑲᔪᕐᑎᒋᒃᓂᒃᑯᑦ ᓄᓇᓕᐅᔪᑦ ᐃᓚᐅᑎᑕᐅᓗᑎᒃ, ᐃᓄᐃᓪᓗ ᖃᐅᔨᒪᔭᕐᒥᓂᒃ ᑐᓴᐅᒪᑎᑦᑎᓗᑎᒃ, ᐃᓕᓯᒪᔭᕐᒥᓂᒃᓗ ᐊᒻᒪᓗ ᐊᓕᐊᓇᐃᒋᔭᕐᒥᓂᒃ ᐊᐅᓚᑦᑎᖃᑕᐅᓗᑎᒃ ᒥᕐᖑᐃᕐᓯᕐᕕᒃᒥᒃ. ᒥᕐᖑᐃᕐᓯᕐᕕᓕᕆᔨᒃᑯᑦ ᐃᑲᔪᕐᑎᒋᒃᓂᒃᑯᑦ ᑲᔪᓯᓂᐊᕐᐳᑦ ᐊᐅᓚᑦᑎᓂᒃᑯᑦ, ᐃᖃᓇᐃᔭᖃᑎᒋᔭᐅᓗᑎᒃ ᐱᕚᓪᓕᐅᑕᐅᔪᓐᓇᕐᑐᓂᒃ ᐱᕕᖃᕐᓂᐅᔪᓂᒃᓗ ᐃᓄᒃᓄᑦ ᐊᒻᒪᓗ ᐳᓚᕋᑎᓄᑦ ᓇᒃᒥᓂᖅ ᐊᒃᑐᐊᓂᖃᕐᓗᑎᒃ ᒥᕐᖑᐃᕐᓯᕐᕕᒃᒧᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ.

ᑐᕋᒐᐅᔪᖅ ᐅᑯᓂᖓ ᓯᕗᓪᓕᐅᔭᐅᔭᕆᐊᓕᒃᓂᒃ ᐱᓇᓱᒃᑐᖅ:

• ᐱᔭᐅᒃᑲᓐᓂᕐᓗᓂ ᐊᑐᕐᑕᐅᓂᕐᓴᐅᓗᓂᓗ ᒥᕐᖑᐃᕐᓯᕐᕕᒃ ᐃᓄᒃᓄᑦ
• ᐃᓚᐅᑎᑕᐅᒃᑲᓐᓂᕐᓗᑎᒃ ᐃᓄᐃᑦ ᒥᕐᖑᐃᕐᓯᕐᕕᐅᑦ ᐊᐅᓚᑕᐅᓂᖓᓄ ᐊᕿᒃᑕᐅᔪᓄᑦ
• ᐊᖏᓕᒋᐊᕐᓗᒋᑦ ᐃᓄᐃᑦ ᐱᕚᓪᓕᐅᑎᔪᓐᓇᕐᑕᖏᑦ ᑭᓇᐅᔭᑎᒍᑦ ᐱᕕᖃᕐᓂᐅᔪᒃᑯᑦ

ᐱᓗᐊᕐᓂᖓ ᑐᕋᒐᐅᔪᖅ 2

ᐊᕿᒃᑕᐅᓗᓂ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒃᒥ ᐳᓚᕋᑎᓄᑦ ᖃᐅᔨᔭᐅᔪᓐᓇᕐᑐᑦ

ᑕᓐᓇ ᑐᕋᒐᐅᔪᖅ ᐱᔾᔪᑎᖃᕐᑐᖅ ᐱᕙᓪᓕᐊᑎᑦᑎᓂᕐᒥᒃ ᓄᑕᒥ ᐳᓚᕋᑎᓄᑦ ᖃᐅᔨᔭᐅᒧᓐᓇᕐᑐᓂᒃ ᐱᕕᖃᕐᓂᐅᔪᓐᓇᕐᑐᓂᓗ ᓯᕐᒥᓕᒃ ᒥᕐᖑᐃᕐᓯᕐᕕᒃᒥ ᐃᑲᔪᕐᑎᒋᓗᒋᑦ ᓄᓇᓕᒃ ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ ᐊᒻᒪᓗ ᐳᓚᕋᑦᑐᓕᕆᓂᖃᑦᑕᕐᑐᑦ.

ᑐᕋᒐᐅᔪᖅ ᐱᓇᓱᒃᑐᖅ ᐅᑯᓂᖓ ᓯᕗᓪᓕᐅᔭᐅᔪᒪᔪᓂᒃ:

• ᐅᓄᕐᓯᒋᐊᕐᓗᒋᑦ ᐳᓚᕆᐊᖃᕐᑕᕐᑐᑦ ᐊᒻᒪᓗ ᐃᑲᔪᕐᑕᐅᓗᑎᒃ ᐳᓚᕋᑎᑦ ᐅᐸᒐᓱᒃᑎᓪᓗᒋᑦ ᒥᕐᖑᐃᕐᓯᕐᕕᒃᒧᑦ
• ᐊᔾᔨᖏᖏᑦᑐᑦ ᐳᓚᕋᑎᑦ ᖃᐅᔨᔪᓐᓇᕐᑕᖏᑦ ᐱᕕᖃᕐᓂᐅᔪᑦ ᑐᑭᓯᒋᐊᕈᑎᒃᑯᑦ ᐊᐅᓚᑕᐅᔪᒃᑯᓪᓗ
• ᐃᒃᐱᑦᑎᐊᕐᓗᒋᑦ ᐅᒪᔪᐃᑦ ᖃᐅᔨᔭᐅᔪᑦ ᑕᑯᔭᐅᔪᒪᔪᓪᓗ ᐳᓚᕋᑎᓄᑦ
• ᐳᓚᕋᑎᑦ ᐊᑦᑕᕐᓈᕿᑦᑕᐅᓕᒪᑎᑕᐅᓗᑎᒃ
• ᐃᒃᐱᒋᑦᑎᐊᕐᓗᒋᑦ ᐃᓄᐃᑦ ᐊᖑᓇᓱᒍᓐᓄᕐᓇᖏᑦ ᐃᓕᖁᓯᕐᒥᓂᒃᓗ ᐊᑐᕐᑎᓪᓗᒋᑦ
• ᐃᑲᔪᕐᑐᕐᓗᒋᑦ ᐳᓚᕋᑦᑐᓕᕆᔨᑦ ᐱᕙᓪᓕᐊᓂᖏᑦ ᒥᑦᑎᒪᑕᓕᒃ ᐃᒃᐱᐊᕐᔪᖕᒥᓗ ᐃᑲᔪᕐᑎᒋᓗᒋᑦ ᑲᑐᔾᔨᖃᑎᒋᖑᔪᑦ

ᓄᓇᐃᑦ ᐅᐸᒍᒥᒋᔭᐅᔪᑦ

ᐱᔭᐅᓇᓱᒃᓗᓂ ᑐᕋᒐᐅᔪᖅ, ᑎᓴᒪᐃᑦ ᐅᐸᒍᒥᒋᔭᐅᔪᑦ ᓇᓗᓇᐃᕐᑕᐅᓯᒪᔪᑦ ᐱᒋᐊᕐᕕᐅᓗᑎᒃ ᐳᓚᕋᑎᓄᑦ ᖃᐅᔨᔭᐅᔪᓐᓇᕐᑐᓄᒃ ᐊᕿᒃᑕᐅᑎᓪᓗᒋᑦ, ᒪᕈᒃ ᓯᕗᓪᓕᐅᔪᒃ ᓯᕗᓪᓕᐅᓚᖑᓗᑎᒃ:

1. ᖃᐃᕐᓱᑦ ᓄᓇᖓ (ᓴᓐᓂᕈᑎᐊᓗᑦ ᕿᑭᕐᑕᖓᓂ)
   • ᓄᓇᖓ ᖃᓂᒋᔭᓂᑦᑐᖅ ᓯᓇᖓᑕ ᓯᑯᑦ ᐊᒻᒪᓗ ᐅᐸᒐᒃᓴᐅᓪᓗᓂ ᒥᑦᑎᒪᑕᓕᒃᒥᑦ
   • ᑐᑭᓯᒋᐊᕈᑎᒃᓴᐃᑦ ᐅᓂᑲᓕᐊᖑᔪᓐᓇᕐᑐᑦ ᐃᑦᑕᕐᓂᓴᕕᓂᖃᐅᕐᓂᖓᓄᑦ
   • ᐅᐸᒐᒃᓴᐅᓪᓗᓂ ᐳᓚᕋᑎᓄᑦ ᐅᒥᐊᕐᔪᐊᒃᑯᑦ
2. ᓇᑎᕐᓇᖓ ᕿᓐᓂᕐᑐᑦ (ᓴᓐᓂᕈᑎᐊᓗᑦ ᕿᑭᕐᑕᖓᓂ)
   • ᐱᓱᒃᕕᐅᔪᓐᓇᕐᑐᖅ ᐊᓱᖓᓱᖓᓄᑦ ᑕᑯᔭᕐᑐᕐᑐᓄᑦ
3. ᐃᑦᑕᕐᓂᓴᖃᕐᑐᖅ ᓄᓇᖓ 210x32 (ᑲᖏᕐᖢᕈᓗᒃᒥ ᓄᓇᖓᓂ)
   • ᐅᐸᒐᒃᓴᐅᓪᓗᓂ ᐅᒥᐊᒃᑯᑦ ᐊᐅᔭᒃᑯᑦ
   • ᑕᒃᒪᕐᕕᐅᔪᓐᓇᕐᑐᒥ ᓯᓂᒃᑕᕐᕕᒃᒥᒃ ᐊᕿᒃᑐᖃᕈᓐᓇᕐᖢᓂ ᐊᑐᕐᑕᐅᖃᑦᑕᕐᓂᐊᕐᑐᒥᒃ ᒪᒃᑯᒃᑐᓄᑦ ᐳᓚᕋᑎᓄᓪᓗ
   • ᓯᓂᒃᑕᕆᐊᕐᕕᐅᔪᓐᓇᕐᖢᓂ, ᐃᖃᓗᒐᓱᒋᐊᕐᑐᓪᓗ, ᐱᓱᒋᐊᕐᑐᕐᑐᕐᓪᓗ, ᐅᒪᔪᓂᒃᓗ ᑕᑯᔭᕐᑐᕐᑐᑦ ᐊᒻᒪᓗ ᓄᓇᖓᓂ ᑲᔾᔭᐅᓴᒋᐊᕐᑐᓄᑦ.
4. ᐊᕐᓇᑲᓪᓚᒃ (ᓇᓪᓗᐊᑕ ᓄᓇᖓᓂ)
   • ᐳᓚᕋᑎᓄᑦ ᐅᒥᐊᕐᔪᐊᒃᑯᑦ ᐅᐸᒃᑕᐅᔪᓐᓇᕐᑐᖅ ᑐᑭᓯᒋᐊᕐᕈᑎᑕᖃᕐᓗᓂᓗ
   • ᐃᑦᑕᕐᓂᓴᖃᕐᖢᓂ, ᐊᓱᖓᓱᖓᑕᖃᕐᖢᓂ ᑕᑯᔪᒥᓇᕐᑐᕐᑕᖃᐅᕐᖢᓂᓗ.

ᐅᒥᐊᕐᔪᐊᑦ ᐳᓚᕋᑎᑦ

ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᐊᒻᒪᓗ ᓄᓇᓕᖓ ᒥᑦᑎᒪᑕᓕᒃ ᓴᕿᔭᕐᑎᑦᑎᒃᒪᑕ ᐱᔭᐅᔪᓐᓇᕐᑐᓂᒃ ᐳᓚᕋᑎᓄᑦ ᐅᒥᐊᕐᔪᐊᒃᑯᑦ; ᐅᒪᔪᓂᒃᓗ ᑕᑯᔪᒪᔪᑦ ᑲᔾᔭᕐᓇᕐᑐᓂᒃᓗ, ᐃᓕᖁᓯᓕᕆᓂᒃᑯᓪᓗ ᐊᒻᒪᓗ ᐊᔾᔨᒋᖏᑦᑐᑦ ᐅᒪᔪᐃᑦ. ᓴᓇᖑᐊᕐᑎᑦ ᓴᓇᐅᒐᕐᑎᓪᓗ ᐊᔾᔨᒋᖏᑦᑐᑦ ᐱᑕᖃᐅᕐᖢᑎᒃ, ᐱᐅᓴᐅᑎᑦ, ᐊᒥᐊᒐᐃᑦ, ᒥᕐᓱᒐᐃᓪᓗ, ᐱᕕᖃᕐᕆᓪᓗᑎᒃᓗ ᐃᓄᒃᓄᑦ ᐃᓕᖁᓯᖏᓐᓂᒃᓗ ᑕᑯᓐᓇᕈᓐᓇᕐᖢᑎᒃ ᐅᓂᑲᕐᑐᐊᖏᑎᒍᓪᓗ, ᐱᖑᐊᕐᓂᒃᑯᓪᓗ, ᓴᕿᔭᕐᑎᑕᐅᓂᒃᑯᓪᓗ. ᐅᒥᐊᕐᔪᐊᒃᑯᑦ ᐳᓚᕋᑎᑦ ᐅᓄᕐᓯᒋᐊᕈᑕᐅᔪᓐᓇᕐᒪᑕ ᐳᓚᕆᐊᖃᑦᑕᕐᑐᓄᑦ ᒥᕐᖑᐃᕐᓯᕐᕕᒃᒧᑦ. ᐃᓄᖏᑦ ᓄᓇᓕᒃᓂ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ ᐃᓱᒪᓗᑎᖃᕐᓯᒪᒃᒪᑕ ᐅᒥᐊᕐᔪᐊᒃᑯᑦ ᐳᓚᕋᑎᓂᒃ. ᐃᓱᒪᓗᑕᐅᔪᑦ ᐱᔾᔪᑕᐅᓪᓗᑎᒃ, ᓄᓇᖓ ᐊᑐᐊᒐᓂᒃᓗ ᒪᓕᒃᑕᐅᔭᕆᐊᓕᒃᓂᒃ ᐅᒥᐊᕐᔪᐊᕐᒥᐅᑕᓄᑦ ᓄᓇᒧᐊᕋᓱᒃᑎᓪᓗᒋᑦ ᐊᕿᒃᑕᐅᓂᐊᕐᑐᑦ ᐅᐸᒍᒥᓇᕆᔭᐅᔪᓄᑦ 1, 2 ᐊᒻᒪ 4 ᐅᓚᓂ ᓇᓕᐊᖑᓂᖏᑦ ᐅᖃᕐᓯᒪᔪᑦ. ᐅᖃᐅᓯᐅᒃᑲᓐᓂᓚᕐᑐᖅ ᐳᓚᕋᑎᑦ ᐅᒥᐊᕐᔪᐊᒃᑯᑦ ᑕᑯᔭᕐᑐᖃᑦᑕᕐᑐᑦ ᒥᕐᖑᐃᕐᓯᕐᕕᒃᒥᒃ ᓄᓇᓕᒃ ᑕᒪᕐᒥᒃ ᖃᐅᔨᒋᐊᕐᕕᐅᓗᑎᒃ.

ᐳᓚᕋᑎᑦ ᐅᒥᐊᕐᔪᐊᑦ ᐅᐸᖃᑦᑕᕐᓂᖏᑦ ᓴᓐᓂᕈᐊᑐᑦ ᕿᑭᕐᑕᖓᓄᑦ ᑐᑭᒧᐊᒃᑎᑕᐅᖃᑦᑕᕆᐊᖃᕐᓂᐊᕐᑐᖅ ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᓄᑦ, ᕿᑭᕐᑕᖓ ᑕᕆᐅᖓᓗ ( 2 ᒪᐃᓕ ᓯᒃᔭᖓᓂᑦ) ᑎᖕᒥᐊᑯᕕᐅᓂᖓᓄᑦ. ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ ᒪᓕᒐᖏᑦ ᐊᒻᒪᓗ ᐊᐅᓚᑕᐅᓂᖓᓄᑦ ᑲᑐᔾᔨᓪᓗᑎᒃ ᐊᕿᒃᓯᓯᒪᔪᑦ ᐃᓄᐃᑦ ᐊᕐᖁᑕᐅᓪᓗᑎᒃ ᐃᓱᒪᒋᔭᐅᔭᕆᐊᖃᕐᒥᔪᑦ. ᐃᓗᓕᑲᓐᓂᖏᑦ ᐱᖃᓯᐅᑎᓯᒪᔪᑦ ᓄᓇᐃᑦ ᐊᐅᓚᑕᐅᓂᖏᑦ ᐱᒋᐊᕐᑕᐅᔪᑦ ᓴᓐᓂᕈᑎ ᕿᑭᕐᑕᖓᓂ ( ᑎᑎᕋᕐᓯᒪᔪᖅ 7.1) .

