ᐊᕌᒍᑕᒫᖅᓯᐅᑦ ᐊᐅᓚᓯᓂᕐᒧᑦ ᐸᕐᓇᐅᑎᐅᑉ ᐊᑐᓕᕐᑎᑕᐅᓂᖓᑕ ᖃᓄᐃᓕᖓᓕᕐᓂᖓ 2019-20

---

---

ᐃᓗᓕᖏᑦ

• ᑐᑭᒧᐊᒍᑎᒃᓴᖅ 1: ᓇᓪᓕᐅᓂᖅᓯᐅᕈᑎᖃᕐᓂᖅ ᑲᓲᒪᔾᔪᑎᓕᐊᖑᓯᒪᔪᓂᒃ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒧᑦ ᐃᓄᓐᓄᓪᓗ ᒥᑦᑎᒪᑕᓕᒻᒥ ᐃᑉᐱᐊᔪᒻᒥᓗ
• ᑐᑭᒧᐊᒍᑎᒃᓴᖅ 2: ᐋᖅᑭᑦᓱᐃᓂᖅ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖕᒥ ᐳᓚᕋᑎᓂᒃ ᖃᐅᔨᒋᐊᕐᕕᖃᕐᓂᕐᒧᑦ ᖃᐅᔨᒋᐊᕈᑎ
• ᑐᑭᒧᐊᒍᑎᒃᓴᖅ 3: ᖃᐅᔨᔭᐅᕙᓪᓕᐊᑎᑦᓯᓂᖅ ᐅᔾᔨᕆᔭᐅᕙᓪᓕᐊᑎᑦᓯᓂᕐᓗ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒥᒃ
• ᐊᐅᓚᑦᓯᕕᐅᔪᖅ: ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᖅ
• ᑲᔪᓯᑦᓯᐊᖅᓯᒪᔪᒥᒃ ᐅᓂᒃᑳᖅ
• ᑐᑭᑖᕈᑏᑦ—ᑭᖑᓪᓕᕐᒥ ᐊᓪᓗᕆᐊᕈᑎᐅᓂᐊᖅᑐᑦ

---

ᑐᑭᒧᐊᒍᑎᒃᓴᖅ 1: ᓇᓪᓕᐅᓂᖅᓯᐅᕈᑎᖃᕐᓂᖅ ᑲᓲᒪᔾᔪᑎᓕᐊᖑᓯᒪᔪᓂᒃ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒧᑦ ᐃᓄᓐᓄᓪᓗ ᒥᑦᑎᒪᑕᓕᒻᒥ ᐃᑉᐱᐊᔪᒻᒥᓗ

ᑐᕌᒐᖅ 1.1: ᐃᓄᐃᑦ ᑲᔪᖏᖅᓴᖅᑕᐅᔪᑦ ᐊᑐᖃᑦᑕᖁᔭᐅᓪᓗᑎᒃ ᒥᕐᖑᐃᓯᕐᕕᒻᒥᒃ ᐃᓚᖃᕐᓗᑎᒃ ᐃᓚᒥᓂᑦ ᓄᓇᒦᖃᑎᒌᒍᓐᓇᖁᓪᓗᒋᑦ ᐱᖅᑯᓯᑐᖃᕐᒥᑦ ᑲᔪᓯᑎᑦᓯᓗᑎᒃ ᖃᓲᒪᖃᑎᒌᑦᓯᐊᕐᓂᕐᒥᑦ

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᐱᖓᓱᑦ ᐱᓕᕆᐊᒃᓴᑦ ᓴᖅᑭᖅᑕᐅᓯᒪᔪᑦ ᑲᓲᒪᓂᖅᓴᐅᔾᔪᑎᒃᓴᖏᓐᓄᑦ ᐃᓄᐃᑦ ᐊᒻᒪᓗ ᓄᓇᓖᑦ ᓯᕐᒥᓕᒻᒧᑦ ᐊᐅᓚᑦᓯᓂᕐᒧᓪᓗ ᖃᐅᔨᒪᓂᐅᔪᓂᒃ ᑐᓴᐅᒪᑎᑦᓯᒍᑎᒥᒃ ᑲᔪᓯᑎᑕᐅᒃᑲᓐᓂᓚᐅᖅᑐᑦ ᐊᕐᕌᒍᑦᑎᓐᓂ, ᐃᓚᒋᔭᐅᓪᓗᑎᒃ:
  • ᐃᒡᓗᓕᒋᐅᖅᓴᕐᓂᖅ ᓯᕗᓕᖅᑕᐅᓪᓗᓂ ᐱᖓᓱᓄᑦ ᐃᓄᓐᓄᑦ ᐃᓐᓇᕐᓄᑦ ᖃᓂᒋᔮᓂ ᒥᑦᑎᒪᑕᓕᐅᑉ, ᐄᑉᕈ 13.
  • ᓯᑕᒪᒋᓕᖅᑕᖓ ᐊᕐᕌᒍᒥ ᓇᓪᓕᐅᓂᖅᓯᐅᕈᑕᐅᓕᖅᑐᖅ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᒥ ᐊᒻᒪᓗ ᓄᓇᓖᑦ ᓂᕆᕕᔾᔪᐊᖅᑎᑕᐅᓂᖏᑦ ᒥᑦᑎᒪᑕᓕᒻᒥ, ᔭᓐᓄᐊᓕ 29, ᐊᒻᒪᓗ ᕕᕝᕗᐊᓕ 1, 2020;
  • ᖁᕕᐊᓲᑎᖃᕐᓂᖅ ᑎᖕᒥᐊᓕᕆᓂᕐᒥᒃ ᔪᓚᐃ 11-12, 2019 ᑲᒪᖃᑕᐅᓚᐅᖅᑐᑦ 11 ᒪᒃᑯᑦᑐᑦ ᐊᒻᒪᓗ ᐃᓐᓇᖅ ᒥᑦᑎᒪᑕᓕᒻᒥᐅᑕᖅ.
• ᐅᖄᓚᕋᖅᑎᑦᓯᓚᐅᖅᑐᑦ ᓈᓚᐅᑎᒃᑯᑦ ᒥᑦᑎᒪᑕᓕᒻᒥ, ᐋᖅᑭᓱᖅᑕᐅᓂᐊᖅᑐᖅ ᐊᐅᓚᑕᐅᓗᓂᓗ ᑲᑐᔾᔨᖃᑎᒋᔭᐅᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᐸᕐᓇᑕᐅᓯᒪᓚᐅᖅᑐᖅ ᒫᑦᓯ ᓄᙳᐊᓂ ᑭᓯᐊᓂ ᓄᖅᑲᖅᑎᑕᐅᒋᐊᖃᓚᐅᖅᑐᖅ ᐱᔾᔪᑎᒋᓪᓗᒍ ᓄᕙᔾᔪᐊᕐᓇᖅ−19 ᓄᓇᕐᔪᐊᒥ ᖃᓂᒪᓇᕐᒧᑦ.

ᑐᕌᒐᖅ 1.2: ᐃᓄᐃᑦ ᑲᒪᖃᑕᐅᓂᖏᑦ ᑲᔪᓯᑦᓯᐊᖅᑐᖅ ᒥᕐᖑᐃᓯᕐᕕᓕᕆᓂᕐᒧᑦ ᐃᓱᒪᓕᐅᕈᑕᐅᔪᓄᑦ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᓯᕐᒥᓕᐅᑉ ᐊᐅᓚᑦᓯᔨᐅᖃᑎᖏᑦ JPMC−ᑯᑦ ᐊᑕᐅᓯᐊᖅᑐᑎᒃ ᑲᑎᙵᓪᓗᑎᒃ ᑲᑎᒪᓚᐅᖅᑐᑦ ᐆᑦᑑᑉᐱᕆ 24-25, 2019 ᕿᒥᕐᕈᓪᓗᑎᒃ ᐊᕐᕌᒍᓂ ᖄᖏᖅᑐᓂ ᐊᐅᓚᓂᐅᖃᑦᑕᖅᓯᒪᔪᓂᒃ ᐋᔨᕋᕈᑎᖃᖅᓱᑎᓪᓗ ᐸᕐᓇᐅᑎᓂᒃ ᐊᕐᕌᒎᓂᐊᖅᑐᒧᑦ, ᐊᑕᐅᓯᐊᕐᑐᑎᓪᓗ ᐅᖄᓚᐅᑎᒃᑯᑦ ᑲᑎᒪᓚᐅᖅᑐᑦ ᑏᓰᒻᕙ 11, 2019 ᕿᒥᕐᕈᓪᓗᑎᒃ ᖃᐅᔨᓴᕈᑕᐅᓯᒪᔪᓂᒃ ᓇᐃᓈᖅᓯᒪᔪᓂᒃ ᐅᓂᒃᑳᓂᒃ.
• ᐊᐅᓚᑦᓯᔨᐅᖃᑎᖏᑦ JPMC−ᑯᑦ ᑲᑎᒪᓂᖓ ᐸᕐᓇᑕᐅᓯᒪᓚᐅᖅᑐᖅ ᐃᓱᐊᓂ ᒫᑦᓯ, 2020, ᑭᓯᐊᓂ ᓄᖅᑲᖅᑎᑕᐅᒋᐊᖃᓚᐅᖅᑐᖅ ᐱᔾᔪᑎᒋᓪᓗᒍ ᓄᕙᔾᔪᐊᕐᓇᖅ−19 ᓄᓇᕐᔪᐊᒥ ᖃᓂᒪᓐᓇᖅ.