ᖃᖓᑕᓱᒃᑯᑦ ᐅᐸᖃᑦᑕᕐᓂᖏᑦ

ᓯᕐᒥᓕᒃ ᐅᐸᒐᒃᑕᐅᑦᑎᐊᖏᒻᒪᑦ ᐳᓚᕋᑎᓄᑦ. ᖃᖓᑕᓱᒃᑯᑦ ᐅᐸᒃᑕᐅᔪᓐᓴᕐᕈᓂ ᓯᕐᒥᓕᒃ ᐅᓄᕐᓯᕐᒋᐊᕈᓐᓇᕐᒪᑕ ᐳᓚᕋᑎᑦ ᑕᐃᑯᖓᕐᑐᑦ. ᖃᖓᑕᓱᒃᑯᑦ ᒥᑦᑕᕐᕕᑦ ᐃᓗᐊᓂ ᓯᕐᒥᓕᐅᑦ ᐊᖏᕐᑕᐅᓯᒪᔭᕆᐊᖃᕋᔭᕐᑐᑦ. ᐃᑲᔪᕐᑎᒋᔭᐅᓗᑎᒃ ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ ᐃᓄᐃᓪᓗ ᓄᓇᓕᒃᓂᓗ ᑲᑎᒪᔨᐅᔪᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᖃᓇᐃᔭᖃᑎᒋᒃᓗᑎᒃ ᑲᑎᖓᔪᑦ ᐊᐅᓚᓂᖓᓂᒃ ᑲᑎᒪᔨᐅᔪᑦ ᓇᓗᓇᐃᕐᓯᓗᑎᒃ ᒥᕕᐅᔪᓐᓇᕐᑐᓂᒃ. ᒥᕕᐅᔪᓐᓇᕐᑐᑦ ᒥᑭᓚᖑᔪᒃᑯᑦ ᐃᒃᐱᒃᓇᐅᑎᖃᕐᓂᐊᕐᓗᑎᒃ ᐊᕙᑎᖓᓄᑦ ᐊᒻᓗ ᐃᓕᖁᓯᓕᕆᓂᕐᒧᑦ ᐊᑐᕐᑕᐅᔪᑦ, ᐃᓄᐃᓪᓗ ᐊᖑᓇᓱᒃᓂᖏᓐᓄᑦ ᐊᓯᖏᓐᓄᓪᓗ ᒥᕐᖑᐃᕐᓯᕐᕕᒃᒥ ᐅᐸᒃᓯᒪᔪᓄᑦ, ᐅᓄᕐᓯᒋᐊᕈᑕᐅᓂᐊᕋᓗᐊᕐᑎᓪᓗᒍ ᐳᓚᕋᑎᓄᑦ ᖃᖓᑕᓱᒃᑯᕐᑐᓄᑦ ᖃᐅᔨᔪᓐᓇᕐᑕᖏᓐᓄᑦ ᐅᓪᓗᒥᑐᐃᓐᓇᖅ ᐅᕙᓗᓐᓂᑦ ᓯᓂᒃᑕᕆᐊᕐᑐᓄᑦ. ᐳᓚᕋᑎᑦ ᐊᑦᑕᕐᓇᕐᑕᐃᓕᒪᑎᑕᐅᓂᖏᑦ ᐃᓱᒪᒋᔭᐅᓪᓗᑎᒃᐊᕿᒍᑕᐅᓂᐊᕐᑐᑦ. ᒥᑦᑕᕐᕕᒃᒥᒃ ᐊᕿᒃᓯᓇᓱᒃᓂᕐᒧᑦ ᐱᔾᔪᑎᖃᔾᔨᐊᖏᑦᑐᑦ ᑭᓯᐊᓂᓕ ᓇᓗᓇᐃᕐᓯᒪᔪᖃᖁᓪᓗᒍ ᖁᓕᒥᒍᒃᑯᑦ ᐅᕙᓗᓐᓂᑦ ᖃᖓᑕᓱᒃᑯᑦ ᒥᕕᐅᔪᓐᓇᕋᔭᕐᑐᑦ ᒥᕕᐅᖃᑦᑕᕐᓯᒪᔪᓪᓗ. ᓯᓚᑕᓂᑦᑐᑦ ᒥᕕᐅᖃᑦᑕᕐᓯᒪᔪᑦ ᐃᓄᐃᑦ ᓄᓇᖁᑎᖏᓐᓂ ᐃᓱᒪᒋᔭᐅᖃᓯᐅᑎᓂᐊᕐᑐᑦ, ᐅᖃᓪᓚᖃᑎᒋᔭᐅᓗᑎᒃ ᐃᓄᐃᑦ ᑲᑐᔨᖃᑎᒋᖏᑦ. ᐃᓄᖏᑦ ᓄᓇᓕᒃᓂᑦᑐᑦ ᓇᓗᓇᐃᕐᓯᓯᒪᔪᑦ ᒪᕈᒃᓂᒃ ᒥᕕᐅᖃᑦᑕᕐᓂᑯᔪᓂᒃ.

ᖃᖓᑕᓱᑦ ᖃᖓᑕᖃᑦᑕᕐᓂᖏᑦ ᐳᕐᑐᓇᖃᑦᑕᕐᓂᖏᓪᓗ ᒪᓕᒃᓯᒪᓂᐊᕐᑐᑦ ᐊᕿᒃᑕᐅᔪᓄᑦ (ᐊᕙᑎᓕᕆᓂᕐᒧᑦ ᐃᒃᐱᒃᓇᐅᑎᔪᑦ ᕿᒥᕈᔨᑦ ᑲᑎᒪᔨᖏᓐᓄᑦ, 2004). ᐃᓕᓐᓂᐊᕐᑎᑕᐅᓂᖏᑦ ᐊᒻᒪᓗ ᖃᐅᔨᒪᑎᑕᐅᓂᖏᑦ ᐳᓚᖃᑎᑦ ᐊᒻᒪᓗ ᖃᖓᑕᓱᖃᕐᑎᐅᔪᑦ ᐊᑐᕐᑕᐅᓗᑎᒃ ᐱᔭᕆᐊᖃᕐᑐᓂᒃ ᖃᐅᔨᒪᑎᑕᐅᓂᐊᕐᒪᑕ.

ᐱᓗᐊᕐᓂᖓ ᑐᕋᒐᐅᔪᖅ 3

ᖃᐅᔨᒪᔭᐅᓂᖓ ᐅᔾᔨᕆᔭᐅᓂᖓᓗ ᐊᖏᕐᓕᒋᐊᕐᓗᒍ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒥᒃ

ᑕᓐᓇ ᑐᕋᒐᐅᔪᖅ ᐊᖏᓕᒋᐊᖁᓪᓗᒍ ᖃᐅᔨᒪᔭᐅᓂᖓ ᒥᕐᖑᐃᕐᓯᕐᕕᒃ, ᓴᐳᔾᔭᐅᓯᒪᓂᖓ ᐊᕙᑎᖓ ᐊᒻᒪᓗ ᐃᓄᐃ ᐃᓕᖁᓯᓕᕆᓂᒃᑯᑦ, ᐊᒻᒪᓗ ᐊᒃᑐᐊᓂᖏᑦ ᑲᓇᑕᒥᐅᑦ ᓯᕐᖑᐃᕐᓯᕐᑯᒃᒧᑦ. ᑐᕋᒐᐅᔪᖅ ᓴᕿᔭᕐᓂᐊᕐᑐᖅ ᒪᓕᒃᓗᒋᑦ ᐃᑲᔪᕐᑎᒋᒃᓂᖏᑦ. ᒥᕐᖑᐃᕐᓯᕕᓕᕆᔨᒃᑯᑦ ᑲᓇᑕᒥ ᐃᑲᔪᕐᑎᒋᒃᑐᑦ ᐃᖃᓴᐃᔭᖃᑎᒋᒃᓗᑎᒃ ᓄᓇᓕᖏᓐᓂ ᒥᑦᑕᒪᑕᓕᒃ ᐃᒃᐱᐊᕐᔪᒃᓗ, ᐃᓕᓐᓂᐊᕐᕕᒃᔪᐊᓪᓗ, ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ, ᕿᑭᕐᑕᕐᓂ ᐃᓄᐃᑦ ᑲᑐᔨᔾᔨᖃᑎᒋᖏᑦ ᐊᒻᒪᓗ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᑎᒍᒥᐊᕐᑎᑦ ᐊᓯᖏᓪᓗ. ᐅᔾᔨᕆᔭᐅᓕᒃᑲᓐᓂᕐᓗᓂ ᒥᕐᖑᐃᕐᓯᕐᕕᒃ ᐃᑲᔪᕐᑎᒋᒃᑐᓄᑦ, ᐳᓚᕋᑎᐅᔪᓐᓇᕐᑐᓄᑦ ᐊᒻᒪᓗ ᐃᓄᑐᐃᓐᓇᕐᓄᑦ.

ᑐᕋᒐᐅᔪᖅ ᐅᑯᓂᖓ ᓯᕗᓪᓕᐅᑎᑕᐅᔪᓂᒃ ᐱᑎᑦᑎᓂᐊᕐᐳᖅ:

• ᑭᓱᑕᖃᕐᓂᖓᓂᒃ ᑎᑎᕋᕐᑕᐅᓗᑎᒃ ᖃᐃᔨᓴᕐᑕᐅᕙᓪᓕᐊᖏᓐᓇᕐᓗᓂᓗ ᐊᕙᑎᖓ ᐃᑦᑕᕐᓂᓴᖃᕐᕕᐅᔪᓪᓗ ᐅᓂᑲᕐᑐᐊᖑᔪᓪᓗ ᐃᓄᒃᑎᑐᓪᓗ ᐊᑎᖃᕐᑎᑕᐅᓂᖏᑦ ᓄᓇᐃᑦ.
• ᑲᔪᓯᓗᑎᒃ ᑲᑎᑕᐅᕙᓪᓕᐊᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑦ ᐅᖃᐅᓯᐅᔪᑦ.
• ᓇᓗᓇᐃᕐᑕᐅᓗᑎᑎᒃ ᐊᒻᒪᓗ ᖃᐅᔨᒋᐊᕐᑕᐅᓗᑎᒃ ᖃᓄᑎᒋ ᐊᒃᑐᐊᓂᖃᕐᑎᒋᒃᒪᖓᑕ ᐃᑦᑕᕐᓂᓴᕕᓂᑦ
• ᐱᐅᓯᒋᐊᕐᓗᒋᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᓴᕿᔭᕐᓂᖏᑦ ᓄᓇᓕᒃᓂ ᒥᑦᑎᒪᑕᓕᒃ ᐃᒃᐱᐊᕐᔪᖕᒥᓗ ᖃᓄᐃᓕᐅᕐᑎᑦᑎᖃᑦᑕᕐᓗᑎᒃ ᒥᕐᖑᐃᕐᓯᕐᕕᒃᒥ ᒪᒃᑯᒃᑐᓂᒃ.
• ᐃᑲᔪᖃᑦᑕᕐᓗᑎᒃ ᑐᓴᐅᒪᔭᐅᔭᕆᐊᓕᒃᓂᒃ ᖃᐅᔨᓴᕐᑎᐅᔪᑦ ᓄᓇᓕᓪᓗ
• ᐊᕿᒃᓯᓗᑎᒃ ᑐᓴᐅᒪᔾᔪᑕᐅᓂᐊᕐᑐᓂᒃ ᐃᓕᓐᓂᐊᕈᑕᐅᓂᐊᕐᑐᓂᒃᓗ ᐊᐅᓚᑕᐅᓂᐊᕐᑐᓂᒃᓗ ᒥᕐᖑᐃᕐᓯᕐᑯᓕᕆᓂᕐᒧᑦ ᑲᓇᑕᒥᐅᑕᐅᔪᓄᑦ, ᑭᓯᐊᓂ ᐱᓗᐊᕐᑐᒥᒃ ᐃᓄᖏᑦ ᒥᑦᑎᒪᑕᓕᒃᒥ ᐃᒃᐱᐊᕐᔪᖕᒥᓗ, ᐊᑐᖃᑦᑕᕐᓗᑎᒃ ᒥᕐᖑᐃᕐᓯᕐᕕᓕᕆᔨᒃᑯᑦ ᖃᕋᓴᐅᔭᒃᑯᑦ ᓴᕿᔭᕐᑎᑕᖏᓐᓂᒃ

7.0 ᓄᓇᖏᑦ ᐊᐅᓚᑕᐅᔪᑦ

7.1 ᓴᓐᓂᕈᑎᐅᑦ ᕿᑭᕐᑕᖓ

ᓄᓇᖓ ᐳᕐᑐᔪᑎᓂᒃ ᐱᖑᖃᐅᕐᖢᓂ, ᓯᑯᐃᑦ ᓂᓚᐃᓪᓗ, ᓯᕕᖓᔪᑦ ᐃᓐᓴᕈᐃᑦ, ᐊᐳᑎ ᓇᑎᕐᓇᖅ ᐊᒻᒪᓗ ᓯᕐᒥᑦ, ᓴᓐᓂᕈᑎᐅᑦ ᕿᑭᕐᑕᖓ ᐃᕙᕕᐅᖃᑦᑕᕐᑐᖅ ᐅᓄᕐᑐᓂᒃ ᑎᖕᒥᐊᓂᒃ ᑕᕆᐅᕐᒥᐅᑕᓂᒃ ᐱᖃᓯᐅᑎᓪᓗᒋᑦ ᐊᒃᐸᐃᑦ ᐊᒻᒪᓗ ᐱᑦᑎᐅᓛᑦ. ᑕᕆᐅ ᖃᓂᒋᔭᖓ ᓂᕿᒃᓴᖃᕐᒪᑦ ᑎᖕᓯᐊᓄᑦ. ᓂᒋᐊᓂ ᐊᑭᓐᓇᖓᓂ ᓴᓐᓂᕈᑎᐅᑦ ᕿᑭᕐᑕᖓᑕ, ᓇᑎᕐᓇᖃᐅᕐᖢᓂ ᐃᕙᕕᑦᑎᐊᕙᐅᓪᓗᓂᓗ, ᓂᔾᕙᒃᐸᒃᑐᓄᑦ, ᓯᒃᔭᕐᒥᐅᑕᐅᔪᓄᑦ ᐊᒻᒪᓗ ᐃᒪᕐᒥᐅᑕᐅᔪᓄᑦ. ᓴᓐᓂᕈᑎᐅᑦ ᕿᑭᕐᑕᖓ ᐊᖏᓚᖑᖃᑕᐅᔪᓂᒃ ᐃᕙᕕᐅᒃᒪᑦ ᑲᖑᕐᓄᑦ ᑲᓇᑕᒥ ᐅᑭᐅᕐᑕᕐᑐᓕᒪᖓᓂ. ᑲᑎᓪᓗᒋᑦ 74 ᐅᑭᐅᕐᑕᕐᑐᒥᖃᑦᑕᕐᑐᑦ ᑎᖕᒥᐊᑦ ᕿᑭᕐᑕᕐᒥᑦᑐᑦ.

ᓄᓇᖓ ᐊᐅᓚᑕᐅᓂᖓ ᐱᒋᐊᕈᑎᖃᓚᐅᕐᑐᖅ ᓴᓐᓂᕈᑎᐅᑦ ᕿᑭᕐᑕᖓ ᐅᑯᓂᖓ ᐱᔾᔪᑎᖃᕐᖢᑎᒃ:

• ᑎᖕᒥᐊᒃᑯᕕᐅᓂᖓᓄᑦ ᓇᓗᓇᐃᕐᑕᐅᓯᒪᓪᓗᓂ;
• ᑐᑭᓯᐅᒪᖃᑎᒋᓐᓂᕐᒧᑦ ᐊᖏᑎᖃᒋᒃᓯᒪᔪᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ ᓄᓇᖓᓂᒃ;
• ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕚᓪᓕᐅᑎᓄᑦ ᐊᖏᖃᑎᒋᒍᑎ ᐱᖃᓯᐅᔾᔨᓯᒪᓪᓗᓂ ᑎᖕᒥᐊᖃᕐᕕᐅᔪᒥᒃ ᒥᕐᖑᐃᕐᓯᕐᕕᓕᒪᕐᓗ;
• ᐃᑲᔪᕐᑎᒋᒃᖢᑎᒃ ᐊᐅᓚᑕᐅᓂᖓᓄᑦ ᑲᑎᒪᔨᑦ ᐱᔭᕆᐊᖃᕐᑐᑦ ᐊᕿᒃᑕᐅᓗᑎᒃ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐱᕚᓪᓕᐅᑎᓂᕐᒧᓪᓗ ᐊᖏᖃᑎᒋᒍᑎ ᒪᓕᒃᓗᒋᑦ, ᐱᖃᓯᐅᑎᓗᒍ ᓯᕐᒥᓕᒃ ᒥᕐᖑᐃᕐᓯᕐᕕᒃᒥ ᑲᑎᖓᓪᓗᑎᒃ ᐊᐅᓚᓂᖓᓄᑦ ᑲᑎᒪᔨᐅᔪᑦ;
• ᐅᓄᕐᒪᑕ ᐃᑦᑕᕐᓂᓴᖃᕐᑐᑦ ᓄᓇᐃᑦ;
• ᖃᐅᔨᓴᕐᕕᒃᓄᑦ ᐊᑐᕐᑕᐅᔪᓐᓇᕐᑐᓂᒃ ᐱᑕᖃᕐᒪᑦ ᐊᒻᒪᓗ ᐃᓂᒋᔭᐅᓪᓗᓂ ᐊᑯᓂᐅᔪᒧᑦ ᖃᐅᔨᓴᕐᑎᓄᑦ ᐊᐅᓚᑕᐅᔪᓄᓪᓗ; ᐊᒻᒪᓗ
• ᐅᐸᒍᒥᒋᔭᐅᓪᓗᓂ ᐅᒥᐊᕐᔪᐊᒃᑯᑦ ᐳᓚᕋᑎᑦ ᐊᓯᖏᓪᓗ ᐳᓚᕋᑎᑦ ᖃᓂᒋᔭᓂᓐᓂᖓᓄᑦ ᒥᑦᑎᒪᑕᓕᒃᒥ.

ᐱᔾᔪᑎᖃᕐᑐᖅ ᐊᕝᓄᓇᖓ ᐊᐅᓚᑕᐅᓂᖓᓄᑦ ᓴᓐᓂᕈᑎᐅᑦ ᕿᑭᕐᑕᖓᓂ ᐃᑲᔪᑎᒋᒃᖢᑎᒃ ᑲᓇᑕᒥ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ ᐊᕙᑎᓕᕆᔨᒃᑯᑦ ᑲᓇᑕᒥ ᐊᒻᒪᓗ ᕿᑭᕐᑕᓂ ᐃᓄᐃᑦ ᑲᑐᔨᖃᑎᒋᖏᑦ, ᑲᔪᓯᑎᑦᑎᓇᓱᒃᖢᑎᒃ ᑕᒪᕐᒥᒃ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᐅᒪᔪᓕᕆᓂᕐᒧᑦ ᑲᓇᑕᒥ ᐱᔨᓯᕐᑎᑦ ᒪᓕᒐᖏᓐᓂᒃ ᐊᑐᐊᒐᖏᓐᓂᒃ ᐊᐅᓚᔾᔪᑕᐅᔪᓂᒃᓗ ᐃᒃᐱᒋᔭᐅᑦᑎᐊᕋᓱᒃᖢᑎᒃ ᐊᖏᕈᑕᐅᓯᒪᔪᑦ ᐊᐅᔪᐃᑦᑐᖅ, ᖁᑦᑎᒃᓂᒃᐹᖅ ᐊᒻᒪᓗ ᓯᕐᒥᓕᒃ ᒥᕐᖑᐃᕐᓯᕐᕕᒃᓄᑦ ᐊᒻᒪᓗ ᐊᖏᕈᑕᐅᓯᒪᔪᑦ ᑲᓇᑕᒥ ᐅᒪᔪᖃᕐᕕᐅᔪᑦ ᐊᒻᒪᓗ ᑎᖕᒥᐊᖃᕐᕕᐅᔪᑦ ᓄᓇᕗᑦ ᓄᓇᖓᓂ ᐊᒻᒪᓗ ᐊᑐᐊᒐᐃᑦ ᑐᑭᓯᐅᒪᖃᑎᒋᒃᓂᕐᒧᑦ ᐊᖏᖃᑎᒋᒍᑕᐅᓯᒪᔪᑦ.

8.0 ᑭᒃᓕᓕᐅᕐᓯᒪᔪᑦ

ᑭᒃᓕᓕᐅᕐᓯᒪᔪᑦ ᐊᑐᕐᑕᐅᔪᑦ

ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑭᒃᓕᓕᐅᕐᓯᒪᔪᑦ ᐊᑐᕐᑕᐅᔪᑦ ᓇᓗᓇᐃᕐᓯᓯᒪᔪᑦ ᑭᒃᓕᓕᐅᕐᓯᒪᔭᐅᔪᑦ ᓄᓇᐃᑦ ᐃᒥᓪᓗ ᒥᕐᖑᐃᕐᓯᕐᕕᐅᑦ ᐃᓗᐊᓂᑦᑐᑦ. ᑭᒃᓕᓕᐅᕐᓯᒪᔪᑦ ᓇᓗᓇᐃᕐᓯᓯᒪᔪᑦ ᒥᕐᖑᐃᕐᓯᕐᕕᒃᒥ ᒪᓕᒃᓗᒋᑦ ᐊᕙᑎᖓ ᐃᑦᑕᕐᓂᓴᐃᓪᓗ ᓴᐳᑎᔭᐅᓯᒪᖁᓪᓗᒋᑦ ᐊᒻᒪᓗ ᐳᓚᕋᑎᑦ ᖃᓄᐃᓕᐅᕐᓂᖏᑦ ᓇᒻᒪᒃᑐᒃᑯᑦ ᒪᓕᒃᓯᒪᓗᑎᒃᓗ ᐊᑐᖃᑦᑕᕐᓗᑎᒃ. ᑭᒃᓕᓕᐅᕐᓯᒪᔪᑦ ᑕᓪᓕᒪᐅᔪᑦ ᐅᑯᐊ:

ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᑯᒃ ᐃᓗᓕᖃᕐᑐᖅ ᐱᖓᓱᓂᒃ ᑭᒃᓕᓕᐅᕐᓯᒪᔪᓂᒃ 1, 2 ᐊᒻᒪᓗ 3.

ᓄᓇᕗᑦ ᓄᓇᖓ ᐱᒋᔭᐅᓕᕐᓂᖓᓄᑦ ᐊᖏᖃᑎᒋᒍᑎᑦ ᐱᔭᕆᐊᖃᕐᑎᑦᑎᒃᒪᑕ ᑲᓇᑕᒥ ᒥᕐᖑᐃᕐᓯᕐᕕᑦ ᓄᓇᕗᑦᒥ ᐃᓗᓕᖃᕐᑐᑦ ᑭᒃᓕᓕᐅᕐᓯᒪᔪᑦ 1 ᐊᒻᒪᓗ 2. ᑭᒃᓕᓕᐅᕐᓯᒪᔪᑦ ᐱᔪᓐᓇᕐᑎᑦᑎᑕᐃᓕᒪᖏᑦᑐᑦ ᓄᓇᒥᑦ ᐱᓇᓱᒃᑕᐅᔪᓄᑦ ᐊᒻᒪᓗ ᐊᖑᓇᓱᒃᑕᐅᔪᓄᑦ ᐃᓄᒃᓄᑦ ᒪᓕᒃᓗᒋᑦ ᓄᓴᕗᕐᑕᕈᑎ ᐊᖏᖃᑎᒋᒍᑎᑦ.

ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕙᓪᓕᐅᑎᔪᓄᑦ ᐊᖏᖃᑎᖏᒍᑎ ᐊᒧᐃᑦᑐᖅ, ᖁᒃᑎᒃᓂᕐᐸᖅ ᐊᒻᒪᓗ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᐱᔭᕆᐊᖃᕐᑎᑦᑎᒃᒪᑦ ᒪᕈᒃᓂᒃ ᐃᓗᐊᓂ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒥ ᓇᓗᓇᐃᕐᑕᐅᓗᑎᒃ ᐃᓄᒃᓄᑦ ᐱᓪᓚᕆᐅᒋᔭᐅᔪᓂᒃ ᐅᐸᒃᑕᐅᔪᓐᓇᖏᓪᓗᑎᒃᓗ ᐳᓚᕋᑎᓄᑦ, ᐊᒻᒪᓗ ᐅᖃᕐᓯᒪᓗᑎᒃ ᐊᐅᓚᑕᐅᓂᖓᓄᑦ ᐸᕐᓇᐅᑎᑦ ᓇᓗᓇᐃᕐᓯᓗᑎᒃ ᐳᓚᕋᑎᑦ ᐅᐸᒍᓐᓇᕐᑕᖏᓐᓂᒃ ᐱᔾᔪᑎᖃᕐᓗᓂ ᐊᑦᑕᕐᓇᕐᑕᐃᓕᒪᓂᕐᒧᑦ.

ᓄᓇᓕᑦ ᐃᒃᐱᐊᕐᔪᒃ ᒥᑦᑎᒪᑕᓕᒃᓗ ᐃᓱᒪᓗᑎᖃᕐᒪᑎᒃ ᖃᓄᐃᓕᐅᕐᑕᐅᖃᑦᑕᕐᑐᓂᒃ ᐊᖑᓇᓱᒃᑎᓪᓗᒋᑦ ᐃᒃᐱᒃᓇᐅᑎᒐᔭᕐᑐᓂᒃ ᐊᒻᒪᓗ ᐃᓕᖁᓯᕐᒥᓂᒃ ᐊᑐᕐᑎᓪᓗᒋᑦ ᒥᕐᖑᐃᕐᓯᕐᕕᒃᒥ. ᐱᓪᓚᕆᐅᕗᖅ ᐳᓚᕋᑎᑦ ᐅᐸᒃᑕᐃᓕᒪᔭᕆᐊᖃᕐᓗᑎᒃ ᐃᓄᐃᑦ ᐅᐸᒃᓯᒪᔭᖏᓐᓂᒃ ᐊᖑᓇᓱᒃᑎᓪᓗᒋᑦ ᐃᓕᖁᓯᕐᒥᓂᒃᓗᓐᓂᑦ ᐊᑐᕐᑎᓪᓗᒋᑦ. ᐃᓚᖏᑦ ᓇᓗᓇᐃᕐᑕᐃᓯᒪᔪᑦ ᑭᒃᓕᓕᐅᕐᓯᒪᔪᒃᑯᑦ ᐸᕐᓇᐅᑎᖏᓐᓂ.

ᓇᓄᕐᓄᑦ ᑎᓯᖃᕐᕕᐅᔪᑦ ᐃᒃᐱᒃᓂᓴᖃᐃᒻᒪᑕ. ᐊᐅᓚᑕᐅᓂᖏᑦ ᖃᓄᕐᑐᕈᑕᐅᔭᕆᐊᓕᑦ, ᐱᖃᓯᐅᑎᓗᒍ ᖃᖓᒃᑯᖓᓂᖓ ᓇᓄᐃᑦ ᐊᓂᕙᓪᓕᐊᓕᕐᑎᓪᓗᒋᑦ ᑎᓯᒥᒃᓂᒃ ᐊᑎᕐᑕᖃᐅᕐᑐᓪᓗ.

ᑭᒃᓕᓕᐅᕐᓯᒪᔪᖅ 1 - ᐱᑕᖃᐃᓐᓇᕐᑎᑕᐅᓇᓱᒃᑐᑦ

ᑭᒃᓕᓕᐅᕐᓯᒪᔪᖅ 1 ᓄᓇᐃᑦ ᓴᐳᔾᔭᐅᓯᒪᔭᕆᐊᓕᑦ ᐱᔾᔪᑎᒋᓪᓗᒍ ᐊᔾᔨᐅᖏᑦᑐᒥᒃ ᐃᓗᓕᖃᕐᓂᖏᓐᓄᑦ ᐅᕙᓗᓐᓂᑦ ᐊᑦᑕᕐᓇᕐᑐᒥᑦᑐᓂᒃ ᐃᔨᓕᖁᓯᕐᓱᕐᑐᑦ ᐃᑦᑕᕐᓂᓴᖃᕐᑐᓪᓗᓐᓂᑦ, ᐅᕙᓗᓐᓂᑦ ᐊᔾᔨᐅᖏᑦᑐᓗᑎᒃ ᓄᓇᖓ ᒥᕐᖑᐃᕐᓯᕐᕕᒃᒥ. ᐃᖏᕋᔾᔪᑎᒃᑯᑦ ᐅᐸᒃᑕᐅᔭᕆᐊᖃᖏᑦᑐᑦ, ᑭᓯᐊᓂ ᖃᐅᔨᓴᕐᑕᐅᓯᒪᓪᒪᕆᒃᓗᑎᒃ ᖃᐅᔨᓴᕐᓂᕐᒧᑦ ᐊᒻᒪᓗ ᒥᕐᖑᐃᕐᓯᕐᕕᓕᕆᔨᒃᑯᑦ ᐊᐅᒪᓂᖓᓂ ᐊᖏᕐᑕᐅᓯᒪᓗᑎᒃ ᒥᕐᖑᐃᕐᓯᕐᕕᓕᕆᔨᒃᑯᓐᓄᑦ ᑲᓇᑕᒥ.

ᐅᑯᐊ ᓇᓗᓇᐃᕐᑕᐅᓯᒪᔪᑦ ᑭᒃᓕᓕᐅᕐᑕᐅᓯᒪᔪᑦ 1:

1. ᐃᑦᑕᕐᓂᓴᕐᑕᖃᕐᑐᑦ

   ᐊᑐᓂ ᑭᒃᓕᓕᐅᕐᓯᒪᔪᑦ 1 ᐊᖏᓂᖃᕐᑐᒥᒃ 1 ᑭᓚᒥᑕ ᐊᒃᒪᓗᕐᓯᓗᒍ ᕿᑎᐊᓂ ᓄᓇᖓᑕ. ᑭᓱᑕᖃᕐᒪᖓᑕ ᐊᑐᓂ, ᐱᓪᓚᕆᐅᔾᔪᑎᒋᔭᖓ, ᐊᒻᒪᓗ ᖃᓄᕐ ᐃᒃᐃᒋᔭᐅᑦᑎᐊᕆᐊᖃᕐᒪᖓᑕ ᐅᖃᐅᓯᐅᓯᒪᓂᐊᕐᑐᑦ ᒥᕐᖑᐃᕐᓯᕐᕕᒧᐊᕐᑐᓄᑦ ( ᐱᖃᓯᐅᑎᓗᒋᑦ ᐊᐅᓪᓚᐅᔨᔨᑦ, ᖃᐅᔨᓴᕐᑎᑦ ᐊᒻᒪᓗ ᐊᔾᔨᓕᐅᕆᔨᑦ) ᑕᐃᑯᖓᕈᒪᔪᑦ ᐅᕙᓗᓐᓂᑦ ᖃᓂᒋᔭᓄᐊᕈᒪᔪᑦ. ᐅᐸᒃᑕᐅᓂᐊᕋᖓ ᑭᒃᓕᓕᐅᕐᓯᒪᔪᑦ 1, ᒥᕐᖑᐃᕐᓯᕐᕕᒃᒧᑦ ᑕᑯᔭᕐᑐᕐᓯᒪᔪᑦ ᐃᕙᕆᐊᖃᕐᑐᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᐃᖃᓴᐃᔭᕐᑎᖏᓐᓂᒃ ᒪᓕᒃᑕᐅᓗᑎᒃ ᐅᕙᓗᓐᓂᑦ ᐃᓕᓐᓂᐊᕐᑎᑕᐅᓯᒪᔪᒥᒃ ᐊᐅᓚᐅᔾᔨᔨᒥᒃ ᒪᓕᒃᑕᐅᓗᑎᒃ. ᐊᖏᓂᖓ 1 ᐊᖕᒪᓗᕐᓯᓗᒍ ᐱᖃᓯᐅᔾᔨᓯᒪᖏᑦᑐᖅ ᐃᒪᕐᓂᒃ ᐅᓕᑦᑕᕐᓂᖓᑕ ᐅᖓᑕᓂᑦ, ᐅᒥᐊᑦ ᓯᑭᑐᓪᓗᓐᓂᑦ ᐅᐸᒍᑎᒧᓐᓇᕐᓗᑎᒃ ᑕᕆᐅᕐᒥᑦ, ᑐᖓᓂᑐᐊᕈᑎᒃ ᐅᓕᑦᑕᕐᓂᖓᑕ ᑭᒃᓕᖓᓂᑦ.