ᑐᕌᒐᖅ 1.3: ᐃᓄᐃᑦ ᐃᓚᒋᔭᐅᔪᑦ ᐃᑲᔪᖅᑕᐅᓪᓗᑎᓪᓗ ᒪᑭᒪᔾᔪᑎᒃᓴᓂᒃ ᓴᖅᑭᖅᑐᓂᒃ ᓴᖅᑭᐅᒪᓂᖓᓂᒃ ᒥᕐᖑᐃᓯᕐᕕᒃ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• 2019-2020−ᒥ, ᐊᕙᑎᒐᓚᓐᓃᑦᑐᑦ ᑳᓐᑐᓛᑦ ᑐᓂᔭᐅᓚᐅᖅᑐᑦ ᐃᓄᐃᑦ ᐱᔨᑦᓯᕈᑎᒃᓴᖏᓐᓄᑦ ᓴᓇᔭᐅᓂᖓᓄᑦ ᐋᖅᑭᐅᒪᑎᑕᐅᓂᖓᓄᓪᓗ, ᑐᑭᓕᐅᖅᑕᐅᓂᖓᓄᑦ, ᑐᓵᔨᑎᒍᓪᓗ ᐊᒻᒪᓗ ᐃᓚᓕᐅᔾᔭᐅᓯᒪᓂᕐᒧᑦ/ᖃᐅᔨᒪᔨᑕᐅᓂᕐᒧᑦ.
• ᕕᑉᕗᐊᓕ 2020-ᒥ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᑲᑎᒪᑎᑦᓯᓚᐅᖅᑐᑦ ᐊᕕᑦᑐᖅᓯᒪᓂᕐᒥ ᐱᓇᓱᐊᖃᑎᒌᑦᑐᑦ ᑲᑎᒪᓂᖓᓂᒃ ᕿᒥᕐᕈᓇᑦᑐᑎᒃ ᓯᓚᑖᓃᙶᖅᑐᓂᒃ ᑮᓇᐅᔭᓕᑕᐅᒍᑎᒃᓴᓂᒃ ᐊᒻᒪᓗ ᐅᓄᖅᓯᕙᓪᓕᐊᒍᑎᒃᓴᓂᒃ ᒪᑭᒪᔾᔪᑎᓄᑦ ᐃᑲᔫᑎᓂᒃ ᓄᓇᓕᓐᓄᑦ. ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᐊᕕᑦᑐᖅᓯᒪᓂᕐᒥ ᐱᓇᓱᐊᖃᑎᖏᑦ ᑲᑎᒪᓂᕐᒦᓚᐅᖅᑐᑦ ᒪᕐᕈᐃᓱᖅᑐᑎᒃ ᒥᑦᑎᒪᑕᓕᒻᒥ: ᒥᑦᑎᒪᑕᓕᒃ ᕼᐊᒻᓚᑦ ᒫᑦᓯ 10, 2020; ᐊᒻᒪᓗ ᒥᑦᑎᒪᑕᓕᒃ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ ᒫᑦᓯ 11, 2020.

ᑐᕌᒐᖅ 1.4: ᐅᓂᒃᑳᖏᑦ ᐊᒻᒪᓗ ᖃᐅᔨᒪᓂᖏᑦ ᐃᓄᐃᑦ ᑐᓴᖅᑎᑦᓯᒍᑕᐅᔪᑦ ᒥᕐᖑᐃᓯᕐᕕᓐᓄᑦ ᐳᓚᕋᑎᓕᒫᓄᑦ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• 311-ᖑᓚᐅᖅᑐᑦ ᒥᕐᖑᐃᓯᕐᕕᒻᒧᑦ ᐳᓛᕆᐊᖅᓯᒪᔪᑦ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒧᑦ 2019-20.
• ᑐᑭᓕᐅᕆᓂᕐᒧᑦ ᐱᓕᕆᐊᓕᒪᑦ ᑲᑎᒍᑕᐅᕙᑦᑐᓪᓗ, ᐃᓚᒋᔭᐅᓪᓗᑎᒃ ᐃᒡᓗᓕᒋᐅᖅᓴᕐᓂᖅ, ᐊᓄᓕᐅᕆᐅᕐᓴᕐᓂᖅ, ᓯᕿᓐᓇᕈᑦ ᓇᓪᓕᐅᓂᖅᓯᐅᕈᑕᐅᓂᖓ ᐊᒻᒪᓗ ᖁᕕᐊᓲᑎᖃᕐᓂᖅ ᑎᖕᒥᐊᓂᒃ ᐃᓚᓕᐅᔾᔭᐅᓯᒪᔪᑦ ᐃᓄᐃᑦ ᐅᓂᒃᑳᖏᓐᓄᑦ ᐊᒻᒪᓗ ᑕᑯᓐᓇᒐᖏᓐᓄᑦ.
• ᔪᓚᐃ 30-31, 2019−ᒥ, ᐊᕐᕕᓂᓖᑦ ᒥᕐᖑᐃᓯᕐᕕᒻᒥ ᐃᖅᑲᓇᐃᔭᖅᑏᑦ (ᓯᑕᒪᑦ ᐃᓄᐃᑦ) ᐊᒻᒪᓗ ᓯᑕᒪᐅᔪᖅᑐᑦ ᓄᓇᓕᓐᓃᖔᖅᑐᑦ ᐃᓄᐃᑦ ᐃᑭᓚᐅᖅᑐᑦ ᑕᐃᔭᐅᔪᒥᒃ ᐃᓕᓐᓂᐊᖅᑏᑦ ᓯᑯᒥ ᓇᕈᓇᓐᓂᖏᑦ ᒥᑦᑎᒪᑕᓕᐅᑉ ᖃᓂᒋᔮᓂ ᐊᒻᒪᓗ ᐱᖅᑯᓯᕐᒥᒍᑦ ᐃᓄᐃᑦ ᐱᓕᕆᐊᕆᖃᑦᑕᓲᖏᓐᓂᒃ ᐅᖃᐅᓯᖃᖅᑐᑎᒃ ᑕᒫᓂ ᐊᒻᒪᓗ ᐊᒃᑐᐊᔪᓄᑦ ᒥᕐᖑᐃᓯᕐᕕᒻᒧᑦ 220−ᓃᑦᑐᓄᑦ ᐅᒥᐊᕐᔪᐊᑰᖅᑐᓄᑦ.
• ᐊᐅᒡᒍᓯ 2019−ᒥ, ᐃᖅᑲᓇᐃᔭᖅᑏᑦ ᐊᐅᓚᑦᓯᓚᐅᖅᑐᑦ ᐳᓛᕆᐊᖅᓯᒪᔪᓂᒃ SNP−ᒧᑦ ᖃᐃᖅᑯᔭᐅᓯᒪᔪᓂᒃ ᓯᕗᓕᖅᑕᐅᓪᓗᑎᒃ ᔮᒪᓂᒃᑯᑦ ᒥᓂᔅᑕᖓᓄᑦ ᓯᓚᖅᑲᑎᖏᓐᓄᑦ ᐊᒃᑐᐊᔪᓄᑦ, ᑖᒃᑯᐊ ᐳᓚᕋᑏᑦ ᖃᐅᔨᓚᐅᖅᑐᑦ ᒥᕐᖑᐃᓯᕐᕕᐅᑉ ᒥᑦᓵᓄᑦ, ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᓐᓂᒃᑯᑦ ᐊᐅᓚᑕᖏᓐᓂᒃ.

---

ᑐᑭᒧᐊᒍᑎᒃᓴᖅ 2: ᐋᖅᑭᑦᓱᐃᓂᖅ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖕᒥ ᐳᓚᕋᑎᓂᒃ ᖃᐅᔨᒋᐊᕐᕕᖃᕐᓂᕐᒧᑦ ᖃᐅᔨᒋᐊᕈᑎ