   14 ᓄᓇᐃᑦ ᑭᒃᓕᓕᐅᕐᓯᒪᖁᔭᐅᔪᑦ 1 ᐅᑯᐊᖑᔪᑦ:

   • ᐅᒥᐊᕐᔪᐊᕕᓂᕐᑕᓕᒃ :ᐅᒥᐊᕐᔪᐊᕕᓂᖅ ᑕᑯᔭᐅᔪᓐᓇᕐᑐᖅ” (ᓄᓇᖓ 210X3)
   • ᕿᕐᓂᕐᑐᑦ, “ᕿᕐᓂᕐᑕᖅ (ᐊᑕᐅᓯᐅᖏᑦᑐᖅ)”
   • ᑭᒡᒐᕕᐊᓚᓕᒃ, “ ᒥᑭᑦᑐᑦ ᑭᒡᒐᕕᐊᕐᑕᓕᒃ” (ᓄᓇᖓ 210X10)
   • ᖃᐃᕐᓱᑦ : “ᖃᐃᕐᓱᐃᑦ” (ᓄᓇᖓ 210X47 ᐊᒻᒪᓗ 210X48)
   • ᑲᐸᕈᕐᑕᓕᒃ ,”ᐃᓗᕕᕐᖃᕕᖓ ᑲᐸᕈᖅ” (ᓄᓇᖓsite 201X13)
   • ᓯᑯᔾᔨᕕᒃ, “ ᕿᒪᓗᒐᐃᑦ ᓯᒃᑯᔾᔭᐅᕕᕕᓂᐊ ᐅᑭᐊᒃᓴᒃᑯᑦ” (ᓄᓇᖓ 210X12)
   • ᑎᑎᕋᕐᓕᒃ, “ ᑎᑎᕋᕐᓯᒪᔪᕐᑕᓕᒃ” (ᓄᓇᖓ 210X17)
   • ᐊᕐᓇᑲᓪᓚᒃ (ᓄᓇᖓ 210X22)
   • ᓯᓂᒃᑕᕐᕕᒃ ᐃᓄᒃᓱᒐᖃᕐᑐᖅ 20−30 ᖃᖏᕐᓗᕈᓗᒃᒥ ᓄᓇᖓᓂ (ᓄᓇᖓ 210X32)
   • ᐃᓗᓕᖃᐅᕈᓗᔭᕐᑐᖅ ᓴᓐᓂᕈᑦ ᕿᑭᕐᑕᖓᓂ (ᓄᓇᖓ 210X43)
   • ᓯᓇᓯᐅᕐᕕᒃ, “ᓯᓇᖓ ᐱᒋᐊᕕᖓ” (ᓄᓇᖓ 210X59)
   • ᖃᕐᒪᕐᔪᐃᑦ ᓄᕗᐊᕐᔪᐊ, ᒥᕐᖑᐃᕐᓯᕐᕕᐅᑦ ᐃᓗᐊᓂ
   • ᐅᒥᐊᕐᔪᐊᕕᓂᖅ ᓇᓪᓗᑕ ᐃᓚᖓᓂ (ᓄᓇᖓ ᖃᓂᒋᔭᓂ 210X57). ᖃᐅᔨᓴᕐᑕᐅᒃᑲᓐᓂᕆᐊᓕᒃ ᐃᑦᑕᕐᓂᓴᕐ ᓇᒥᓪᒪᕆᒃᒪᖓᑦ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑎᑎᕋᖁᑎᖏᓐᓂ ᐅᒥᐊᕐᔪᐊᕕᓂᕐᑕᖃᕐᓂᕋᐃᓯᒪᖏᒻᒪᑕ.
   • ᐃᓗᕕᕐᑕᓕᒃ ᓯᓇᓯᐅᕐᕕᐅᑦ ᑲᖏᕐᖢᐊᓂ

   ᐳᓚᕋᑎᑦ ᐅᐸᒍᑎᔪᑦ ᐅᒥᐊᕐᔪᐊᕕᓂᕐᑕᓕᒃᒧᑦ ᐊᒻᒪᓗ ᐃᕐᓂᕐᑐᑦ ᐅᐸᒋᐊᖃᖏᑦᑐᑦ ᔪᓚᐃ 1-ᒥᑦ ᓯᑎᐱᕆ 30−ᒧᑦ, ᐃᓄᖏᑦ ᒥᑦᑎᒪᑕᓕᒃᒥᐅᑦ ᑕᐃᑲᓂᑎᓪᓗᒋᑦ. ᑕᒃᑯᐊᒃ ᒪᕈᒃ ᓇᓗᓇᐃᕐᑕᐅᓯᒪᔪᒃ ᐱᓪᓚᕆᐅᓂᖏᓐᓂᒃ ᐃᓄᒃᓄᑦ, ᐱᔭᕆᖃᕐᓂᖓ ᒪᓕᒃᖢᒍ ᐃᓄᒃᓄᑦ ᐃᒃᐱᒃᓇᐅᑎᔪᑦ ᐱᕚᓪᓕᐅᑎᔪᓄᓪᓗ ᐊᖏᖃᑎᒋᒍᑎᓂ.

2. ᑎᖕᒥᐊ ᐃᓂᒋᔭᖏᑦ
   1. ᑕᕆᐅᕐᒥᐅᑦ ᑎᖕᒥᐊᑦ ᐃᓂᒋᔭᖓ, ᐅᐊᖕᓇᖓᓂ ᐊᑭᓐᓇᕐᐸᓯᐊᓂ ᓴᓐᓂᕈᑎᐅᑦ ᕿᑭᕐᑕᖓᓂ ᐊᒻᒪᓗ ᖃᖁᓗᐃᑦ ᓄᓇᖓᓂ ᓯᓇᓯᐅᕐᕕᐅᑦ ᖃᓂᒋᔭᓂ
      • ᑭᒃᓕᓕᐅᕐᓯᒪᔪᖅ 1 ᐊᖏᓂᖃᕐᑐᖅ 2 ᑭᓚᒥᑕ ᓴᓂᒧᑦ ᖃᓄᐃᓕᐅᕐᕕᐅᒍᓂ, ᓱᕐᓗ ᓴᓇᕕᐅᒍᓂ, ᓯᓂᒃᑕᕐᕕᐅᒍᓂ, ᐅᕙᓗᓐᓂᑦ ᐊᓯᖏᑦ ᖃᓄᐃᓕᐅᕐᑐᑦ ᐃᒃᐱᒃᓇᐅᑎᖁᓇᒋᑦ ᑎᖕᒥᐊᓄᑦ.
      • ᓯᑯᖃᕈᓐᓂᕋᖓᑦ, ᐳᓚᕋᑎᑦ ᑕᑯᔭᕐᑐᕈᓐᓇᕋᔭᕐᑐᑦ ᐅᒥᐊᒃᑯᑦ ᑭᓯᐊᓂ, ᐊᒻᒪᓗ ᐃᒃᐱᒋᔭᐅᑦᑎᐊᕐᓗᑎᒃ ᒪᓕᒐᐃᑦ ᐱᖁᔭᐃᓪᓗ ᐅᕙᓗᓐᓂᑦ ᐊᑐᖁᔭᐅᔪᑦ ᐅᒪᔪᓕᕆᔨᒃᑯᑦ ᑲᓇᑕᒥ ᐱᔨᓯᕐᑎᑦᓂᑦ, ᐱᖃᓯᐅᑎᓗᒋᑦ ᐊᖏᕐᑕᐅᓯᒪᔭᕆᐊᖃᕐᓂᖓ ᐅᒪᔪᓕᕆᓂᕐᒧᑦ ᐱᔨᓯᕐᑎᑦ ᖃᓄᐃᓕᐅᕐᑐᖃᕐᓂᐊᕐᑎᓪᓗᒍ ᓴᓐᓂᕈᑎᐅᑦ ᕿᑭᕐᑕᖓᓂ ᑎᖕᒥᐊᖃᕐᕕᐅᔪᒥ.
      • ᓄᓇᒥ ᖃᓄᐃᓕᐅᕐᑐᑦ, ᓯᓂᒃᑕᕐᑐᓪᓗᓐᓂᑦ ᐊᖏᕐᑕᐅᔪᓐᓇᖏᑦᑐᑦ ᐃᓗᐊᓂ ᑭᒃᓕᓕᐅᕐᓯᒪᔪᑦ 1 ᑎᖕᒥᐊᖃᕐᕕᐅᔪᑦ.
      • ᑲᓇᑕᒥ ᐅᒪᔪᓕᕆᔨᒃᑯᑦ ᐱᔨᓯᕐᑎᑦ ᐊᑐᐊᒐᖏᑦ ᑎᖕᒥᐊᓄᑦ ᑕᑯᔭᐅᔪᒪᒃᐸᑕ ᒪᓕᒃᑕᐅᔭᕆᐊᖃᕐᑐᑦ ᓯᕐᒥᓕᒃ ᒥᕐᖑᐃᕐᓯᕐᕕᒃᒥ.
   2. ᑲᖑᖃᕐᓂᖓ ᓂᒋᐊᓂ ᐊᑭᓐᓇᕐᐸᓯᐊᓂ ᓇᑎᕐᓇᖓᑕ ᓴᓐᓂᕈᑎ ᕿᑭᕐᑕᖓᓂ − ᐊᐅᔭᐅᓕᕋᖓᑦ
      • ᓴᐳᔾᔭᐅᓯᒪᓇᓱᒃᓗᑎᒃ ᒪᓐᓂᓕᐅᕐᑎᓪᓗᒋᑦ ᐃᕙᑎᓪᓗᒋᑦ, ᑕᓐᓇ ᑭᒃᓕᓕᐅᕐᓯᒪᔪᖅ 1 (ᓄᓇᖑᐊᒥ 7) ᐊᑐᕐᑕᐅᖃᑦᑕᕐᓂᐊᕐᐳᖅ ᑲᖑᐃᑦ ᐃᕙᑎᓪᓗᒋᑦ (ᒪᐃ1-ᒥᑦ ᐊᒋᓯ 31-ᒧᑦ). ᐅᓪᓗᖏᑦ ᐊᓯᓪᓕᑐᐃᓐᓇᕆᐊᓕᑦ ᖃᐅᔨᓴᕐᑎᓪᓗᒋᑦ ᑐᑭᓯᔭᐅᒍᓂ ᑎᑭᓐᓂᖏᑦ ᐊᒻᒪᓗ ᐃᕙᓂᖏᑦ ᐊᓯᓪᓕᕈᑎᒃ.
      • ᖃᐅᔨᓴᕐᑐᑦ ᐅᐃᒪᓴᕐᑕᐅᖁᓇᒋᑦ, ᐳᓚᕋᑎᓪᓗ ᐊᐅᓪᓚᐅᔨᓯᒪᔪᓪᓗ ᐅᐸᒍᑎᔭᕆᐊᖃᖏᑦᑐᑦ ᐊᐅᔭᒃᑯᑦ ᖃᐅᔨᓴᕐᑎᓪᓗᒋᑦ, ᐊᑯᓐᓂᖓᓂ ᒪᐃ 1 ᐊᒻᒪᓗ ᐊᒋᓯ 31.
3. ᐃᒪᕐᓱᓂᖓ ᐊᒻᒪᓗ ᐃᑦᑕᕐᓂᓴᐃᑦ ᓂᒋᕐᐸᓯᐊᓂ ᓇᓪᓗᐊᑕ ᓄᓇᖓᓂ
   • ᐱᓪᓚᕆᐅᔾᔪᑎᖓ ᐃᑦᑕᕐᓂᓴᕐᑕᖃᕐᓂᖓᓄᑦ ᑲᖑᖃᕐᓂᖓᓄᓪᓗ.
4. ᐊᓱᖓᓱᖔᑦ
   • ᒪᕈᒃᒪᑎᒃ ᓴᕿᔭᕐᑐᒃ ᐊᓱᖓᓱᖓᓕᒃ ᓯᕐᒥᓕᐅᑦ ᒥᕐᖑᐃᕐᓯᕐᕕᑦ ᐃᓗᐊᓂ, ᐱᖃᑕ ᓇᓪᓗᐊᑕ ᓄᓇᖓᓂ ᐱᖃᑕᓗ ᓴᓐᓂᕈᑎᐅᑦ ᕿᑭᕐᑕᖓᓂ.
5. ᐅᔭᕋᖕᖑᕐᓯᒪᔪᑦ ᖃᓂᒋᔭᓂᑦᑐᑦ ᕿᕐᓂᕐᑐᑦ
   • ᓇᐸᕐᑐᕕᓂᑦ ᖃᓂᒋᔭᓂ ᕿᕐᓂᕐᑐᑦ, ᓴᓐᓂᕈᑎᑦ ᕿᑭᕐᑕᖓᓂ.

ᑭᒃᓕᓕᐅᕐᓯᒪᔪᖅ 2 - ᐅᒪᔪᖃᕐᓂᖓ

ᑭᒃᓕᓕᐅᕐᓯᒪᔪᖅ 2 ᐃᓗᓕᖃᕐᑐᖅ ᐊᖏᓇᕐᓯᒪᓪᓗᓂ ᓄᓇᒥᑦᑐᖅ ᐅᒪᔪᓄᓪᓗ ᐃᓂᒋᔭᐅᔪᖅ. ᐊᕙᑎᖓ ᐃᓄᒃᓄᑦ ᓱᕋᒃᑕᐅᑕᐃᓕᒪᓗᓂ ᑐᕋᒐᖃᕐᓂᕐᓴᐅᓪᓗᓂ. ᑭᒃᓕᓕᐅᕐᓯᒪᔪᖅ 2 ᐱᕕᖃᕐᑎᑦᑎᔪᖅ ᐳᓚᕋᑎᓂᒃ ᖃᐅᔨᔪᓐᓇᕐᓗᑎᒃ ᓇᒃᒥᓂᕐ ᑐᑯᓗᑎᒃ ᒥᕐᖑᐃᕐᓯᕐᕕᐅᑦ ᐊᕙᑕᓂ ᐊᒻᒪᓗ ᐱᔨᓯᕋᕐᓂᒃᑯᑦ ᐱᖁᑎᒃᑯᓪᓗᓐᓂᑦ ᐱᑕ ᖃᓗᐊᖏᒃᑲᓗᐊᕐᓗᓂ. ᐊᖏᓂᕐᓴᐅᔪᒥ ᑭᒃᓕᓕᐅᕐᓯᒪᔪᒥ 2, ᐳᓚᕋᑎᑦ ᐱᕕᖃᕈᓐᓇᕐᑐᑦ ᖃᐅᔨᔪᓐᓇᕐᓗᑎᒃ ᐃᓄᖃᖏᑦᑐᒥᑐᒥ. ᐃᖏᕋᔾᔪᑎ ᐊᐅᓚᐅᑎᓕᑦ ᐅᐸᒃᑕᐅᔭᕆᐊᖃᖏᑦᑐᖅ ᑭᓯᐊᓂ ᖃᐅᔨᓴᕐᑕᐅᓯᒪᑦᑎᐊᕐᓗᓂ ᖃᐅᔨᓴᕐᑎᓄᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᐊᐅᓚᑕᖏᓐᓄᑦ ᑐᓴᐅᒪᑎᑦᑎᓂᕐᒧᓪᓗ ᖃᐅᔨᒪᑎᑦᑎᓂᕐᒧᓪᓗ ᒥᕐᖑᐃᕐᓯᕐᕕᒃᒧᑦ ᐊᖏᕐᑕᐅᓯᒪᓗᑎᒃ ᒥᕐᖑᐃᕐᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᐊᒻᒪᓗ ᒪᓕᒃᓯᒪᓗᓂ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐱᖁ.ᖏᓐᓂ ᒪᓕᒐᖏᓐᓂᒃᓗ.

ᑭᒃᓕᓕᐅᕐᓯᒪᔪᑦ 2 ᒥᕐᖑᐃᕐᓯᕐᕕᒃᓂ ᐃᓗᓕᖃᕐᑐᖅ ᑕᒪᕐᒥᒃ ᐃᓗᐊᓂᑦᑐᑦ ᒥᕐᖑᐃᕐᓯᕐᕕᒃᒥ ᓇᓗᓇᐃᕐᑕᐅᓯᒪᖏᑦᑐᑦ ᑭᒃᓕᓕᐅᕐᓯᒪᓂᖏᓐᓂᒃ 1 ᐊᒻᒪ 3.

ᐃᓄᖏᑦ ᐃᒃᐱᐊᕐᔪᒃ ᒥᑦᑎᒪᑕᓕᒃᒥᓗ ᐊᑐᖁᔨᓯᒪᔪᑦ ᐳᓚᕋᑎᑦ ᒪᓕᒃᑕᐅᖃᑦᑕᕐᓗᑎᒃ ᐊᐅᓚᐅᔨᔨᒧᑦ ᒥᕐᖑᐃᕐᓯᕐᕕᒃᒧᐊᓕᕋᖓᑕ, ᐊᑦᑕᕐᓇᖏᑦᑐᒥᖁᓪᓗᒋᑦ ᐊᒻᒪᓗ ᐃᒃᐱᒍᓱᑦᑎᐊᖁᓪᓗᒋᑦ ᐃᓄᐃᑦ ᐊᖑᓇᓱᒃᓂᖏᓐᓂᒃ ᐃᓕᖁᓯᕐᒥᓂᒃᓗ ᐊᑐᕐᑎᓪᓗᒋᑦ. ᐊᕿᒃᓱᕐᑕᐅᑎᓪᓗᒍ ᐸᕐᓇᐅᑎ, ᐊᐅᓚᐅᔾᔨᔨᑦ ᐅᓄᖏᓗᐊᓚᐅᕐᒪᑕ ᐱᔨᓯᕐᑐᑦ ᐃᒃᐱᐊᕐᔪᖕᒥᑦ ᒥᑦᑎᒪᑕᓕᒃᒥᓪᓗ ᐳᓚᕋᑎᓄᑦ. ᐳᓚᕋᑎᑦ ᐊᑐᖃᑦᑕᖁᔭᐅᓂᐊᕐᑐᑦ ᐊᐅᓪᓚᐅᔨᔨᓂᒃ.