ᑐᕌᒐᖅ 2.1: ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ, ᐳᓚᕋᖅᑐᓕᕆᔩᑦ ᐊᒻᒪᓗ ᒐᕙᒪᓂ ᐱᓕᕆᖃᑕᐅᔪᑦ ᓇᓗᓇᐃᖅᑐᐃᓂᐊᖅᑐᑦ ᐱᕙᓪᓕᐊᑎᑦᓯᓗᑎᓪᓗ ᐳᓚᕋᑎᓂᒃ ᖃᐅᔨᒋᐊᕐᕕᖃᕐᓂᕐᒧᑦ ᐊᑐᓚᐅᖅᑕᖏᓐᓂᒃ ᐃᓚᒋᔭᐅᓗᑎᒃ ᖃᐅᔨᒪᔭᐅᓂᖓᑕ ᓇᓗᓇᐃᖅᓯᒪᔭᐅᓂᖓ ᐅᑭᐅᖅᑕᖅᑐᒨᖅᓯᒪᓂᖏᓐᓂᒃ ᐊᑐᖅᑕᐅᓂᐊᖅᑐᖅ ᒥᕐᖑᐃᓯᕐᕕᒻᒥ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• 2017−ᒥ, PCA ᐋᖅᑭᑦᓱᐃᒋᐊᓯᓚᐅᖅᑐᑦ ᐅᓄᖅᑐᓂᒃ−ᐅᓪᓗᓂᒃ ᐱᓱᕋᔮᑦᑎᑦᓯᖃᑦᑕᓂᕐᒥᒃ ᓂᒋᐊᓂ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᒥ ᒪᓂᒪᑎᑦᓯᓂᒃᑯᑦ ᖃᐅᔨᒪᔮᖑᓂᖓᓄᑦ ᓇᓗᓇᐃᖅᓯᒪᒍᑎᒥᒃ ᐅᑭᐅᖅᑕᖅᑐᒨᖅᓯᒪᓂᕐᒧᑦ. ᐱᓕᕆᐊᕆᔭᐅᓚᐅᖅᑐᖅ 2019-ᒥ ᑕᕝᕗᙵᙵᔪᓂᒃ ᐃᓚᒋᔭᐅᓪᓗᑎᒃ ᐋᖅᑭᑦᓯᐊᕆᓇᓱᐊᕈᑎ ᐱᔭᕆᐊᑭᑦᑐᒃᑯᑦ ᐱᔪᓐᓇᐅᑎᑖᕋᓱᐊᕈᑎᒃᓴᓄᑦ ᐊᒻᒪᓗ ᐃᓯᕈᓐᓇᓂᕐᒧᑦ ᐊᐅᓚᑕᐅᓂᖓᓂᒃ ᕿᑭᖅᑕᓂᒃᑯᓐᓂᒃ ᐊᒻᒪᓗ ᑲᓇᑕᒥ ᓂᕐᔪᑎᓕᕆᔨᕐᔪᐊᑯᓐᓂᒃ (CWS) ᐃᓯᕈᓐᓇᓂᕐᒧᑦ ᐃᓄᐃᑦ ᓄᓇᖁᑎᖏᓐᓄᑦ (IOL) ᐊᒻᒪᓗ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᒥ ᑐᓛᓄᑦ ᐅᑎᖅᑕᕐᕕᒃ ᑎᖕᒥᐊᖃᐅᓯᕝᕕᒻᒧᑦ. ᕿᑭᖅᑕᓂᒃᑯᑦ ᓴᖅᑮᓚᐅᖅᑎᓪᓗᒋᑦ ᓄᑖᒥᒃ ᐃᓄᐃᑦ ᓄᓇᖁᑎᖏᓐᓄᑦ ᐃᓯᕈᓐᓇᐅᑎᑖᕋᓱᐊᕐᓂᕐᒧᑦ ᐱᔪᓐᓇᐅᒻᒥᒃ ᐊᑭᖏᓐᓂᓪᓗ, ᓄᑖᒥᒃ ᐊᖅᑯᑎᒃᓴᕆᔭᐅᓂᐊᖅᑐᒥᒃ ᓇᓖᕌᕈᑎᒃᓴᓂᒃ ᐃᓯᕈᓐᓇᓂᕐᒧᑦ ᐃᓄᐃᑦ ᓄᓇᖁᑎᖏᓐᓄᑦ ᖃᐅᔨᓴᕐᓂᖃᓚᐅᖅᑐᑦ. ᐊᖅᑯᑎᒃᓴᐅᓂᐊᖅᑐᖅ ᓱᓕ ᓇᓗᓇᐃᖅᑕᐅᓯᒪᙱᑦᑐᖅ.
• ᒥᕐᖑᐃᕐᓯᕕᓕᕆᔨᒃᑯᑦ ᑲᓇᑕᒥ (PCA−ᑯᑦ) ᑲᑎᒪᖃᑎᖃᓚᐅᖅᑐᑦ ᐊᐅᓚᑦᓯᔨᐅᖃᑎᒥᓂᑦ ᑲᑐᔾᔨᓂᒃᑯᑦ (JPMC−ᑯᓐᓂᒃ) ᐊᒻᒪᓗ ᑲᓇᑕᒥ ᐆᒪᔪᓕᕆᔨᕐᔪᐊᑦ ᐱᔨᑦᓯᕋᖅᑎᖏᓐᓂᑦ (CWS−ᑯᑦ ) ᐆᑦᑑᑉᐱᕆ 24, 2019−ᒥ ᐋᔩᕋᕈᑎᖃᖅᓱᑎᒃ ᐅᒥᐊᕐᔪᐊᓄᑦ ᑐᓚᕝᕕᐅᖃᑦᑕᕈᓐᓇᕋᔭᖅᑐᓂᒃ ᐊᒻᒪᓗ ᖃᖓᑕᓲᓄᑦ ᒥᕝᕕᐅᖃᑦᑕᕈᓐᓇᕋᔭᖅᑐᓂᒃ.
• 2019/2020−ᒥ, ᒥᕐᖑᐃᕐᓯᕕᓕᕆᔨᒃᑯᑦ ᑲᓇᑕᒥ (PCA−ᑯᑦ) ᕿᒥᕐᕈᓚᐅᖅᑐᖅ ᐋᖅᑭᒋᐊᕆᓪᓗᑎᓪᓗ ᒥᕐᖑᐃᓯᕐᕕᒻᒧᑦ ᐳᓛᕆᐊᖃᑦᑕᖅᑐᓂᒃ ᖃᐅᔨᒋᐊᕐᕕᖃᕐᓂᖅ ᑎᑎᕋᖅᓯᒪᔪᒃᑯᑦ ᐳᓛᕆᐊᖅᓯᒪᓚᐅᖅᑎᓪᓗᒋᑦ. ᑎᑎᕋᖅᑕᐅᕙᓪᓕᐊᔪᖅ ᐊᒻᒪᓗ ᐅᑕᖅᑭᔪᑦ ᐃᓄᒃᑎᑑᓕᖅᑎᑕᐅᓂᖏᓐᓂᒃ ᐊᒻᒪᓗ ᐅᓂᒃᑳᖑᓂᐊᖅᑐᖅ ᐊᐅᓚᑦᓯᔨᐅᖃᑎᒥᓂᑦ ᑲᑐᔾᔨᓂᒃᑯᑦ (JPMC−ᑯᓐᓂᒃ) ᐋᖅᑭᒋᐊᖅᓯᒪᔪᖅ ᖃᐅᔨᒋᐊᕈᑎ ᑎᑎᕋᖅᓯᒪᔪᖅ ᓂᕆᐅᒋᔭᐅᓚᐅᖅᑐᖅ ᐊᑐᓕᖅᑎᑕᐅᓂᐊᕐᓂᖓᓂᒃ 2020-ᒥ ᑭᓯᐊᓂ ᑭᖑᕙᕆᐊᕆᐊᖃᓚᐅᖅᑐᖅ ᐊᕐᕌᒎᓂᐊᖅᑐᒧᑦ ᒪᐃᖓᓕᕐᒥᑉᐸᑦ ᐱᔾᔪᑕᐅᓪᓗᓂ ᓄᕙᔾᔪᐊᕐᓇᖅ-19 ᒥᕐᖑᐃᓯᕐᕕᒃ ᒪᑐᓯᒪᓂᖓᓄᑦ.

ᑐᕌᒐᖅ 2.2: ᐳᓚᕋᖅᑐᓕᕆᖃᑕᐅᔪᑦ ᐊᒻᒪᓗ ᓄᓇᓖᑦ ᒥᑦᑎᒪᑕᓕᒃ ᐃᑉᐱᐊᔪᓪᓗ ᐃᑲᔪᖅᓱᐃᔪᑦ ᐳᓚᕋᑏᑦ ᐊᑐᓚᐅᖅᑕᖏᓐᓂᒃ ᒥᕐᖑᐃᓯᕐᕕᒻᒥ, ᐊᒻᒪᓗ ᒪᓂᒪᑎᑦᓯᔪᑦ ᐳᓚᕋᑏᑦ ᐊᑐᓚᐅᖅᑕᖏᓐᓂᒃ ᓄᓇᓕᓐᓂ ᐃᑲᔫᑎᔪᓂᒃ ᒥᕐᖑᐃᓯᕐᕕᓕᐊᕈᔾᔭᐅᕙᑦᑐᓂᒃ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᑐᙵᓴᐃᓚᐅᖅᑐᑦ 311−ᓂᒃ ᐳᓚᕋᑎᓂᒃ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒧᑦ ᐊᕐᕌᒍᑦᑎᓐᓂ.
• ᒥᑦᑎᒪᑕᓕᒻᒨᓚᐅᖅᑐᖅ 15 ᐳᓚᕋᑎᑕᖅᑏᑦ ᐅᒥᐊᕐᔪᐊᑦ 2019−ᒥ, ᐃᓚᖓᑦ (ᐃᓕᓐᓂᐊᖅᑏᑦ ᓯᑯᒥ ᐅᒥᐊᕐᔪᐊᖅ; 220 ᐅᒥᐊᕐᔪᐊᒦᓚᐅᖅᑐᑦ) ᓄᖅᑲᖓᓚᐅᖅᑐᖅ ᒥᕐᖑᐃᕐᓯᕕᒻᒥ. ᐊᕐᕕᓂᓖᑦ ᑲᓇᑕᒥ ᒥᕐᖑᐃᓯᕐᕕᒻᒥ ᐃᖅᑲᓇᐃᔭᖅᑏᑦ ᐊᒻᒪᓗ ᓯᑕᒪᐅᔪᖅᑐᑦ ᓄᓇᓕᓐᓃᙶᖅᑐᑦ ᐃᓄᐃᑦ ᐃᑭᓚᐅᖅᑐᑦ ᑕᐃᔭᐅᔪᒥᒃ ᐃᓕᓐᓂᐊᖅᑏᑦ ᓯᑯᒥ ᓇᕈᓇᓐᓂᖏᑦ ᒥᑦᑎᒪᑕᓕᐅᑉ ᖃᓂᒋᔮᓂ ᐊᒻᒪᓗ ᐱᖅᑯᓯᕐᒥᒍᑦ ᐃᓄᐃᑦ ᐱᓕᕆᐊᕆᖃᑦᑕᓲᖏᓐᓂᒃ ᐅᖃᐅᓯᖃᖅᑐᑎᒃ ᐳᓛᕆᐊᖅᓯᒪᓂᕐᒥᓂ.
• ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐃᑲᔫᑎᖃᓚᐅᖅᑐᑦ ᐊᓯᖏᓐᓂᒃ ᓄᓇᓕᓐᓄᑦ ᐳᓚᕋᑎᑕᖅᑎᓂᒃ ᐅᒥᐊᕐᔪᐊᒃᑯᑦ ᐳᓛᕆᐊᖅᑎᑕᐅᓯᒪᔪᓂᒃ ᑐᓂᓯᓯᒪᓪᓗᑎᒃ ᐳᓚᕋᑎᓄᑦ ᑐᓴᐅᒪᑎᑦᓯᔾᔪᑎᒃᓴᓂᒃ ᐃᑭᒪᔪᓄᑦ, ᑐᓂᐅᖅᑲᐃᓪᓗᑎᒃ ᒥᕐᖑᐃᓯᕐᕕᒻᒧᑦ ᑐᑭᓯᑎᑦᓯᒋᐊᕈᑎᓂᒃ ᑎᑎᕋᖅᓯᒪᔪᓂᒃ, ᐊᒻᒪᓗ ᐊᐅᓚᑦᓯᓪᓗᑎᒃ ᖃᐅᔨᒋᐊᕐᕕᒃᓴᓂᒃ ᑐᓛᓂᒃ ᐅᑎᖅᑕᖅᑐᓂᒃ ᑎᖕᒥᐊᓂᒃ.