ᑭᒃᓕᓕᐅᕐᓯᒪᔪᖅ 3 - ᐃᓕᖁᓯᕐᓱᕐᑐᖅ ᓄᓇᖓ ᐊᕙᑎᖓ

ᑭᒃᓕᓕᐅᕐᓯᒪᔪᖅ 3 , ᐳᓚᕋᑎᑦ ᖃᐅᔨᔪᓐᓇᕐᑐᑦ ᒥᕐᖑᐃᕐᓯᕐᕕᑦ ᖃᓄᐃᓕᖓᒃᒪᖓᑦ ᐃᓕᖁᓯᕐᓱᕐᑎᓪᓗᒍ ᐃᑦᑕᕐᓂᓴᖃᕐᕕᐅᔪᓪᓗ ᐅᐸᒃᑕᐅᕙᒃᓗᓂ ᖃᓄᐃᓕᐅᕐᕕᐅᓗᓂᓗ ᐱᔨᓯᕋᕐᑕᐅᔭᕆᐊᓕᑦ ᐱᖁᑎᖃᐅᕐᓗᓂᓗ. ᖃᐅᔨᒪᔭᐅᓗᑎᒃ ᐅᐸᒃᑕᐅᔭᕆᐊᓕᒃ, ᐃᖏᕋᔾᔪᑎᒃᑯᕐᓂᐊᕈᑎᒃ.

ᐅᑯᐊᖑᔪᑦ ᓇᓗᓇᐃᕐᑕᐅᓯᒪᔪᑦ ᑭᒃᓕᓕᐅᕐᓯᒪᔪᑦ 3:

1. ᓂᒋᐊᓂ ᐊᑭᓐᓇᕐᐸᓯᐊᓂ ᓴᓐᓂᕈᑎᐅᑦ ᕿᑭᕐᑕᖓᓂ: ᐃᒃᓕᓂᕆᔭᐅᔪᓐᓇᕐᑐᖅ ᐊᐅᓚᐅᔨᔨᓄᑦ ᐳᓚᕋᑎᑦ ᑕᑯᔭᕐᑐᕐᑎᑕᐅᓗᑎᒃ ᒥᑦᑎᒪᑕᓕᒃᒥᑦ ᓯᑭᑐᒃᑯᑦ, ᓯᑭᑐᕐᓇᕐᑎᓪᓗᒍ
   ᐊᕋᒍ ᐃᓗᐊᓂ ᑭᒃᓕᓕᐅᕐᓯᒪᔪᖅ 3 ᓯᑭᑐᕐᕕᐅᔪᓐᓇᕐᑐᖅ ᐅᑭᐅᒃᑯᑦ. ᑭᒃᓕᓕᐅᕐᓯᒪᔪᖅ ᐊᑐᕐᑕᐅᓂᐊᕐᑐᖅ ᐊᐳᑎᖃᓕᕋᖓᑦ ᑭᓯᐊᓂ ᑲᖑᖃᓕᕐᐸᑦ ᐃᔭᓯᒋᐊᕐᐸᑕ (ᐊᑐᓯᒋᐊᕋᔭᕐᖢᓂ ᑭᒃᓕᓕᐅᕐᓯᒪᔪᖅ 1 ᑲᖑᐃᑦ ᐃᕙᓕᕐᑎᓪᓗᒋᑦ).
2. ᓂᒋᐊᓂ ᐊᑭᓐᓇᕐᐸᓯᐊᓂ ᓴᓐᓂᕈᑎᐅᑦ ᕿᑭᕐᑕᖓᓂ: ᑲᖑᓕᕆᕕᒃ 1 ᐊᒻᒪᓗ 2
   ᐃᖏᕋᔾᔪᑎᑦ ᐊᐅᓚᐅᑎᓕᑦ ᐳᓚᕋᑎᓄᑦ, ᑐᓴᐅᒪᑎᑦᑎᔨᓄᑦ ᐅᕙᓗᓐᓂᑦ ᐊᓯᖏᓐᓄᑦ ᑕᐃᑯᖓᐅᓇᓱᒃᑐᓄᑦ ᐊᖏᕐᑕᐅᓯᒪᔭᕆᐊᖃᕐᑐᑦ ᐊᖏᕐᑎᐅᔪᓄᑦ ᑲᖑᓕᕆᕕᒃᒧᑦ ᐊᒻᒪᓗ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᖃᐅᔨᓴᕐᓂᖅ ᖃᐅᔨᒪᓇᓱᒃᓂᕐᓗ ᐱᓕᕆᐊᖑᔪᖅ ᑲᔪᓯᑦᑎᐊᖁᓪᓗᒍ ᐊᒻᒪᓗ ᐊᕙᑎᖓ ᓱᕋᒃᑕᐅᖁᓴᒍ ᐃᒃᐱᒋᔭᐅᑦᑎᐊᕐᓗᓂᓗ.
3. ᐃᒃᓕᓂᖓ ᐃᒃᐱᐊᕐᔪᖕᒥ ᒥᑦᑎᒪᑕᓕᒃᒧᑦ ᒪᓕᒃᓗᒍ ᑯᖓ ᒪᓚ, ᓇᓪᓗᐊᑕ ᓄᓇᖓᒍᑦ
   ᐃᒃᓕᓂᐅᔪᖅ ᓇᓗᓇᐃᕐᑕᐅᓯᒪᔪᖅ ᐊᕐᖁᑕᐅᔪᓐᓴᕐᓂᖓᓂᒃ ᐊᐅᓚᐅᔭᐅᓯᒪᔪᒧᑦ ᓯᑭᑐᒃᑯᑦ ᒥᕐᖑᐃᕐᓯᕐᕕᓕᐊᕐᑐᓄᑦ.
4. ᐊᓯᖏᑦ ᐃᒃᓕᓂᐅᔪᑦ ᓇᓪᓗᐊᑕ ᓄᓇᖓᓂ
   ᐳᓚᕋᑎᑦ ᐊᑐᕈᓐᓇᕐᑎᑕᐅᔪᑦ ᐃᒃᓕᓂᕐᒥᒃ ᓯᑭᑐᒃᑯᑦ ᐊᐅᓚᐅᔭᐅᓯᒪᓗᑎᒃ, ᑭᓯᐊᓂ ᐅᐸᒃᑕᐅᑦᑕᐃᓕᒪᓗᑎᒃ ᐃᓄᐃᑦ ᐊᖑᓇᓱᒃᑐᑦ ᐃᓕᖁᓯᕐᒥᓂᒃᓗ ᐊᑐᕐᑎᓪᓗᒋᑦ. ᐳᓚᕋᑎᑦ ᖃᐅᔨᔪᓐᓇᕐᑐᑦ ᐃᓚᖓᓂ ᒥᕐᖑᐃᕐᓯᕐᕕᒃᒥ ᐊᐅᓚᐅᔾᔭᐅᓯᒪᓗᑎᒃ ᐱᓪᒪᕆᐅᒋᔭᐅᔪᑦ ᐃᓄᒃᓄᑦ (ᐊᑕᓂᑦᑐᖅ ᑕᑯᓗᒍ). ᑎᓴᒪᓕᒃᑯᑦ ᐃᖏᕋᔭᕆᐊᖃᖏᑦᑐᑦ ᒥᕐᖑᐃᕐᓯᕐᕕᐅᑦ ᐃᓗᐊᓂ.

8.2 ᓄᓇᐃᑦ ᐱᓪᓚᕆᐅᒋᔭᐅᔪᑦ ᐃᓄᒃᓄᑦ

ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕚᓪᓕᐅᑎᔪᓄᑦ ᐊᖏᖃᑎᒋᒍᑎᑦ ᐊᐅᔪᐃᑦᑐᖅ, ᖁᑦᑎᒃᓂᕐᐸᖅ ᐊᒻᒪᓗ ᓯᕐᒥᓕᒃ ᒥᕐᖑᐃᕐᓯᕐᕕᒃᓄᑦ ᐱᔭᕆᐊᖃᕐᑎᑦᑎᒪᑕ ᐊᐅᓚᑕᐅᓂᖓᓄᑦ ᐸᕐᓇᐅᑎᑦ ᓯᕐᒥᓕᒃ ᒥᕐᖑᐃᕐᓯᕐᕕᒃᒧᑦ ᐱᖃᓯᐅᑎᓗᒍ ᖃᓄᐃᑕᐅᔭᕆᐊᓕᑦ ᐱᓪᓚᕆᐅᒋᔭᐅᔪᓪᓗ ᐃᓄᒃᓄᑦ ᐃᒃᐱᒋᔭᐅᓗᑎᒃ ᐳᓚᕋᑎᓄᑦ ᐅᐸᒃᑕᐅᔭᕆᐊᖃᖏᓪᓗᑎᒃ ᐊᔪᕐᑎᑕᐅᓗᑎᒃᓗᓐᓂᑦ, ᐃᓚᓐᓂᒃᑯᑦ ᑕᐃᒪᖓᓕᒪᕐᓗᓐᓂᑦ. ᕿᕐᓂᕐᑐᑦ ᐊᒻᒪᓗ ᐅᒥᐊᕐᔪᐊᕕᓂᕐᑕᓕᒃ ᐱᔭᕆᐊᖃᕐᑐᑦ ᐊᖏᖃᑎᒋᒍᑎᒥ ᐱᖃᓯᐅᑎᓯᒪᓗᑎᒃ ᐊᐅᓚᓂᖓᓄᑦ ᐸᕐᓇᐅᑎᓂ ᐱᓪᓚᕆᐅᓂᖏᓐᓂᒃ ᐃᓄᒃᓄᑦ. ᐊᓯᖏᑦ ᐱᓪᓚᕆᐅᒋᔭᐅᔪᑦ ᐱᖃᓯᐅᔾᔭᐅᔪᓐᓇᕐᑐᑦ ᐊᐅᓚᓂᖓᑕ ᐸᕐᓇᐅᑎᖏᓐᓂ.

1. ᐅᒥᐊᕐᔪᐊᕕᓂᕐᑕᓕᒃ ᓄᓇᖓᓂ Maud Bight
   ᑖᓐᓇ ᓄᓇ ᓇᓗᓇᐃᕐᑕᐅᓯᒪᔪᖅ ᑭᒃᓕᓕᐅᕐᑕᐅᓯᒪᓂᖓᓂᒃ 1. ᐃᓗᓕᖏᑦ ᐊᐅᓚᓂᖓᑕ ᐸᕐᓇᐅᑎᑦ ᑕᑯᔭᐅᔪᓐᓇᕐᑐᑦ ᑭᒃᓕᓕᐅᕐᓯᒪᔪᑦ 1 ᐅᓂᑲᖏᓐᓂ.
2. ᕿᕐᓂᕐᑐᑦ
   ᑖᓐᓇ ᓄᓇ ᓇᓗᓇᐃᕐᑕᐅᓯᒪᔪᖅ ᑭᒃᓕᓕᐅᕐᓯᒪᓂᖓᓂᒃ 1. ᐃᓗᓕᖏᑦ ᐊᐅᓚᓂᖓᑕ ᐸᕐᓇᐅᑎᑦ ᑕᑯᔭᐅᔪᓐᓇᕐᑐᑦ ᑭᒃᓕᓕᐅᕐᓯᒪᔪᑦ 1 ᐅᓂᑲᖏᓐᓂ. .
3. ᓴᓐᓂᕈᑎ ᕿᑭᕐᑕᖓᓂ − ᑲᖑᕐᓄᑦ ᐃᕙᕕᐅᔪᑦ ᓯᒃᔭᕐᐸᓯᐊᓂ ᓂᒋᐊᓂ ᐊᑭᓐᓇᕐᐸᓯᐊᓂ ᓴᓐᓂᕈᑎᐅᑦ ᕿᑭᕐᑕᖓᓂ
   ᑕᓐᓇ ᓄᓇ ᒪᑐᓯᒪᖃᑦᑕᓂᐊᕐᑐᖅ ᐳᓚᕋᑎᓄᑦ ᐱᓇᓱᕈᓯᒃᓄᑦ ᒪᕈᒃᓄᑦ ᔪᓂᒥ ᒪᓂᒃᑕᓕᕋᖓᑕ. ᐅᓪᓗᓪᓚᑦᑕᖏᑦ ᒪᓕᒃᓯᒪᓂᐊᕐᑐᑦ ᖃᖓᒃᑯᑦ ᐃᕙᓕᕐᒪᖓᑕ. ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ ᐊᓯᓪᓕᔾᔪᑕᐅᒃᒪᑦ ᖃᖓᒃᑯᑦ ᐃᕙᖃᑦᑕᕐᓂᖏᑦ. ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᖃᓇᐃᔭᖃᑎᖃᕐᓗᑎᒃ ᒥᑦᑎᒪᑕᓕᒃᒥ ᐅᒪᔪᓕᕆᔨᒃᑯᑦ ᑲᑎᒪᔨᖏᓐᓂᒃ ᐅᐱᖓᑕᒪᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᖃᐅᔨᒪᑎᑦᑎᕙᒃᓗᑎᒃ ᖃᖓᑕ ᒪᓐᓂᒃᑕᕐᓂᐊᕐᒪᖓᑕ.
4. ᓯᒃᔭᖓᓂ ᓂᒋᐊᓂ ᐊᑭᓐᓇᕐᐸᓯᐊᓂ ᓯᓇᓯᐅᕐᕕᒃᒥ
   ᐱᓪᓚᕆᐅᒃᒪ ᐃᓄᒃᓄᑦ ᐊᖑᓇᓱᒃᑎᓪᓗᒋᑦ ᓯᓇᖓᓂ ᐅᐱᖓᒃᑯᑦ. ᓯᒃᔭᖓ ᐊᒃᑐᐊᒃᒪᑦ ᐊᑯᓕᐊᖃᑦᑕᐅᑦ ᐃᒪᖓᓄᑦ. ᒪᑐᓯᒪᖃᑦᑕᕐᓂᐊᕐᑐᖅ ᔪᓂ 16−ᒥᑦ ᔪᓚᐃ 31-ᒧᑦ.
5. ᓇᓪᓗᐊᑕ ᓄᓇᖓᓂ − ᕿᑎᐊᓂ ᓄᓇᐃᓐᓇᕐᒥ
   ᑕᓐᓇ ᓄᓇ ᓇᓪᓗᐊᑕ ᓄᓇᖓᓂ ᑎᕙᓯᒃᑐᒥ ᐱᓪᓚᕆᐅᒃᒪᑦ ᑐᒃᑐᓄᑦ ᐃᕐᓂᐅᕐᕕᐅᓂᖓᓄᑦ ᑐᑐᒐᓱᒃᕕᐅᓪᓗᓂᓗ ᒪᑐᓯᒪᖃᑦᑕᕐᓗᓂ ᐳᓚᕋᑎᓄᑦ ᔪᓂ 1−ᒥᑦ ᐊᒋᓯ 31−ᒧᑦ. ᐊᕋᒍ ᐃᓗᐊᓂ ᐊᓯᖏᑦ, ᐳᓚᕋᑎᑦ ᑕᒪᐅᖓᕐᓂᐊᕈᑎᒃ ᐊᐅᓪᓚᐅᔭᐅᓯᒪᓗᑎᒃ ᐃᓄᐃᓪᓗ ᐊᖑᓇᓱᒃᑐᑦ ᐅᐸᒃᑕᐅᑦᑕᐅᓕᒪᓗᑎᒃ ᐃᓕᖁᓯᕐᒥᓂᒃᓗ ᐊᑐᕐᑎᓪᓗᒋᑦ. ᓯᑭᑐᒃᑯᑦ ᐅᐸᒐᒃᓴᐅᔪᖅ ᐊᐅᓚᐅᔾᔭᐅᓯᒪᓗᓂ. ᓄᓇᖓ ᒪᑐᓯᒪᑐᐃᓐᓇᕆᐊᓕᒃ ᐳᓚᕋᑎᑦ ᐃᒃᐱᒃᓇᐅᑎᓕᕐᐸᑕ ᑐᒃᑐᓄᑦ ᐃᕐᓂᐅᕐᐸᓪᓕᐊᔪᓄᑦ ᐊᖑᓇᓱᒃᑐᓄᓪᓗᓐᓂᑦ.
6. ᒫᓚ ᑯᖓ ᓇᕐᓴᖓ Mala River Valley
   ᐊᑯᓂᖓᓂ ᔪᓂ 1 ᐊᒻᒪᓗ ᐊᒋᓯ 31, ᒫᓚ ᑯᖓ ᓇᕐᓴᖓ ᓇᑎᕐᓇᖅ ᒪᑐᐃᖓᖃᑦᑕᕐᓗᓂ ᐃᖏᕋᔾᔪᑎᒃᑯᖏᑦᑐᓄᑦ. ᐳᓚᕋᑎᑦ ᒫᓚ ᑯᖓᓄᑦ ᐊᐅᓪᓚᐅᔨᔨᖃᕐᓗᑎᒃ ᐊᒻᒪᓗ ᐃᓄᐃᑦ ᐊᖑᓇᓱᒃᑎᓪᓗᒋᑦ ᐃᓕᖁᓯᕐᒥᓂᒃᓗ ᐊᑐᕐᑎᓪᓗᒋᑦ. ᓄᓇ ᒪᑐᓯᒪᑐᐃᓐᓇᕆᐊᓕᒃ ᐳᓚᕋᑎᑦ ᐃᒃᐱᒃᓇᐅᑎᖃᕐᐸᑕ ᑐᒃᑐᓄᑦ ᐃᕐᓂᐅᕐᑎᓪᓗᒋᓪᓗᓐᓂᑦ ᐊᖑᓇᓱᒃᑎᓪᓗᒋᓪᓗᓐᓂᑦ.
7. ᑲᖏᖢᕈᓗᒃ Oliver Sound
   ᑕᓐᓇ ᐊᕗᕐᕕᐅᖃᑦᑕᕐᒪᑦ ᑭᒍᑕᖏᕐᓇᑦ ᐸᐅᖓᓂᒃᓗᓐᓂᑦ ᑐᒃᑐᒐᓱᒃᕕᐅᓪᓗᓂᓗ. ᐳᓚᕋᑎᑦ ᐅᐸᒍᓐᓇᕐᑐᑦ ᐅᒥᐊᒃᑯᑦ, ᑭᓯᐊᓂ ᓱᑲᓴᖏᓪᓗᑎᒃ ᑕᕆᐅᕐᒥᐅᑕᐃᑦ ᐳᐃᔨᑦ ᐅᐃᒪᓴᕐᑕᐃᓕᒪᓗᒋᑦ.
8. ᑕᓐᓇ ᐱᔭᐅᔪᒪᔪᑦ ᐱᓪᓚᕆᐅᓂᖓᓄᑦ ᐃᓄᒃᓄᑦ
   ᐊᓯᖏᑦ ᐱᔭᐅᔪᒪᔪᑦ ᐱᓪᓚᕆᐅᓂᖏᓐᓂᒃ ᐃᓄᒃᓄᑦ ᐅᖃᐅᓯᐅᓯᒪᔪᑦ ᑲᑎᒪᑎᑕᐅᑲᑕᒃᑎᓪᓗᒋᑦ ᐃᓄᐃᑦ.
   
   
   • ᓇᓪᓗᐊᑕ ᓄᓇᖓᓂ: ᐃᖃᓗᒐᓱᒃᕕᐅᖃᑦᑕᕐᓂᖓᓄᑦ ᓄᓇᖓ 210X 50
   • ᓇᓪᓗᐊᑕ ᓄᓇᖓᓂ: ᐱᓪᓚᕆᐅᒃᒪᑦ ᑐᒃᑐᒐᓱᒃᕕᐅᓪᓗᓂ ᓂᒋᐊᓂ ᐊᕿᐊᕈᕐᓇᕐᒥ
   • ᓴᓐᕈᑎᐅᑦ ᕿᑭᕐᑕᖓᓂ: ᐱᓪᓚᕆᐅᔪᖅ ᑐᒃᑐᒐᓱᒃᕕᐅᒃᒪᑦ ᖃᓂᒋᔭᓂ Cape Walter Bathurst
   • ᓴᓐᕈᑎᐅᑦ ᕿᑭᕐᑕᖓᓂ: ᐱᓪᓚᕆᐅᔪᖅ ᑐᒃᑐᒐᓱᒃᕕᐅᓂᖓᓄᑦ ᖃᓂᒋᔭᓂ Cape Byan Martin ᐊᒻᒪᓗ Bathurst Bay
   • ᓴᓐᕈᑎᐅᑦ ᕿᑭᕐᑕᖓᓂ:ᐱᓪᓚᕆᐅᔪᖅ ᑐᒃᑐᒐᓱᒃᕕᐅᓂᖓᓄᑦ ᖃᓂᒋᔭᓂ Canada
   • ᓴᓐᕈᑎᐅᑦ ᕿᑭᕐᑕᖓᓂ: ᓯᒃᔭᖓ ᓇᓐᓄᒐᓱᒃᕕᐅᒃᒪᑦ ᖃᓂᒋᔭᓂ ᑲᐸᕈᕐᑕᓕᒃ ᐊᒻᒪ ᓇᕐᓴᕐᓱᒃ ᓯᕐᒥᒃ
   
   
   
ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᖃᓇᐃᔭᖃᑎᖃᐃᓐᓇᕐᓂᐊᕐᑐᑦ ᓄᓇᓕᒃᓂᒃ ᑐᑭᓯᔭᐅᒃᑲᓐᓂᕋᓱᒃᓗᑎᒃ ᖃᓄᕐ ᐃᓄᐃᑦ ᐊᐅᓚᑦᑎᔪᒪᒃᒪᖓᑕ ᑕᒃᑯᓂᖓ.

ᐊᔪᓕᕐᑎᑕᐅᓯᒪᒃᐸᑕ ᐳᓚᕋᑎᑦ ᐱᓪᓚᕆᐅᔪᑦ ᐃᓄᒃᓄᑦ ᓇᓗᓇᐃᕐᑕᐅᓯᒪᓂᐊᕐᑐᑦ ᖃᐅᔨᒋᐊᕐᑎᑦᑎᓯᒪᓗᑎᒃ ᑲᑎᖓᓪᓗᑎᒃ ᐊᐅᓚᓂᖓᓂᒃ ᑲᑎᒪᔨᐅᔪᓂᒃ.
9. ᓄᓇᓕᕋᓚᕆᔭᐅᔪᑦ ᐃᒃᓗᕋᓚᕆᔭᐅᔪᓪᓗ
   ᐳᓚᕋᑎᑦ ᐅᐸᒋᐊᖃᖏᑦᑐᑦ ᐅᖓᓯᒃᓂᓕᒃᒥ 1 ᑭᒪᒥᑕ ᐃᒃᓗᕋᓚᓂᑦ ᓄᓇᓕᕋᓚᓂᒃᓗᓐᓂᑦ. ᑕᒃᑯᐊ ᓄᓇᐃᑦ ᒪᑐᓯᒪᖃᑦᑕᕐᓂᐊᕐᑐᑦ ᐅᖃᐅᓯᐅᒐᖓᑕ ᐊᖓᔪᕐᖃᒻᒪᕆᐊᓄᑦ.

ᐳᓚᕋᑎᑦ ᐊᑦᑕᕐᓇᕐᑕᐃᓕᒪᓂᕐᒧᑦ ᐅᐸᒍᓐᓇᖏᑕᖏᑦ ᒪᑐᔭᐅᓯᒪᔪᓪᓗ

ᐃᓄᒃᓄᑦ ᐃᒃᐱᒃᓇᐅᑎᔪᑦ ᐊᒻᒪᓗ ᐱᕚᓪᓕᐅᑎᔪᓄᑦ ᐊᖏᖃᑎᒋᒍᑎᑦ ᐊᐅᔪᐃᑦᑐᖅ, ᖁᑦᑎᒃᓂᕐᐸᖅ ᐊᒻᒪᓗ ᓯᕐᒥᓕᒃ ᒥᕐᖑᐃᕐᓯᕐᑯᑦ ᐅᖃᕐᓯᒪᒃᒪᑦ ᐳᓚᕋᑎᑦ ᐅᐸᒋᐊᖃᖏᓪᓗᑎᒃ ᐊᔪᕐᑎᑕᐅᓗᑎᒃᓗᓐᓂᑦ ᐊᑕᐅᓯᕐ ᐊᑕᐅᓯᐅᖏᑦᑐᕐᓗᓐᓂᑦ ᒥᕐᖑᐃᕐᓯᕐᕕᒃᒥ ᐊᕋᒍ ᐃᓗᐊᓂ ᐊᑦᑕᕐᓇᕐᑕᐃᓕᒪᓂᕐᒧᑦ ᐱᔾᔪᑎᒋᓪᓗᒍ. ᓇᓗᓇᐃᕐᑕᐃᓯᒪᔭᕆᐊᖃᕐᓗᑎᒃᓗ ᑕᐃᒪᐃᑦᑐᓂᖏᓐᓂᒃ ᐊᐅᓚᓂᖓᓄᑦ ᐸᕐᓇᐅᑎᐅᔪᓂ, ᐊᒻᒪᓗ ᓇᓗᓇᐃᕐᑕᐅᓯᒪᖏᑉᐸᑕ, ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᖏᑦ ᐊᒻᒪᓗ ᑲᑎᖓᓪᓗᑎᒃ ᐊᐅᓚᓂᖓᓄᑦ ᑲᑎᒪᔨᐅᔪᑦ ᐊᐱᕆᔭᐅᒐᔭᕐᑐᑦ ᐊᑐᓕᕐᑎᑕᐅᓚᐅᖏᓐᓂᖓᓂ ᐊᔪᓕᕐᓯᒪᔾᔪᑕᐅᔪᑦ.

1. ᑲᖏᕐᖢᕈᓗᒃ
   ᑐᐊᓂᖓᓄᑦ ᐊᔭᓂᑭᓐᓂᖓᓄᑦ ᑲᖏᕐᖢᖓ ᐃᖃᖓᓗ ᖃᐅᔨᒪᓇᖏᓗᐊᕐᓂᖓᓄᑦ ᑲᖏᕐᖢᕈᓗᒃ ᐊᖏᔪᓄᑦ ᐅᒥᐊᕐᔪᐊᓄᑦ ᐅᐸᒃᑕᐅᔭᕆᐊᖃᖏᑦᑐᖅ.
2. ᓴᓐᓂᕈᑎ ᕿᑭᕐᑕᖓᓂ ᓯᕐᒥᑦ
   ᓯᑭᑐᒃᑯᑦ ᐃᖏᕋᔭᕆᐊᖓ ᐅᓗᕆᐊᓇᕐᒪᑦ ᐊᑦᑕᕐᓇᕐᖢᓂᓗ. ᑕᒃᑯᐊ ᐱᔾᒧᑎᒋᓪᓗᒋᑦ ᐳᓚᕋᑎᑦ ᓯᑭᑐᑯᕆᐊᖃᖏᑦᑐᑦ ᐊᐅᓚᐅᔭᐅᓯᒪᒐᓗᐊᕈᑎᒃᓗᓐᓂᑦ .
3. ᓇᓄᖃᕐᓂᖏᑦ
   ᓇᓄᖃᕐᓂᖃᐅᕐᓂᖓᓄᑦ ᐃᓚᖓ ᓯᒃᔭᖓᓗᓐᓂᑦ ᓴᓐᓂᕈᑦ ᕿᑭᕐᑕᖓᓂ ᐊᒻᒪᓗ ᓇᓪᓗᐊᑕ ᓄᓇᖓᓂ. ᐳᓚᕋᑎᑦ ᐊᐅᔭᒃᑯᑦ ᐅᐸᖃᑦᑕᕆᐊᖃᖏᑦᑐᑦ.

8.4 ᐃᖃᓗᒐᓱᒃᓂᖅ ᐳᓚᕋᑎᓄᑦ

ᐃᖃᓗᒐᓱᒍᒪᔪᑦ ᓄᓇᕗᕐᑕᖃᑕᐅᓯᒪᖏᑦᑐᓄᑦ ᐊᖏᕐᑕᐅᓇᓱᒍᓐᓇᕐᑐᑦ ᐊᖓᔪᖃᒻᒪᕆᐊᓄᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᖃᓗᒐᓱᑎᒥᒃ. ᐅᖓᑕᓄᖏᑦᑐᖅ ᐱᔪᓐᓇᕐᑕᖓ ᐅᓄᕐᓂᖏᑦ ᐊᕿᒃᑕᐅᔪᓐᓇᕐᑐᖅ ᐃᓄᒃᒧᑦ ᐊᑕᐅᓯᕐ ᖃᐅᑕᒪᑦ. ᐊᐅᔪᐃᑦᑐᕐᒥ, ᐅᒃᑐᑎᒋᓪᓗᒍ, ᑭᒃᓕᖓ ᑎᓴᒪᐃᑦ ᖃᐅᑕᒪᑦ. ᑕᓯᑦ ᖃᓄᐃᑦᑐᓂᖏᑦ ᒪᓕᒃᓗᒋᑦ, ᑯᓪᓗᓐᓂᑦ ᑕᕆᐅᕐᓗᓐᓂᑦ ᖃᖓᒃᑯᖓᓂᖓᓗ ᐊᕋᒍ ᐃᓗᐊᓂ ᓇᓗᓇᐃᕐᑕᐅᔭᕆᐊᖃᕐᑐᑦ ᑕᐃᒪᓐᓇ ᐃᖃᓗᒐᓱᒃᕕᐅᔪᓐᓇᕐᓂᖏᓐᓂᒃ. ᖃᖓᒃᑯᖓᔪᓐᓇᕐᓂᖏᓪᓗ ᓇᒥᓐᓂᖏᓗ ᐊᕿᒃᑕᐅᔪᓐᓇᕐᒥᔪᑦ ᐃᖃᓗᖃᐃᓐᓇᕐᑎᑦᑎᓇᓱᒃᓂᕐᒧᑦ.

ᒫᓐᓇᐅᔪᖅ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑐᓴᐅᒪᖏᑦᑐᑦ ᖃᓄᕐ ᐅᓄᕐᑎᒋᒃᒪᖓᑕ ᓯᕐᒥᓕᒃ ᒥᕐᖑᐃᕐᓯᕐᕕᐅᑦ ᐃᓗᐊᓂᑦᑐᓂᒃ ᑕᓯᑦ ᐃᖃᓗᒐᓱᒃᕕᐅᔪᓐᓇᕐᒪᖓᑕ ᐳᓚᕋᑎᓄᑦ ᐅᕙᓗᓐᓂᑦ ᓇᒥ ᐃᖃᓗᒐᓱᒃᓗᑎᒃ ᐅᓄᖏᓗᐊᕐᒪᖓᑕ ᓄᑎᓪᓕᐊᕐᔪᐃᓪᓗᓐᓂᑦ.

ᑕᓯᖅ ᑲᖑᓕᕆᕕᐅᔪᒥᑦᑐᖅ 1 ᖃᓂᒋᔭᓂ ᐊᑐᕐᑕᐅᓚᖑᓪᓗᓂᓗ ᒥᕐᖑᐃᕐᓯᕐᕕᒃᒥ (ᖃᐅᔨᓴᕐᑐᓄᑦ). ᑐᑭᓯᐅᒪᔭᐅᖏᑦᑐᕐ ᓱᓕ ᐃᖃᓗᖃᕐᑎᒋᒃᒪᖓᑦ ᐅᕙᓗᓐᓂᑦ ᐃᖃᓗᒐᓱᒃᑕᐅᖃᑦᑕᕐᑎᓪᓗᒍ ᓄᖑᑉᐸᓪᓕᐊᒐᔭᖏᒻᒪᖓᑕ. ᓇᓗᓇᐃᕐᑕᐅᓯᒪᔪᑦ ᐃᖃᓗᒐᓱᒃᕕᐅᔪᓐᓇᕐᑐᑦ ᐳᓚᕋᑎᓄᑦ ᐱᖃᓯᐅᑎᓯᒪᔪᑦ ᑕᓯᑦ ᓄᓇᒥ Cape Joy ᑕᕆᐅᖓᓂᓗ ᒥᕐᖑᐃᕐᓯᕐᕕᐅᑦ ᐊᕙᑕᓂ.