ᑐᕌᒐᖅ 2.3: ᑕᒪᕐᒥᒃ ᒥᕐᖑᐃᓯᕐᕕᒻᒥ ᐊᑐᖃᑦᑕᖅᑐᑦ ᐋᖅᑭᑦᓯᒪᑦᓯᐊᑎᑦᓯᔪᓐᓇᖅᑐᑦ ᐊᑦᑕᓇᙱᑦᑐᒥᒃ ᖁᕕᐊᓇᖅᑐᒥᓪᓗ ᐳᓛᕆᐊᖅᓯᒪᓂᕐᒥᓂᒃ ᐊᒻᒪᓗ ᑕᕝᕙᙶᖅᓯᒪᔪᑦ ᐃᑲᔫᑎᓖᑦ ᐳᓚᕋᑏᑦ ᐊᑦᑕᓇᐃᖅᓯᒪᒍᑎᒃᓴᖏᓐᓄᑦ ᐸᕐᓇᐅᑏᑦ, ᓴᐳᔾᔨᓯᒪᒍᑏᑦ, ᐊᒻᒪᓗ ᑭᒡᒍᑏᑦ ᐃᖅᑲᓇᐃᔭᖃᑎᒌᓐᓂᒃᑯᑦ ᐱᓇᓱᐊᖃᑕᐅᔪᓂᒃ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᐳᓚᕋᑎᒥᒃ ᐱᕐᕈᓗᐊᕿᔪᖃᓚᐅᙱᑦᑐᖅ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖓᓂ 2019-20.
• ᐊᓃᕐᑐᑦ ᖃᓄᖅ ᓯᕗᓪᓕᕐᒥ ᑲᒪᒋᔭᐅᒋᐊᖃᕐᒪᖔᑕ ᐋᓐᓂᖅᑐᓕᕆᓂᕐᒧᑦ ᐃᓕᓐᓂᐊᑎᑦᓯᓂᐅᓚᖓᓚᐅᖅᑐᖅ ᐃᖅᑲᓇᐃᔭᖅᑎᓂᒃ ᐊᒻᒪᓗ ᓄᓇᓖᑦ ᐃᓄᖏᓐᓂᒃ ᐸᕐᓇᑕᐅᓯᒪᓚᐅᖅᑐᖅ ᐃᓱᐊᓂ ᒫᑦᓯ ᒥᑦᑎᒪᑕᓕᒻᒥ, ᑭᓯᐊᓂ ᓄᖅᑲᖅᑎᑕᐅᒋᐊᖃᓚᐅᖅᑐᖅ ᐱᔾᔪᑎᒋᓪᓗᒍ ᓄᕙᔾᔪᐊᕐᓇᖅ−19 ᓄᓇᕐᔪᐊᒥ ᖃᓂᒪᓐᓇᒧᑦ.

---

ᑐᑭᒧᐊᒍᑎᒃᓴᖅ 3: ᖃᐅᔨᔭᐅᕙᓪᓕᐊᑎᑦᓯᓂᖅ ᐅᔾᔨᕆᔭᐅᕙᓪᓕᐊᑎᑦᓯᓂᕐᓗ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒥᒃ

ᑐᕌᒐᖅ 3.1: ᓄᓇᓕᓐᓂ ᖃᐅᔨᒋᐊᕐᕕᒃᓴᖅ ᐱᐅᓯᒋᐊᖅᑕᐅᓯᒪᔪᖅ ᐋᖅᑭᒋᐊᖅᑕᐅᓯᒪᓂᖓᒍᑦ ᑐᓴᐅᒪᔾᔪᑎᓕᕆᓂᒃᑯᑦ ᖃᐅᔨᓴᕐᓂᕐᒧᑦ, ᓇᐅᑦᓯᑐᕐᓂᕐᒧᑦ ᐱᖅᑯᓯᕐᓂᓪᓗ ᖃᐅᔨᒪᓂᐅᔪᓂᒃ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᕕᕝᕗᐊᓕ 4, 2020−ᒥ, ᒥᕐᖑᐃᓯᕐᕕᒻᒥ ᐃᖅᑲᓇᐃᔭᖅᑏᑦ ᐃᓚᒋᔭᐅᓚᐅᖅᑐᑦ ᓄᓇᓕᓐᓂ ᐃᓕᓐᓂᐊᑎᑦᓯᓂᕐᒧᑦ ᐊᑯᓂᐅᔪᒧᑦ ᐋᖅᑭᑦᓯᒪᔪᒥᒃ ᓂᕐᓕᓕᕆᕕᒻᒥ ᖃᐅᔨᓴᖅᑎᓂᒃ Centre d’études Nordiques−ᒦᙶᖅᓯᒪᔪᓂᒃ ᐋᔩᕋᕈᑎᖃᖅᓱᑎᒃ ᐊᕙᑎᒥᒃ ᓇᐅᑦᓯᑐᕐᓂᕐᒥᒃ ᐊᒻᒪᓗ ᑲᑐᔾᔨᖃᑎᒌᓐᓂᒃᑯᑦ ᐊᐅᓚᓂᐅᔪᓂᒃ.
• ᓄᓇᓕᓐᓂ ᑲᑎᓐᓂᐅᖃᑦᑕᓚᐅᖅᑐᑦ ᓇᓗᓇᐃᖅᑕᐅᒌᖅᓯᒪᔪᑦ, ᓯᕿᓂᐅᑉ ᐅᑎᕐᓂᖓ, ᖁᕕᐊᓲᑎᖃᕐᓂᖅ ᑎᖕᒥᐊᓂᒃ, ᐃᒡᓗᓕᒋᐅᖅᓴᕐᓂᕐᓗ, ᐊᒻᒪᓗ ᐊᓄᓕᐅᕆᐅᖅᓴᕐᓂᖅ, ᐋᖅᑭᑦᓯᒪᔪᒃᑯᑦ ᐊᐅᓚᓂᖃᐃᓐᓇᖅᑐᑦ ᐊᐅᓚᑦᓯᓪᓗᓂ ᐅᖃᖃᑎᒌᖃᑦᑕᓂᕐᒥᒃ, ᐃᖅᑲᓇᐃᔭᖃᑎᒌᓐᓂᕐᒧᑦ ᐱᕙᓪᓕᐊᔾᔪᑎᒃᓴᓂᒃ ᐊᒻᒪᓗ ᑐᓴᐅᒪᑎᑦᓯᓂᕐᒥᒃ ᖃᐅᔨᒪᓂᐅᔪᓂᒃ.

ᑐᕌᒐᖅ 3.2: ᖃᐅᔨᒪᔭᐅᔪᑦ ᒥᕐᖑᐃᓯᕐᕕᒃ ᐊᕙᑖᓂᒃ, ᐃᓕᖅᑯᓯᒃᑯᑦ ᐊᑐᕋᑦᓴᓂᒃ, ᐊᒻᒪᓗ ᐃᓄᐃᑦ ᐊᑐᖅᓯᒪᔭᖏᓐᓂᒃ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ ᖃᐅᔨᔭᐅᒃᑲᓂᖅᑎᑦᓯᒍᑕᐅᔪᖅ ᖃᐅᔨᓴᕐᓂᒃᑯᑦ, ᓇᐅᑦᓯᑐᕐᓂᒃᑯᑦ, ᐊᒻᒪᓗ ᐋᖅᑭᑦᓯᒪᑦᓯᐊᓂᖅᐹᓂᒃ ᐊᑐᖅᑕᐅᒍᓐᓇᖅᑐᓂᒃ ᐃᓚᓕᐅᔾᔭᐅᓯᒪᓗᑎᒃ ᐃᓄᐃᑦ ᖃᐅᔨᒪᓂᖏᑦ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• 2019-ᒥ, ᐊᕙᑎ ᓱᓕᔪᒥᒃ ᓇᐅᑦᓯᑐᖅᑕᐅᓂᖓᓄᑦ ᐱᓕᕆᐊᒃᑯᑦ ᑲᑎᖅᓱᖅᑕᐅᓯᒪᒧᑦ ᓄᐊᑕᐅᓚᐅᖅᑐᑦ ᐱᓕᕆᕕᐅᔪᒥ ᐊᒻᒪᓗ ᐅᖓᓯᑦᑐᒥᒃ ᐃᑉᐱᓐᓂᕈᑎᒃᑯᑦ ᖃᐅᔨᓴᕈᑎᓄᑦ ᓯᕐᒦᑦ ᐊᕙᑎᖏᓐᓂ (ᐊᖏᓈᖅᓯᒪᔪᖅ ᑲᑎᓐᓂᖓ ᐊᒻᒪᓗ ᓯᕐᒦᑦ ᑎᑭᐅᑎᓯᒪᓂᖏᑦ) ᐊᒻᒪᓗ ᓇᑎᕐᓇᖅ ᐊᕙᑖᓂ (ᐊᐅᓚᐃᓐᓇᕐᓂᖓ ᐃᑭᐊᖓ ᓄᓇᐅᑉ, ᐱᓱᑦᑏᑦ ᐃᕐᓂᐅᖃᑦᑕᕐᓂᖏᑦ ᐊᒻᒪᓗ ᐊᓯᔾᔨᖅᓯᒪᒐᓛᓐᓂᖓ ᓄᓇᕋᐃᑦ ᐱᕈᖃᑦᑕᕐᓂᖏᑦ).
• ᐃᓚᒋᔭᐅᓪᓗᓂ ᐃᓄᐃᑦ ᖃᐅᔨᒪᓂᖏᑎᒍᑦ ᐊᕙᑎ ᓱᓕᔪᒥᒃ ᓇᐅᑦᓯᑐᖅᑕᐅᓂᖓᓄᑦ ᐆᑦᑐᕋᐅᑦ, ᔫᓂ 2019−ᒥ, ᐊᑕᐅᓯᖅ ᓯᕐᒥᓕᒃ ᐃᓄᐃᑦ ᖃᐅᔨᒪᓂᖏᓐᓄᑦ ᐱᔭᕆᐊᑭᓪᓕᑎᕆᔨᒃᑯᓐᓄᑦ ᐃᓚᒋᔭᐅᔪᖅ ᒥᑦᑎᒪᑕᓕᒻᒦᙶᖅᑐᖅ, ᐊᑕᐅᓯᖅ ᐊᖑᓇᓱᑦᑎ, ᐱᖓᓱᑦ ᒪᒃᑯᑦᑐᑦ ᐊᒻᒪᓗ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒻᒥ ᐃᖅᑲᓇᐃᔭᖅᑎ ᒥᕐᖑᐃᓯᕐᕕᓕᐊᓚᐅᖅᑐᑦ ᖃᐅᔨᓴᕆᐊᖅᑐᑎᒃ ᑕᑯᔭᒥᒍᑦ ᐊᒻᒪᓗ ᑎᑎᕋᖅᑕᐅᓪᓗᑎᒃ ᐃᓄᐃᑦ ᖃᐅᔨᒪᓂᖏᑦ ᐊᒃᑐᐊᔪᑦ ᓯᕐᒦᑦ ᐊᕙᑎᖏᓐᓄᑦ. ᒥᑦᑎᒪᑕᓕᒻᒥ ᐃᑉᐱᐊᔪᒻᒥᓗ ᐃᓄᐃᑦ ᖃᐅᔨᒪᔭᖏᓐᓄᑦ ᐱᔭᕆᐊᑭᓪᓕᑎᕆᔩᑦ ᐊᑐᓂᑦ ᑲᑎᙵᓪᓗᑎᒃ ᑲᑎᒪᓚᐅᖅᑐᑦ ᕕᑉᕗᐊᓕ 2019−ᒥ ᐊᒻᒪᓗ ᒪᕐᕈᐃᖅᓱᕐᓗᑎᒃ ᑲᑎᒪᒃᑲᓐᓂᕆᐊᖃᕐᓂᐊᖅᑐᑦ ᐅᖄᓚᐅᑎᒃᑯᑦ ᑲᔪᓯᕙᓪᓕᐊᖁᓪᓗᒍ ᐸᕐᓇᓐᓂᖓ ᐊᒻᒪᓗ ᐊᑐᓕᖅᑎᑕᐅᕙᓪᓕᐊᖁᓪᓗᒍ ᐆᑦᑐᕋᕈᑕᐅᔪᖅ.
• ᐊᕐᕌᒍᑕᒫᑦ ᐃᓕᖅᑯᓯᒃᑯᑦ ᐊᑐᖅᑕᐅᔪᓂᒃ ᓇᐅᑦᓯᑐᕐᓂᐅᖃᑦᑕᖅᑐᖅ ᐱᐊᓂᒃᑕᐅᓚᐅᖅᑐᖅ ᖃᐃᖅᓱᑦ ᓄᓇᖓᓂ ᐊᐅᒡᒍᓯ 2019−ᒥ. ᒫᓐᓇᒫᒃᑯᑦ ᓱᖅᑯᐃᖅᓯᓯᒪᒍᑎᒃᓴᖅᑕᖃᓚᐅᙱᑦᑐᖅ ᐊᑐᖅᑕᐅᖏᓐᓂᖅᓴᐅᒻᒪᖔᑕ ᐃᓕᖅᑯᓯᒃᑯᑦ ᐱᖅᑯᓯᐅᔪᑦ ᐊᐅᓚᑦᓯᒍᑕᐅᔪᓄᑦ ᒥᕐᖑᐃᓯᕐᕕᒻᒥ.
• 14 PCA ᖃᐅᔨᓴᕐᓂᕐᒧᑦ ᐊᒻᒪᓗ ᓄᐊᑦᓯᓂᕐᒧᑦ ᐱᔪᓐᓇᐅᑏᑦ ᑐᓂᔭᐅᓚᐅᖅᑐᑦ 2019−ᒥ ᖃᐅᔨᓴᕈᑕᐅᔪᓂᒃ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖓᓂ.
• ᓯᑕᒪᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓚᐅᖅᑐᑦ ᓯᑕᒪᓂᒃ ᑕᖅᑭᓂᒃ ᖃᐅᔨᓴᖅᑎᒻᒪᕆᐅᑎᑕᐅᓪᓗᑎᒃ ᑕᐃᒎᓯᓕᓐᓂᒃ Centre d’études Nordiques ᖃᐅᔨᓴᖅᑎᓂᒃ ᓂᕐᓕᕐᓂᒃ ᖃᐅᔨᓴᕐᕕᒻᒥ.