ᐃᖃᓗᒐᓱᒃᓂᐅᑦ ᐊᐅᓚᑕᐅᓂᖓ

• ᐃᖃᓗᒃᑕᐅᔪᑦ ᐱᓯᒪᐃᓐᓇᕐᓗᑎᒃ ᐅᖓᑕᓄᖏᑦᑐᖅ ᑎᓴᒪᐃᑦ (4) ᐅᓪᓗᕐᒧᑦ ᐃᓄᒃ ᐊᑕᐅᓯᖅ.
• ᑕᓯᑦ ᑯᒃᑐᓪᓗ, ᑯᒐᓚᓪᓗ ᐃᓗᐊᓂ 10 ᑭᓚᒥᑕ ᑲᖑᓕᕆᕕᒃᒥ ᒪᑐᓯᒪᔪᑦ ᐃᖃᓗᒐᓱᒃᕕᐅᒧᓐᓇᖏᑦᑐᑦ ᖃᐅᔨᓴᕐᑎᓄᑦ ᐳᓚᕋᑎᓄᓪᓗ ᑭᓯᐊᓂ ᑐᑭᓯᐅᒪᔭᐅᓕᕐᐸᑕ ᖃᓄᑎᒋ ᐃᖃᓗᖃᕐᑎᒋᒃᒪᖓᑕ ᐃᖃᓗᐃᓪᓗ ᓄᖑᑉᐸᓪᓕᐊᒐᔭᖏᒻᒪᖓᑕ.
• ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐳᓚᕋᑎᓂᒃ ᐱᖃᑦᑕᖁᔨᕗᑦ “ᐃᖃᓗᒃᓗᒍ ᐱᓯᒪᓗᒍ” ᐃᒪᐃᖏᖓᕐᓗᑎᒃ “ᐃᖃᓗᒃᓗᒍ ᐅᑎᕐᑎᓪᓗᒍ” ᐃᓄᐃᑦ ᐃᓕᖁᓯᖏᑦ ᒪᓕᒃᓗᒋᑦ ᐃᒃᐱᒋᑦᑎᐊᕆᐊᖃᕐᓂᖅ ᐅᒪᔪᐃᑦ ᐊᒃᑐᑲᑕᒋᐊᖃᖏᓐᓂᕐᒥᒃᓗ.

ᓇᐃᓇᕐᓯᒪᔪᑦ ᑐᕋᒐᐃᑦ ᐊᕙᑎᖓᓄᑦ ᖃᐅᔨᓴᕐᓂᕐᒧᑦ

ᒪᓕᒃᓗᒋᑦ ᑲᑎᒪᔨᕐᔪᐊᑦ ᐊᕿᒃᑕᖏᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᑕᐅᓂᖓᓄᑦ ᐊᑐᐊᒐᐃᑦ, ᐸᕐᓇᐅᑎᑦ ᐊᐅᓚᑕᐅᔪᓪᓗ ᕿᓄᖓᓱᑎ,2004, ᑐᕋᒐᐅᔪᑦ ᐊᕙᑎᖓᓂᒃ ᖃᐅᔨᓴᕐᓂᕐᒧᑦ ᐱᔭᕆᕐᑕᐅᓚᐅᕐᑐᖅ “ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃᒧᑦ ᑎᑎᕋᓚᐅᑲᒃᓯᒪᔪᖅ ᐊᐅᓚᓂᖓᓄᑦ ᐸᕐᓇᐅᑎᑦ” ( ᑎᑎᕋᓚᐅᑲᒃᓯᒪᔪᖅ ᐸᕐᓇᐅᑎ). ᐸᕐᓇᐅᑎᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᑕᐅᓂᖓᓄᑦ ᐊᐅᓚᑕᐅᓂᖓᓄᑦ ᐸᕐᓇᐅᑎᓄᑦ ᐱᕕᖃᕐᑎᑦᑎᒃᒪᑦ ᐊᖏᓇᕐᓗᒍ ᐊᒻᒪᓗ ᐱᔭᕆᖏᓪᓗᓂ ᐃᒃᐱᒃᓇᐅᑎᔪᓐᓇᕐᑐᑦ ᐊᐅᓚᓂᖓᓂ, ᐊᒻᒪᓗ ᖃᐅᔨᓴᕐᑕᐅᓪᓗᓂ ᑲᑎᑉᐸᓪᓕᐊᒐᔭᕐᑐᑦ ᐃᒃᐱᒃᓇᐅᑎᒐᔭᕐᑐᑦ ᖃᓄᐃᓕᐅᕐᑐᖃᕐᑎᓪᓗᒍ ᐊᕙᑎᖓᓂ.

ᖃᐅᔨᓴᕐᓂᐅᔪᑦ ᐊᕙᑎᖓᓂᒃ ᖃᐅᔨᒋᐊᖃᕐᑕᕐᑐᑦ ᐃᒃᐱᒃᓴᐅᑎᒐᔭᕐᑐᓂᒃ ᓄᓇᖓᓄᑦ ᐊᕙᑎᖓᓄᓪᓗ, ᐃᑦᑕᕐᓂᓴᕐᓄᓪᓗ, ᐳᓚᕋᑎᑦ ᖃᐅᔨᓴᖏᓐᓄᓪᓗ, ᐃᓄᐃᓪᓗ ᐃᓕᓐᓂᐊᕐᑎᑕᐅᓂᖏᓐᓄᑦ ᐅᔾᔨᕈᓱᒃᓂᖏᓐᓄᓪᓗ ᐊᒻᒪᓗ ᐃᑲᔪᕐᑎᒋᔭᐅᓪᓗᑎᒃ ᓄᓇᓕᑦ ᐃᓄᐃᓪᓗ. ᖃᐅᔨᓴᕐᓂᐅᔪᖅ ᐃᓱᒪᒋᔭᖃᖃᑦᑕᕐᑐᑦ ᑭᒃᓕᓕᐅᕐᓯᒪᔪᓂᒃ ᐸᕐᓇᐅᑎᓂᒃ ᐊᒻᒪᓗ ᐱᔭᐅᓇᓱᒃᑐᓂᒃ ᑎᑎᕋᕐᓯᒪᔪᓂᒃ ᐸᕐᓇᐅᑎᓂᒃ ᐊᕿᒃᓯᓇᓱᒃᖢᑎᒃ ᐃᒃᐱᒃᓇᐅᑎᓂᐊᕐᒪᖓᑕ ᐊᕙᑎᖓᓄᑦ ᐱᐅᔪᒃᑯᑦ ᐱᐅᖏᑦᑐᒃᑯᓪᓗᓐᓂᑦ. ᐅᓄᕐᑐᑦ ᐱᔭᐅᓇᓱᒃᑐᑦ ᓂᕆᐅᒋᔭᖏᑦᑐᑦ ᐊᕙᑎᖓᓄᑦ ᐃᒃᐱᒃᓇᐅᑎᕐᔪᐊᕐᓂᐊᕐᒪᖓᑕ. ᐸᕐᓇᐅᑎ ᓇᓗᓇᐃᕐᓯᓯᒪᔪᖅ ᐅᓄᕐᑐᓂᒃ ᐱᐅᓂᕐᓴᒃᑯᑦ ᐊᕙᑎᖓᓄᑦ ᐃᒃᐱᒃᓇᐅᑎᒐᔭᕐᑐᓂᒃ ᐱᐅᓯᒋᐊᕈᑕᐅᒐᔭᕐᑐᓂᒃᓗ ᐅᑯᐊᖑᔪᑦ ᐃᓚᖏᑦ:

• ᖃᐅᔨᒪᔭᐅᓕᒃᑲᓐᓂᕐᓗᓂ ᐊᕙᑎᖓᓂᑦᑐᑦ ᐃᑦᑕᕐᓂᓴᖃᕐᕕᐅᒧᓪᓗ ᖃᐅᔨᓴᕐᓂᒃᑯᑦ ᖃᐅᔨᒪᓇᓱᒃᓂᒃᑯᓪᓗ;
• ᑐᓴᐅᒪᔭᐅᓕᒃᑲᓐᓂᕐᓗᓂ ᖃᐅᔨᒪᔭᐅᔪᑦ ᒥᕐᖑᐃᕐᓯᕐᕕᒃᒥ ᐃᓄᒃᓄᑦ ᖃᐅᔨᒪᑎᑕᐅᓗᑎᒃ ᐃᖃᓇᐃᔭᕐᑎᐅᔪᑦ ᐊᐅᓚᓂᖓᓄᓪᓗ ᐱᒋᐊᕐᑕᐅᓇᓱᒃᑐᑦ;
• ᐃᑲᔪᕐᑎᒋᒃᓗᑎᒃ ᐃᓄᐃᑦ, ᐊᐅᓚᑦᑎᔨᐅᔪᓪᓗ ᐊᓯᖏᓪᓗ ᑎᒍᒥᐊᕐᑎᐅᔪᑦ ᑐᑭᒧᐊᒃᑎᑕᐅᓗᑎᒃ ᐊᐅᓚᓂᖃᑦᑎᐊᖁᓪᓗᒍ;
• ᐊᒃᑐᐊᓂᖃᕐᓂᕐᓴᐅᓗᑎᒃ ᑲᓇᑕᒥᐅᑦ ᐊᒻᒪᓗ ᒥᕐᖑᐃᕐᓯᕐᕕᒃᒥᐅᑦ ᐃᓄᐃᑦ ᖃᐅᔨᒪᒃᑲᓐᓂᕐᓗᑎᒃ ᐅᔾᔨᕈᓱᒃᓗᑎᒃᓗ ᑐᑭᓯᐅᒪᓂᕐᓴᐅᓗᑎᒃᓗ ᐃᑲᔪᕐᑐᐃᓗᑎᒃᓗ ᐊᐅᓚᓂᖓᓂᒃ ᒥᕐᖑᐃᕐᓯᕐᕕᐅᑦ; ᐊᒻᒪᓗ
• ᐱᐅᓯᒋᐊᕐᓗᒍ ᐃᑲᔪᕐᑎᒋᒃᓂᒃᑯᑦ ᐊᐅᓚᓂᖓ ᓄᓇᓕᒃᓂ.

ᑭᒃᓕᓕᐅᕐᓯᒪᔪᑦ ᐸᕐᓇᐅᑎ ᒥᕐᖑᐃᕐᓯᕐᕕᒃᒧᑦ ᒪᓕᒃᓯᒪᓗᓂ ᑲᓇᑕᒥ ᒥᕐᖑᐃᕐᓯᕐᕕᐅᔪᑦ ᐱᖁᔭᖏᓐᓂᒃ ᐊᒻᒪᓗ ᐃᓕᓴᕐᓯᐅᒪᓗᓂ ᓄᓇᐃᑦ ᓴᐳᑎᔭᐅᓯᒪᔭᕆᐊᓕᑦ, ᐅᒪᔪᖃᕐᓂᐅᔪᓪᓗ ᐊᒻᒪᓗ ᐃᖏᕋᔾᔪᑎᖃᕆᐊᖃᖏᑦᑐᑦ. ᑭᒃᓕᓕᐅᕐᓯᒪᔪᑦ ᐸᕐᓇᐅᑎ ᐱᐅᖏᓐᓂᕐᓴᐅᔪᒧᑦ ᐊᑐᕈᑕᐅᔾᔨᐊᖏᒻᒪᑦ, ᑭᓯᐊᓂᓕ ᐱᐅᓂᒃᓴᖓᒧᑦ ᓴᐳᔾᔭᐅᓯᒪᓇᓱᒃᖢᓂ ᓄᓇᖓ ᐊᒻᒪᓗ ᐳᓚᕋᑎᑦ ᖃᓄᐃᓕᐅᕈᓐᓇᕐᑕᖏᓐᓂᒃ ᐊᕿᒍᑕᐅᓪᓗᓂ.

ᑎᑎᕋᓚᐅᑲᒃᓯᒪᔪᖅ ᐸᕐᓇᐅᑎ ᓇᓗᓇᐃᕐᓯᓯᒪᔪᖅ ᐱᔾᔪᑎᖃᕐᖢᓂ ᐊᕿᒃᐸᓪᓕᐊᓂᖓᓂᒃ ᐳᓚᕋᑎᑦ ᖃᐅᔨᔪᓐᓇᕐᑕᖏᓐᓂᒃ ᐱᕕᖃᕐᓂᐅᔪᓂᒃ ᐅᓄᕐᓯᒋᐊᕈᑎᒃᓴᐅᓂᐊᕐᓗᑎᒃ ᐳᓚᕋᑎᓄᑦ. ᐅᓄᕐᓯᒋᐊᕐᓂᖓ ᐳᓚᕋᑎᑦ ᐃᒃᐱᒃᓇᐅᑎᑐᐃᓐᓇᕆᐊᓕᒃ ᓄᓇᖓᓄ ᐊᕙᑎᖓᓄᑦ ᐃᑦᑕᕐᓂᓴᖃᕐᕕᐅᔪᓄᓪᓗ ᐊᒻᒪᓗ ᐃᓄᐃᑦ ᐃᓕᖁᓯᖃᒍᑦ ᐊᑐᑎᕐᑕᐅᔪᓄᑦ, ᐅᐸᒃᑕᐅᖃᑦᑕᕐᓂᖏᑎᒍᑦ. ᐊᒻᒪᓗᑦᑕᐅᖅ ᓴᐳᔾᔭᐅᓯᒪᓂᖏᓐᓄᑦ ᑭᒃᓕᓕᐅᕐᓯᒪᔪᒃᑯᑦ, ᐸᕐᓇᐅᑎ, ᑎᑎᕋᕐᓯᒪᔪᑦ ᐊᑕᐅᓯᐅᖏᑦᑐᑦ ᐊᕿᒋᐊᕈᑎᒃᓴᐅᔪᓐᓇᕐᑐᑦ ᐊᒥᐊᑯᖃᖁᓴᒋᑦ ᐅᓄᕐᓯᒋᐊᕋᓗᐊᕐᐸᑕ ᐳᓚᕋᑎᑦ ᕿᒪᐃᖃᑦᑕᖁᓇᒋᑦ, ᓱᕐᓗ

• ᑐᓴᐅᒪᑎᑕᐅᓗᑎᒃ ᐳᒪᕋᑎᑦ ᐱᓪᓚᕆᐅᓂᖓᓂᒃ ᐊᔪᕐᑎᑕᐅᓗᑎᒃᓗ ᐃᓕᖁᓯᕐᓱᕐᓂᖓ ᐃᑦᑕᕐᓂᓴᖃᕐᕕᐅᔪᓪᓗ ᑭᒃᓕᓕᐅᕐᓯᒪᔪᒥ 1
• ᓄᓇᐃᑦ ᐅᐸᒃᑕᐅ.ᕆᐊᖃᖏᑦᑐᑦ ᐊᕋᒍ ᐃᓗᐊᓂ ᐊᕿᒃᓯᒪᔪᑦ
• ᐳᓚᕋᑎᑦ ᖃᐅᔨᔪᓐᓇᕐᑕᖏᑦ ᐱᔾᔪᑎᖃᕐᑐᑦ ᓄᓇᐃᑦ ᐱᔪᒥᓇᕐᑐᑦ ᓇᓗᓇᐃᕐᑕᐅᓯᒪᔪᑦ ᓇᓗᓇᐃᕐᑕᐅᓯᒪᔪᑦ ᓄᓇᓂ
• ᓄᓇᒥ ᓇᒥᓐᓂᖏᑦ ᐊᒻᒪᓗ ᐊᑐᐊᒐᐃᑦ ᐅᒥᐊᕐᔪᐊᑦ ᐳᓚᕋᑎᓄᑦ ᐅᐸᒍᓐᓇᕐᑕᖏᑦ ᐊᕿᒃᑕᐅᓂᐊᕐᑐᖅ ᐊᑐᓂ ᓄᓇᐅᔪᓄᑦ
• ᓄᓇᐃᑦ ᓂᕈᐊᕐᑕᐅᔪᑦ ᖃᖓᑕᓱᒃᑯᑦ ᐅᐸᒃᑕᐅᔪᓐᓇᕐᑐᑦ ᒥᑭᓚᖑᔪᒃᑯᑦ ᐃᒃᐱᒃᓂᖁᓪᓗᒍ ᐊᕙᑕ ᐃᑦᑕᕐᓂᓴᖃᕐᕕᐅᔪᓪᓗ, ᐃᓄᐃᓪᓗ ᐊᖑᓇᓱᒃᓂᖏᑦ ᐊᓯᖏᓪᓗ ᒥᕐᖑᐃᕐᓯᕐᕕᒃᒥ ᐊᑐᖃᑦᑕᕐᑐᓄᑦ, ᖃᖓᑕᓱᒃᑯᑦ ᐅᐸᒃᑕᐅᔪᓐᓇᕐᖁᓪᓗᒍ ᐳᓚᕋᑎᑦ ᖃᐅᔨᔪᓐᓇᕐᖁᓪᓗᒋᑦ ᐅᓪᓗᐃᓐᓇᕐᑐᓄᑦ ᓯᓂᒃᑕᕐᑐᓄᓪᓗᓐᓂᑦ
• ᐳᓚᕋᑎᑦ ᐱᖁᔭᐅᕗᑦ ᐊᐅᓚᐅᔨᔨᐅᔪᒥᒃ ᐱᖃᑎᖃᖃᑦᑕᕐᓗᑎᒃ ᒥᕐᖑᐃᕐᓯᕐᕕᒃᒧᑦ ᐊᑦᑕᕐᓇᖏᑦᑐᒥᖁᓪᓗᒋᑦ ᐊᒻᒪᓗ ᐃᑲᔪᕐᑕᐅᓗᑎᒃ ᐃᒃᐱᒍᓱᑦᑎᐊᖁᓪᓗᒋᑦ ᐃᓄᐃᑦ ᐊᖑᓇᓱᒃᓂᖏᓐᓄᑦ ᐃᓕᖁᓯᕐᒥᓂᒃᓗ ᐊᑐᕐᑎᓪᓗᒋᑦ