ᑐᕌᒐᖅ 3.3: ᒥᕐᖑᐃᓯᕐᕕᒃ ᐊᕙᑖ, ᐃᓕᖅᑯᓯᒃᑯᑦ ᐊᑐᕋᑦᓴᑦ, ᐊᒻᒪᓗ ᐃᓄᐃᑦ ᐃᓕᖅᑯᓯᖓ ᐊᒻᒪᓗ ᐊᑐᖅᓯᒪᔭᖓᓂᒃ ᖃᐅᔨᒋᐊᕐᕕᒃᓴᖅ ᐊᒻᒪᓗ ᐃᓕᓐᓂᐊᕈᑎᒃᓴᑦ ᐱᓕᕆᐊᒃᓴᓪᓗ ᐋᖅᑭᓱᖅᑕᐅᔪᑦ, ᐊᐅᓚᑕᐅᔪᑦ, ᐊᒻᒪᓗ ᐱᕚᓪᓕᕈᑕᐅᔪᑦ ᑲᑐᔾᔨᖃᑎᒌᔭᐅᓂᖏᓐᓄᑦ ᐊᓯᖏᑦ ᑲᑐᔾᔨᖃᑎᒌᑦ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᓯᕐᒥᓕᐅᑉ ᒥᕐᖑᐃᕐᓯᕐᕕᖓ ᑕᑯᑦᓴᐅᑎᑕᐅᖃᑕᐅᓂᐊᖅᑐᖅ ᑖᒃᑯᑎᒎᓇ ᐅᑭᐅᖅᑕᖅᑐᒥᐅᙱᑦᑐᖅ ᑕᑯᑦᓴᐅᑎᑦᓯᓂᕐᒥᒃ ᒪᓐᑐᕆᐊᒥ ᐊᒻᒪᓗᑭᑖᒥ ᐃᓪᓗᐊᓗᒻᒥ ᐊᕙᑎᒥᒃ ᓴᖅᑭᔮᖅᑎᑦᓯᕕᐅᔪᖅ ᒪᑐᐃᒃᑲᓂᖅᐸᑦ, ᑭᖑᓂᐊᓂ ᓄᕙᔾᔪᐊᕐᓇᖅ−19.
• ᖁᕕᐊᓲᑎᒋᔭᐅᓂᖓᓄᑦ ᑎᖕᒥᐊᓕᕆᓂᖅ ᔪᓚᐃᒥ ᐃᓚᖃᓚᐅᖅᑐᖅ ᒪᕐᕉᓐᓂᒃ ᐅᓪᓘᓐᓂᒃ ᐃᓕᓐᓂᐊᑎᑦᓯᒍᑕᐅᓪᓗᓂ ᐊᐅᓚᑕᐅᓪᓗᓂ ᐱᓕᕆᖃᑕᐅᓪᓗᑎᒃ ᒥᑦᑎᒪᑕᓕᒃ ᕼᐊᒻᓚᖏᑦ. 30-ᓃᑦᑐᑦ ᒪᒃᑯᑦᑐᑦ ᐅᐸᑦᓯᒪᖃᑦᑕᓚᐅᖅᑐᑦ ᐅᓪᓗᒃᑯᑦ ᑲᑎᓐᓂᐅᕙᑦᑐᓄᑦ ᐊᒻᒪᓗ ᐃᓚᒋᔭᐅᓪᓗᑎᒃ ᐃᓕᓐᓂᐊᑎᑦᓯᒍᑕᐅᔪᓂᒃ ᑎᖕᒥᐊᓕᕆᓂᕐᒧᑦ.
• ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᑲᑐᔾᔨᖃᑎᓖᑦ ᑲᓇᑕᒥ ᓂᕐᔪᑎᓕᕆᔨᕐᔪᐊᑯᓐᓂᒃ ᐊᒻᒪᓗ ᓄᓇᓖᑦ ᐃᓐᓇᖏᓐᓂᒃ ᐱᕚᓪᓕᕈᑎᒃᓴᓂᒃ ᖃᐅᔨᔭᐅᕙᓪᓕᐊᑎᑦᓯᒍᑎᒃᓴᑎᒍᑦ ᑎᖕᒥᐊᑦ ᒪᓐᓂᖏᓐᓂᒃ. ᐃᓕᓴᐃᒍᑎᒃᓴᖅ ᐊᑐᖅᑕᐅᖃᑦᑕᖅᑐᖅ ᐅᖃᖃᑎᒌᒍᑕᐅᓪᓗᓂ ᐱᖕᒪᕆᐅᓂᖓ SNP ᑎᖕᒥᐊᖃᕐᓂᐅᔪᒧᑦ, ᐊᒻᒪᓗ ᐃᓄᐃᑦ ᖃᐅᔨᒪᓂᖏᓐᓂᒃ ᑎᖕᒥᐊᓂᒃ ᓄᓇᓖᑦ ᐃᓄᖏᓐᓄᑦ ᐊᒻᒪᓗ ᐳᓚᕋᑎᓄᑦ.
• ᐃᖅᑲᓇᐃᔭᖅᑏᑦ ᐅᓂᒃᑳᓚᐅᖅᑐᑦ ᓯᕐᒥᓕᐅᑉ ᒥᕐᖑᐃᕐᓯᕐᕕᖓ ᒥᑦᓵᓄᑦ ᐃᓕᓐᓂᐊᕐᓂᓕᓐᓄᑦ 7-12 ᐃᑉᐱᐊᔪᒻᒥ ᐆᑦᑑᑉᐱᕆ 10, 2019-ᒥ ᐃᓕᓐᓂᐊᕐᓂᓕᓐᓄᓪᓗ 10 ᒥᑦᑎᒪᑕᓕᒻᒥ ᐆᑦᑑᑉᐱᕆ 28 (60-ᖏᓐᓃᓚᐅᖅᑐᑦ ᐃᓕᓐᓂᐊᖅᑏᑦ ᑲᑎᓪᓗᒋᑦ). ᐅᓂᒃᑳᕆᓪᓗᐊᑕᓚᐅᖅᑕᖏᑦ ᒥᕐᖑᐃᓯᕐᕕᒻᒥ ᐱᓪᓗᐊᑕᐅᔪᑦ, ᓇᐅᑦᓯᖅᑑᑏᑦ, ᐃᖅᑲᓇᐃᔮᕆᔭᐅᔪᓐᓇᖅᑐᓄᑦ ᐊᖅᑯᑎᒃᓴᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓂ ᐊᒻᒪᓗ ᐊᕐᕌᒍᑕᒫᖅᓯᐅᑏᑦ ᓄᓇᓕᓐᓂ ᑲᑎᓐᓂᐅᕙᑦᑐᑦ.

---

ᐊᐅᓚᑦᓯᕕᐅᔪᖅ: ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᖅ

ᑐᕌᒐᖅ 7.1: ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ, ᑲᓇᑕᒥ ᓂᕐᔪᑎᓕᕆᔨᕐᔪᐊᒃᑯᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᖅᑲᓇᐃᔭᖃᑎᒌᓐᓂᖓ ᐊᒻᒪᓗ ᐋᖅᑭᐅᒪᑦᓯᓂᖓ ᐊᐅᓚᑦᓯᓂᕐᒥᓂᒃ ᒥᑦᑎᒪᑕᓕᐅᑉ ᐊᑭᐊᓂ ᕿᑭᑕᖅᒥᒃ ᐊᒻᒪᓗ ᐱᔭᕆᐊᑭᓪᓕᑎᕆᓂᖅ ᐱᔪᓐᓇᐅᑎᑖᕈᒪᔾᔪᑎᓂᒃ ᐊᒻᒪᓗ ᐊᐅᓚᑦᓯᔾᔪᑎᓂᒃ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᒥᕐᖑᐃᕐᓯᕐᕖᑦ ᑲᓇᑕᒥ (PCA−ᑯᑦ) ᑲᔪᓯᑎᑦᓯᓚᐅᖅᑐᑦ ᐱᓕᕆᐊᒥᓂᒃ 2018-19−ᒥᓂᓴᕐᓂᒃ ᐱᓕᕆᖃᑎᖃᖅᑐᑎᒃ ᕿᑭᖅᑕᓂᒃᑯᓐᓂᒃ ᐊᒻᒪᓗ ᑲᓇᑕᒥ ᓂᕐᔪᑎᓕᕆᔨᕐᔪᐊᑯᓐᓂᒃ ᐊᐅᓚᑦᓯᓂᕐᒥᒃ ᐱᔪᓐᓇᐅᑎᑖᕋᓱᐊᖅᑐᓄᑦ ᐳᓚᕋᑎᓄᑦ ᐃᓯᕈᓐᓇᐅᑎᒥᒃ ᐅᓄᖅᑐᓂᒃ− ᐅᓪᓗᓂᒃ ᐱᓱᕋᔮᕝᕕᒻᒥᒃ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᒥ ᐃᓄᐃᑦ ᓄᓇᖁᑖᒎᖓᔪᒥᒃ ᐊᖅᑯᑎᖓᒍᑦ ᐊᒻᒪᓗ ᑐᓛᑦ ᐅᑎᖅᑕᖅᑐᑦ ᑎᖕᒥᐊᖃᐅᓯᕝᕕᒃᑯᑦ, ᑭᓯᐊᓂ ᑲᔪᓯᓚᐅᙱᑦᑐᖅ. ᐱᓇᓱᐊᒐᐅᒃᑲᓂᕐᓂᐊᖅᑐᖅ ᐋᖅᑭᑦᓱᐃᓂᕐᒥᒃ ᐋᖅᑭᓯᐊᖅᓯᒪᔪᒥᒃ ᐱᔪᓐᓇᐅᑎᑖᕋᓱᐊᕈᑎᒥᒃ ᐱᖓᓱᑎᒍᑦ ᑲᑐᔾᔨᖃᑎᒌᑎᒍᑦ 2020-ᒥ.
• ᑲᓇᑕᒥ ᓂᕐᔪᑎᓕᕆᔨᕐᔪᐊᒃᑯᑦ ᕿᒥᕐᕈᖃᑦᑕᖅᑐᑦ ᐊᒻᒪᓗ ᐊᑎᓕᐅᖃᑕᐅᖃᑦᑕᖅᑐᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᖃᐅᔨᓴᕈᓐᓇᓂᕐᒧᑦ ᐱᔪᓐᓇᐅᑎᓂᒃ ᐱᓕᕆᐊᓄᑦ ᑲᑐᔾᔨᖃᑎᒌᓐᓂᒃᑯᑦ ᐊᐅᓚᑕᐅᔪᓂᒃ ᐃᓚᖓᓂ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᒥ.
• ᐃᒃᓯᕙᐅᑕᐅᖃᑕᐅᔪᑦ ᐊᓱᖓᓱᖔᓄᑦ ᐊᐅᓚᑦᓯᔨᐅᖃᑕᐅᓪᓗᑎᒃ ᑲᑎᒪᔨᕋᓛᑦ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᒥ ᑐᓛᓄᑦ ᐅᑎᖅᑕᕐᕕᒃ ᑎᖕᒥᐊᖃᐅᓯᕝᕕᖕᒧᑦ ᑲᑎᒪᔪᓃᓚᐅᖅᑐᑦ ᐆᑦᑑᑉᐱᕆ 2019−ᒥ ᓯᕐᒥᓕᒻᒥᑦ ᐊᐅᓚᑦᓯᔨᐅᖃᑕᐅᔪᑦ ᑲᑐᔾᔨᓂᑯᑦ (JPMC−ᑯᑦ) ᑲᑎᒪᓂᖓᓂ ᕿᒥᕐᕈᓪᓗᑎᒃ ᐊᕐᕌᒎᑕᒫᖅᓯᐅᑎᓂᒃ ᐱᔪᓐᓇᐅᑎᓄᑦ ᐅᓂᒃᑳᓂᒃ ᐊᒻᒪᓗ ᐋᔩᕋᕐᓂᕐᒧᑦ ᑲᑐᔾᔨᓪᓗᑎᒃ ᐱᔪᓐᓇᐅᑎᑖᖅᑎᑦᓯᖃᑦᑕᓂᕐᒧᑦ ᐊᐅᓚᓂᖓᓂᒃ.

ᑐᕌᒐᖅ 7.2: ᐊᐅᓚᑦᓯᓂᖅ ᐳᓚᕋᑏᑦ ᐃᓯᕈᓐᓇᕈᑎᖏᓐᓂᒃ ᐱᕙᓪᓕᐊᑎᑦᓯᓂᕐᓗ ᐳᓚᕋᑏᑦ ᐳᓛᕆᐊᖅᓯᒪᓚᐅᖅᑎᓪᓗᒋᑦ ᐱᓕᕆᐊᖅ ᐊᒻᒪᓗ ᐅᖃᖃᑎᒌᒍᑎᒃᓴᑦ ᐊᒃᑐᐊᔪᑦ ᐃᓄᐃᑦ ᐊᐅᓚᑕᖏᓐᓄᑦ, ᐃᓕᖅᑯᓯᒃᑯᑦ ᐊᑐᖃᑦᑕᖅᑕᖏᓐᓂᒃ ᐱᑕᓕᕐᔪᐊᒻᒪᕆᐊᓘᓂᖓ ᐊᕙᑎ ᒥᑦᑎᒪᑕᓕᐅᑉ ᐊᑭᐊᓂ ᕿᑭᖅᑕᖅ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᑎᑭᐅᑎᓇᓱᐊᕐᓂᖅ ᑖᑦᓱᒧᖓ ᑐᕌᒐᕐᒧᑦ ᓇᓗᓇᐃᖅᓯᓯᒪᔪᖅ ᐱᕙᓪᓕᐊᓂᖓᓂᒃ ᐳᓚᕋᑏᑦ ᐊᑐᓚᐅᖅᑕᖏᓐᓂᒃ ᐅᒥᐊᕐᔪᐊᒃᑯᑦ ᐳᓚᕋᑎᓂᑦ ᐅᓯᖃᑦᑕᖅᑐᑦ ᖃᐃᖅᓱᑦ ᓄᓇᖓᓂ. ᑭᓯᐊᓂᓕ, ᑖᓐᓇ ᓱᖅᑯᐃᖅᑕᐅᓚᐅᖅᑐᖅ ᐆᑦᑐᕋᑦᓴᐅᙱᒋᐊᖓ ᐳᓚᕋᑎᓂᑦ ᐅᓯᖃᑦᑕᕐᑐᓄᑦ ᐅᒥᐊᕐᔪᐊᒃᑯᑦ ᑲᒻᐸᓂᐅᔪᓄᑦ 100 ᐃᑭᒪᔪᑦ ᐅᖓᑖᓄᑦ ᐱᔾᔪᑎᒋᓪᓗᒍ:
  • ᐊᑦᓱᕈᕐᓇᓗᐊᕋᔭᕐᒪᑦ ᓄᓈᕋᓱᐊᕆᐊᑦᓴᖅ ᓯᔾᔭᒧᑦ ᓇᓗᓇᐃᖅᑕᐅᓚᐅᕐᑐᑦ ᑕᒪᓐᓇ ᒥᕐᖑᐃᕐᓯᕐᕕᓕᕆᔨᓄᑦ ᑲᓇᑕᒥ (PCA−ᑯᑦ) ᓄᓈᕐᕕᑦᓴᐅᒐᔭᕆᐊᖓ;
  • ᐃᓅᐃᓴᓪᓕᒋᐊᖅᑕᐅᒐᓗᐊᖅᑲᑕ ᒥᕐᖑᐃᕐᓯᕐᕕᓕᕆᔨᓄᑦ ᑲᓇᑕᒥ (PCA−ᑯᑦ) ᖁᓕᐅᓈᖃᑦᑕᕐᓗᑎᒃ ᓄᓈᖅᑎᑕᐅᔪᑦ ᐆᑦᑐᕋᑦᓴᐅᖏᒻᒥᔪᖅ ᐊᒥᓲᓗᐊᕐᑎᓪᓗᒋᑦ ᓇᓪᓕᑭᑕᕐᑕᐅᒋᐊᓖᑦ; ᐊᒻᒪᓗ
  • ᑰᒐᓛᒃ ᑰᑦᑐᖅ ᓄᓇᖓᒍᑦ ᐊᓯᔾᔨᖃᑦᑕᕐᒪᑦ ᑰᕈᑕᕆᑎᓪᓗᒍ ᐃᑳᕋᓱᐊᕆᐊᖓ ᐊᑦᓱᕈᕐᓇᕈᓐᓇᖅᑐᖅ.
  ᑕᐃᒪᐃᒻᒪᑦ, ᑐᑭᓕᐊᖑᔪᑦ ᑐᑭᓯᐅᒪᓂᖏᓐᓂᑦ ᐋᖅᑭᓱᖅᑕᐅᒻᒪᑕ ᑖᑯᓄᖓ ᓄᓇᖃᖅᑐᓄᑦ ᑖᒃᑯᐊᓗ ᐋᖅᑭᑕᐅᓯᒪᒻᒪᑕᑦ ᐃᓄᓐᓄᑦ ᐊᑐᕐᑕᐅᔪᑦᓴᐅᓪᓗᑎᒃ, ᑕᐃᒪᐃᒻᒪᑦ ᐱᐊᓂᒃᓴᐅᓂᐊᖅᑐᖅ 2020−ᒥ ᐸᕐᓇᑕᐅᔪᑦ ᑐᕌᖓᓗᑎᒃ ᐃᓄᐃᓴᓐᓂᕐᓴᓄᑦ ᐳᓚᕋᑎᓄᑦ ᐅᐸᑦᑕᐅᕙᑉᐸᑦ ᖃᒧᑕᐅᔭᒃᑯᑦ ᐅᐱᕐᖔᒥ.
• ᐃᓕᖅᑯᓯᒃᑯᑦ ᓄᓇᖓᓂᒃ ᐃᓕᓴᐃᒍᑎᒃᓴᐃᑦ ᐱᐊᓂᒃᑕᐅᓚᐅᖅᑐᑦ 2019−ᒥ ᐊᒻᒪᓗ ᓇᓗᓇᐃᖅᑕᐅᓯᒪᓂᐊᖅᑐᖅ ᖃᐃᖅᓱ ᓄᓇᖓ ᐃᓚᓕᐅᔾᔭᐅᓯᒪᓗᓂ ᑐᑭᓕᐅᕈᑕᐅᓯᒪᔪᑦ ᐊᑐᖅᑕᐅᓯᒪᓂᖓᒍᑦ ᐋᖅᑭᓱᖅᑕᐅᓯᒪᓕᖅᐸᑕ.

ᑐᕌᒐᖅ 7.3: ᐃᑲᔪᖅᑕᐅᓂᖓᒍᑦ ᑲᔪᓯᒍᓐᓇᖅᑐᖅ ᐊᐅᓚᓂᖓ ᓂᕐᓕᓕᕆᓂᕐᒧᑦ ᑕᒻᒫᖅᓯᒪᕕᒋᔭᐅᔪᒥ ᖃᐅᔨᓴᕐᕕᒃ ᐱᕚᓪᓕᕈᑕᐅᓗᓂᓗ ᐊᑦᑕᓇᐃᖅᓯᒪᔾᔪᑎᒃᓴᑦ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᓗᓂ ᐃᓪᓗ ᐊᒻᒪᓗ ᐊᒃᑐᖅᑕᐅᑎᑦᓯᓗᐊᑦᑕᐃᓕᓂᖅ ᐊᕙᑎᒥᒃ ᓇᓗᓇᐃᖅᓯᒪᔭᐅᓗᓂ ᑕᒻᒫᖅᓯᕕᒋᔭᐅᔪᖅ ᐊᐅᓚᓂᖓᒍᑦ.