ᖃᓄᑎᒋ ᐃᒃᐱᒃᓇᐅᑎᓂᖓ ᒪᓕᒃᓯᒪᓂᐊᕐᑐᖅ ᖃᓄᑎᒋ ᐅᓄᕐᑎᒋᒃᒪᖓᑕ ᐳᓚᕋᑎᑦ ᒥᕐᖑᐃᕐᓯᕐᕕᒃᒧᑦ. ᒪᓐᓇ ᐅᓄᕐᓂᖏᑦ ᐳᓚᕋᑎᑦ ᑕᑯᓪᓗᒋᑦ ᐃᒃᐱᒃᓇᔾᔨᐊᖏᑦᑐᖅ ᐊᕙᑎᑦᑎᓐᓄᑦ ᐅᓄᖏᓐᓂᖏᓐᓄᑦ ᓄᓇᒥᒃᓗ ᐊᖏᔪᒥᓐᓂᖏᓐᓄᑦ, ᐅᓄᕐᓂᖏᑦ ᐳᓚᕋᑎᑦ ᐅᓄᕐᓯᒋᐊᑐᐃᓐᓇᕆᐊᓕᑦ ᓱᒃᑲᐃᑦᑐᒃᑯᑦ. ᐳᓚᕋᑎᑦ ᑎᑭᖃᑦᑕᕐᑐᑦ ᐅᒥᐊᕐᔪᐊᒃᑯᑦ ᐅᓄᕐᓯᒋᐊᕈᑎᒐᔭᕐᑐᒐᓗᐊᑦ ᕿᓚᒻᒥᐅᔪᒃᑯᑦ ᐱᔾᔪᑎᒋᓪᓗᒍ ᐅᒥᐊᕐᔪᐊᑦ ᐃᓄᖃᕈᓐᓇᕐᒪᑕ 40-ᒥᑦ 100−ᒧᑦ. ᐅᓄᕐᓯᒋᐊᕐᓂᖏᑦ ᐳᓚᕋᑎᑦ ᐃᒃᐱᒃᓇᐅᑎᓗᐊᔾᔨᐊᖏᑦᑐᖅ ᐊᕙᑎᖓᓄᑦ. ᑭᓯᐊᓂᓗ ᖃᐅᔨᓴᕐᓂᐅᔪᑦ ᐊᕙᑎᖓᓂᒃ ᐅᖃᕐᓯᒪᔪᑦ ᐊᕿᒃᑐᖃᕈᓐᓇᕐᓂᖓᓂᒃ ᖃᐅᔨᓴᐅᑕᐅᓂᐊᕐᑐᒥᒃ ᐊᕿᒃᑐᖃᕆᐊᖃᕈᓂ ᖃᐅᔨᒪᔾᔪᑕᐅᓂᐊᕐᑐᓂᒃ ᖃᓄᑎᒋ ᑲᑎᑉᐸᓪᓕᐊᑎᒋᒃᒪᖓᑕ ᐅᓄᕐᓯᒋᐊᕐᑎᓪᓗᒋᑦ ᐳᓚᕋᑎᑦ.

ᓄᓇᕐᔪᐊᒥ ᑲᑎᑉᐸᓪᓕᐊᔪᑦ ᐃᒃᐱᒃᓇᐅᑎᔪᑦ ᓱᕐᓗ ᓯᓚᐅᑦ ᐊᓯᓪᓕᕐᐸᓪᓕᐊᓂᖓᓄᑦ ᓇᓗᓇᐃᕐᑕᐅᓯᒪᔪᑦ ᐸᕐᓇᐅᑎᓂ ᐃᒃᐱᒃᓇᐅᑎᒐᔭᕐᓂᖏᓐᓂᒃ ᒥᕐᖑᐃᕐᓯᕐᑯᒃᒧᑦ, ᐱᖃᓯᐅᑎᓪᓗᒍ ᒥᕐᖑᐃᕐᓯᕐᕕᐅᑦ ᐊᕙᑕᓄᑦ, ᐳᓚᕋᑎᑦ ᖃᖓᒃᑯᖃᑦᑕᕐᓂᖏᑦ ᐊᒻᒪᓗ ᐃᓄᓯᖏᓐᓄᑦ ᐃᓄᐃᑦ ᓄᓇᖃᕐᑐᓄᑦ. ᐸᕐᓇᐅᑎᐅᔪᖅ ᓇᓗᓇᐃᕐᓯᓯᒪᔪᖅ ᖃᐅᔨᓴᕐᓂᐅᒐᔭᕐᑐᓂᒃ ᐊᒻᒪᓗ ᓴᐳᔾᔭᐅᓯᒪᒐᔭᕐᑐᓂᒃ ᐊᕙᑎᖓᓂᒃ ᐃᑦᑕᕐᓂᓴᖃᕐᕕᐅᔪᓂᒃᓗ ᓯᕗᓪᓕᐅᔭᐅᓯᒪᒐᔭᕐᓂᖏᓐᓂᒃ. ᖃᐅᔨᓴᐅᑕᐅᓂᐊᕐᑐᑦ ᖃᓄᐃᓕᖓᓕᕐᒪᖓᑦ ᒥᕐᖑᐃᕐᓯᕐᑯᒃ ᐊᕙᑎᖓ ᐱᖃᓯᐅᑎᓗᒍ ᓯᓚᐅᑦ ᐊᓯᓪᓕᕐᐸᓪᓕᐊᓂᖓ ᖃᐅᔨᔾᔪᑕᐅᕙᓪᓕᐊᒃᒪᖓᑦ ᐊᕿᒃᓯᓯᒪᓕᕐᑐᒐᓗᐊᑦ ᐊᑐᕐᑕᐅᒐᔭᕐᑐᓂᒃ ᑭᓯᐊᓂ ᐊᔾᔨᒋᖏᓐᓂᖃᐅᕐᒪᑦ ᖃᐅᔨᓴᐅᑕᐅᔪᒃᑯᑦ. ᐃᑲᔪᕐᑐᕐᑕᐅᓗᓂ ᖃᐅᔨᓴᕐᓂᐅᔪᖅ, ᐸᕐᓇᐅᑎ ᐱᕕᖃᕐᑎᑦᑎᒃᒪᑦ ᑲᔪᓯᓗᓂ ᐊᒃᑐᐊᓂᕆᔭᖏᑦ ᐃᓄᐃᑦ ᒥᖑᐃᕐᓯᕐᕕᒃᒧᑦ, ᐃᓕᓐᓂᐊᕐᕕᒃᔪᐊᕐᒥᐅᓄᑦ ᐊᓯᖏᓐᓄᓪᓗ ᐃᑲᔪᑎᒋᔭᐅᕙᒃᑐᓄᑦ ᖃᐅᔨᓴᖃᑦᑕᕐᑐᓄᑦ. ᐸᕐᓇᐅᑎ ᑐᕋᒐᐅᔪᓂᒃ ᐅᖃᕐᓯᒪᒋᓪᓗᓂ ᖃᐅᔨᒪᔭᐅᓂᕐᓴᐅᖁᓪᓗᒍ ᐊᕙᑎᖓ, ᐃᑦᑕᕐᓂᓴᖃᕐᕕᐅᔪᑦ ᐊᒻᒪᓗ ᐃᓄᐃᑦ ᐃᓄᓯᕆᓚᐅᕐᑕᖏᑦ ᐃᓕᖁᓯᖏᓪᓗ, ᖃᐅᔨᓴᕐᓂᒃᑯᑦ, ᖃᐅᔨᒪᓇᓱᒃᓂᒃᑯᑦ ᐃᓄᐃᓪᓗ ᖃᐅᔨᒪᔭᑐᖓᖏᑦ ᐊᑐᕐᑕᐅᓂᖏᑎᒍᑦ. ᑕᓐᓇ ᖃᐅᔨᓴᕐᓂᖅ ᖃᐅᔨᒪᓇᓱᒃᓂᕐᓗ ᐸᕐᓇᐅᑎ ᐊᑐᕐᑎᓪᓗᒍ ᑐᑭᓯᔪᑕᐅᓂᐊᕐᒪᑦ ᐊᕿᒃᓱᐃᔨᐅᔪᓄᑦ ᖃᓄᑎᒋ ᓯᓚᕐᔪᐊᕐᒥᖓᕐᑐᑦ ᑲᑎᐸᓪᓕᐊᓗᑎᒃ ᐃᒃᐱᒃᓇᐅᑎᖃᕐᑎᒋᒃᒪᖓᑕ ᒥᕐᖑᐃᕐᓯᕐᕕᒃᒧᑦ.

ᐃᓚᖏᑦ ᐱᒋᐊᕐᑕᐅᔪᒪᔪᑦ ᐅᖃᐅᓯᐅᓯᒪᔪᑦ ᐸᕐᓇᐅᑎᓂ ᐃᓱᒪᒋᔭᐅᑐᐃᓐᓇᕐᓯᒪᔪᑦ ᖃᐅᔨᓴᕐᑕᐅᒃᑲᓐᓂᕆᐊᖃᕐᑐᑦ ᐃᓗᐊᓂ ᓄᓇᕗᑦ ᓄᓇᖓ ᓄᓇᑕᕆᔭᐅᓂᖓᓄᑦ ᐊᖏᖃᑎᒋᒍᑎᓂ ᐅᕙᓗᓐᓂᑦ ᒪᓕᒐᐅᔪᓂ ᐊᑐᓂ ᕿᓄᖓᓱᑕᐅᔪᑦ ᑎᑎᕋᕐᑕᐅᓕᕐᐸᑕ. ᐱᔭᕆᐊᖃᕐᑐᑦ ᐊᕿᒋᐊᕈᑎᒃᓴᐃᑦ, ᖃᐅᔨᒋᐊᕈᑎᒃᓴᐃᑦ ᐊᒻᒪᓗ ᑕᑯᒋᐊᕐᑲᓐᓂᕐᓂᖏᑦ ᐊᕿᒃᑕᐅᓂᐊᕐᑐᑦ ᕿᓄᖓᓱᑕᐅᔪᑦ ᐱᕙᓪᓕᐊᑎᓪᓗᒋᑦ ᐃᓱᒪᒋᔭᐅᑐᐃᓐᓇᓚᐅᕐᓗᑎᒃ ᐊᕿᒃᓱᕐᑕᐅᓯᒋᐊᕈᑎᒃ ᑲᔪᓯᑎᑕᐅᓯᒋᐊᕈᑎᒃᓗ.

ᐸᕐᓇᐅᑎᐅᔪᖅ ᐊᕿᒃᑕᐅᓯᒪᔪᖅ ᒥᕐᖑᐃᕐᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᐊᒻᒪᓗ ᓯᕐᒥᓕᒃ ᒥᕐᖑᐃᓯᕐᕕᒃᒧᑦ ᐸᕐᓇᒃᑎᐅᔪᑦ ᑲᑎᒪᔨᖏᓐᓄᑦ ᐊᒻᒪᓗ ᕿᒥᕈᔭᐅᓪᓗᑎᒃ ᑲᑎᖓᓪᓗᑎᒃ ᐊᐅᓚᓂᖓᓄᑦ ᑲᑎᒪᔨᐅᔪᑦ. ᐸᕐᓇᒃᑎᐅᔪᑦ ᐊᒻᒪᓗ ᑲᑎᖓᓪᓗᑎᒃ ᐊᐅᓚᓂᖓᓄᑦ ᑲᑎᒪᔨᐅᔪᑦ ᑕᒪᕐᒥᒃ ᑎᒃᑯᐊᕐᑕᐅᕕᖃᕐᑐᐃᓐᓇᐅᒃᒪᑎᒃ ᕿᑭᕐᑕᓂ ᐃᓄᐃᑦ ᑲᑐᔨᖃᑎᒋᖏᓐᓂᑦ ᐊᒻᒪᓗ ᒐᕙᒪᑐᖃᒃᑯᓐᓂᑦ. ᐃᓄᐃᑦ ᑲᑎᒪᑎᑕᐅᑲᑕᒃᑎᓪᓗᒋᑦ ᐱᒋᐊᓚᐅᕐᑐᖅ ᐱᒋᐊᓐᓂᖓᓂ 2014. ᐃᓱᒪᓗᑕᐅᔪᑦ ᐅᖃᐅᓯᐅᔪᑦ ᐱᖃᓯᐅᔭᐅᓚᐅᕐᑐᑦ ᐸᕐᓇᐅᑎᒧᑦ ᐊᑲᐅᓇᕋᖓᑦ.

ᐸᕐᓇᐅᑎ ᐊᕙᑎᓕᕆᓂᕐᒧᑦ ᖃᐅᔨᓴᕐᑕᐅᓂᖓᓄᑦ ᐅᖃᓚᐅᕐᑐᑦ ᓯᕐᒥᓕᒃ ᑲᓇᑕᒥ ᒥᕐᖑᐃᕐᓯᕐᕕᒃ ᐊᐅᓚᓂᖓᓄᑦ ᐸᕐᓇᐅᑎ ᐱᐅᓂᕐᓴᐅᔪᒃᑯᑦ ᐃᒃᐱᒃᓇᐅᑎᖃᕐᓂᐊᕐᑐᖅ ᐱᐅᖏᓐᓂᕐᓴᐅᔪᒃᑯᑦ ᐃᒃᐱᒃᓴᐅᑎᖃᖏᓐᓂᕐᓴᐅᓂᐊᕐᑐᖅ. ᐸᕐᓇᐅᑎ ᐃᑲᔪᑕᐅᓂᐊᕐᑐᖅ ᑐᕋᒐᐅᔪᓄᑦ“ᐸᕐᓇᒃᓂᖅ ᐱᑕᖃᐃᓐᓇᕐᓂᕐᒧᑦ ᓯᕗᓂᒃᓴᑦᑎᓐᓂ: ᒐᕙᒪᑐᖃᒃᑯᑦ ᐱᑕᖃᐃᓐᓇᕐᓂᕐᒧᑦ ᑐᕋᒐᖏᑦ ᑲᓇᑕᒥ (2010) ᓴᐳᔾᔭᐅᓯᒪᓗᓂ ᓄᓇᖓ ᐊᕙᑎᖓᓗ.

10.0 ᖁᔭᒋᔭᐅᔪᑦ

ᐋᕐᕿᒃᓱᕐᑕᐅᑎᓪᓗᒍ ᐊᐅᓚᓂᖓᓄᑦ ᐸᕐᓇᐅᑎ ᐃᓄᒋᐊᓄᑦ ᐃᓚᐅᕕᐅᓚᐅᕐᒪᑦ ᐊᔾᔨᒋᖏᑦᑐᓄᑦ ᐃᓄᒃᓄᑦ ᑲᑎᒪᔨᐅᒧᓄᓪᓗ ᓴᕿᑎᔪᑕᐅᓂᐊᕐᒪᑦ ᐸᕐᓇᐅᑎᒥᒃ ᐊᑐᕐᑕᐅᒧᓐᓇᕐᓂᐊᕐᑐᒥᒃ ᐊᑐᐊᒐᐅᓗᓂ ᐊᐅᓚᓂᖓᓄᑦ ᒥᕐᖑᐃᓯᕐᕕᒃᒧᑦ ᐊᕋᒍᒐᓴᒃᓄᑦ. ᐅᑯᐊ ᐃᑲᔪᕐᓯᒪᔪᑦ ᐸᕐᓇᐅᑎᒧᑦ ᖁᔭᒋᔭᐅᔪᒪᓪᓗᑎᒃ:

ᐃᓄᒃᑎᑐᖓᓕᕆᔨᑦ ᑐᓴᔨᓪᓗ ᐸᕐᓇᒃᑕᐅᑎᓪᓗᒍ ᐅᑯᓇᖓ ᑲᒪᒋᔭᐅᓚᐅᕐᑐᖅ ᐱᖃᓯᐅᑎᓪᓗᒋᑦ ᒥᓴᑭ ᐊᓗᕈᑦ, ᒧᐊᒐᓐ ᐊᕐᓇᑲᓪᓚᒃ, ᑕᐃᑐᓯ ᐊᕐᓇᑲᓪᓚᒃ, ᒪᓚᑲᐃ ᐋᕆᐊᖅ, ᐊᐃᕙᓚᕼᐊ ᑯᑉᓗ, ᓗᓯ ᓇᑦᓯᖅ ᐊᒻᒪᓗ ᐃᓚᐃᓴ ᐱᐅᒐᑦᑐᐊᓗᒃ.