ᐱᕙᓪᓕᐊᓯᒪᓂᐅᔪᑦ/ᐅᔾᔨᕐᓇᓗᐊᕐᓂᖏᑦ

• ᐋᔩᕋᕈᑕᐅᔪᑦ ᓚᐃᓴᖓᓄᑦ ᐃᓐᓄᑦᑕᐅᓯᒪᓂᖓᓄᑦ ᐊᒻᒪᓗ ᐃᓚᓕᐅᔾᔭᐅᓯᒪᔪᓂᒃ ᐊᐅᓚᓂᖓᓄᑦ ᐊᐅᓚᑕᐅᔪᓄᓪᓗ ᐊᖏᖃᑎᒌᒍᑎᖓ ᒥᕐᖑᐃᕐᓯᕐᕕᓕᕆᔨᓄᑦ ᑲᓇᑕᒥ (PCA−ᑯᑦ) ᐊᒻᒪᓗ ᐃᓕᓐᓂᐊᕕᔾᔪᐊᖓ ᓚᕕᐅᓪ ᓂᕐᓕᓕᕆᓂᕐᒧᑦ ᑕᒻᒫᖅᓯᒪᕕᐅᔪᒧᑦ ᑲᒪᒋᔭᐅᕙᓪᓕᐊᔪᖅ. 2019−ᒥ, ᓄᓇᕗᒻᒥ ᐱᓕᕆᕕᒋᔭᐅᔪᒧᑦ ᐊᖓᔪᖅᑳᒻᒪᕆᖓ ᑲᑎᒪᖃᑎᖃᓚᐅᖅᑐᖅ ᖃᐅᔨᓴᖅᑎᓂᒃ ᓚᕕᐅᓪ ᐃᓕᓐᓂᐊᕕᔾᔪᐊᖓᓃᙶᖅᑐᓂᒃ ᐋᔩᕋᕈᑎᖃᖅᓱᑎᒃ ᑎᑎᕋᖅᓯᒪᓂᖏᓐᓂᒃ ᐊᖏᖃᑎᒌᒍᑏᑦ. ᐋᖅᑭᓱᖅᑕᐅᓂᖓ ᓚᐃᓴ ᐃᓐᓄᑦᑕᐅᓯᒪᓂᖓᓄᑦ ᓯᕗᓪᓕᐅᔾᔭᐅᔭᕆᐊᖃᖅᑎᑕᐅᓚᐅᖅᑐᖅ 2019−ᒥ, ᐊᒻᒪᓗ ᐱᐊᓂᒃᑕᐅᔪᒃᓴᒫᖅ 2020-ᒥ.

---

---

ᑐᑭᑖᕈᑏᑦ—ᑭᖑᓪᓕᕐᒥ ᐊᓪᓗᕆᐊᕈᑎᐅᓂᐊᖅᑐᑦ

ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥᓄᓇᕗᑦ ᐊᓪᓚᕕᖏᓐᓃᑦᑐᑦ ᓯᕐᒥᓕᐅᑉᓗ ᐊᐅᓚᑦᓯᖃᑎᒌᖏᑦ ᕿᓚᓈᖅᐳᑦ ᐱᓕᕆᖃᑎᒌᓐᓂᐊᕐᓂᕐᒥᓂᑦ ᐊᕐᕌᒍᕆᓂᐊᖅᑕᑎᓐᓂ. ᐸᕐᓇᑕᐅᓯᒪᔪᑦ ᐊᕐᕌᒍᒧᑦ 2020-21 ᐋᖅᑭᒋᐊᖅᑕᐅᒋᐊᖃᓚᐅᕐᒪᑕ ᐱᔾᔪᑎᒋᓪᓗᒍ ᓄᕙᕐᔪᐊᕐᓇᖅ 19 ᓯᐊᒻᒪᖅᓯᒪᓂᖓᓄᑦ ᓄᓇᕐᔪᐊᕐᒥ. ᐱᓗᐊᕐᓂᖏᑦ ᐃᓱᒪᒋᔭᐅᔪᑦ ᐊᕐᕌᒍᕆᓂᐊᖅᑕᑎᓐᓄᑦ ᐱᖃᓯᐅᔾᔨᕗᑦ ᐅᑯᓂᖓ:

• ᐸᕐᓇᑕᐅᖁᓪᓗᒋᑦ ᐋᖅᑭᒋᐊᖅᑕᐅᓗᑎᓪᓗ ᑮᓇᐅᔭᓕᐅᕋᓱᐊᕈᑏᑦ ᐱᓕᕆᐊᖑᒋᐊᓖᓪᓗ ᐊᕐᕌᒍᖓᓂ 2020-2021 ᐃᓱᒪᒋᐱᐊᕐᓗᒍ ᓄᕙᕐᔪᐊᕐᓇᖅ 19, ᐊᐅᓚᑦᓯᒍᑏᑦ ᐸᕐᓇᑕᐅᓂᖏᑦ ᐊᒻᒪᓗ ᐊᐅᓚᑦᓯᖃᑎᒌᖏᑦ ᐅᖃᕆᐊᕐᓂᕆᔭᖏᑦ ᐃᓚᒋᓕᐅᔾᔭᐅᓗᑎᒃ.
• ᐱᓕᕆᖃᑎᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᓴᖅᑭᖅᑕᐅᓗᑎᒃ ᓈᓚᐅᑎᒃᑯᑦ ᑐᓴᖅᑕᐅᔭᕆᐊᓖᑦ ᐊᒻᒪᓗ ᕙᐃᔅᕗᒃᑯᑦ (Facebook) ᑕᑯᑦᓴᕈᖅᑎᑕᐅᓗᑎᒃ ᓈᓚᐅᑎᒃᑯᑦ ᐅᖃᖅᑕᐅᔪᑦ ᑐᑭᓯᔭᐅᔭᕆᐊᓖᑦ ᐱᔾᔪᑕᐅᔪᑦ ᓱᒻᒪᑦ ᓴᖅᑭᖅᑕᐅᓯᒻᒪᒻᒪᖔᑦ ᑲᓇᑕᒥ ᒥᕐᖑᐃᓯᕐᕕᐅᔪᑦ, ᐅᖃᖃᑎᒌᒍᑕᐅᓗᑎᓪᓗ ᖃᓄᐃᓕᖓᓕᕐᓂᖏᑦ ᒥᕐᖑᐃᓯᕐᕕᑦ ᓄᕙᕐᔪᐊᕐᓇᖅ 19 ᓯᐊᒻᒪᖅᓯᒪᓂᖓ ᐱᓪᓗᒍ.
• ᐱᔭᕇᖅᑕᐅᒋᐊᓕᒃ ᓚᐃᓴᓐᓯᖃᕈᑕᐅᔪᖅ ᓇᔪᖅᑕᐅᓂᐊᕈᓂ ᐊᐅᓚᓂᖃᕐᓂᐊᕈᓂᓗ ᐊᐅᓚᑦᓯᔾᔪᑎᖏᑦ ᐊᖏᖃᑎᒌᒍᑎᖓᑕ ᖃᕐᓕᖅᑐᕐᕕᐅᑉ.
• ᐱᓕᕆᖃᑎᒋᓗᒋᑦ ᐊᐅᓚᑦᓯᖃᑎᒌᑦ ᑲᓇᑕᒥᓗ ᐆᒪᔪᓕᕆᓂᕐᒧᑦ ᐱᔨᑦᓯᖅᑎᖏᑦ ᓇᓗᓇᐃᖅᓯᒋᐊᖃᕐᓂᖏᑦ ᑎᖕᒥᓲᕆᔭᐅᓂᐊᖅᑐᒥᑦ ᐅᒥᐊᕐᔪᐊᒃᑯᓪᓗ ᓂᐅᕐᕈᐊᓂᑦ ᐅᓯᖃᑦᑕᖅᑏᑦ ᑐᓚᕕᒋᔪᓐᓇᖅᑕᖏᓐᓂᑦ ᕿᒥᕐᕈᓗᒋᓪᓗ/ᓄᑖᕈᕆᐊᕐᓗᒋᓪᓘᓐᓃᑦ ᐊᑐᐃᓐᓇᐅᒍᓐᓇᖅᑐᑦ ᐊᐅᓚᑦᓯᓂᕐᒧᑦ ᐸᕐᓇᐅᑎᐅᒋᐊᓐᖓᓚᐅᖅᑐᓄᑦ ᓯᕗᓪᓕᕐᒥ ᓇᓗᓇᐃᖅᑕᐅᓚᐅᖅᑐᑦ ᐃᓱᒪᒋᔭᐅᔪᖅ ᐱᐅᓇᔭᕆᐊᖓ
• ᕿᒥᕐᕈᓗᒋᑦ ᐱᔪᓐᓇᐅᑏᑦ ᑲᒪᒋᔭᐅᓂᕆᓇᔭᖅᑕᖏᑦ ᐱᓕᕆᖃᑎᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑲᓇᑕᒥ ᐆᒪᔪᓕᕆᓂᕐᒧᑦ ᐱᔨᑦᓯᖅᑎᖏᑦ ᐊᒻᒪᓗ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐴᓛᕆᐊᖅᑐᑦ ᐱᓪᓗᒋᑦ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖕᒧᑦ.
• ᑭᖑᓪᓕᐹᖅᓯᐅᑏᑦ ᐱᔭᕇᖅᑕᐅᓗᑎᒃ ᑕᓯᐅᖅᓯᒋᐊᕈᑏᑦ ᑐᑭᓕᐅᖅᑕᐅᓯᒪᔪᓪᓗ ᐱᓕᕆᐊᖑᓂᖏᑦ ᖃᐃᖅᓱᒨᖓᔪᑦ.
• ᐱᔭᕇᖅᑕᐅᓗᓂ ᓄᓇᓕᒻᒥ ᐊᐱᖅᓱᕐᓂᖅ ᐃᑉᐱᐊᕐᔪᒻᒥ ᐱᔾᔪᑎᒋᓪᓗᒍ ᓯᓈᓯᐅᕐᕕᒻᒥ ᐃᓪᓗᕋᓛᖅ ᐊᒃᑐᐃᓐᕆᓇᔭᖅᑕᖓᓗ ᖃᐅᔨᓴᖅᑕᐅᓗᓂ.